Feioch non Itan
Popun ach angei ewe pristut a ngeni kich ach sipwe efeiochu aramas noun ewe Samon, sipwe fori non Itan.
Pwi achengicheng, chon angangen non ewe pristut an Kot, ua men kinisou ren ai kapas ngeni kemi non ei pwinin. Ua men unusen meninitikemi me kinisou. Nupwen ua kapas ngeni kemi me rongorong usun ami waten nuku, ai nuku pwe amen wateno-manamanen pristut non ei fonufan, ren eu mwichen pristut amen pochokun me ekkewe pristut mi nukuchar.
Non ai kei fitu fansoun remi nepwinei, upwe kapas ngeni kemi ami ekkena oua mochen oupwe wesen napeno pochokun non ami angangen pristut. Oua sinei usun ewe koko pwe oupwe eningano wisemi ren ami angang.1 Nge ina oupwe ekieki ika met wewen echunon ena koko ngeni kemi.
Upwe poputa me won ekkewe minefon tiken pokiten rese kon kan nien wewefichiti ifa ussun met repwe fori ar repwe eningano wewen ar we angangen pristut. Ekkewe minefon elter a auchea repwe pwan ausening. Me emon pisop non aewin wikan non wisan epwe pwan mochen ausening.
Eu nesen ngeni ei ai upwe chechemeni fansoun ai we emon tiken. Ua aneanei pwe amwo ita emon a fen ereniei ekkei met upwe ne kapas won iei. Meni ita epwe fen anisi sokkun angang meinisin non pristut mi fis ngeni ei me nom—pwan ekkei ua angei ikenai.
Ua epinipinino non tiken non eu kukun pranch ikewe ie ngang chok tiken nge pwi we Ted ewe pwan emon chok sense. Am we chok eu famini non ewe pranch. Ewe unusen pranch ra chu me non imwem we. Noum we souemwenin pristut me pwi we i emon minefo memper ewe a keran chok angei ewe pristut. Ita Ua nuku iwe pwe angangen wisei we chok pristut upwe asawa ewe sakramen non am we nenien mongo non imwem we.
Nupwen ai we famini a mwokut ngeni Utah, ua nom non eu waten wart nein chommong tiken. Non aewin ai mwichen sakrament ikewe, Ua katonoch ekkewe tiken-ussun ew armi, ussun me rei-mokutur mi chok nonofengen atun ra asawa fetanei ewe sakrament ussun eu tim ir mi kaeo.
Uwa osen nuokus iwe non ewe oruen Raninfel ua mwitir ngeni ewe imwen fan non ai akanaemon nupwen ese wor chon kuna ei. Ua chechemeni pwe ewe Yalecrest Wart non Salt Lake City, me mi wor ewe nios won ewe pwuun. Ua feino nukunupen ewe nios ua iotek tingor aninis ai upwe sinei ifa usun napanapen ai upwe fori wisei ne asawa ewe sakrament. Ai we iotek mi ponu.
Nge ngang mi sinei pwe mi wor eu murinon aanen iotek me ekieki atun sia achocho ne marita non ach angangen pristut. A fis ren ai weweiti ika pwata emon me emon ra angei ewe pristut. Ewe popun ach angei ewe pristut a ngeni kich ach sipwe efeiochu aramas noun ewe Samon, sipwe fori non Itan.2
Ina epwe ekkoch ier mwirin ai we emon tiken nupwen ua kaeo usun met akauchean. Ren ai weweiti, ua emon pris mi nap, a wor eu wisei ai upweno churi eu nenien tumun ren mwichen sakrament. Ra tingoreei upwe asawa ewe sakrament. Use chiwen ekieki sokkun anen ai upwe asawa ewe sakrament, ua nengeni won mesen emon me emon ekkewe chinap. Ua kuna chommong me neir ra kechiw. Emon fefin a komochuno poun ufei we, nengeni ei, me nouomong ne apasa, “O, kinisou ngonuk, kinisou ngonuk.”
Ewe Samon a efeiochu ai we angang a kawor non Itan. Ena ran ua iotek fan iten eu waten manaman epwe fis nge use iotek fan iten ai upwe fofor murino ne fori wisei. Ua iotek pwe ekkewe aramas repwe mefi an ewe Samon we tong seni ai we angang ua men tongei. Ua kaeo pwe iei ewe kien ach sipwe anisi me efiochu ekkoch non Itan.
Ua rongorong och mettoch akeran chok fis a achemato eu waten tong. Nupwen meinisin an Mwichefen mwich ra kouno ren ewe COVID-19 pandemic, emon pwi chon iamwir a etiwa wisan me ren ewe presetenin mwichen elter pwe epwe efeiochu me fori ewe sakrament ngeni emon sister akan iamwiri. Nupwen a kori neminewe me tingorei epwe wano ren ewe sakrament, neminewe a etiwa non an aro tipemwaramwar, ese mochen epwe atou atewe seni imwan we non ewe fansoun onuwokus me nuku pwe metttoch meinisin epwe mwitir ne niwin sefaniti akoman.
Nupwen a tori imwen neminewe we non ewe sosorun Raninfel, neminewe a tingor. Ika pwe mi tufich ar repwe pwan feino ren an we neiper 87 ierin epwe pwan angei ewe sakrament? Ren an ewe pisop mumuta, a tipeeu ngeni.
Ren chommong, chommong wiik, me tumunuochun towawen nefinen me pwan ekkoch pekin tumun, ei kukun mwichen chufengenin Souneng ra mwich fengen non eu me eu Raninfel ren ar angangen sakrament. Fokkun ekkoch chok tatakisin pinewa me kapen konik—nge chommong chonun mas mi supw ren ewe tongen Kot.
Tori fansoun, ewe chon iamwir, an famini, me neminewe a iamwiri ra tufichin niwin sefaniti mwichefen. Nge ewe 87-ierin a mano punuwan, ewe neipor, fanasengesin an mochen tumunoch, apwan niwiniti ne nom chok non imwan. Ewe chon iamwir—a chechemeni pwe wisan we ngeni chok ewe emon nge esapw ngeni ewe chinap—nge mi chok fokkun mosonoson ne feito ngeni imwan we iteiten Raninfel, pukefel me ekis mokun pinewa non poun, an epwe fori ewe sakramen fan iten an ewe Samon saingon mwongo.
An angangen pristut, usun ai we angang non ewe ran non ewe nenien tumun, a fis pokiten tong. Mi pung, ewe chon iamwir a keran chok tingorei ewe pisop ika mi wor ekkoch non an we wart epwe tongeni tumunur. An mochen eningano an we angangen pristut a napono nupwen a angang non iten ewe Samon me non ekkoch an fori fan Itan. Use sinei ika ewe chon iamwir a iotek, usun ai ua iotek, fan iten ekkewe a anisir ar repwe sinei an ewe Samon tong, nge pokiten an we angang fan iten ewe Samon, ewe pungun achok taitap.
Usun pwan chok met mi fis nupwen ua iotek me mwen aiwe fori ewe efeiochun pristut ngeni ekkoch mi semwen ika non fansoun mi namot. A fis fan eu non pioing nupwen emon tokter a emwitiri ei—a wesen emwitiriei nap seni akomwan—a ereni ei—upwe mwitir me tou me ikewe pwe repwe fori ar angang, nap seni ar epwe mut ngeni ei ai upwe fori ewe efeiochun pristut. Ua nomwetiw, me ua fori ewe efeioch. Me ewe kukun nengin u efeiochu non na ran, mine ewe tokter a ekieki pwe epwene ma, mi chok manau. Ua men unusen kinisou ngeni ena fansoun non ena ran, use mut ngeni met ua mefi epwe fiti ngeni ai ekiek nge ua mefi pwe ewe Samon a mochen pwe upwe efeiochu ewe kukun nengin. Me ua sinei met ewe feioch: Ua efeiochu an epwe chikar. Me ewe nengin a chikar!
A fis fan chommong nupwen ua fori ai angangen efeioch ngeni ekkoch ra fetan ngeni mano, fiti chochon ar famini ra rongeno ewe pet, nukunuk ren eu efeiochun echikar. Ina mwo ika ekis chok ai fansoun, Ua chok ikiotek ai upwe sinei sokkun feioch ewe Samon a amonata upwe tongeni fori fan Itan. Me tingor ai upwe sinei ifa usun An epwe efeiochu emon ewe nge esapw met ua mochen me ekkewe aramas ra nom unukun. Ai kuna pwe ikamo ewe feioch esapw ina met ekkoch ra mochen faniter ika atongeer kewe, ewe Ngun mi Fel a atapa netiper repwe mefi ar repwe etiwa me ourur nap seni ar repwe netipengaw.
Usun chok pwan ewe memefin ngun mi fel a fis nupwen petriark ra echikifel me iotek ren emwen an epwe fori ewe efeioch ewe Samon a awora faniten emon aramas. Sefaniti, Ua rong efeioch a fis a amairu ei me pwan amairu ewe aramas a angei ewe efeioch. Fatochun, ewe efeioch a feito seni ewe Samon—me ruu ekkewe ourur a nom non me pwan ekkewe feioch a apasa non Itan. An ewe petriark iotek me echikifel a ponu me ren ewe Samon.
Usun emon pisop, ua kaeo nupwen akokon ekkewe ir mi nimenimoch ren interfiu ua iotek ngeni ewe Samon epwe anisiei ai upwe sinei met A mochen ren ewe aramas, komochuno won sokkun ekiekin ngun mi fel A amonata ne sukano met ua ekieki. A weires ika ewe Samon, non tong, epwe mochen efeiochu emon ren an apungu. Mi fiti angang ach sipwe sinei fengeni met ewe Samon a mochen seni met om mochen me met emon aramas a mochen.
Ua nuku pwe sia tongeni ach sipwe eningano ach angangen pristut non unusen manauch ika fen nap seni. Epwe anongonong won ach nikitu ne sotuni ach sipwe sinei an ewe Samon mochen me ach achocho ne ausening Nouwan pwe sipwe sineiochu met A mochen ren ewe aramas sia angang ngeni fan Itan. Ena ningeno epwe feito non kukun tetenin. Menip epwe mang ne feito, nge epwe feito. Ewe Samon a pwon ngeni kich:
“Ion mi nukuchar ne angei ekkei ru pristut minne ua kapas usun, me eningano wiser kewe, repwe epinipinino seni ewe Ngun mi Fel ren sofosefanin inisir.
“Repwe winiti noun Moses at me Aaron me mwirimwirin Abraham, me ewe mwichefen me muun kot, me ekkewe mi kefinita me ren Kot.
“Me pwan meinisin ekkewe ra angei ei pristut repwe angei ewe Samon.”3
Ai pwarata pwe ekkewe kien ewe pristut a niwisefanito me ren ewe Soufos Joseph Smith. Chon angangen ewe Samon ra pwato seni nang ar eniwinsefanieto ewe pristut ren ewe waten mettoch ese mwo fis mi nom mwach. Israel epwe chufengen. Noun ewe Samon aramas repwe amoneta ngeni An we amwararen Oruen Wareto. Ewe Niwinsefanito epwe soposopono. Ewe Samon epwe pwan pwarano An mochen ngeni Noun soufos me Noun chon angang.
Enip kopwe mefi kukun om kopwe anono ngonuk ewe waten siwin usun met ewe Samon epwe fori. Ika kopwe, Ua tingoreok kopwe iotek me tingor ifa usun ewe Samon a nengonuk. A sineochuk, A ngonuk ewe pristut, om fefeita me eningano ewe pristut a auchea ngeni I pokiten An tongeok me An nukuk pwe kopwe efeiochu aramas non Itan.
Ua efeiochuk iei om kopwe tongeni mefi An tong me An nukunuk non iten Jises Kraist, amen.