Si Kristo Nabanhaw: Ang Hugot nga Pagtuo diha Kaniya Makabalhin og mga Bukid
Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto kanila nga magatuo.
Minahal kong mga kaigsoonan, mapasalamaton ako sa pribilehiyo nga makapamulong uban kaninyo niining Dominggo sa Pagkabanhaw.1 Ang makatubos nga sakripisyo ug Pagkabanhaw ni Jesukristo mousab sa atong mga kinabuhi hangtod sa hangtod. Gimahal nato Siya ug mapasalamatong nagsimba Kaniya ug sa atong Langitnong Amahan.
Atol sa milabayng unom ka bulan, padayon kitang nakiglayog sa tibuok kalibotan nga pandemya. Akong gikatingala ang inyong kapasidad nga makabawi ug sa espirituhanon nga kalig-on sa pagsugakod sa sakit, pagkanawad-an, ug pagkahilayo. Ako kanunayng nag-ampo nga, bisan niining tanan, mobati kamo sa walay pagkapakyas nga gugma sa Ginoo alang kaninyo. Kon nasagubang ninyo ang inyong mga pagsulay uban sa mas lig-on nga pagkadisipulo, kining milabay nga tuig dili makawang.
Karong buntaga, nakadungog kita gikan sa mga lider sa Simbahan nga naggikan sa matag gipamuy-an nga kontinente sa kalibotan. Sa pagkatinuod, ang mga panalangin sa ebanghelyo alang kini sa matag kaliwat, pinulongan, ug katawhan. Ang Simbahan ni Jesukristo usa ka tibuok kalibotan nga simbahan. Si Jesukristo ang atong pangulo.
Sa dakong pasalamat, bisan gani ang pandemya wala makapahinay sa padayong pag-uswag sa Iyang kamatuoran. Ang ebanghelyo ni Jesukristo mao gayod ang gikinahanglan niining nagkalibogay, mabingkilon, ug hapo nga kalibotan.
Ang matag usa sa mga anak sa Dios angayang makadawat sa oportunidad nga makadungog ug modawat sa makaayo, makatubos nga mensahe ni Jesukristo. Walay laing mensahe nga mas mahinungdanon sa atong kalipay—karon ug sa kahangtoran.2 Walay laing mensahe nga mas puno sa paglaom. Walay laing mensahe nga makawagtang sa panagbingkil sa atong katilingban.
Ang hugot nga pagtuo kang Jesukristo mao ang pundasyon sa tanan nga tinuohan ug agianan sa balaang gahom. Sumala ni Apostol Pablo, “Kon walay pagtuo dili gayod mahimo ang pagpahimuot sa [Dios]: kay si bisan kinsa nga moduol sa Dios kinahanglang motuo nga siya anaa, ug nga siya magganti sa mga nangita kaniya.”3
Ang tanan nga maayo sa kinabuhi—ang matag kalagmitan nga panalangin nga may mahangturong kahulogan—magsugod sa hugot nga pagtuo. Ang pagtugot nga ang Dios mopatigbabaw sa atong kinabuhi magsugod sa hugot nga pagtuo nga Siya andam nga mogiya kanato. Ang tinuod nga paghinulsol magsugod sa hugot nga pagtuo nga si Jesukristo adunay gahom sa paglimpyo, pag-ayo, ug paglig-on kanato.4
“Kamo dili molim[o]d sa gah[o]m sa Dios,” si propeta Moroni mipahayag, “kay siya nagbuhat pinaagi sa gah[o]m, sumala sa hugot nga pagtuo sa mga katawhan.”5 Ang atong hugot nga pagtuo mao ang mobubu sa gahom sa Dios sa atong kinabuhi.
Ug sa gihapon, ang pag-ugmad og hugot nga pagtuo ingon og malisod. Dunay mga panahon nga kita maghunahuna kon makalikom ba kaha kita og igong hugot nga pagtuo aron makadawat sa mga panalangin nga ato kaayong gikinahanglan. Hinoon, ang Ginoo miwagtang niana nga mga kahadlok pinaagi sa mga pulong ni propeta Alma diha sa Basahon ni Mormon.
Si Alma mihangyo kanato sa yanong paagi sa pagsulay sa pulong ug “pagbansay sa usa ka tipik sa hugot nga pagtuo, oo, bisan [kita] kutob ra sa pagtinguha sa pagtuo.”6 Ang mga pulong nga “tipik sa hugot nga pagtuo” nagpahinumdom kanako sa biblikanhong saad nga kon kita “may pagtuo sama sa liso sa mustasa,” atong “ingnon kining bukira, Balhin ngadto,’ ug kini mobalhin; ug walay dili mahimo ngari [kanato].”7
Ang Ginoo mosabot sa atong mortal nga kahuyang. Kitang tanan usahay masayop. Apan nahibalo usab Siya sa atong talagsaon nga potensyal. Ang liso sa mustasa magsugod sa gamay apan motubo kini nga usa ka kahoy sa igong gidak-on aron ang mga langgam makahimo og salag sa mga sanga niini. Ang liso sa mustasa nagrepresentar sa gamay apan nagtubo nga pagtuo.8
Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo siya kanato nga motuo.
Minahal kong kaigsoonan, ang akong panawagan kaninyo niining buntag sa Pasko sa Pagkabanhaw mao nga sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi,9 bisan og ang inyong personal nga mga hagit pareha kadako sa Bukid sa Everest.
Ang inyong mga bukid tingali mga kasubo, pagduhaduha, sakit, o ubang personal nga mga problema. Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo. Nagkinahanglan kana og buhat. Ang tapulan nga mga tigkat-on ug tigpasagad nga mga disipulo sa kanunay maglisod sa pagtigom og igong tipik sa hugot nga pagtuo.
Ang paghimo og bisan unsang mas maayo nagkinahanglan og paningkamot. Ang pagkahimong tinuod nga disipulo ni Jesukristo dili usa ka eksepsyon. Ang pagpalambo sa inyong hugot nga pagtuo ug pagsalig Kaniya nagkinahanglan og paningkamot. Motanyag ko og lima ka sugyot nga makatabang kaninyo sa pagpalambo nianang hugot nga pagtuo ug pagsalig.
Una, magtuon. Pagmahimong aktibo nga tigkat-on. Isubsob ang inyong kaugalingon diha sa mga kasulatan aron mas makasabot sa misyon ug pangalagad ni Kristo. Hibaloi ang doktrina ni Kristo aron inyong masabtan ang gahom niini alang sa inyong kinabuhi. Dawata gayod ang kamatuoran nga ang Pag-ula ni Jesukristo moepekto diha kaninyo. Siya midala diha sa Iyang Kaugalingon sa inyong kasub-anan, sa inyong kasaypanan, sa inyong mga kahuyang, ug inyong mga sala. Gibayaran Niya ang atong mga sala ug mihatag og gahom kaninyo sa pagbalhin sa tanang kalisdanan nga inyong sagubangon. Maangkon ninyo kana nga gahom pinaagi sa inyong hugot nga pagtuo, pagsalig, ug kaandam sa pagsunod Kaniya.
Ang pagbalhin sa inyong mga bukid tingali magkinahanglan og milagro. Kat-uni ang mahitungod sa mga milagro. Ang mga milagro moabot sumala sa inyong hugot nga pagtuo sa Ginoo. Ang sentro nianang hugot nga pagtuo mao ang pagsalig sa Iyang kabubut-on ug gitakda nga panahon—unsaon ug kon kanus-a Siya mopanalangin kaninyo sa milagrosong tabang nga inyong gitingoha. Ang inyong pagkawalay pagtuo lamang maoy magpugong sa Dios sa pagpanalangin kaninyo sa mga milagro aron sa pagbalhin sa mga bukid sa inyong kinabuhi.10
Kon magkat-on kamo og mas daghan mahitungod sa Manluluwas, mas sayon ang pagsalig sa Iyang kalooy, sa Iyang walay kinutoban nga gugma, ug sa Iyang makalig-on, makaayo, makatubos nga gahom. Ang Manluluwas mas duol kaninyo kon mag-atubang kamo o magsagobang og kalisdanan uban sa hugot nga pagtuo.
Ikaduha, pilia nga motuo kang Jesukristo. Kon kamo adunay pagduhaduha mahitungod sa Dios nga Amahan ug sa Iyang Hinigugmang Anak, o sa kabalido sa Pagpahiuli o sa katinuod sa balaang tawag ni Joseph Smith isip propeta, pilia nga motuo11 ug pagpabiling matinud-anon. Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga imong makit-an ang sipyat sa kinabuhi sa propeta o sayop sa mga kasulatan. Hunonga ang pagdugang sa inyong mga pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad.
Ikatulo, lihok gamit ang hugot nga pagtuo. Unsay inyong buhaton kon kamo adunay dugang nga hugot nga pagtuo? Hunahunaa kini. Isulat kini. Dayon dawata ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo.
Ikaupat, moambit sa sagradong mga ordinansa sa takos nga paagi. Ang mga ordinansa moabli sa gahom sa Dios alang sa inyong kinabuhi.12
Ug ikalima, pangayo sa inyong Langitnong Amahan og tabang, sa ngalan ni Jesukristo.
Ang hugot nga pagtuo nagkinahanglan og buhat. Ang pagdawat og pagpadayag nagkinahanglan og buhat. Apan “ang tanan nga magapangayo magadawat; ug ang magapangita makakaplag; ug ang magatuktok pagaablihan.”13 Ang Dios nahibalo unsay makatabang aron motubo ang inyong hugot nga pagtuo. Mangayo, ug dayon mangayo na usab.
Ang dili tumutoo tingali moingon nga ang hugot nga pagtuo alang ra sa huyang. Apan kini nga hunahuna walay paglantaw sa gahom sa hugot nga pagtuo. Mipadayon kaha ang mga Apostoles sa Manluluwas sa pagtudlo sa Iyang doktrina human sa Iyang pagkamatay, nga ipameligro ang ilang kinabuhi, kon sila may pagduhaduha pa Kaniya?14 Moantos kaha si Joseph ug Hyrum Smith sa martir nga kamatayon sa pagpanalipod sa Pagpahiuli sa Simbahan sa Ginoo gawas nga sila adunay siguradong pagsaksi nga kadto tinuod? Mokabat kaha og 2,000 ka Santos ang nangamatay sa gisubay nga mga dalan nga giagian sa mga pioneer15 kon sila wala pay hugot nga pagtuo nga ang ebanghelyo ni Jesukristo gipahiuli na? Sa pagkatinuod, ang hugot nga pagtuo mao ang gahom nga naghimong posible sa butang nga imposible.
Ayaw paus-osi ang hugot nga pagtuo nga anaa na kaninyo. Nagkinahanglan og hugot nga pagtuo ang pagpasakop sa Simbahan ug pagpabiling matinud-anon. Nagkinahanglan og hugot nga pagtuo ang pagsunod sa mga propeta kay sa mga batid nga mamumulong ug sa opinyon sa kadaghanan. Nagkinahanglan og hugot nga pagtuo ang pagserbisyo og misyon atol sa pandemya. Nagkinahanglan og hugot nga pagtuo ang pagpakabuhi og putli nga kinabuhi samtang ang kalibotan nagsinggit nga ang balaod sa Dios bahin sa kaputli karon lawos na. Nagkinahanglan og hugot nga pagtuo ang pagtudlo sa ebanghelyo ngadto sa mga anak diha sa sekyular nga kalibotan. Nagkinahanglan og hugot nga pagtuo ang pagpangaliyupo alang sa kinabuhi sa usa ka minahal ug gani dugang pa nga pagtuo ang pagdawat sa makasagmuyo nga tubag.
Duha ka tuig ang milabay, si Sister Nelson ug ako mibisita sa Samoa, Tonga, Fiji, ug Tahiti. Ang matag usa niini nga isla sa kanasoran nakasinati og kusog kaayong pag-ulan sulod sa mga adlaw. Ang mga miyembro nagpuasa ug nag-ampo nga ang ilang mga miting nga ipahigayon sa gawas mapanalipdan gikan sa ulan.
Sa Samoa, Fiji, ug Tahiti, pagsugod gayod sa mga miting, mihunong ang ulan. Apan sa Tonga, ang ulan wala mohunong. Sa gihapon 13,000 ka matinud-anong mga Santos nangabot og sayo aron makalingkod, mapailubong naghulat diha sa padayon nga pagpangatagak sa ulan, ug dayon naglingkod nga basa kaayo sa duha ka oras nga miting.
Among nakita ang labihan ka madasigong hugot nga pagtuo nga anaa sa matag usa niadto nga mga taga-isla—hugot nga pagtuo nga igong mopahunong sa ulan, ug pagtuo nga magpadayon bisan ang ulan wala mohunong.
Ang mga bukid sa atong kinabuhi dili sa kanunay mabalhin kon sa unsang paagi o kon kanus-a nato gusto. Apan ang atong hugot nga pagtuo kanunay nga mohandos kanato paabante. Ang hugot nga pagtuo kanunay nga mopalambo sa atong pag-access sa diosnon nga gahom.
Palihog hibaloi kini: kon ang bisan unsang butang ug si bisan kinsa sa kalibotan nga inyong gisaligan mapakyas man, si Jesukristo ug ang Iyang Simbahan dili gayod mopakyas kaninyo. Kay ang Ginoo dili gayod mahitagpilaw, o mahikatulog.16 Siya “sama kagahapon, karon, ug [ugma].”17 Siya dili [motalikod] sa Iyang mga pakigsaad,18 sa Iyang mga saad, o sa Iyang gugma alang sa Iyang katawhan. Siya mobuhat og mga milagro karon, ug mobuhat Siya og mga milagro ugma.19
Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto sa magatuo.20
Ang inyong nagtubo nga hugot nga pagtuo Kaniya makabalhin og mga bukid—dili mga bukid nga bato nga pangpatahom sa yuta—apan mga bukid sa kasub-anan sa inyong kinabuhi. Ang inyong nagmalamboon nga hugot nga pagtuo makatabang kaninyo sa pagbalhin sa inyong mga hagit ngadto sa dili hitopngan nga kalamboan ug oportunidad.
Niini nga Dominggo sa Pagkabanhaw, uban sa halawom nako nga mga pagbati sa gugma ug pasalamat, ako modeklarar kaninyo sa akong pagsaksi nga si Jesukristo sa pagkatinuod nabanhaw. Siya nabanhaw sa pagpangulo sa Iyang Simbahan. Siya nabanhaw sa pagpanalangin sa kinabuhi sa tanan nga mga anak sa Dios, bisan asa sila nagpuyo. Uban sa hugot nga pagtuo diha Kaniya, kita makabalhin sa mga bukid sa atong kinabuhi. Ako mopamatuod gayod pinaagi sa sagrado nga ngalan ni Jesukristo, amen.