Bra Christ hɔ, na Mma Wonko Mmba
Kwan papaapa do a hom dze botu wiadze no mpon nye wobesiesie wiadze ama Christ ber hom to nsa frɛ obiara dɛ ɔmbɛkã No do.
Ɔnnkyɛree na minyaa krataa bi fii young woman asɛmpɛfo bi hɔ. Ɔkyerɛɛw dɛ, “Maaka. … Munnhu nyimpa ban a me yɛ, naaso menya atsenkã dɛ merebɛyɛ adze nwanwa bi wɔ ha.
Ana enya pɛ dɛ ibɛtse w’abrabɔ no botae ase a, erodwendwen ho sɛ Ɔsor Egya nyim wo nyimpa ban nye sɛ Ohia wo a? Me mbabun adɔfo, na ma obiara no megye dase dɛ nyiano no yɛ nyew! Ewuradze wɔ nhyehyɛɛ bi ma wo. Oesiesie wo ama ndɛ, seseiara, dɛ ebɛyɛ ahoɔdzen na tum ama papayɛ wɔ N’edwuma kɛse no mu. Yehia hom! Sɛ hom nnkã ho a ɔnnkɛyɛ nwanwa koraa!
Gyinabew krɔnkrɔn horow mu no, hɛn nkɔnhyɛnyi dɔfo, President Russell M. Nelson, kaa me nokwar tsĩabaa ebien ho asɛm dɛ ɔyɛ hom edwuma nwanwa na enyimnyam ne fapem.
Ber a nna menye mo kun tsenaa egua mu no, hɛn nkɔhyɛnyi twee n’egua no bɛɛn hɛn, a nna nkyɛ ɔnye hɛn anankoroma rehyia, na ɔdze n’enyiwa amba bruu no hwɛɛ me kaan. Nna menngye nndzi sɛ nna m’akoma robɔ pimpim anaa oegyae tow koraa ber a ɔfrɛɛ me dɛ mosom dɛ Wiadze Mfɛndzanan Young Women President no. Obisaa asɛmbisa bi a ɔda ho gyegye wɔ m’akoma mu, Bonnie, ebɛnadze na ohia dɛ [mbabun] hia dɛ wohu?’’
Modwendwen ho mber tsiabaa na mekãa dɛ, “Wohia dɛ wohu hɔn nyimpa ban a wɔyɛ.’’
Ɔtsẽaa mu dɛ “NYEW!”, “na wohia dɛ wohu hɔn botae.’’
Hɛn Awoosu Krɔnkrɔn
Eyɛ Ɔsor Egya ne ba dɔfo a, esom bo. Ɔdɔ wo emudzi mu ara ma dɛ Ɔsomaa Ne Ba, Jesus Christ, dɛ Ɔmbɔbɔ werdam mma emi na ɔwo. 1 Agyenkwa no dɔ ma wo no nntwa aborɔdɔ—mpo sɛ yedzi nkõgu mpo a! Biribiara nnkotum atsew hɛn efi Nyankopɔn no dɔ ho. 2 Erekaa ɔdɔ yi botum esiw wiadze no sum a ɔbɔ mbɔdzen dɛ ɔbrɛ w’awerɛhyɛmu wɔ wo awoosu krɔnkrɔn mu no adze na ofura w’enyiwa wɔ wo ndaamba nkrabea ho no kwan.
FSY ehyiadzi bi ase no, mihyiaa young women beenu bi a nna woridzi aper. Young women beenu no kãa dɛ wɔkɛdaan hɔn patriarch nhyira no woekohu Ewuradze no dɔ na n’akwankyerɛ ma hɔn ankorankor. Hwehwɛ wo patriarch nhyira, pepa ho huntuma sɛ otwar dɛ eyɛ a, na wɔw do sũa. Sɛ nnyi bi a, ntsɛmara,—kɛgye bi. Mma nntwentweɔn mmfa nhwehwɛ dza Ewuradze pɛ dɛ ɔkã kyerɛ seseiara wɔ wo nyimpa ban a eyɛ ho.
Hɛn Onnyiewiei Botae
President Nelson no nokwar a otsĩa ebien a ɔkãe kyerɛ hɛn dɛm da no nye yebohu hɛn botae. Iyi nye hɛn asodzi nwanwa na enyimnyam no.
Mfe pii a abɛsen kɔ no, nna me babanyin Tanner edzi mfe enum mber a ɔbɔɔ no fuutbɔɔl a odzi kan. Ɔyɛɛ no enyigye!
Ber a yeduur agordzi ase no, yehun dɛ nna no kuw no dze goal posts a osisi no famu na woridzi mu agor—nnyɛ dza wɔdze hyɛ n’adaka mu no bi na mbom eboa kɛsenara a ɔsõ koraakoraa ma mfe enumfo.
Agordzi no yɛɛ adzehia kɛsenara ber a mohun Tanner dɛ ogyina eboa n’enyim. Moho boow me dodow. Ana ɔtse no botae ase dɛ ɔroweɔn eboa no ampaara?
Wɔbɔɔ nhwiroma, na yedzii agor no n’ekyir ara ma hɛn werɛ fiir Tanner. Awerɛfir mu ara etsĩafo no kuw ba kor nyaa bɔɔl no na opropro no ntsɛntsɛm dze kɔr ne nkyɛn. Mohwɛɛ Tanner ne tsentsendo dze hwɛɛ no pefee dɛ nna ɔayɛ krado dɛ obegyina ma wɔnnkɛhyɛ hɔn a. Muhun adze a nna m’enyi nnda.
Odu beebi wɔ agordzi mu no, nna Tanner n’enyi adan na ɔhyɛɛ ase dɛ ɔdze ne nsa bankum ruduadua etuetu a ɔdeda eboa no mu no. Na ɔdze ne nsa nyimfa so yɛɛ dɛmara. Odzi do, ne nantabon bankum. No korakoraa, ne nantabon nyimfa. Nna Tanner dze eboa no akyekyer noho koraa. Nna no werɛ efir no botae na dza wonyaa awerɛhyɛmu wɔ no mu dɛ ɔmbɛyɛ ho.
Tanner no fuutbɔɔl agodzi no annkyɛr dze, naaso n’adzesũa ma me dɛm da no nnkɛpepa da. Ɔtɔ mber bi a obiara n’enyi dan fi siantsir a yɛwɔ ha ho na yɛdze hɛn ahom nyinara kɔto beebi fofor. Satan n’akodze horow a tum wɔ mu dodoodow kor nye dɛ ɔdze papa na ndzɛmba a oye, wɔ ahohia ber mu no, obotum efura hɛn enyi na wɔakyekyer hɛn efi edwuma papa no ho—kor noara a wɔdze hɛn baa wiadze yi mu no ho. 3
Hɛn onnyiewiei botae nye dɛ yɛbɛba Christ hɔ na ɔhyewbɔ mu ara yɛaka Noho wɔ N’edwuma kɛse mu. Ɔyɛ mberɛw tse dɛ yɛreyɛ dza President kyerɛkyerɛɛ no dɛ: Ber biara a yɛbɛyɛ biribiara dze aboa obiara no … ma woedzi na woesie hɔn ahyɛmu a wɔnye Nyankopɔn dzi no, na yɛroboa hɔn ma wɔaboa Israel ano.’’ 4 Na sɛ yɛnye No bɔmu yɛ N’edwuma a, yɛba bohu No na yɛdɔ No yie.
Yedua gyedzi, nnuhu a ɔsom bo, na yerisie hɛn ahyɛmudzi horow do kɔ do hwehwɛ Agyenkwa no dze twe bɛn no yie. Sɛ yedua ahyɛmudzi, na ayɛdze horow do kyekyer hɛnho fam No a, yɛdze awerɛhyɛmu, 5 bambɔ, 6 na daapem dɛwdzi a no mu dɔ bɛhyɛ hɛn abrabɔ mu mã. 7
Sɛ yɛba No hɔ a, yɛdze N’enyiwa dze hu binom yie. 8 Bra Christ hɔ. Bra seseiara, mbom mma wo nko mba! 9
Jesus Christ n’asɛmpa no nnhia ara; ɔyɛ adze tsitsir ma obiara. “Kwan fofor bi nnyi hɔ anaadɛ biribiara nnyi hɔ a wobodua do dze agye [hɛn] nkwa, gyedɛ Christ nko do.’’ 10 Yehia Jesus Christ! Wiadze no hia Jesus Christ. 11
Hom nkaa dɛ, kwan papaapa do a hom dze botu wiadze no mpon nye wobesiesie wiadze ama Christ ber hom to nsa frɛ obiara dɛ ɔmbɛkãa No do.
Asɛm bi wɔ Mormon Nwoma no mu a ɔkã Christ a Ɔasoɛr efi ewufo mu ho tum mu ara dɛ Agyenkwa no kɛseraa Nephifo no. Ana ibotum esusu dza obesi bɛyɛ?
Ber a Christ kãa dɛ otwar dɛ Ɔsan kɔ Egya no hɔ no, Ɔdze n’enyiwa kɔr aprɔw bio.” 12 Ohun dɛ nyinsuwa eguraa hɔn no, nna Onyim wɔ hɔn akoma mu dɛ wɔrohwehwɛ ma Oetsimtsim wɔ hɔn nkyɛn kakra.
Obisaa dɛ: “Ana hom wɔ ayarfo bi wɔ hom mu? Hom mfa hɔn mbra. Ana hom wɔ ebubuafo anaa efurafo, … etsitsifo, anaa hɔn a biribi rehaw hɔn? Hom mfa hɔn mbra na mebɛsa hɔn yarba.’’ 13
Ɔdze ayamuhyehye kɛse no, Oennsiw obiara kwan na ɔsee dɛ wɔmfa “hɔn a biribi rehaw hɔn’’ no nyina mbra. M’enyi gye ho dɛ biribiara nyi hɔ a ɔsõ anaa osuar ma Jesus Christ dɛ ɔsã ho yarba.
Onyim hɛn amandzehu dɛmara na ɔfrɛ dɛ, Yɛmfa dza ɔrehaw na n’abaw egura, dza ɔatɔ bitsi, ahantannyi no na wɔnntse no ase, ankonamnyi no, anaa “hɔn a biribi rehaw hɔn mbra.’’
Na hɔn “nyina kɔree, … ; na ɔsaa hɔn yarba nkorkor. …
“… Na hɔn nyina, hɔn a wɔasa hɔn yarba nye hɔn a wodzi mu nyina bɔɔ mu, [twae] hwee n’ananadze, na wɔsɔɔr no.’’ 14
Aber biara a mekenkan asɛm yi no migyina kakra, mibisa moho dɛ: Woana na medze no babrɛ Christ? Woana na edze no bɛba?
Yebotum ahwɛ bio, dɛ mbrɛ Jesus yɛe no, ahwɛ no pefee dɛ yenntwa obi nngyae na yɛato nsa afrɛ obiara dɛ ɔmbra mbohu No a?
Hom mma menye hom nkyɛ fasusu wɔ mbrɛ obesi botum ayɛ mberɛw ho. Me mfe 15 nyɛnko Peyton, nyaa botae bi dɛ ɔbɛkenkan kyerɛwsɛm ne nyiyimu enum da kor biara wɔ anapa edzidzi ber, na ɔnoara nko annyɛ. Ɔrohwɛ bio no, Peyton too nsa frɛɛ n’awofo na no nuanom, mpo no nuabanyin a oedzi mfe enum. Nyɛe a ɔyɛ dɛ adze ketseketse no nye dza nna Christ rekyerɛkyerɛ mber a Ɔsee hɔn dɛ, “Wɔmfa hɔn mbra.’’
Wɔda ho atserɛw ɔfrɛ yi fi Ewuradze hɔ mu ndɛ. Young women na young men hom nhyɛ ase seseiara, wɔ homara hom fie. Hom bɔbɔ mpaa na hom ebisa Ɔsor Egya mbrɛ hom besi botum aboa hom awofo ber a wɔkɔdo ba Christ hɔ? Wohia hom dɛmara dɛ hom so wohia hɔn.
Nkyii hwɛ w’enuanom, anyɛnkofo, na wo fipamfo bio. Woana na edze no bɛba Christ hɔ?
Agyenkwa no paa mu kãa dɛ, “Hwɛ Emi nye kan no; mayɛ fasusu ama hom.’’ 15 Yɛbɛtse Agyenkwa no dɔ na asomdwee nkã ber a yɛka Noho ma ɔgye Nyankopɔn n’ebusua, osiandɛ Ɔabɔ anohoba dɛ, “Nyia a odzi m’ekyir no rennantsew sum mu, na obenya nkwa kan no.’’ 16
Ebɛn enyimnyam mber nye yi dɛ yɛbɛyɛ Christ n’edwuma!
Nyew, hom wɔ ha rebɛyɛ biribi nwanwa. Menye President Nelson a ɔkãa dɛ, “Ewuradze hia hom ma hom asesã wiadze no. Ber a hom gye Ne pɛ to mu na wɔka no do no, hom ankasa bohu dɛ wɔreyɛ dza onnkotum ayɛ yie no yie!’’ 17
Megye dase akokodur mu dɛ Ewuradze nyim wo nyimpa ban na Ɔdɔ wo! Yɛbɔmu a, yɛbɛma No botae akɔ kan kɛpem da kɛse no a Christ Nankasa bɛsan aba asaase yi do na ɔafrɛ hɛn nkorkor dɛ “yɛmbra.’’ Yɛbɔbɔ mu aboa ano enyigye mu ara, osiandɛ hɛn nye hɔn a yɛaba Christ hɔ, na nnyɛ hɛn nko na yɛbae. Jesus Christ ne dzin mu, amen.