Emudziyɛ Nnkyerɛ Dɛ Mmfom Bio
Sɛ itse dɛ edzi nkõgu mpɛn bebeere wɔ mbɔdzembɔ mu dɛ ibɔwɔw do aper a, kaa Christ no Werdambɔ no na adom no a ɔma otum ba no dɛ ɔyɛ nokwar.
Ber bi medze dza wɔdze yɛ voice-to-text wɔ mo foon do dze amandzɛɛbɔ bi kɛmaa me babaa na m’asew banyin. Mekãa dɛ, “Hom beenu no. Nokwar modɔ hom.” Hɔn nsa kãa dɛ, “Metan hom beenu no. Ɔwɔ dɛ modɔ hom.” Ana ɔnnyɛ ahobow dɛ ntsɛmara asɛm papa na ɔyɛ adwenpa no wonnkotum atse ase? Iyi nye dza ɔtɔfabi a osi wɔ Nyankopɔn no nnuhu na emudziyɛ nsɛm ho.
Binom gye asɛm no mfomdo mu ara dɛ nnuhu na nsesã nnhia. Nyankopɔn n’asɛm nye dɛ wɔyɛ adze esitsir. 1 Naaso hɛn esintɔ mpo no Nyankopɔn ndɔ hɛn a? Ɔyɛ nokwar! Ɔdɔ hɛn emudzi mu ara. Modɔ me nanamba, hɔn mfom mpo mu no, naaso dɛm no nnkyerɛ dɛ memmpɛ dɛ wotu mpon na wɔbɛyɛ nyia wobotum abɛyɛ nyina. Nyankopɔn dɔ hɛn dɛ mbrɛ yɛtse yi ara, mbom Ɔdɔ hɛn dodoodow dɛ obegya hɛn dɛmara. 2 Yerinyin wɔ Ewuradze mu nye ɔnnkyebo no botae. 3 Nsesã nye Christ no Werdambɔ no botae. Nnyɛ dɛ Christ botum ama yɛaasoɛr, Ɔaatsew hɛnho, Ɔaakyekye hɛn werɛ, na Ɔaasa hɛn yarba nko, mbom ne nyina mu no, Obotum adandan hɛn ma yɛabɛyɛ tse dɛ Ɔnoara yie. 4
Binom gye asɛm no mfomdo mu ara dɛ nnuhu yɛ dza osi prɛko pɛr. Nyankopɔn n’asɛm nye dɛ, dɛ mbrɛ President Russell M. Nelson akyerɛkyerɛ no, “Nnhu … yɛ ndzeyɛɛ kwan.’’ 5 Nnuhu bɛgye mber na mbɔdzembɔ nwɔw do, 6 ntsi yɛropow bɔn 7 na “yerinnyi pɛ biara bio dɛ yɛbɛyɛ bɔn, na mbom yɛbɛyɛ papa aber nyina’’ 8 yɛ nkwa nda mu adze hwehwɛ. 9
Abrabɔ tse dɛ edze kaar rutu kwan abɔ kurow mu nyina aprɔw. Yennkotum dze famu ngo tɛnk kor edu hɛn akwantu n’ewei. Otwar dɛ yɛwɔw do hyɛ tɛnk no mã. Yeridzi sacrament no tse dɛ yeekesi famu ngo gyinabea. Ber a yenu hɛn ho na yɛyɛ hɛn ahyɛmudzi horow fofor no, yɛdze hɛn pɛ bɔ anohoba dɛ yebesie mbrasɛm no, na Nyankopɔn na Christ dze Sunsum Krɔnkrɔn no hyira hɛn. 10 Ne tsiabaa no, yɛbɔ anohoba dɛ yɛbɛper akɔ kan wɔ hɛn akwantu mu, na Nyankopɔn na Christ bɔ anonoba dɛ wɔbɛsan ahyɛ tɛnk no mã.
Binom gye asɛm no mfomdo mu ara dɛ wɔmfata dɛ wɔdze hɔnho bɛhyɛ asɛmpa no mu imu osiandɛ wɔnntsew hɔn ho koraa mmfi suban bɔn ho. Nyankopɔn n’asɛm nye dɛ emudziyɛ nnkyerɛ dɛ mmfom bio. 11 Emudziyɛ nye ereyɛ nokwafo na erobɔ mbɔdzen. Otwar dɛ yedzi nokwar ma Nyankopɔn, asɔfodzi baanodzifo, na hɔn a wɔdɔ hɛn, 12 na otwar dɛ yɛper sie Nyankopɔn ne mbrasɛm na yɛmmpa aba dabiarada osiandɛ yɛfom. 13 Elder Bruce C. Hafen kãa dɛ erenya Christ suban “hwehwɛ abotar na nwɔw do koraa kyɛn dɛ ɔhwehwɛ dɛ mfom nnyi hɔ.’’ 14 Ewuradze akã dɛ Sunsum n’akyɛdze horow no “osian hɔn a wɔdɔ me na wodzi me mbrasɛm nyina do nye hɔn a wɔper dɛ wɔbɛyɛ dɛm ntsi na wɔdze ma.” 15
Aberantsɛba bi a mebɛfrɛ no Damon kyerɛɛw dɛ: “Mirinyin no medze ehuhu mfonyin dzii aper. Nna aber nyina m’enyi tõ ara ma munntum nnyɛ dza ɔtsen.’’ Aber biara Damon bɔfom no, mfe ho ekyir ne yaw no dzendzendzenn ma obu no ho fɔ katsee dɛ ɔmmfata adom, bɔnfakyɛ, anaa kwan biara bio fi Nyankopɔn hɔ. Ɔkãa dɛ: ‘‘Meyɛɛ m’adwen dɛ me fata dɛ ɔwɔ dɛ metseetsee aber nyina. Mobɔɔ m’adwen pɔw dɛ ebia Nyankopɔn kyir me osiandɛ nna mennya pɛ dɛ mebɛyɛ edwuma dzen dze edzi do prɛko pɛr. Dapɛn kor na ɔtɔfabi a bosoom kor mpo no migyina yie, na afei maasan ekyir na m’adwen dɛ, ‘mennkɛyɛ yie da, ntsi mbɔdzen a morobɔ no mpo no ho mfaso nye dɛn?’”
Abagura mber kɛse bi a ɔtse dɛm mu no Damon kãa kyerɛɛ n’asɔfodzi banodzinyi dɛ, “Ebia ɔwɔ dɛ megyaa asɔr ba ara. Maabrɛ ndabrabanyi yɛ.”
Ne banodzinyi no buae dɛ: “Nnyɛ ndabrabanyi osiandɛ ewɔ suban bɔn bi a erobɔ mbɔdzen egyae ntsi. Sɛ edze suma, idzi ho ator, anaa ebɔ mbɔdzen nunu woho dɛ Asɔr no wɔ ɔhaw mu dɛ osie gyinapɛn a ɔkrɔn tsetse dɛm a nna eyɛ ndabrabɔyi. Iridzi nokwar wɔ wo ndzeyɛe ho na erutu anamɔn akɔ kan nnyɛ ndabrabanyiyɛ. Ɔyɛ ereyɛ dɛ osuanyi.” 16 Banodzinyi yi serɛɛ kãa Elder Richard G. Scott n’asɛm a ɔkyerɛkyerɛɛ dɛ: “Ewuradze hu mberɛwyɛ horow soronko koraa kyɛn mbrɛ Ohu etuatsew. … Sɛ Ewuradze kã mberɛwyɛ horow ho asɛm a, aber nyina ehumbɔbɔr kã ho.” 17
Dɛm nhumu no maa Damon enyidado. Ohun dɛ Nyankopɔn nnhyɛ Ɔsor hɔ a ɔrekã dɛ, “Damon edzi nkõgu.” Mbom, ebia nna Ɔrekã dɛ, “Damon etu mpon papaapa.” Ewiei no aberantsɛba yi gyae dɛ ɔdze enyitõ resisi ne tsir adze anaa ɔdze nkyerɛkyerɛmu rohwehwɛ nkyɛnkyɛn. Ɔmaa n’enyi do hwɛɛ sor gyee mboa krɔnkrɔn na onyae. 18
Damon kãa dɛ: “Mber abɛsen mu nko a menya nye Nyankopɔn nyaa nkitahodzi nye mber a meserɛ bɔnfakyɛ, na afei dze mesan so serɛ adom—‘N’adom tum’ no [Bible Dictionary, “Grace”]. Nna mennyɛɛ dɛm da. Afei dze mennsɛɛ mber pii mmfa nnkyir moho wɔ dza maayɛ ho na menya mber pii dze dɔ Jesus wɔ dza Ɔayɛ ho.”
Mohwɛ mber tsentsen a Damon dzii aper no a, nna ɔrommboa na ɔremmba mu mma awofo na baanodzifo a nna wɔroboa no dɛ ɔnkã dɛ “ɔrennyɛ bio’’ ntsɛmara dodow anaa wɔbɛhyɛ ahosan gyinapɛn binom ama no dze akyerɛ dɛ “odzi mu.’’ Mbom, wɔdze botae ahorow nkakraba, a obotum ayɛ dze hyɛɛ ase. Woyii enyidadodze nyina anaa biribiara fii hɔ na wotsimii wɔ mpontu nkakrankakra do, a ɔmaa Damon kwan ma ogyina konyimdzi ntoatoado do kyɛn nkõgu do. 19 Ɔno, tse dɛ Limhi no nkorɔfo a nna wɔwɔ nkowaasom mu no, sũae dɛ obotum “ayɛ prɔmprɔm nkakrankara.’’ 20
Elder D. Todd Christofferson etu fo dɛ: “Yehyia adze kɛse bi a, obehia dɛ yɛyɛ ho edwuma nkakrankakra, nkakrankakra daa daa. … Yɛdze su afoforfo na dza ɔfata reka hɛn suban ho anaa yeridzi su bɔn do anaa nkowayɛ do no taa kyerɛ dɛ mbɔdzembɔ ndɛ a kor so dzi do na kor so, ebia nda beberee, mpo abosoom na mfe pii. … Na yebotum ayɛ osiandɛ yebotum atotɔ aserɛ Nyankopɔn … agye mboa a yehia da kor biara.’’ 21
Afei, enuanom na nkyerɛbaa, COVID-19 nsan yarba no nnyɛ bɔɔkɔɔ ma obiara, naaso tsew woho a ɔkã danmuhyɛ fenkyiim ho no ama abrabɔ tsitsir ara ayɛ dzen ama hɔn a wɔnye su bɔn ridzi aper no. Kaa dɛ nsesã ba, nnuhu yɛ ndzeyɛɛ kwan, na emudziyɛ nnkyerɛ dɛ mfom bio. Ohia dodow no, kaa dɛ Nyankopɔn na Christ pɛ dɛ wɔboa hɛn wɔ ha ara na sesei. 22
Binom gye asɛm no mfomdo mu ara dɛ Nyankopɔn rotweɔn aboa a gyedɛ hɛn nnuhu ho ekyir. Nyankopɔn n’asɛm nye dɛ Ɔbɔboa hɛn ber a yenu hɛnho. N’adom wɔ hɔ ma hɛn “a bea a yeedu wɔ setsie anamɔn kwan do mmfa ho.’’ 23 Elder Dieter F. Uchtdorf akã dɛ: “Nyankopɔn nnhia nkorɔfo a mfom nnyi hɔn ho. Ɔhwehwɛ hɔn a wɔdze hɔn ‘akoma na adwen bɛma ɔpɛ mu’ [Nkyerɛkyerɛ na Ahyɛmudzi 64:34.], na Ɔbɛma woedzi mu ‘wɔ Christ mu’ [Moroni 10:32–33].’’ 24
Dodowara na wodzi yaw wɔ nkitahodzi a oebubu na mu atwe a ɔyɛ dzen ma hɔn dɛ wobenya gyedzi wɔ Nyankopɔn n’ayamuhyehye na penkyɛr mu. Wɔper hwehwɛ Nyankopɔn dɛ mbrɛ Ɔtse—Egya dɔfo a ohyia hɛn wɔ hɛn hia mu 25 na onyim mbrɛ osi “dze ndzɛmba pa ma hɔn a wobisa no.’’ 26 N’adom nnyɛ abaadobɔdze ara mma nyia odzi mu no. Ɔyɛ “mboa krɔnkrɔn’’ a Ɔdze ma dze boa hɛn ma yɛafata. Ɔnnyɛ akatua ara mma tseneneenyi no. Ɔyɛ “ahoɔdzen ho akyɛdze’’ a Ɔdze ma dze boa hɛn ma yɛayɛ tsenenee. 27 Yɛrennantsew mbɛn Nyankopɔn na Christ ara. Yɛnye Hɔn robɔ mu anantsew. 28
Asɔr no mu beebiara no, mbabun se Young Women na Aaron Asɔfodzi Quorum Nsɛntsitsir no. Ofi New Zealand dze kɔ Spain dze kɔ Ethiopia dze kɔ Japan, young women kã dɛ, “Nnuhu akyɛdze no som me bo.’’ Ofi Chile dze kɔ Guatemala, dze kɔ Moroni, Utah, young men kã dɛ, “Ber a meper dɛ mosom, sie gyedzi, munu moho, na mutu mpon da biara no, mebɛfata dɛ megye temple nhyira horow na asɛmpa ne dɛw a ɔmmbɔadze no”.
Mobɔ nhyira horow no na dɛm dɛw no ho anohoba dɛ ɔyɛ nokwar na hɔn a wosie mbrasɛm no nyina hɔn nsa bɛka na “hɔn a wɔper dɛ wɔbɛyɛ dɛm.’’ 29 Sɛ itse dɛ edzi nkõgu mpɛn pii wɔ mbɔdzenbɔ mu dɛ ibɔwɔw do aper a, kaa Christ no Werdambɔ no na adom no a ɔma ɔba mu no dɛ ɔyɛ nokwar. 30 “[N’] ehumbɔbɔr abasa no atsen wɔ hom do.’’ 31 Ɔdɔ hom—ndɛ, mfe 20 a ɔreba mu, na afebɔɔ. Jesus Christ ne dzin mu, amen.