Aso Edur Bi Nnyi Gilead?
Nnyɛ Agyenkwa n’ayarsa tum ara nye N’ahom dɛ Otum sa hɛn nyimpadua yarba, mbom ebia dza ohia dodow mpo no, N’ahom dɛ Otum sa hɛn akoma yar.
Mber tsiabaa a mifii asɛmpakã edwuma bae ekyir, ber a nna meyɛ adzesũanyi wɔ Brigham Young Esũapɔn no, menyaa foon do ɔfrɛ fi me papa hɔ. Ɔkãe kyerɛɛ me dɛ oenya pancrease kokoram yarba na ɔwɔ mu dɛ mber dodow a ɔdze bɛtsena ase nnyɛ papa dze, naaso ɔwɔ enyimpisi dɛ obenya ayarsa na ɔasan edzi n’abrabɔ mu dwumadzi horow no. Foon do ɔfrɛ no bɛyɛɛ mber dzendzen maa me. Me papa ayɛ me bishop, me nyɛnko, na mo fotufo. Ber a emi, me maame, na mo nuanom, dween ndamba ho no, nna ɔyɛ awerɛhow. Nna mo nuabanyin kumabaa, Dave, rosom asɛmpakã dwumadzi wɔ New York na ɔyɛɛ n’afãmudze fii kwan tsentsen, wɔ dza ɔyɛ dzen a orisisi yinom wɔ ebusua mu no.
Dɛm da no nduryɛ ahwɛfo no susuu ɔprehyɛn ho dze abɔ mbɔdzen na woesiw kokoram n’ano amma ɔanntserɛw. Hɛn ebusua kyeer kɔm na yɛbɔɔ mpaa enyiberdo dɛ anwanwadze bi nsi. Menyaa gyedzi a oye ara dɛ m’egya botum enya ayarsa. Ansaana wɔrebɛyɛ ɔprehyɛn no, menye mo nuabanyin panyin, Norm, maa m’egya nhyira. Yɛdze gyedzi biara a yebotum enya no, yɛbɔɔ mpaa dɛ onya ayarsa.
Nna ɔprehyɛn no bedzi dɔnhwer pii, mbom mber tsiabaa ekyir noara, na datser no baa atweɔnee bea hɔ nye hɛn ebusua bedzii ehyia. Ɔkãa kyerɛɛ hɛn dɛ mber a wɔhyɛɛ ɔprehyɛn ase no, wohunii dɛ kokoram no atserɛw wɔ m’egya ne nyimpadua mu nyina. Wogyina dza wohunii do no, nna m’egya nnyi mber pii dze bɛtsena ase. Obubuu hɛn koraa.
Ber a m’egya nyanee fi ɔprehyɛn mu no, nna ɔper dɛ obohu sɛ ɔprehyɛn no wiee yie a. Yɛnye no kyɛɛ awerɛhowsɛm no.
Hɛn ebusua kɔɔr do kyeer kɔm na yɛbɔɔ mpaa enyiberdo dɛ anwanwadze bi nsi. Ber a m’egya n’apɔwmudzen kɔr famu ntsɛntsɛm no, yɛhyɛɛ ase bɔɔ mpaa dɛ obotum enya ahotɔ efi yaw mu. Ewiei no, ber a ne tsebea sɛɛe koraa no, yɛserɛɛ Ewuradze dɛ ɔmma no kwan ma ontwa mu ntsɛm. Abosoom kakra ara wɔ ɔprehyɛn n’ekyir no, dɛ mbrɛ datser no dzii kan kãe no, m’egya fii mu.
Ward mu asɔrmba na ebusua anyɛnkofo kyerɛɛ hɔn dɔ na ayamuyie dodow kyerɛɛ hɛn ebusua. Yenyaa funsie fɛɛfɛɛfɛw a ɔhyɛɛ m’egya n’abrabɔ enyimnyam. Naaso mber twaa mu no, yɛhyɛɛ ase dzii yaw wɔ hɛn egya onnyi hɔ no ho, mehyɛɛ ase dwendwen siantsir a m’egya ennya ayarsa ho. Modwendwen ho sɛ nna me gyedzi nnyɛ dzen yie a. Ebɛnadze ntsi na ebusua ebusua binom nya anwanwadze, na hɛn ebusua ennya? Musũae wɔ m’asɛmpakã edwuma mu dɛ monkɔ kyerɛwsɛm no mu nkɛgye nyiano, ntsi no mehyɛɛ ase hwehwɛɛ kyerɛwsɛm no mu.
Ahyɛmu Dadaw no kyerɛkyerɛ edur anaa seradze huanhuam bi a, wɔdze sa epirakur, na wɔdze efuw bi a ofifir wɔ Gilead yɛ, ho asɛm. Ahyɛmu Dadaw mber mu no nna wɔfrɛ seradze no dɛ “Gilead edur.’’ 1 Nkɔnhyɛnyi Jeremiah twaa mbusu horow a ohun no wɔ no nkorɔfo do no ho kwadwom na onyaa enyidado dɛ wobenya ayarsa. Jeremiah bisaa dɛ, “Aso edur bi nnyi Gilead; ana onunsinyi bi nnyi hɔ?’’ 2 Nwoma, ndwom, na edwin nyina mu no, wɔatɔ dɛ wɔkyerɛ Agyenkwa Jesus Christ dɛ ɔyɛ Gilead Edur no osian N’anwanwa ayarsa tum no ntsi. Tse dɛ Jeremiah, nna modwendwen dɛ, “Aso edur bi nnyi Gilead mma Nielson ebusua no?’’
Mark tsir 2 wɔ Ahyɛmu Fofor mu no, yehu Jesus wɔ Capernaum. Agyenkwa no n’ayarsa tum ho asɛm tserɛɛw asaase no nyina do, nyimpa beberee tuu kwan kɔr Capernaum ma Agyenkwa no asa hɔn yar. Nna nkorɔfo dodoodow na wɔaboa ano wɔ fie no a nna Agyenkwa hyɛ mu no ho dɛ nna kwan bio nnyi hɔ mma No a ɔbɛgye hɔn nyina. Mbanyin baanan a wɔso mbubuinyi baa Agyenkwa no hɔ dɛ ɔnsa no yar. Ɔnam nyimpa dodow no ntsi nna wonntum ndua mu, dɛm ntsi wɔkɛpaa fie no n’etsifi na wogyaagyaa banyin no sii famu ma ohyiaa Agyenkwa no.
Ber a mekenkan asɛm yi no, dza Agyenkwa no kãe no ber a Ohyiaa banyin yi no yɛɛ me ahobow: “Ɔba, wɔdze wo bɔn akyɛ wo.’’ 3 Modwen ho dɛ sɛ nkyɛ emi nye mbanyin baanan no a wɔsoaa banyin yi hɔn mu kor a, nkyɛ mesee Agyenkwa no dɛ, “Yɛdze no baa ha pɛɛ dɛ wɔbɛsa no yar.’’ Modwen dɛ nkyɛ Agyenkwa no bobua dɛ, “Mesaa no yar.’’ Ana ɔbɛyɛ dɛ nna menntse ase yie—dɛ nnyɛ Agyenkwa n’ayarsa tum ara nye N’ahom dɛ Otum sa hɛn nyimpadua yarba, na ebia dza ohia dodow mpo no, N’ahom dɛ Otum sa hɛn akoma na m’ebusua a wodzi yaw no akoma abobɔ no yarba.
Agyenkwa no duaa sũahu yi do kyerɛkyerɛɛ adzesũadze bi a ohia ber a ewiei koraa no honandua mu ara ɔsa banyin no yar. Ɔdaa edzi pefee ma me dɛ nna N’asɛm nye dɛ Obotum dze ne nsa akã hɔn a wɔyɛ enyifurafo hɔn enyiwa, ma woetum ehu adze. Obotum dze Ne nsa akã etsitsifo asowa ma woetum atse asɛm. Obotum dze Ne nsa akã hɔn a wonntum nnantsew no hɔn anan ma woetum anantsew. Obotum asa hɛn enyiwa na hɛn asowa na hɛn anan yarba, na dza ohia dodoodow wɔ ne nyina mu no, Obotum asã hɛn akoma yarba ber a Ɔtsew hɛnho fi bɔn ho na odua nsɔhwɛ adzendzen do pegya hɛn.
Ber a Agyenkwa kopue nkorɔfo a wɔwɔ Mormon Nwoma mu no do wɔ No Wusoɛr ekyir no, Ɔsanee kãa N’ayarsa tum no ho asɛm bio. Nephifo no tsee Ne ndze fi sor a ɔrekã dɛ, “Ana hom rennsan mmba me nkyɛn, na hom nnu homho wɔ hom bɔn ho ma wɔasakyer hom, ama maasa hom yarba?” 4 Ekyir no, Agyenkwa no kyerɛkyerɛ dɛ, “Na hom nnyim, bɛyɛ na ɔasan enu noho, na ɔdze akoma a odzi mu aba me nkyɛn, na mebɛsa no yarba.’’ 5 Nna Agyenkwa no rennkã honandua mu ayarsa ho asɛm na mbom hɔn akra mu sunsum mu ayarsa a.
Moroni dze ntseasee bio kã ho ber a ɔkã n’egya Mormon ne nsɛm. Ɔkãa anwanwadze ho asɛm ekyir no, Mormon kyerɛkyerɛ mu dɛ, “Na Christ akã dɛ: Sɛ hom nya gyedzi wɔ mo mu a, hom benya tum dze ayɛ biribiara a ohia wɔ mo mu.’’ 6 Musũae dɛ otwar dɛ me gyedzi no botae yɛ Jesus Christ, na ohia dɛ megye dza ohia a ofi No hɔ no to mu ber a medze gyedzi wɔ No mu dzi dwuma. Sesei metse ase dɛ nna m’egya no wu no hia ma Nyankopɔn ne nhyehyɛɛ. Sesei, sɛ medze me nsa gu bi so ne tsir do dze hyira no a, me gyedzi wɔ Jesus Christ mu, na metse ase dɛ nyimpa no botum na oenya honandua mu ayarsa, sɛ ohia wɔ Christ mu a.
Agyenkwa No Werdambɔ no a, ɔma No ɔpon na N’ahoɔdzen tum ebien no kwan, nye nhyira koraa a Jesus Christ dze ma hɛn nyina. Sɛ yɛdze akoma no botae mu nu hɛnho a, Agyenkwa no tsew hɛnho fi bɔn ho. Ber a enyigye mu ara yɛdze hɛn pɛ ma Egya no, mpo wɔ gyinabew horow no nkõdzen dodoodow mu a, Agyenkwa no bɛma hɛn adzesoadze do ma wɔayɛ har. 7
Mbom adzesũadze kɛsenara a otsĩa ebien wɔ ha. Nna mfomdo mu ara magye edzi dɛ Agyenkwa n’ayarsa tum no annyɛ edwuma amma m’ebusua. Sɛ seseiara medze mpanyin enyiwa na sũahu hwɛ m’ekyir a, muhu dɛ Agyenkwa n’ayarsa tum no daa edzi wɔ m’ebusua mu ba kor biara n’abrabɔ mu. Mitsimii wɔ honandua ayarsa do ara ma menntum ennhu anwawadze a osii no. Ewuradze duaa nsɔhwɛ dzendzen yi do hyɛɛ me maame dzen na opegyaa no boor n’ahom do, na ɔtsenaa ase kyɛree na ɔbɔɔ bra a ɔyɛɛ mfaso. Onyaa nhyɛdo nwanwa papa wɔ ne mba na nanamba do. Ewuradze dze ɔdɔ, koryɛ, gyedzi, na dzenyɛ a ɔbɛkaa hɛn abrabɔ ho na ɔkɔ do ndɛ hyiraa emi na mo nuanom
Na hɛn papa so ɛ? Dɛ mbrɛ ɔtse ma obiara a obonu noho no, onyaa sunsum mu ayarsa ber a ɔhwehwɛe na onyaa nhyira horow a ɔwɔ hɔ osian Jesus Christ no Werdambɔ no ntsi. Onyaa no bɔn ho bɔnfakyɛ na sesei dze ɔrotweɔn Wusoɛr n’anwanwadze no. Ɔsomafo Paul kyerɛkyerɛɛ dɛ, “Na dɛ mbrɛ hɔn nyina wu wɔ Adam mu no, dɛmara so na hɔn nyina benya nkwa wɔ Christ mu.’’ 8 Ehu, nna merekã kyerɛ Agyenkwa no dɛ, “Yɛdze hɛn papa brɛɛ wo dɛ sa no yarba,’’ na Agyenkwa no ada no edzi pefee seseiara akyerɛ me dɛ Ɔsaa no yarba. Gilead edur no yɛɛ edwuma maa Nielson ebusua no—nnyɛ wɔ kwan a nna yeesusu mu, na mpo no wɔ kwan tsitsir mu a woehyira hɛn na ɔkɔ do hyira hɛn abrabɔ so.
John tsir 6 mu wɔ Ahyɛmu Fofor mu no, Agyenkwa no yɛɛ anwanwadze a ɔyɛ soronko dodoodow. Ɔdze nam kakra na paanoo kakra no, Agyenkwa no maa 5,000 edziban. Makenkan asɛm yi mpɛn pii, naaso dɛm sũahu yi n’afã bi wɔ hɔ a mennhu a sesei ɔayɛ mfaso kɛse ama me. Agyenkwa no maa 5,000 edziban ekyir no, Ɔserɛɛ N’esuafo no dɛ wɔmboaboa mporporba, dza ɔkaa ekyir n’ano, a wɔhyɛɛ nkɛntsɛn 12 mã. Siantsir a Agyenkwa no nyaa mber dze yɛɛ dɛm no ayɛ me nwanwa. Ɔada edzi pefee ama me dɛ adzesũadze kor a yebotum esũa efi dɛm mber mu no nye iyi: Otum ma 5,000 edziban ma bi ka ekyir. “M’adom sõ adasamba nyina.’’ 9 Agyenkwa no ɔpon na ayarsa tum no botum ahata bɔn, epirakur, anaa nsɔhwɛ biara do—a mbrɛ ne kɛse si sõ na mbrɛ osi yɛ dzen mmfa ho no—na bi aka ekyir. N’adom sõ.
Yɛdze dɛm nyimdzee no, yebotum dze gyedzi akɔ kan, a yenyim dɛ sɛ nkõdzen mber ba a—na nokwar wɔbɛba—anaa sɛ bɔn twa hɛn abrabɔ ho hyia a, Agyenkwa no dze “ayarsa wɔ ne ntsaban mu,’’ 10 gyina hɔ roto nsa frɛ hɛn dɛ yɛmbra No hɔ.
Megye Gilead Edur no, Agyenkwa Jesus Christ, hɛn Pomfo, na N’anwanwa ayarsa tum ho, ho dase kyerɛ hom. Megye me dasedzi wɔ Ne pɛ ho dɛ ɔbɛsa wo yarba. Jesus Christ ne dzin mu, amen.