Asɔr ho Hia a Ohia
Kyerɛwsɛm no, kyerɛkyerɛ pefee asɔr a hɛn Ewuradze Jesus Christ dze tumdzi hwɛ do na Ɔma no kwankyerɛ no n’ahyɛse na no ho hia a ohia.
Mfe pii abɛsen no, Elder Mark E. Petersen, Asomafo Duebien no hɔn Quorum kuw ba no, hyɛɛ ne Kasae ase a ɔdze mfatoho yi.
“Kenneth na ne yer, Lucille, yɛ nyimpa papafo, nokwafo na wɔtsen. Mbom, wɔnnkɔ asɔr, naaso wɔtse nkã dɛ wobotum ayɛ papa a oye a wɔnnkɔ asɔr. Wɔkyerɛkyerɛ hɔn mba no nokwardzi na suban pa na wɔkã kyerɛ hɔn ho dɛ dza Asɔr botum ayɛ ama hɔn ara nye no.
“Na, ne nyina mu no, wosi do dɛ wohia hɔn dapɛn ewiei ma ebusua enyikãdze … [na] asɔr nkɔree besiw hɔn kwan.” 1
Ndɛ, m’asɛm no fa dɛm nkorɔfo apapafo na nkorɔfo a wɔdwen nyamesom ho na woegyaa dɛ wɔkɔ hɔn asɔrasɔr anaa wɔmmfa hɔnho nnhyɛ mu. 2 Sɛ mekã “asɔrasɔr,” me dze ntamadan, mosque, anaa asɔr ekuw horow nkaa no kã ho. Ɔfa hɛn ho dɛ asɔr nkɔree wɔ iyinom nyina mu no akɔ famu ara yie, ɔman no mu nyina. 3 Sɛ yegyaa dɛ hɛn asɔrasɔr rosom hɛn bo wɔ siantsir biara ntsi a, ɔbɛyɛ esian ama hɛn ankorankor sunsum mu abrabɔ, na dodowara repaa hɔnho efi Nyame ho no tsew Ne nhyira ma hɛn amanaman no do.
Asɔr nkɔree na no mu dwumadzi no boa hɛn ma yɛyɛ nkorɔfo apapa na onya nhyɛdo pa wɔ nkaafo hɔn abrabɔ do. Asɔr mu no wɔkyerɛ hɛn mbrɛ yebesi dze nyamesom ho fapem nkyerɛkyerɛ abɔ bra. Yesũa fi hɛn hɔ nkorkor. Fasusu a okenyan yɛ ndam kyɛn asɛmpakã ara. Yenya dzenhyɛ ber a yɛnye nkaafo a wɔnye hɛn adwen saa no nya fɛkuwbɔ. Asɔr nkɔree na yɛdze hɛnho hyɛ mu no, hɛn akoma yɛ, dɛ ma Bible kã no “toatoa mu kor wɔ ɔdɔ mu.” 4
I.
Kyerɛwsɛm a Nyankopɔn dze ama Christianfo wɔ Bible mu na wɔ ndɛ nyikyerɛ mu no, kyerɛkyerɛ pefee hia a asɔr hia. Ebien no nyina kyerɛ dɛ Jesus Christ kyekyeer asɔr na Osusuu dɛ asɔr bi bɔkɔ do asɔw N’edwuma no do wɔ N’ekyir. Ɔfrɛɛ Asomafo Duebien na Ɔmaa hɔn tumdzi na nsaafee dɛ wɔmfa nhwɛ do. Bible kyerɛkyerɛ hɛn dɛ Christ “yɛ asɔr ne tsir” 5 na ne dzibewdzifo no, wɔnye hɔn mae “wɔ ahotsewfo mudzi ntsi, wɔ ɔsom dwumadzi no ntsi, wɔ Christ nyimpadua ne ntsi.” 6 Nokwar, Bible no da no edzi pefee asɔr no n’ahyɛse na no ho hia a ohia sesei.
Binom kã dɛ asɔr nhyiamu horow no nkɔree no mmboa hɔn. Binom kã dɛ, “Ndɛ mennsũa hwee” anaa “Obiara anntsew n’enyim amma me” anaa “Wɔfoom me.” Onnyi dɛ ankorankor abagura sianka hɛn fi Christ nkyerɛkyerɛ ho, Ɔno a Ɔkyerɛkyerɛɛ hɛn dɛ yɛnsom, nnyɛ dɛ wɔbɔsom hɛn. 7 Iyi da hɛn adwen do no, asɔrba kor bi kãa dza n’Asɔr nkɔree no tsim do ho asɛm:
“Mfe pii a wɔabɛsen no, mesesãa mo su a ɔfa asɔr nkɔree ho. Monnkɔ asɔr bio wɔ mankasa ntsi, mbom dɛ mobɔdwen binom ho. Mohwɛ dɛ mibekyia nkorɔfo a hɔn nko tsena, mebɛyɛ ahɔho akwaaba, … mubotu moho ama edwumayɛ bi ho. …
“Ne tsiabaa, mokɔ asɔr dapɛn biara a medze adwen dɛ mebɛkekã moho, nnyɛ bɔmmyɛ, na medze ndzepa ba nkorɔfo abrabɔ mu.” 8
President Spencer W. Kimball kyerɛkyerɛɛ dɛ “yɛnnkɔ Ahomgyeda nhyiamu horow no dɛ wɔbɛma hɛn enyi agye anaa wɔakyerɛkyerɛ hɛn ara. Yɛkɔ dɛ yɛrokɔsɔr Ewuradze. Ɔyɛ ankorankor asodzi. … Sɛ som no annkɔ yie amma wo a, ɔwo na edzi nkõgu. Obiara runntum nnsɔr mma wo; otwar dɛ wankasa itweɔn Ewuradze.” 9
Asɔr nkɔree botum ebue hɛn akoma mu na wɔatsew hɛn akra ho.
Asɔr mu no, hɛn nko yɛnnsom anaa dza hɛn yɛpɛ anaa ber a oye ma hɛn. Yɛtaa som wɔ kuw mu. Som mu no yenya ɔsor kwan ahorow ma yɛsoɛr tra hɛn mber yi mu pɛsɛankonya su no. Som a Asɔr ma ho kwankyerɛ no ɔboa hɛn ma yedzi hɛn ankorankor pɛsɛankonya su do konyim, a obotum atsew hɛn sunsum mu mpontu do no.
Mfaso binom so a ohia wɔ hɔ a mebɛkã ho asɛm, tsiabaa mpo a. Asɔr kɔ mu no yɛnye nkorɔfo anwanwfo a wɔrobɔ mbɔdzen asom Nyame nya fɛkuwbɔ. Iyi kaa hɛn dɛ yɛnnyɛ ankonam wɔ hɛn nyamesom dwumadzi horow mu. Hɛn nyina yehia dɛ yɛnye binom nya fɛkuwbɔ, na asɔr fɛkubɔ yɛ sũahu mapã a yebotum enya, hɛn na hɛn hokãfo na hɛn mba. Fekuwbɔ yinom nnyi hɔ a, nkanka wɔ mbofra na awofo nokwafo ntamu a, nhwehwɛmu kyerɛ dɛ, ɔreyɛ dzen ama awofo dɛ wɔbɛtsetse hɔn mba wɔ hɔn gyedzi mu. 10
II.
Ma medzi kan akasa ho nyina fa nsɔr nyina ho. Afei mebɛkã siantsir soronko a asɔrbayɛ, asɔr nkɔree, na edze woho hyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no a Agyenkwa no dze asan ananmu aba ho asɛm.
Nokwar, yesi no pi dɛ kyerɛwsɛm no, tsetse na ndɛ dze no, kyerɛkyerɛ pefee asɔr a hɛn Ewuradze Jesus Christ dze tumdzi hwɛ do na Ɔma no kwankyerɛ no n’ahyɛse na no ho hia a ohia. Yɛgye dase so dɛ Jesus Christ ne nsanananmu Asɔr no wɔakyekyer dɛ ɔnkyerɛkyerɛ Ne nkyerɛkyerɛ ne mãhyɛ na ɔmfa N’asɔfodzi tumdzi no nyɛ ayɛdze a ohia ma wɔdze kɔ Nyankopɔn ahenman no mu. 11 Asɔrmba a wogyaa Asɔr ba na wɔtwer hɔn ankorankor sunsum mu ahoɔdzen nko no, paa hɔnho fi asɛmpa ehiadze tsitsir yinom ho: asɔfodzi tum na nhyira no, nsanananmu nkyerɛkyerɛ ne mãhyɛ, na nkenyan na kwan ahorow a wobotum dze nkyerɛkyerɛ no abɔ bra. Wokwetsir hɔn kwan a wɔdze bɛfata ebusua ntoado daapem ama hɔn ebusua.
Nsanananmu Asɔr ne mfaso kɛse kor nye dɛ ɔboa hɛn ma yenyin sunsum mu. Nyinii kyerɛ nsesã. Sunsum mu no ɔkyerɛ dɛ irunu woho na erehwehwɛ dɛ ibɔtwe abɛn Ewuradze. Asɔr no a wɔdze asan ananmu aba mu no yɛwɔ nkyerɛkyerɛ, nyɛbea, aboafo a woekenyan hɔn a wɔboa hɛn ma yenu hɛnho. Hɔn botae, asɔrbayɛ ho abaguafo nhyiamu mpo no, nnyɛ ntsẽa, tse dɛ emmuyɛfo asɛndzii mu nsunsuando. Ɔdɔ mu ara asɔrbayɛ ho abaguafo hwehwɛ dɛ wɔbɔboa hɛn ma yɛafata bɔnfakyɛ ho ehumbɔbɔr a Jesus Christ No Werdambɔ dze bɔbɔɔ adze no.
Ankorankor sunsum mu ahoɔdzen nntaa mma tsipia nye etuhoakyɛ som ho nhyehyɛɛ a nsanananmu Asɔr no dze ma no. Fasusu kɛse wɔ iyi ho nye mberantsɛ na nkataasia na mpanyimfo a wɔdze hɔn skuulkɔ anaa hɔn edwuma ho mponee dwumadzi to nkyɛn na wɔgye asɛmpasomafo ɔfrɛ. Wɔyɛ edwuma dɛ asɛmpasomafo ma ananaben wɔ ananabea a hɔn ara wɔannsaan mu ennyi. Dɛm ara so yɛ nokwar ma asɔrmba anokwafo a wɔdze hɔnho hyɛ etuhoakyɛ som a yɛfrɛ no “temple edwuma” mu. Nkyɛ wonnkotum ama dɛm som yi mu biara sɛ Asɔr no a ɔfa ho kaw, ɔhyehyɛ, na ɔhwɛdo no nnkã ho a.
Hɛn asɔrmba hɔn nyamesom ho gyedzi na Asɔr som akyerɛkyerɛ hɔn mbrɛ wosi wɔdze hɔn mbɔdzembɔ bɔ mu yɛ edwuma a ɔboa apaamu no nyina. Sũahu na mpontu a ɔtse dɛm no nnsi wɔ pɛsɛankonya su a wɔatahye wɔ ndɛ ɔmamfo ndzeyɛɛ mu no. Hɛn sɔn mu ward mu a wɔakyekyeer no mbea mbea no, yɛnye nkorɔfo a hɛn ara yɛannsan mu ennyiyi hyiamu yɛ edwuma, nkorɔfo a wɔkyerɛkyerɛ hɛn adze na wɔsɔ hɛn hwɛ.
Yerusũa sunsum mu su horow tse dɛ ɔdɔ, ayamuhyehye, bɔnfakyɛ, na abotar no, iyi ma hɛn kwan ma yesũa mbrɛ yɛnye nkorɔfo a ɔson hɔn nkyir koraa na dza wɔpɛ bɔ mu yɛ edwuma. Mfaso yi aboa hɛn asɔrmba pii na wɔayɛ nhyira ama ekuw dodowara a wodzi mu dwuma no. Latter-day Saintfo ayɛ atsenkã wɔ tum a wɔdze mbɔdzembɔ ho nkabɔmu wɔ koryɛ mu yɛ akandzifo. Dɛm suban no fi hɛn edzikamfo akokodurfo a wodzii kan kɛkyekyeer ɔman wɔ Anee Mbepɔw Afamu na wɔdze hɛn etuhoakyɛ nkabɔmu su a ɔsom hɛn bo no dze boa obiara.
Nyimpa ho mboa na adɔyɛ mbɔdzembɔ mu dodowara no ohia dɛ wɔdze ankorankor ahodze piinara boa ano na wɔhwɛ do yie. Nsanananmu Asɔr no yɛ iyi wɔ ne nyimpa ho mboa mbɔdzembɔ kɛsenara no wɔ wiadze nyina mu. Wɔrekyekyɛ adzesũa na eduryɛ ho ndzɛmba, wɔrema hɔn a ɔkɔm dze hɔn no edziban, wɔrohwɛ tukɔrfo, wɔroboa adan suban bɔn a ɔka awerɛw mu ho nsunsuando, na ndzɛmba horow pii kã ho. Hɛn Asɔrmba ayɛ atsenkã wɔ hɔn Helping Hands dwumadzi wɔ esian mber mu. Asɔrbayɛ boa hɛn ma yɛyɛ hɛn kyɛfa wɔ mbɔdzembɔ akɛsenara a ɔtsetse dɛm. Asɔrmba so tua akɔnkye afɔrbɔ ma wɔdze boa ehiafo a wɔwɔ hɔnankasa hɔn mu.
Ma ɔkã erudua Sunsum n’anyɛnkoyɛ do renya asomdwee na enyigye no ho no, hɛn Asɔrmba a wɔba asɔr no nya enyigye wɔ asɛmpa abrabɔ mu aba, tse dɛ nhyira a ofi edze Enyansasɛm no robɔ bra na honandua na sunsum mu prɔmprɔmyɛ a idzi ebupɛn du mbra no do a wɔdze abɔ anohoba no. Yenya nhyira so fi hɛn baanodzifo a woekenyan hɔn no hɔn afotu mu.
Dza ɔkrɔn wɔ iyi nyina mu nye asɔfodzi ayɛdze a wɔdze tumdzi yɛ a ohia ma daapem a, sacrament a yɛgye no Ahomgyeda biara no kã ho. Ayɛdze a odzi ewiei wɔ nsanananmu Asɔr no nye awar ho ahyɛmudzi a ɔwɔ hɔ daapem, a ɔma wotum toa ebusua enyimnyam nkitahodzi do. President Nelson kyerɛkyerɛɛ fapem nkyerɛkyerɛ wɔ kwan yɛbɛkaa daa. Ɔkãa dɛ: “Yennkotum enya ɔpɛ ara ma ɔdze hɛn ekodu Nyankopɔn enyim. Ɔsɛ dɛ yedzi dɛm mbra no a [dɛm nhyira] gyina do no.” 12
Dɛm mbra no kor nye yɛsom wɔ asɔr Kwesida biara. 13 Hɛn som na onnyiewiei nhyehyɛɛ a yɛdze bɔ bra no twe hɛn bɛn Nyame na otu hɛn tum a yɛdze dɔ no mpon. Parley P. Pratt, asɔpɔkan mberano yi Asomafo mu ɔbaako no, kãa nkã a ɔtsee ber a Nkɔnhyɛnyi Joseph Smith kyerɛkyerɛɛ fapem nkyerɛkyerɛ yinom mu no: “Metsee nkã dɛ Nyankopɔn yɛ mo ɔsor Egya ampara; dɛ Jesus yɛ mo nua, na dɛ me yer a ɔda mo bo mu no yɛ onnyiewiei, adamfo bɛkyebo, yamuyiefo, ɔbɔfo a ɔrosom , a wɔdze no ama me dɛ awerɛkyekye, na enyimnyam abɔtsir afebɔɔ kesi afebɔɔ. Ne tsiabaa no, afei nna mubotum dze sunsum na ntseasee adɔ.” 14
Ewiei no, mekaa hom nyina dɛ yɛnngye nndzi dɛ asɔr mu nko na wotum yɛ papa. Asɔr biara nnkã ho no, yehu nyimpa ɔpepe a wɔroboa na wɔreyɛ ndwuma pa pii a wɔnnkotum akan. Ankorankor no, Latter-day Saintfo yɛ no mu pii. Yehu ndwuma yinom dɛ ɔda onnyiewiei nokwar no edzi dɛ “Sunsum no ma ɔdasanyi biara a ɔbɛba wiadze yi mu no kan.” 15
Ndwuma pa a wobotum ayɛ a asɔr nnkã ho nyina ekyir no, nkyerɛkyerɛ ne mãhyɛ na no nkwagye na nkwagye ntowdo ayɛdze horow no nsa kã wɔ nsanananmu Asɔr mu nko. Dza ɔkã ho no, Asɔr kɔ ma hɛn ahoɔdzen na gyedzi ntomu a ofir enye agyedzifo binom a hɔn so wɔrobɔ mbɔdzen etsim wɔ ahyɛmu anamɔn kwan na wɔayɛ Christ esuafo yie no nya fɛkuwbɔ na wɔbɔ mu som. Mobɔ mpaa dɛ hɛn nyina yebegyina pintsinn wɔ Asɔr sũahu ahorow yinom mu ber a yɛhwehwɛ onnyiewiei nkwa, akyɛdze a ɔsõ sen Nyame n’akyɛdze nyina no, wɔ Jesus Christ ne dzin mu, amen.