Hwɛ Kwan no do Tsentsendo
Ebetsim wɔ ndzɛmba a ohia dodoodow ho—tsitsir ara “ndaamba’’ ndzɛmba, onnyiewiei ndzɛmba ho no—yɛ adze tsitsir wɔ abrabɔ yi ne ndandanee mu.
Mber a midzii mfe 15 no, menyaa adzesũanyi ɔkwanserɛ, a ɔmaa mo kwan dɛ montwuw kaar sɛ m’awofo no kor bɛkã moho a. Ɔyɛɛ me dɛw dodow, ber a m’egya bisae sɛ mebɛpɛ dɛ mopue a.
Ɔkãa kaar no akwansin kakra fii kurow mu hɔ dze faa kwan-ebien tsentsen, tɔɔtsenn bi do a nkorɔfo kakraabi na wɔfa do—a ɔsɛ dɛ mehyɛ no nsew dɛ, ɔbɛyɛ dɛ bea kortsee a onyaa atsenkã dɛ esian nnkɔto no. Okegyinaa kwan ne nkyɛnnkyɛn, na yɛsesãa ananmu. Ɔkyerɛkyerɛɛ me ndzɛmba bi na nkyii ɔkãe kyerɛɛ me dɛ, “Fa ahwɛyie na yɛ nkakrankakra hyɛ ase twuw ara kɛpem dɛ mebɛse wo dɛ gyina.’’
Medzii ne nhehyɛɛ do pɛpɛɛpɛr. Mbom bɛyɛ simaba 60 ekyir no, ɔkãa dɛ, “Ɔba, gyina. Erema menya abofon. Nna eremanman basabasa wɔ kwan no do nyina.’’ Obisaa dɛ, “Nna ebɛnadze na erohwɛ?”
Medze atseetsee bi no, mekãa dɛ, “Morohwɛ kwan no.’’
Nkyii ɔkãa iyi dɛ: “Nna morohwɛ w’enyiwa, na erohwɛ dza obua kaar no n’enyim no ara. Sɛ ehwɛ dza ɔda w’enyim pɛɛ nko a, erunntwuw kaar tsentsendo da.’’ Afei otsĩi mu dɛ, “Hwɛ kwan no do tsentsendo. Dɛm no bɔboa wo ma etwuw tsentsendo.’’
Dɛ nna medzi mfe 15 no, modween ho dɛ nna ɔyɛ hɛnkã adzesũa papa. Ofitsi dɛm mber no meehu dɛ nna ɔyɛ abrabɔ mu adzesũadze kɛse dɛmara. Ebetsim wɔ ndzɛmba a ohia dodoodow ho—tsitsir ara “ndaamba’’ ndzɛmba ho, onnyiewiei ndzɛmba—yɛ adze tsitsir wɔ abrabɔ yi ne ndandanee mu.
Mber bi wɔ Agyenkwa n’abrabɔ mu no, Ɔpɛɛ dɛ ɔka no nko, ntsi “ɔkɔr koko no do nkyɛn beebi kɔsɔree.’’ 1 Ɔdze nkyerɛkyerɛ maa N’esuafo no ma wɔkɔr dɛ worokotwa epo no. Anafua sum mu no, nsuhɛn a nna esuafo wɔ mu no hyiaa ehum yerɛwyerɛw. Jesus kɔr dɛ Ɔrekɛgye hɔn na nnyɛ wɔ ntɔyɛɛ kwan do. Kyerɛwsɛm asɛm kenkan dɛ, “Na anafua dasu a otsĩa anan no mu ɔnantseew po enyi baa hɔn nkyɛn.’’ 2 Wohun No no, wɔhyɛɛ ase suroe, osiandɛ wɔdween dɛ nyimpasu a ɔbɛɛn hɔn no yɛ ɔsaman. Jesus, hun hɔn ihu na ɔpɛ dɛ hɔn adwen na hɔn akoma da no, nye hɔn kasae dɛ, “Hom nhyɛ dzen; mara a, mma hom nnsuro.’’ 3
Peter n’ahom annka noho nko mbom ɔsanee so nyaa akokodur. Akokodur na kitsikitsi daa no, Peter sũii frɛɛ Jesus, “Ewuradze, sɛ woara a, hyɛ me ma membra wo nkyɛn wɔ nsu no do.’’ 4 Jesus dze ne nsato a yenyim na mber nnda ho no buae dɛ: “Bra.’’ 5
Peter, dɛwdzi a nokwar ara enyidado dze maa no no, fii hɛn no mu sii nsu no do. Ber a otsiim Agyenkwa no do no, nna otum yɛ dza onnkotum, ɔnantsew nsu do mpo. Ahyɛse noo, Peter ennsuro ehum no. Na mframa “dzendzenndzen’’ no 6 dann n’enyi koraa, ma n’adwen danee. Suro no sanee bae. No nsunsuando no, ne gyedzi yewee, na ɔhyɛɛ ase dɛ ɔrodɔ. “Ɔkaa mu dɛ, Ewuradze, gye me.’’ 7 Agyenkwa no, a aber nyina ɔper dɛ ɔbɛgye hɛn no, too ne nsa suoo no mu.
Adzesũadze mpempem horow wɔ hɔ a yebosũa efi anwanwasɛm yi mu, mbom mebɛkã ebiasa.
Tsim wɔ Christ do
Adzesũadze a odzi kan: tsim wɔ Christ do Ber a Peter dze n’enyiwa tsiim Jesus do no, otumii nantsew nsu no do. Ehum, asorɛkye, na mframa no enntum ennsiw no kwan wɔ mber tsentsen a otsimii wɔ Agyenkwa no do no.
Yɛretse hɛn korakora botae ase no boa hɛn ma yɛhwehwɛ dza ɔwɔ dɛ yetsim do. Yennkotum edzi agor edzi konyim a yennyim hɛn botae, nna yennkotum abɔ bra a ɔyɛ mfaso a yennyim no botae. Nhyira akɛse horow no mu kor a Jesus Christ n’asɛmpa a wɔdze asan ananmu dze abrɛ hɛn nye dɛ oyi asɛmbisa no ano dɛ “Abrabɔ no botae nye dɛn?’’, dze kã ndzɛmba bi so ho. “Hɛn botae wɔ abrabɔ yi mu nye dɛ yebenya dɛwdzi na yɛayɛ ahoboa dze asan akɔ Nyankopɔn n’enyim.’’ 8 Yɛrekaa dɛ yɛwɔ asaase do dze reyɛ ahoboa dze asan akɔ nye Nyankopɔn akɛtsena no boa hɛn ma yetsim wɔ ndzɛmba a ogya hɛn kɔ Christ hɔ do.
Yeritsim wɔ Christ do no hia ahohyɛdo, tsitsir ara wɔ sunsum mu suban nketsenketse na ɔnnyɛ dzen ho a ɔboa hɛn ma yɛbɛyɛ esuafo apapa. Osuanyiyɛ biara nnyi hɔ a ahohyɛdo nnkã ho.
Hɛn ntsimii wɔ Christ do yɛ pefee mbordo sɛ yɛhwɛ kwan no do tsentsendo hwɛ bea a yɛpɛ dɛ yɛwɔ na nyimpa ban a yɛpɛ abɛyɛ na afei dabiara yenya mber dze yɛ ndzɛmba a ɔbɔboa hɛn ma yeedu hɔ. Yeritsim wɔ Christ do botum ama hɛn adwenpɔwbɔ no ayɛ mberɛw na ɔama hɛn akwankyerɛ wɔ mbrɛ yebesi botum edzi hɛn mber na mboa horow no yie papaapa.
Ber a ndzɛmba pii wɔ hɔ a wɔfata hɛn tsimii no, yesũa fi Peter ne fasusu no mu hia a ohia dɛ aber nyina yɛdze Christ bɔto hɛn tsimii ne finimfin. Ɔnam Christ nko do na yebotum asan nye Nyankopɔn akɛtsena. Yɛdan Christ n’adom do ber a yɛper dze bɛyɛ tse dɛ Ɔno na yɛhwehwɛ No bɔnfakyɛ na ahoɔdzen tum sɛ yɛtɔ sin a.
Yɛ Ahwɛyie wɔ Ndan Enyi ho
Adzesũadze a otsĩa ebien: yɛ ahwɛyie wɔ ndan enyi ho. Ber a Peter yii n’adwen fii Jesus do dze hwɛɛ mframa na asorɛkye a otwaa n’anan ho no, ɔhyɛɛ ase dɛ ɔrodɔ.
Ndzɛmba pii da “hɛn enyim’’ a obotum adan hɛn enyi efi hɛn adwen wɔ Christ na onnyiewiei ndzɛmba do a “wɔda hɛn enyim tsentsendo no.’’ Abɔnsam nye ndanenyifo kɛse no. Yesũa fi Lehi n’adaaso mu dɛ ndze horow fi dan kɛse na potoon no mu a nna wɔrohwehwɛ adaadaa hɛn akɔ ndzɛmba a obeyi hɛn efi kwan a yɛroboaboa hɛn ho dze asan akɔ nye Nyankopɔn akɛtsena no ho. 9
Na ndanenyi horow bi a yemmbu no hwee wɔ hɔ a wobotum ayɛ mbusu dɛmara. Dɛ mbrɛ wɔkã no, “Adze kor a ohia ma bɔn edzi konyim nye dɛ nyimpa apapafo nnkɛyɛ hwee.’’ Ɔsɛɛfo no esi enyimpi dɛ ɔnnkɛma nkorɔfo apapafo ayɛ hwee, anaa annyɛ koraa no wɔbɛsɛɛ hɔn mber wɔ ndzɛmba a ɔbɛdan hɔn enyi efi hɔn tsirmupɔw na botae horow a ɔkrɔn do. Mfatoho, ndzɛmba bi wɔ hɔ a wɔgye enyim nkakrankakra dan hɛn enyi no botum ayɛ ndanenyi bɔn sɛ ahohyɛdo nnka ho a. Ɔsɛɛfo no tse ase dɛ ndanenyi nnyi dɛ ɔyɛ adzebɔn anaa suban a ɔmmfata ma oenya nsunsuando.
Wobotum Agye Hɛn
Adzesũadze a otsĩa ebiasa: wobotum agye hɛn. Peter hyɛɛ ase dɛ ɔrodɔ no, ɔkaa mu dɛ, “Ewuradze, gye me. Na ntsɛmara Jesus too ne nsa, suoo no mu.’’ 10 Sɛ yehu dɛ yɛrodɔ, sɛ yehyia ahohiahia, anaa sɛ yɛfom a, hɛn so Obotum agye hɛn.
Ahohiahia na nsɔhwɛ ber no, hom botum ayɛ tse dɛ emi na hom enya enyidado dɛ ɔgye bɛba ntsɛmara. Mbom kaa dɛ Agyenkwa no bae bɔboaa Asomafo no wɔ anafua dasu a otsĩa anan no mu—ber a nna woedzi dasu ne mber dodow rebrɛ wɔ ehum no mu. 11 Yɛbɔbɔ mpaa dɛ sɛ mboa no ammba ntsɛmara a, annyɛ koraa no ɔbɛba wɔ dasu a otsĩa ebien no mu, anaa mpo wɔ abɛbusɛm dasu a otsĩa ebiasa no mu. Sɛ otwar dɛ yɛtweɔn a, hom nya awerɛhyɛmu dɛ Agyenkwa no roweɔn aber nyina, Ɔrohwɛ dɛ yennkɔ sɔw abor ma yebotum asɔw no do. 12 Hɔn a wɔrotweɔn wɔ dasu a otsĩa anan no mu no, ebia eda ho wɔ amandzehu ne finimfin mu, mma mmpa abaw. Aber nyina anokwafo no nya ɔgye, sɛ wɔ ɔnnkyebo asetsena anaa mfesantsen ber mu o.
Ɔtɔfabi a yɛdɔ osian hɛn mfom na mfomdo ntsi. Sɛ siantsir yi ntsi erodɔ a, yɛ nsanmu enyigye mu fanu woho. 13 Megye dzi dɛ ndzɛmba kakrabaa na ɔma Agyenkwa no enyigye mbordo kyɛn Ɔregye hɔn a wɔdan, anaa wɔsan ba, No hɔ. 14 Nkorɔfo a mber bi wɔhwee ase na wɔfomee na wonuu hɔnho na wɔbɛyɛɛ dzen wɔ Christ ho gyedzi mu no ho nsɛm ahyɛ kyerɛsɛm no mu mã. Muhu dɛ nsɛm no wɔ kyerɛsɛm no mu ma wɔabɔ hɛn nkaa dɛ Agyenkwa no dɔ ma hɛn na No tum dɛ ɔbɔpon hɛn no mmbɔ adze da. Sɛ yenu hɛnho a nnyɛ Agyenkwa no nko na odzi dɛw, mbom yenya dɛwdzi kɛse dɛmara.
Ewiei
Moto nsa frɛ hom dɛ hom ngye enyim “nhwɛ tsentsendo’’ na hom tsimii wɔ ndzɛmba a ohia ankasa do no nyin. Hom mma yɛmfa Christ nsi hɛn tsimii ne finimfin. Ndanenyi horow nyina mu no, ndzɛmba a “ɔda hɛn enyim no,’’ na ekyinehyia mframa a otwa hɛnho hyia no, megye dase dɛ Jesus nye hɛn Agyenkwa na hɛn Pomfo na hɛn Ɔgyefo. Jesus Christ ne dzin mu, amen.