Kaa W’ahotseweefo a Woruhu Amandze Yi, O Hɛn Nyankopɔn

Elder Anthony D. Perkins ne kasae

Ɔkã Eduosuon no ho

Yeresie ahyɛmudzi horow no bue Jesus Christ no werdam afɔr no tum no dze ma ahoɔdzen na mpo dɛwdzi ma ɔwo a ihu amandze no.

Ɔnnkyebo sũahu a Ne mba nyina benya nsɔhwɛ na oehyia atseetsee no kã Ɔsor Egya n’enyigye nhyehyɛɛ no ho. ¹ Mfe enum a wɔabɛsen kɔ no na wohun dɛ meenya kokoram yarba. Maatse na meda ho tse honandua mu yaw fi ɔprehyɛn horow, radiation eduryɛ, na ndur no nsunsuando mu. Meedzi atsenkã ho aper wɔ anafua kɔdaannda mu. Nduryɛ nkontaabu kyerɛ dɛ annhwɛ a mobowu ntsɛm akyɛn ma modwen ho, a mebegya, mber kakra no, ebusua a wɔsom me bo ekyir.

Beebi a etse biara no, honandua anaa nkãtse amandzehu fi nsɔhwɛ na honam mu mbrɛwyɛ asorɔtow ayɛ, ɔyɛ sesei, anaa dakor bi no bɛyɛ w’abrabɔ ne fã bi.

Honandua mu amandzehu botum ayɛ ɔdomankoma mpanyinyɛ, yarbayarba a enyi nnda, na mpofirmu akwanhyia; ɔkɔm anaa nnyi dabew; anaa ayaayaadze, ewurkadze, na akõkoekõ no nsunsuando.

Atsenkã mu amandzehu botum efi ahopeper anaa abagura; kun anaa yer, ɔwofo, anaa banodzinyi a egye no dzi a ɔpa wo; sikasɛm a ɔnnkɔ yie; binom hɔn atsɛnkyew; anyɛnkofo, mba, anaa ebusua mu mba bi hɔn nsanmuyi; ayaayaadze wɔ no su beberee mu; awar anaa mba ho enyidado a wɔammba mu; adɔfo hɔn nyarba a no mu yɛ dzen anaa owu ntsɛm; anaa fibea ahorow so pii mu ba.

Ibesi dɛn botum asɔw mbubui amandzehu soronko na ɔtɔfabi a ɔba hɛn mu kor biara hɔ no?

Ndaase mu ara, enyidado wɔ Jesus Christ n’asɛmpa no mu, na enyidado botum asan so akã w’abrabɔ ho. Ndɛ mepɛ dɛ menye hom kyɛ enyidado ho fapem anan a ogyina kyerɛwsɛm, nkɔnhyɛsɛm nkyerɛkyerɛ, erosom ho nsera pii, na mankasa m’apɔwmudzen nsɔhwɛ a ɔrokɔ do no do. Fapem yinom ntserɛw mfa obiara ho ara mbom ɔsan so yɛ marankasa m’asɛm ankasa.

Odzi kan, amandzehu nnkyerɛ dɛ Nyankopɔn n’enyi nngye w’abrabɔ ho. Mfe mpem ebien a wɔabasen kɔ no, Jesus n’esuafo hun banyin onyifuranyi bi wɔ temple na wobisaa dɛ, “Rabbi, woana na ɔyɛɛ bɔn, nyimpa yi n’awofo a, dɛ, wɔwoo no onyifuranyi?’’

Nna N’esuafo no dza wɔgye dzi no nntsen, dɛ mbrɛ nkorɔfo pii yɛ no ndɛ no, dɛ abrabɔ mu atseetsee na amandzehu yɛ bɔn no nsunsuado. Mbom Agyenkwa no buaa dɛ, “Nnyɛ nyimpa yi na ɔyɛɛ bɔn, eso nnyɛ n’awofo a; na mbrɛ Nyankopɔn ndwuma bɛda edzi wɔ no mu ntsi a.’’ ²

Nyankopɔn n’edwuma nye dɛ ɔdze hɛn bɛkyebo na onnyiewiei nkwa bɔbɔ adze. ³ Naaso nsɔhwɛ na amandzehu besi dɛn botum—dze tsitsir ara nyimpa bi ne pɛ a ɔdze dzii dwuma bɔn dze bae no ⁴ —na no korakoraa ɔbɛma Nyankopɔn n’edwuma etu mpon?

Ewuradze kãa kyerɛɛ N’ahyɛmudzi nkorɔfo no dɛ, “Manan wo … ;masan mu meyi wo wɔ ahohiahia fononoo mu.’’ ⁵ Dza ɔdze hɛn amandzehu bae biara no, hom Ɔsor Egya dɔfo botum atsen no dze ahoa wo kra. ⁶ Akra a wɔahoa ho no dze nokwar tsema na ayamuhyehye botum asoasoa nkorɔfo hɔn adzesoadze. ⁷ Akra a wɔahoa ho a woefi “ahohiahia kɛse mu’’ no esiesie hɔnho enyigye mu ara dɛ wɔbɛtsena Nyankopɔn ne nkyɛn afebɔɔ, na “Nyankopɔn bɛpepa nyinsuwa nyina efi hɔn enyiwa mu.’’ ⁸

Otsĩa ebien, Ɔsor Egya nyim hom amandzehu pɔkyee. Mber a yɛwɔ nsɔhwɛ mu no, yebotum mfomdo mu ara yɛadwen dɛ Nyankopɔn wɔ ekyirkyir na hɛn yaw mmfa noho. Nkɔnhyɛnyi Joseph Smith mpo kyerɛɛ nkãtse yi ber a nna ɔwɔ n’abrabɔ nkõdzen ber mu. Wɔdze no too Liberty Efiadze ber nna Latter-day Saintfo mpempem na wɔdze ɔhyɛ rututu efi hɔn efiefi no, Joseph duaa mpaabɔ do hwehwɛɛ Nyankopɔn: “O Nyankopɔn, ewɔ hen? Hen na wo ntamadan a ɔkata wo sumabew do no wɔ? Ɔdze ntotɔserɛdze yi dze wiei dɛ: “Kaa w’ahotseweefo a woruhu amandze yi, O hɛn Nyankopɔn.’’ ⁹

Ewuradze ne nyiano no maa Joseph nye obiara a ohu amandze no awerɛhyɛmu.

“Me ba, asomdwee nkã wo kra; w’akotorka na w’amandzehu na ɔnnkɛkyɛr;

“Na afei, sɛ esɔw no yie a, Nyankopɔn bɛma wo do wɔ sor.’’ ¹⁰

Ahotseweefo pii a woruhu amandze nye me akyɛ mbrɛ wosii tse Nyankopɔn no dɔ nkã wɔ hɔn nsɔhwɛ ber mu. Mekaa marankasa mo sũahu pefee mber bi mu wɔ mo kokoram akõdzi mu mber a nna adatserfo nnyae nnhun yaw dzendzen no ne siantsir. Menye me yer tsenaa ase a, nna ma daa yɛyɛ no, merebehyira hɛn edziban do. Naaso, dza mutumii yɛe nyina nye dɛ musũi ara see dɛ, “Ɔsor Egya, meserɛ boa me. Meyar dodow.” Simaba 20 dze kɔ 30 no, No dɔ twaa moho hyiae. Ɔannkã me yarba ne siantsir, no nsunsuando korakoraa ne nsɛnkyerɛdze, na ahomgye fi yaw no mu. Metsee No dɔ mapã ne nkã ara, na nna dɛm no ye na oye so.

Megye dase dɛ hɛn Ɔsor Egya, a ohu nsorɔm kor mpo ne famu hwe no, nyim w’amandzehu. ¹¹

Otsĩa ebiasa, Jesus Christ dze N’ahoɔdzen tum no dze boa wo ma inya ahoɔdzen a edze bɔsɔw w’amandzehu no yie. Ahoɔdzen tum yi dua No Werdambɔ no do ba. ¹² Musuro dɛ Asɔr mu asɔrmba pii dwen dɛ sɛ wɔyɛ dzen kakra ara a hɔnara wobotum edzi amandzehu biara do konyim. Iyi yɛ abrabɔ kwan a ɔyɛ dzen. W’ahoɔdzen mber tsiabaa no nnkotum nye Agyenkwa no no tum a ɔmmbɔadze da ne fibea a ɔbɛhyɛ wo kra dzen no nnsɛ dabiarada. ¹³

Mormon Nwoma no kyerɛkyerɛ dɛ Jesus Christ bɛfa hɛn yaw, yarba, na mberɛwyɛ “ato no do’’ ama Oeehu mbrɛ obesi aboa hɛn. ¹⁴ Ibesi dɛn botum enya tum a Jesus Christ dze ma no ma ɔaboa wo na ɔahyɛ wo dzen wɔ amandzehu ber mu? Dza ohia tsitsir nye edze woho bɛtakyer Agyenkwa no ber a eresie ahyɛmudzi horow a enye no edzi no. Yedzi ahyɛmu horow yinom ber a yɛgye asɔfodzi ayɛdze horow no. ¹⁵

Alma no nkorɔfo no kɛhɛɛn enuma ahyɛmudzi no mu. Ekyir no wohun amandze wɔ nkowaasom mu na wɔbraa hɔn dɛ mma wɔnsɔr wɔ petee mu anaa mpo wɔmmbɔ mpaa kɛse. Naaso wosiee hɔn ahyɛmudzi horow wɔ kwan papa biara a wobotum no do ber a wosũii kommyɛ mu wɔ hɔn akoma mu. No nsusuando no, tum krɔnkrɔn bae. “Ewuradze hyɛɛ hɔn dzen ama woeetum asoa hɔn adzesoadze no na wɔammberɛ.’’ ¹⁶

Hɛn nda mu no, Agyenkwa no to nsa frɛ hɛn dɛ, “Hom nhwɛ me wɔ hom adwendwen biara mu; mma hom nngye kyim, mma hom nnsuro.’’ ¹⁷ Sɛ yesie hɛn sacrament ahyɛmudzi dɛ yɛbɛkaa No aber nyina a, Ɔbɔ anohoba dɛ No Sunsum nye hɛn bɛtsena. Sunsum no ma hɛn ahoɔdzen ma yɛdze sɔw nsɔhwɛ na yɛyɛ dza hɛnara ankasa yennkotum ayɛ. Sunsum no botum asa hɛn yar, dɛ mbrɛ President James E. Faust kyerɛkyerɛɛ dɛ, “Ayarsa no binom bɔkɔ do wɔ wiadze kor bi so mu.’’ ¹⁸

Temple ahyɛmudzi na ayɛdze horow no san so hyira hɛn, bea a “nyamesu mu tum da edzi.’’ ¹⁹ Meseraa ɔbaa bi a nna ne ba basiaba ewu wɔ akwanhyia yaayaw bi mu, nkyii n’ekyir no kokoram ma no kun so wui. Mibisaa no mbrɛ osii tumii sɔw yaw na amandzehu a ɔtse dɛm. Obuae dɛ ahoɔdzen fi sunsum mu awerɛhyɛmu wɔ onnyiewiei ebusua a menyae wɔ temple a metaa sɔr mu no bae. Dɛ mbrɛ wɔbɔ anohoba no, Ewuradze ne fie ayɛdze no dze Nyankopɔn no tum no ama no akontar. ²⁰

Otsĩa anan, da kor biara ma wo enyi ngye. Hɔn a wohu amandze no taa tse nkã dɛ adzesaa yɛ tsentsen, na adzekyee remmba da. Oye dɛ ibosũ. ²¹ Mbom, sɛ ihu woho wɔ amandzehu anafua sum a, sɛ efa gyedzi a ibotum enyan ahwɛ anapa kan ne dɛwdzi. ²²

Mfatoho, mekɛseraa enã kumabaa a nna ɔregye kokoram ayarhwɛ, na ɔayerɛw n’ano enyimnyam mu ara wɔ n’egua mu a yaw na tsinhwi a onnyi no mpo mmfa ho. Mihyiaa awarfo a wonnyinii a enyigye mu ara wɔrosom dɛ mbabun baanodzifo mpo a nna wonntum nnwo mba. Menye ɔbaa dɔfo bi tsenaa ase—nanabasia kumabaa, enã, na yer a—nna ɔaka no nda kakrabaa a ɔbɛtsena ase; naaso wɔ ebusua no hɔn enyinsuwakyi mu no nna serɛw na enyigye nkaadze wɔ mu.

Ahotseweefo yinom a nna woruhu amandze no yɛɛ dza President Russell M. Nelson akyerɛkyerɛ no ne fasusu:

“Hɛn abrabɔ mu enyigye a yɛtse no mmfa gyinabew horow a yɛwɔ mu ho, mbom ɔfa adzebiara a hɛn abrabɔ tsim do ho.

Sɛ yɛdze hɛn abrabɔ tsim Nyankopɔn no nkwagye ho nhyehyɛɛ … na Jesus Christ na N’asɛmpa no do a, yebotum enya enyigye a dza orisi—anaa dza orinnsi—wɔ hɛn abrabɔ mu no mmfa ho.” ²³

Megye dase ²⁴ dɛ hɛn Ɔsor Egya kaa Ne Ahotseweefo a woruhu amandze, ɔdɔ hom, na onyim hom ankasa. Hɛn Agyenkwa nyim ma yɛtse. “Ampaara, ɔasɔw hɛn yaw, na ɔasoa hɛn awerɛhow.” ²⁵ Minyim—dɛ daa daa ɔdzedzifo ²⁶ —eresie ahyɛmudzi horow no bue Jesus Christ no werdam afɔr tum no ma ɔma ahoɔdzen na mpo dɛwdzi ma hɔn a wohu amandze.

Obiara a ohu amandze no, meserɛ dɛ, “Na Nyankopɔn ndua ne Ba no n’enyigye do mma hom adzesoa nyɛ har.’’ ²⁷ Jesus Christ ne dzin mu, amen.