Adzehwehwɛ Nokwar mu Enya Nyiano
Moto nsa frɛ hɛn nyina dɛ yɛnkɔ do nto hɛn gyedzi wɔ Christ mu, Ɔno a Ɔkɔ do sakyer hɔn a wɔhwehwɛ No nyina hɔn abrabɔ.
Afe 1846 n’ahyɛse no, abɔasefo mbanyin, mbaa, na mbofra mpempem tuu kwan dze hɔn enyi kyerɛɛ anee afãmu dɛ wɔrokɔ Zion. Hɔn gyedzi kɛse nunuu hɔn akokodur kɛse no. Ma binom no, dɛm akwantu no woennwie da osiandɛ wowuwui wɔ kwan do. Binom so a, nna wɔrefa ahohiahia kɛse mu, peree kɔr kan wɔ gyedzi mu.
Ɔnam hɔn ntsi, ebusuantsen pii ekyir no, m’ebusua nyaa nhyira a ɔwɔ Jesus Christ n’asɛmpa nkowar no mu dɛw.
Tse dɛ aberantsɛba bi so a, mebɛkã noho asɛm ekyir yi, nna meedzi mfe 14 ber a mehyɛɛ ase dzii ebisa wɔ ɔsom na me gyedzi ho. Nna mokɔ asɔr fofor bi a ɔbɛn me fie, naaso minyaa pɛ dɛ mobɔkɔ akɛsera nsɔrnsɔr horow pii.
Ewiaber bi, muhun mberantsɛmba beenu a wɔhyɛ ntar etuntum na sor atar efufuw dɛ wɔrehɛn me fipamfo ne fie. Nna mberantsɛmba yi yɛ—soronko.
Adzekyee no mihyiaa me fipamfo no, Leonor Lopez, na mibisaa no dɛm mbanyin no hɔn ase. Leonor kyerɛɛ mu dɛ wɔyɛ asɛmpasomafo ma Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo. Ɔkãa no enyigye mu ara kyerɛɛ me dɛ wonumaa ɔno na n’ebusua wɔ Asɔr no mu afe kor a ɔabɛsen no. Ohun me pɛ no, Leonor too nsa frɛɛ me dɛ menye asɛmpasomafo no nhyia na munsũa mfa Asɔr no ho.
Nda ebien ekyir no, mekãa Lopez ebusua no ho nye asɛmpasomafo no hyiae. Wɔdaa hɔnho edzi dɛ Elder John Messerly a ofi Ogden, Utah, nna Elder Christopher Osorio a ofi Walnut Creek, California. Mowerɛ nnkefir hɔn dabiarada.
Ɔnam dɛ nna meedzi 14 ara ntsi, Elder Messerly gyinaa do katsee dɛ yɛnnkɔ me fie a ɔbɛn hɔ no ama me maame eehu dza wɔrekyerɛkyerɛ me no. Hɔ no, ɔkyerɛkyerɛɛ mu dɛ wɔbae dɛ wɔrebɛkyɛ asɛm afa Jesus Christ ho na wobisaa kwan fii no hɔ dɛ wɔbɛkyerɛkyerɛ me. Me nã penee na mpo ɔkãa hɛnho ber a wɔrekyerɛkyerɛ me no.
Asɛmpasomafo no dzii kan bisaa Leonor dɛ ɔmbɔ mpaa. Iyi kitsaa me yie ankasa osiandɛ nna ne mpaabɔ no nnyɛ nsɛmfua bi a oetwuw egu ne tsir mu ne nsee, mbom nna ɔyɛ nsɛm a ofi n’akoma mu. Metsee nkã dɛ ɔnye n’Egya a Ɔwɔ Sor rekasa ampaara.
Nkyii, asɛmpasomafo no kyerɛkyerɛɛ hɛn Jesus Christ ho asɛm. Wɔdze Ne mfonyin bi kyerɛe a ɔtɔɔ mo do osiandɛ nna ɔyɛ Christ tseasefo, no a Ɔasoɛr no mfonyin.
Wɔkɔɔr do, kyerɛkyerɛ hɛn mbrɛ Jesus kyekyeer N’Asɔr wɔ tsetse mber mu a, Ɔno nye tsir no na Asomafo duebien kã ho. Wɔkyerɛkyerɛɛ hɛn Gyedzi ho Asehwe ho asɛm—mbrɛ nokwar no na Christ no tum no fii asaase do wɔ N’Asomafo hɔn wu ekyir no.
Wɔkasaa faa mfe 14 aberantsɛba bi ho a wɔfrɛ no Joseph Smith a, afe 1800 ahyɛse mber mu no, ɔkɔr nsɔrnsɔr horow dze rohwehwɛ nokwar no. Mber guu mu no, Joseph n’adwen konsee no yɛɛ kɛse. Ekyir no ɔkenkaan wɔ Bible mu dɛ yebotum “[e]bisa Nyankopɔn” 1 nyansa no, Joseph, wɔ gyedzi mu, kɔr kwaa bi mu kɔbɔɔ mpaa na obisaa Asɔr a ɔnkɔdɔm.
Asɛmpasomafo no hɔn mu kor kenkaan Joseph ne nsɛm a ɔfa dza osii no ho ber a ɔbɔɔ mpaa no:
“Muhun kan fadum bi a ɔhyerɛn sen ewia, wɔ m’etsifi papaapa, a osiaan berɛww kɛpeem dɛ ɔtɔɔ mo do.
“… Ber a kan no tɔɔ mo do no muhun Nyimpa-su beenu bi a hɔn hyerɛn na hɔn enyimnyam no murunntum nnkã ho asɛm, dɛ wɔsensɛn mo sor wɔ wimu. Hɔn mu kor bɔɔ me dzin na ɔkasaa kyerɛɛ me, ɔtseen ne nsa wɔ kor no do—Oyi nye mo Dɔba no. Tsie No!” 2
Dɛm nkyerɛkyerɛ no mu no, Sunsum no sii nokwar pii ho tadua maa me.
Odzi kan, Nyankopɔn tsie Ne mba nyina hɔn nokwar mpaabɔ, na ɔsor ebue ama obiara—nnyɛ kumaabi ara.
Otsĩa ebien, Nyankopɔn Egya no, Jesus Christ, na Sunsum Krɔnkrɔn no yɛ ankorankor baasa, wɔbɔ mu wɔ Hɔn botae no dɛ “[wɔ]dze nyimpa ne bɛkyebo na onnyiewiei nkwa bɔbɔ adze.” 3
Otsĩa ebiasa, wɔbɔɔ hɛn wɔ Nyankopɔn no su do. Hɛn Ɔsor Egya na Ne Ba, Jesus Christ, wɔ nyimpadua a ɔyɛ honam na mbiew tse dɛ hɛnara, naaso Wɔwɔ enyimnyam mu nye emudzi mu, na Sunsum Kɔnkrɔn no yɛ sunsum nyimpa‑su. 4
Otsĩa anan, ɔnam Joseph Smith do no, Jesus Christ dze N’asɛmpa na nokwar Asɔr no asan anan mu aba asaase do. Asɔfodzi tumdzi a wɔdze maa Christ N’Asomafo mfe 2000 a wɔabasen kɔ no nye asɔfodzi kor noara Peter, James, na John dze hyɛɛ Joseph Smith na Oliver Cowdery no. 5
No korakoraa, yesũae faa Jesus Christ N’ahyɛmu kor so ho: Mormon Nwoma no. Tsetse nkɔnhyɛfo na wɔkyerɛwee, ɔkã nkorɔfo bi a wɔtsenaa America ansaana wɔrobɔwo Jesus, ber a wɔwoo no, nna n’awoo ekyir ho asɛm. Fi mu no, yesũa mbrɛ wosii hunii, wɔdɔe, na wɔsoom Christ a, Oyii noho kyerɛɛ hɔn dɛ Agyenkwa no a Ɔasoɛr efi owu mu no.
Sunsum no pusuuw me ara yie ber a musũaa asɛm a Agyenkwa no kãa kyerɛɛ hɔn no: “Hwɛ, Emi nye Jesus Christ no a nkɔnhyɛfo gyee dase dɛ ɔbɛba wiadze no.” 6
Asɛmpasomafo no maa hɛn Mormon Nwoma no bi. Yɛkenkanee na yɛgyee nsato a ɔwɔ Mormon Nwoma no n’ewiei no too mu a, ɔse dɛ:
“Na ber a hom nsa bɛkã dɛm ndzɛmba yi no, mutu hom fo dɛ hom mbisa Nyankopɔn, Onnyiewiei Egya no, wɔ Christ ne dzin mu, dɛ sɛ dɛm ndzɛmba yinom nnyɛ nokwar a; na sɛ hom dze nokwar akoma bisa, pra hom akoma mu, na hom nya gyedzi wɔ Christ no mu a, ɔnam Sunsum Krɔnkrɔn no tum do bɛda nokwar a ɔwɔ mu no edzi akyerɛ hom.
“Na ɔnam Sunsum Krɔnkrɔn no tum do, hom botum ehu nokwar a ɔwɔ ndzɛmba nyinara mu.” 7
Ɔka kakra ma aso mfe 45 fitsi ber a emi na me maame hun dɛwdzi na tum a ɔwɔ gyedzi wɔ Christ mu no. Osian hɔn gyedzi wɔ Christ mu no ntsi na Lopez ebusua nye me kyɛɛ hɔn ɔsom fofor no. Osian hɔn gyedzi wɔ Christ mu ntsi na asɛmpasomafo beenu yi fii hɔn efiefi wɔ United States bohun emi na me maame. Ɔnam anyɛnkofo adɔfo yinom nyina hɔn gyedzi do na woduaa gyedzi sinape abafua wɔ hɛn mu a oeenyin abɛyɛ onnyiewiei nhyira dua kokroko no.
Dɛm nhyira mfe yinom mu no, yeehu, dɛ mbrɛ President Russell M. Nelson kãe no, dɛ: “Abrabɔ mu biribiara a oye no—nhyira biara a ɔwɔ onnyiewiei nsunsuando no—dze gyedzi hyɛ ase. Yɛrema Nyame kwan ma Oedzi nyim wɔ hɛn abrabɔ mu no dze gyedzi hyɛ ase dɛ Ɔpɛ dɛ Ɔma hɛn akwankyerɛ. Nokwar nnuhu dze gyedzi dɛ Jesus Christ wɔ tum dɛ Ɔtsew ho, Ɔsa yarba, na Ɔhyɛ hɛn dzen hyɛ ase.” 8
Moto nsa frɛ hɛn nyina dɛ yɛnkɔ do nto hɛn gyedzi wɔ Christ mu, ɔno a Ɔasesã emi na me maame hɛn abrabɔ na Ɔkɔ do sakyer hɔn a wɔhwehwɛ no nyina hɔn abrabɔ. Minyim dɛ Joseph Smith nye Nsanananmu Nkɔnhyɛnyi no, dɛ President Nelson nye hɛn Nkɔnhyɛnyi ndɛ, dɛ Jesus nye Christ tseasefo no na hɛn Pomfo, na dɛ Ɔsor Egya tse ase na Oyi Ne mba nyina hɔn mpaabɔ ano. Megye dɛm nokwar yinom ho dase wɔ Jesus Christ dzin krɔnkrɔn mu, amen.