Yɛrema Hɛn Nsakyeree ma Jesus Christ no no Mu Adɔ
Kyerɛwsɛm no na hɛn Nyimdzee wɔ Nyankopɔn ho yɛ akyɛdze—akyɛdze a yɛtaa bu no tootooba. Hom mma dɛm nhyira yinom nsom hɛn bo.
Elder Nielson, yɛda wo ase wɔ wo nsɛm dɛw. Nna yehia.
M’enuanom na nkyerɛbaa adɔfo, President Russell M. Nelson akyerɛkyerɛ hɛn ndaansa yi ara: “Ama yɛayɛ biribiara yie no ɔgye mbɔdzembɔ. Yɛrebɛyɛ Jesus Christ esuafo no nokwafo no kã ho. Eroto wo gyedzi na awerɛhyɛmu wɔ No mu no gye mbɔdzembɔ.” Ndzɛmba bi a ɔdze maa hɛn dɛ yɛdze bɔto hɛn gyedzi wɔ Jesus Christ mu no bi nye dɛ yɛbɛyɛ nkorɔfo a yɛdze hɛnho hyɛ adzesũa mu, dɛ yɛdze hɛnho bɛhyɛ kyerɛwsɛm no mu ama yɛatse Christ no ndwuma na no somdwuma no ase yie. (Hwɛ “ Christ Is Risen; Faith in Him Will Move Mountains ,” Liahona, Esusow Aketseaba 2021, 103.)
Yesũa fi Mormon Nwoma no mu dɛ nna kyerɛwsɛm no yɛ ehiadze kɛse a ɔkã Lehi n’ebusua ho—ohia ara ma ntsi Nephi na no nuanom sanee kɔr Jerusalem kegyee ayewa mprɛtse no (hwɛ 1 Nephi 3–4).
Kyerɛwsɛm no da Nyankopɔn ne pɛ ma hɛn no edzi tse dɛ ma Liahona no yɛɛ maa Nephi na ne papa no. N’egyan mu bui ekyir no, nna Nephi hia dɛ ohu bea a ɔbɔkɔ ekenya edziban. Ne papa, Lehi, hwɛɛ Liahona no na ohun ndzɛmba a wɔakyerɛw no. Nephi hun dɛ ndua ntseantseamba no yɛ edwuma dɛ mbrɛ hɔn gyedzi, mbɔdzembɔ, na setsie a wɔdze maa hɔn no tse. Ɔsan so hun nkyerɛwee a ne kenkan nnyɛ dzen na ɔma hɔn ntseasee fa Nyankopɔn n’akwan ho. Ohun dɛ Ewuradze nam akwan nketsenketse do dze ndzɛmba akɛse ba. Ɔyɛɛ setsie maa akwankyerɛ a Liahona no dze mae no. Ɔkɔr bepɔw no do na onyaa edziban maa n’ebusua a nna wɔahaw papaapa ɔnam dɛ wonnyi edziban no ntsi. (Hwɛ 1 Nephi 16:23–31.)
Ɔyɛ me dɛ nna Nephi yɛ adzesũanyi a ɔdze noho nyina ahyɛ kyerɛwsɛm no mu. Yɛkenkan dɛ nna Nephi n’enyi gye kyerɛwsɛm no ho, ɔdwendwen ho wɔ n’akoma mu, na ɔkyerɛwee so ama ne mba esũa na woeenya ho mfaso (hwɛ 2 Nephi 4:15–16).
President Russell M. Nelson kãa dɛ:
“Sɛ [yɛ]per kɔ kan, na [yɛ]mee wɔ Christ n’asɛm mu, na [ye]tsim kodu ewiei a, … [ye]benya onnyiewiei nkwa’ [2 Nephi 31:20].
“Eremee bor erekã ahwɛ ara. “Eremee kyerɛ dɛ eretse ne dɛw. Yɛtse kyerɛwsɛm no ne dɛw ber a yerusũa no wɔ sunsum mu enyigye nhunii na gyedzi setsie mu. Sɛ yɛmee wɔ Christ ne nsɛm mu a, wɔda hɛn ‘nyimpa akoma pon no do’ [2 Corinthfo 3:3]. Wɔbɛyɛ hɛn su ne fã tsitsir.” (“ Living by Scriptural Guidance ,” Liahona, Sanda 2001, 21).
Ebɛn Ndzɛmba Binom na Yɛbɛyɛ Sɛ Hɛn Akra Enyi Gye wɔ Kyerɛwsɛm no mu a?
Hɛn pɛ dɛ yɛbɛkã ho wɔ Israel mboano no wɔ ntwamutam n’afã ebien nyina no bɔkɔ sor. Ɔbɛyɛ hɛn su na ɔnnyɛ nwanwa mma hɛn dɛ yɛbɔto nsa afrɛ ebusua na anyɛnkofo ma woeetsie asɛmpasomafo no. Yɛbɛfata, na yebenya temple recommend a ɔmmpaa ho ama yɛakɔ temple mpɛn dodow a ɔbɛyɛ yie. Yɛbɛyɛ edwuma ahwehwɛ, yesiesie, na yɛdze hɛn ewuakɔr edzin ama temple. Yebesie Ahomgye da no nokwar mu a, yɛrokɔ asɔr Kwesida biara akɛyɛ hɛn ahyɛmu a yɛnye Ewuradze ayɛ no fofor ber a yedzi sacrament no emudzi mu. Yebesi gyinae dɛ yɛbɛka ahyɛmu kwan no do, a yɛdze asɛm biara a ofi Nyankopɔn n’anomu aba no robɔ bra (hwɛ Nkyerɛkyerɛ na Ahyɛmudzi 84:44).
Ibenya Enyigye wɔ Ewuradze ne Nsɛm mu N’asekyerɛ Nye Dɛn ma Wo?
Irinya enygigye wɔ kyerɛwsɛm no mu bor nyimdzee ho kɔm na nsukɔm ara. Nephi nyaa enyigye kɛse wɔ n’abrabɔ mu. Naaso, ɔsan so hyiaa nkõdzen na awerɛhow (hwɛ 2 Nehpi 4:12–13). “Naaso,” ɔkãa dɛ, “minyim nyia medze mo werɛ atwer no” (2 Nephi 4:19). Ber a yesũa kyerɛwsɛm no, yɛbɛtse Nyankopɔn no nkwagye ho nhyehyɛɛ na nkwagye ntowdo no ase yie, na yebenya awerɛhyɛmu wɔ anohoba horow a ɔdze abɔ hɛn wɔ kyerɛwsɛm no mu, dɛmara wɔ anohoba na nhyira horow a ofi ndɛ nkɔnhyɛfo mu hɔ.
Ewiaber bi, nyɛnko bi too nsa frɛɛ emi na me yer wɔ hɔn fie. Nna hɔn mfe esuon babanyin, David, nntsee Bible asɛm a ɔfa David na Goliath ho da, na nna ɔpɛ dɛ otsie. Ber a mehyɛɛ ase kãa asɛm no, mbrɛ David dze ne gyedzi a ɔwɔ Israel Nyankopɔn ne dzin mu, ɔdze tsiabo na ɔbo, a afõwa biara nndze ne nsamu, pirae na okuum Philistianyi no, kãa n’akoma (hwɛ 1 Samuel 17).
Ɔdze n’enyiwa akɛse a obir no rohwɛ me no, obisaa me enyiber do dɛ, “Woana nye Nyankopɔn?” Mekyerɛɛ mu kyerɛɛ no dɛ Nyankopɔn nye hɛn Ɔsor Egya na yesũa Noho asɛm wɔ kyerɛwsɛm no mu.
Nkyii obisaa me dɛ, “Ebɛnadze nye kyerɛwsɛm no?” Mekãa kyerɛ no dɛ kyerɛwsɛm no yɛ Nyankopɔn ne nsɛm na wɔ mu no obohu nsɛm adɛɛdɛw a ɔbɔboa no ma oehu Nyankopɔn yie. Mekãa kyerɛɛ ne maame dɛ ɔmfa Bible a ɔwɔ no wɔ fie no na mma ɔmma David nnkɛda a ɔnnkenkan asɛm no nyina nnkyerɛɛ no. N’enyi gyee ber a oritsie no. Kyerɛwsɛm no na hɛn nyimdzee wɔ Nyankopɔn ho yɛ akyɛdze—akyɛdze a yɛtaa bu no tootooba. Hom mma dɛm nhyira yinom nsom hɛn bo.
Ber a meyɛɛ asɛmpasomafo edwuma wɔ me mberantsɛ ber mu no, muhun dɛ yɛkyerɛ kyerɛwsɛm no a, nkorɔfo pii hɔn abrabɔ sesã. Muhun tum a ɔwɔ mu na mbrɛ osi tum sesã hɛn abrabɔ. Nyimpa kor biara a yɛkyerɛɛ no asɛmpa nsanananmu no yɛ nyimpa soronko a ɔson n’ehiadze. Kyerɛwsɛm krɔnkrɔn no—nyew, nkɔnhyɛsɛm a nkɔnhyɛfo krɔnkrɔn akyerɛw no—dze hɔn baa gyedzi wɔ Ewruadze mu na nnuhu ho na ɔsesãa hɔn akoma.
Kyerɛwsɛm no dze enyigye hyɛɛ hɔn mã ber a wonyaa nkenyan, akwankyerɛ, awerɛkyekyer, ahoɔdzen, na nyiano ma hɔn ehiadze ho. Hɔn mu dodow ara sii gyinae dɛ wɔbɛyɛ nsesã wɔ hɔn abrabɔ mu na wɔhyɛɛ ase dzii Nyankopɔn ne mbrasɛm do.
Nephi ma hɛn nkuranhyɛ dɛ hɛn enyi ngye wɔ Christ ne nsɛm mu, ɔnam dɛ Christ ne nsɛm no bɛkã ndzɛmba nyinara a ɔsɛ dɛ yɛyɛ akyerɛ hɛn (hwɛ 2 Nephi 32:3).
Moto nsa frɛ wo dɛ nya nhyehyɛɛ a otsim a edze bɛyɛ kyerɛwsɛm adzesũa. Come, Follow Me yɛ adze kɛse a yɛwɔ ma asɛmpa adzekyerɛ na no nsũae, ɔrodɔ hɛn nsakyeree aba Jesus Christ hɔ, na ɔroboa hɛn ma yɛabɛyɛ dɛ Ɔno ara. Ber a yesũa asɛmpa no, nnyɛ nsɛm fofor bi na yɛrohwehwɛ ara; mbom, yɛrohwehwɛ abɛyɛ “abɔdze fofor” (2 Corinthfo 5:17).
Sunsum Krɔnkrɔn no gya hɛn kɔ nokwar ho na ɔgye dase wɔ nokwar no ho ma hɛn (hwɛ John 16:13). Ɔhyerɛn kan wɔ hɛn adwen mu na ɔyɛ hɛn ntseasee fofor na ɔkã hɛn akoma a ɔnam Nyankopɔn ne nyikyerɛ do, nokwar nyina farba. Sunsum Krɔnkrɔn no tsew hɛn akoma mu. Okenyan hɛn wɔ pɛ do dɛ yɛbɔbɔ bra dɛ mbrɛ nokwar no tse na ɔwasa kyerɛ hɛn kwan a yɛbɛfa do ayɛ no. “Sunsum Krɔnkrɔn no … bɛkyerɛkyerɛ wo ndzɛmba nyina” (John 14:26).
Ɔrekasa fa nsɛm a Oyii kyerɛɛ Nkɔnhyɛnyi Joseph Smith ho no, hɛn Agyenkwa no kãa dɛ:
“Dɛm nsɛm yi mmfi ɔdasanyi biara, na mbom ofi mo hɔ; …
“Na ɔyɛ me ndze na ɔkasa kyerɛ hom no; na mo Sunsum na ɔdze ama hom … ;
“Dɛm ntsi, hom botum agye dase dɛ hom atse me ndze, na hom nyim me nsɛm” (Nkyerɛkyerɛ na Ahyɛmudzi 18:34–36).
Ɔwɔ dɛ yɛhwehwɛ Sunsum Krɔnkrɔn N’ayɛnkoyɛ. Dɛm botae yi wɔ dɛ odzi hɛn adwenpɔwbɔ horow do na ɔma hɛn adwendwen na hɛn ndzeyɛɛ ho kwankyerɛ. Otwar dɛ yɛhwehwɛ biribiara a ɔdze Sunsum no ne nhyɛdo ba na yɛpow biribiara a ɔtwe hɛn fi dɛm nhyɛdo no ho.
Megye dase dɛ Jesus Christ nye hɛn Egya a Ɔwɔ Sor no Dɔba no. Modɔ m’Agyenkwa. M’enyi sɔ Ne kyerɛwsɛm na No nkɔnhyɛfo atseasefo. President Nelson yɛ No nkɔnhyɛnyi. Wɔ Jesus Christ ne dzin mu, amen.