Fie a no mu Ndzɛmba Ɔtoado Esiado Esiado
“Ndzɛmba a wɔyɛ toado esiado esiado’’ no yɛ mberɛw, ɔdomankoma, na kwan papa ma Ewuradze dɛ ɔkyerɛkyerɛ hɛn, dɛ Ne mba, fapem horow a ohia.
M’abrabɔ edwumayɛ na mo som wɔ Asɔr mu no, maayɛ iyi mpempem—naaso mennyɛ bi ara da wɔ mbarimba 15 a wɔtsetse ngua mu wɔ m’ekyir pɛɛ no hɔn enyim. Metse hom mpaabɔ na hɔn dze.
Enuanom na nkyerɛbaa, meyɛ Tonga Ahenman a ɔwɔ South Pacific ɔdehye mapã mbom wɔtsetsee me wɔ America Etsifi. Wiadze nsan yarba no esiw Tongan mberantsɛmba asɛmpasomafo ɔha ɔha, bia mpempem a wɔrosom wɔ wiadze nyina no kwan ma wɔnnsan nnkɔ hɔn kurow mu osian n’ahe a wɔtoo mu no ntsi. Tongan elderfo binom asom bɛyɛ mfe ebiasa na nkyerɛbaa no dze bobor mfe ebien! Wɔdze dza wɔdze nyim hɛn nkorɔfo a ɔyɛ gyedzi tweɔn abotar mu. Sesei dze, mma ɔnnyɛ hom ahobow dodow sɛ hɔn mu bi a wɔrosom wɔ hom ward na stake horow no reyɛ nye me asɛ a—wɔreyɛ mpanyimfo na worufuw dwen. Hɛn enyisɔ asɛmpasomafo wɔ beebiara wɔ hɔn etuhoakyɛ som, mpo sɛ ɔyɛ tsentsen anaa etsĩa koraa sen ma nna hɔn enyi da ho kwan osian wiadze nsan yarba no ntsi a.
Kwesida bi mber a nna meyɛ deacon no, nna mekitsa nsu trae a medze sacrament rokɔ aprɔw wɔ abrandaa no mu ber a ɔbaa bi baa dan no mu. Dɛ m’asɛdze no, mebɛɛn na medze trae no maa no. Ɔbɔɔ ne tsir adze, yerɛɛw n’ano, na oyii nsu kuraba no kor. Ɔammba ntsɛm ammbɛgye paanoo. Sũahu yi n’ekyir mber tsiabaa no, me fie kyerɛkyerɛnyi, Ned Brimley, kyerɛkyerɛɛ me dɛ wɔdze Jesus Christ n’asɛmpa no su na nhyira pii ma hɛn toado na esiado esiado.
Dɛm dapɛn n’ewiei no, Ned na n’adamfo dze adzesũadze bi a mowerɛ nnkefir da baa hɛn fie. Ned bɔɔ hɛn nkaa dɛ Nyankopɔn bɔɔ wiadze no esiado esiado. Ewuradze dze ahwɛyie kɛse kyerɛkyerɛ Moses wɔ kwan a Ɔfaa do dze bɔɔ asaase no mu. Odzi kan, Ɔhyɛɛ ase ber a ɔtsew kan no fi sum ho, nkyii nsu fi wewew do ho. Ɔdze nduadzewa na mbowadoma kãa ho ansaana ɔdze n’abɔdze ne kɛsenara reba asaase fofor a Ɔabɔ no do: adasamba a, ɔdze Adam na Eve hyɛɛ ase.
“Na Nyankopɔn bɔɔ nyimpa wɔ nankasa no su do, Nyankopɔn no su do na ɔbɔɔ no; ɔbɔɔ hɔn ɔbanyin nye ɔbaa. …
“Na Nyankopɔn hun adze a ɔayɛ nyinara, na hwɛ, oye papa’’ (Genesis 1:27, 31).
Ɔyɛɛ Ewuradze enyi sɔ. Na nda a otsĩa esuon no Ɔgyee n’ahom.
Ndzɛmba toado esiado esiado a wɔdze bɔɔ wiadze no mma yehu dza ohia dodoodow nko ma Nyankopɔn, mbom ne siantsir na hɔn a Ɔbɔɔ asaase no dze maa hɔn so.
Ned Brimley dze asɛntsia: “Vai, Nyankopɔn ne fie yɛ bea wɔyɛ ndzɛmba esiado esiado,” hyɛɛ ne nkenyan adzesũadze mu. “N’enyi da wo kwan dɛ ebɔbɔ wo bra esiado esiado. Ntoado papa mu. Ɔpɛ dɛ esom asɛmpakã edwuma mu ansaana awar.” Besi ndɛ, Asɔr baanodzifo rekyerɛkyerɛ seseiara dɛ “Ewuradze n’enyi da aberantsɛba nyimdzefo biara no dɛ ɔnyɛ ahoboa dɛ ɔbɔsom. … Young Women … a wɔpɛ dɛ wɔsom so no wɔ dɛ wɔyɛ ahoboa’’ (General Handbook: Serving in The Church of Jesus Christ of Latter-day Saints, 24.0, ChurchofJesusChrist.org). Nuabanyin Brimley kɔɔr do dɛ: “Nyankopɔn pɛ dɛ ewar ansaana awo mba. Na Ɔpɛ dɛ ekɔ do tu wo talent horow mpon ber a enya nwomasũa.” Sɛ isan mu yi dɛ ennkɔbɔ wo bra atoatoa do a, ibohu dɛ abrabɔ ayɛ dzendzen na basaa.
Nuabanyin Brimley sanee so kyerɛkyerɛɛ dɛ ɔnam No werdam afɔrbɔ do no, Agyenkwa no boa hɛn ma yɛsan ananmu dze ndzɛmba toto esiado esiado wɔ hɛn abrabɔ a ɔnam hɛnara anaa binom hɔn nsanmu yi horow do no ɔayɛ basaa anaa ɔnntoa do no.
Ofi dɛm mber dze kɔ no, meenya “ndzɛmba a ɔtoado esiado esiado’’ ho ahomka. Menyaa sũ dɛ mohwehwɛ ntoado nhwɛdo wɔ abrabɔ na asɛmpa no mu.
Elder David A. Bednar kyerɛkyerɛɛ fapem yi dɛ: “Ber a yesũa adze, na yɛdze Jesus Christ n’asɛmpa no bɔ bra no, ntoado taa yɛ nkyerɛkyerɛ. Hwɛ, mfatoho, adzesũadze a yesũa fa sunsum mu ehiadze fi dza osisii etsitsir a wɔbae ber a wɔdze Agyenkwa n’asɛmpa ne mãhyɛ saan ananmu wɔ nda a odzi ekyir yinom nyehyɛɛ ho.’’
Elder Bednar kyerɛɛw Enyido-adzehu a Odzi kan na Moroni a opuei Joseph Smith do no nkorkor dɛ ɔrekyerɛkyerɛ nkɔnhyɛnyi banyinba no, Nyankopɔn no su na suban na odzi kan, Mormon Nwoma na Elijah hɔn asɛdze a wobedzi wɔ Israel hɔn mboano wɔ ntwamutam n’afã ebien wɔ mberano a odzi ekyir yi mu na odzi do.
Elder Bednar dze wie dɛ: “Dɛm nkenyan ntoado yi kyerɛkyerɛ fa sunsum mu ndzɛmba ho a ohia kɛse ma Nyankopɔn” (“ The Hearts of the Children Shall Turn ,” Liahona, Ɔberɛfɛw 2011, 24).
Adze kor a meehu nye dɛ “ndzɛmba a wɔyɛ toado esiado esiado’’ no yɛ mberɛw, ɔdomankoma, na kwan papa ma Ewuradze dɛ ɔkyerɛkyerɛ hɛn, dɛ Ne mba, fapem horow a ohia.
Yɛaba asaase do dɛ yebosũa adze na yeenya sũahu a nkyɛ yennkenya. Hɛn mpontu yɛ soronko ma hɛn mu kor biara dɛ ankorankor na adzehia tsitsir wɔ Ɔsor Egya ne nhyehyɛɛ mu. Hɛn honandua na sunsum mu nyin hyɛ ase nkakrankakra na otu mpon bɔkɔɔ ber a yenya sũahu ntoado.
Alma kã tum asɛmpa fa gyedzi ho—ɔdze aba mfatoho rekasa no, aba, a, sɛ wotutu ho na wogugu n’ase yie a, ɔhyɛ ase dɛ orinyin fi dua kakraba mu nyin yɛ kɛse a ɔsow eduaba a ɔyɛ dɛw (hwɛ Alma 32:28-43). Adzesũadze no nye dɛ gyedzi benyin ber a yɛma no kwan na yɛnyɛn aba no—anaa Nyankopɔn n’asɛm—wɔ hom akoma mu. Hom gyedzi benyin ber a Nyankopɔn n’asɛm hyɛ ase “yeyer wɔ hom akoma mu’’ (nyiyimu 28). Dɛ “ɔyeyer, na oepue sor, na ɔahyɛ ase rinyin’’ (nyiyimu 30) no yɛ dza yehu na nkyerɛkyerɛ adze ebien. Ɔsan so yɛ ndzɛmba a ɔtoado.
Ewuradze kyerɛkyerɛ hɛn dɛ ankorankor dɛ mbrɛ hɛn ahom a yɛdze bosũa adze na mbrɛ yesi sũa adze tse. Hɛn mpontu gyina hɛn kradoyɛ, hɛn pɛ dɛ yɛbɛyɛ nhwehwɛ mu, gyedzi ne pɛndo, na ntseasee do.
Wɔkyerɛkyerɛɛ Nephi dza Joseph Smith bosũa no Kirtland, Ohio, mfe bɔbor 2,300 ekyir no: “Na hwɛ, dɛm na Ewuradze Nyankopɔn se: Medze me nsɛm bɛma adasamba nsensaaneba tsia nsensaaneba, ahyɛdze tsia ahyɛdze, ha kakra, na hɔ kakra; na nhyira nkã hɔn a wodzi m’ahyɛdze do, na wɔdze hɔn aso ma m’afotu, na wobosua nyansa”(2 Nephi 28:30).
Dɛ yesũa adze “nsensaaneba tsia nsensaaneba, ahyɛdze tsia ahyɛdze, ha kakra na hɔ kakra,’’ yɛ ntoatoado bio!
Hwɛ nsɛmansɛm a odzi do a yɛatse no hɛn abrabɔ mu mpɛn pii no: “Wɔyɛ dza ohia ana wɔayɛ dza ɔfata’’ anaa “Fa numfonsu ma hɔn ansaana nam.’’ Na iyi so ɛ, “Ɔwɔ dɛ yesũa nantsew ana yeetu mbirika’’? Nokwarsɛm yinom kor biara kã biribi a ɔyɛ ntoado.
Anwanwadze yɛ edwuma dɛ mbrɛ ntoado esiado esiado tse. Anwanwadze si sɛ yedzi kan nya gyedzi a. Gyedzi dzi anwanwadze kan.
Wɔsan so hyɛ young men wɔ Aaronic Asɔfodzi dzibew horow no wɔ ntoatoado mu, dɛ mbrɛ nyimpa a wɔrehyɛ no: deacon, kyerɛkyerɛnyi, na afei sɔfo ne mfe a oedzi tse.
Ayɛdze horow a ohia ma nkwagye na nkwagye ntowdo no nyina no yɛ ntoatoado wɔ su mu. Wonuma hɛn ansaana yɛagye Sunsum Krɔnkrɔn n’akyɛdze no. Temple ayɛdze horow no yɛ ntoatoado dɛmara. Nokwar, dɛ mbrɛ me nyɛnko Ned Brimley kyerɛkyerɛɛ me nyansa mu no, sacrament yɛ ntoado—wɔdze paanoo hyɛ ase, na nsu dzi do.
“Na woridzidzi no, Jesus faa paanoo na ohyiraa do, na ɔdze maa n’esuafo no na ɔsee dɛ, Hom ngye ndzi; iyi nye me nyimpadua.
“Na ɔfaa kuraba no, na ɔdaa ase, na ɔdze maa hɔn dɛ, Hom nyinara nnom bi;
“Na iyi nye mo bɔgyaa a ɔyɛ ahyɛmu no dze a dodowara ntsi woruhue egu ama bɔnfafir’’ (Matthew 26:26–28).
Jerusalem na wɔ America mantɔw no, Agyenkwa no hyehyɛɛ sacrament no esiado esiado pɛpɛɛpɛ dɛmara.
“Hwɛ, me fi yɛ fi a wɔyɛ no mu biribiara esiado esiado, na ɔnnyɛ fi a basabasa biara wɔ mu, Ewuradze Nyankopɔn na ɔse’’ (Nkyerɛkyerɛ na Ahyɛmudzi 132:8).
Nnuhu yɛ ntoado. Ɔdze gyedzi wɔ Jesus Christ mu hyɛ ase, mpo sɛ kumaaabi ara. Gyedzi hia ahobrɛadze, a ɔyɛ adzehia tsitsir dɛ ewɔ “akoma a abobɔ nye sunsum a abotow.’’(2 Nephi 2:7).
Nokwar, asɛmpa ne fapem horow anan a odzi kan no toado. “Yɛgye dzi dɛ fapem na Asɛmpa n’ayɛdze a odzi kan no nye, Gyedzi wɔ Jesus Christ mu; otsĩa ebien, Nnuho; otsĩa ebiasa, Nsumuhyɛ enuma a ɔwɔ hɔ ma bɔnfakyɛ; otsĩa anan, Wɔdze nsa rugu wo do ama Sunsum Krɔnkrɔn n’akyɛdze no’’ (Gyedzi ho Nsɛmpɔw 1:4).
Ɔhen Benjamin kyerɛkyerɛɛ no nkorɔfo nokwar a ohia yi: “Na hom nhwɛ ma wɔnyɛ ndzɛmba wɔ nyansa no kwan do; osiandɛ onnhia mma ɔdasanyi dɛ obotu mbirika ntsɛntsɛm asen mbrɛ n’ahom botum. Naaso ohia dɛ omia noho ama oeenya mbirikatu no mu akyɛdze; dɛm ntsi, ɔsɛ dɛ wɔyɛ ndzɛmba nyina wɔ no kwan do’’ (Mosiah 4:27).
Hom mma yɛmbɔ hɛn bra esiado esiado na yɛnhwehwɛ ndzi ntoado no a Ewuradze ahyehyɛ ama hɛn no do. Wobehyira hɛn ber a yɛhwehwɛ na yedzi nhwɛdo na ntoado horow no do a no mu na Ewuradze kyerɛkyerɛ dza ohia dodoodow ma No no. Jesus Christ ne dzin krɔnkrɔn no mu, amen.