Manumalo i le Lalolagi ma Maua le Malologa
Saili ia maua le malologa mai le mau gasu, lē mautonu, ma tiga o lenei lalolagi e ala i le manumalo i le lalolagi e ala i au feagaiga ma le Atua.
O’u uso e ma tuafafine pele, ou te faafetai i le feiloai ai ma outou i lenei taeao mamalu o le Sapati. Ou te mafaufau pea ia te outou e le aunoa. Ou te maofa i le ala tou te vave tali atu ai i soo se taimi tou te vaaia ai isi o mafatia. Ou te tu ma ofo i le faatuatua ma le molimau tou te faaalia pea lava pea. Ou te tagi ona o o outou lototiga, lē fiafia, ma popolega. Ou te alofa ia te outou. Ou te faamautinoa atu ia te outou e alofa lo tatou Tama Faalelagi ma Lona Alo Pele, o Iesu Keriso, ia te outou. La te silafia patino o outou tulaga, lo outou lelei, o outou mana’oga, ma ā outou tatalo mo se fesoasoani. Ou te tatalo pea lava pea mo outou ia outou lagonaina lo La alolofa mo outou.
O le lagonaina o lo La alofa e taua, ona e foliga mai tatou te feagai ma lu’itau i aso uma ma talafou faapopole tagata. Atonu ua e oo i ni aso na e moomoo ai na o le fai lava o le ofumoe, moe faapupuu, ma fai i se tasi e fafagu oe i luga pe a mavae atu uma faigata ma tofotofoga.
Ae, o’u uso e ma tuafafine pele, e anoanoa’i mea matagofie o loo i luma atu. I aso a sau, o le a tatou vaai ai i le faailoaga silisili o le mana o le Faaola e le’i vaai muamua lava i ai le lalolagi. I le va o le taimi nei ma le taimi e toe afio mai ai o Ia “i le mana ma le mamalu tele,” o le a Ia faaee maia avanoa, faamanuiaga, ma vavega lē mafaitaulia i luga o ē faatuatua.
Peitai, o loo tatou ola i le taimi nei i le mea moni o se taimi aupito sili ona faigata i le talafaasolopito o le lalolagi. O mea lavelave ma lu’itau ua tuua ai le tele o tagata e lagonaina le lofituina ma le vaivai. Peitai, mafaufau i se aafiaga talu ai nei e ono faamalamalama ai le auala e mafai ai e oe ma a’u ona maua le malologa.
I le taimi o le fale tatala talu ai nei o le Malumalu o Uosigitone D.C., sa molimauina ai e se sui o le komiti o le fale tatala se talanoaga manino a o ia faafeao atua ni tusitala lauiloa i totonu o le malumalu. Sa te’i lava ua auai atu se aiga talavou i le vaega lea sa mo na’o le au tusitala. Sa tuufesili pea se tasi o failipoti e uiga i le “malaga” a se tagata e ulu i le malumalu a o ia faagasolo i potu sauniga o le malumalu. Sa ia fia iloa pe o le malaga i le malumalu o se faatusa o lu’itau i le malaga a se tagata i le olaga.
Sa faalogo ma le toto’a atu se tamaitiiti o le aiga lea i le talanoaga. Ina ua ulufale atu le vaega o le maimoaga i se potu o faaeega paia, sa faasino atu le tamaitiiti i le fatafaitaulaga, lea e tootutuli ai tagata e osi feagaiga ma le Atua, ma faapea atu, “Oi, e manaia. O le nofoaga lenei mo tagata e malolo ai mai le latou malaga faalemalumalu.”
Ou te masalo sa le’i iloa e le tamaitiiti le loloto tele o lana matauga. Masalo na te le’i malamalama e uiga i le sootaga tuusa’o i le va o le osiga o se feagaiga ma le Atua i totonu o le malumalu ma le folafolaga ofoofogia a le Faaola:
“Ia outou o mai ia te a’u, outou uma o e tigaina ma mafatia i avega, o a’u foi e maloloai outou.
“Ia outou amoina la’u amo, ma ia outou faaa’oa’o ia te au, … ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”2
Uso e ma tuafafine pele, ou te faanoanoa mo i latou o ē tu’ua le Ekalesia ona ua latou lagona ua tele mea ua manaomia mai ia i latou i le avea ai ma tagata auai. Latou te le’i iloaina lava o le osiga ma le tausiga o feagaiga e faafaigofieina moni ai lava le olaga. O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. Faamolemole ia mafaufau loloto i lena upumoni ofoofogia!
O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala. O i latou e ola i tulafono maualuluga atu a Iesu Keriso latou te mauaina Lona mana maualuga atu. O lea, o ē tausia feagaiga e aiā i se ituaiga faapitoa o malologa lea e oo mai ia i latou e ala i a latou sootaga faalefeagaiga ma le Atua.
A o le’i tuuina atu e le Faaola o Ia lava i tiga o Ketesemane ma Kalevaria, sa Ia tautino atu i Ana Aposetolo, “E maua foi outou e le puapuaga i le lalolagi: a ia outou lototetele; ua ou manumalo i le lalolagi.”3 Mulimuli ane, sa Ia augani mai ia i tatou taitoatasi ia faia lea lava mea e tasi ina ua Ia fetalai, “Ou te loto ia outou manumalo i le lalolagi.”4
Uso e ma tuafafine pele, o la’u savali ia te outou i le asō e faapea, ona na manumalo Iesu Keriso i lenei lalolagi pa’ū ma ona sa Ia togiola mo i tatou taitoatasi, e mafai foi e outou ona manumalo i lenei lalolagi ua lofia i le agasala, faaloloto, ma ua tele ina vaivai.
Ona sa togiola e le Faaola, e ala i Lana Togiola le i’u, i tatou taitoatasi mai vaivaiga, measese, ma le agasala, ma ona sa Ia oo i tiga uma, popole, ma avega e te le’i oo lava i ai,5 ona oo lea, pe a e salamo moni ma saili Lana fesoasoani, e mafai ona e manumalo i lenei lalolagi lē mautonu.
E mafai ona e manumalo i mala faataumaoi faaleagaga ma faalelagona o le lalolagi, e aofia ai le faasausili, faamaualuga, ita, ola lē mama, inoino, matape’ape’a, lotoleaga, ma le fefe. E ui i mea faalavefau ma mea leaga ua siomia ai i tatou, e mafai lava ona e mauaina le malologa—o lona uiga, o le mapusaga ma le filemu—e oo lava i le lotolotoi o ou faafitauli sili ona faigata.
O lenei upumoni taua ua uunaia ai ni fesili autu se tolu:
Muamua, o le a le uiga o le manumalo i le lalolagi?
Lua, e faapefea ona tatou faia?
Ma le tolu, e faapefea e le manumalo i le lalolagi ona manuia ai o tatou olaga?
O le a le uiga o le manumalo i le lalolagi? O lona uiga o le manumalo lea i le faaosoosoga ia popole atu i mea a le lalolagi nai lo mea a le Atua. O lona uiga o le faatuatuaina o le mataupu faavae a Keriso e sili atu i lo filosofia a tagata. O lona uiga o le fiafia i le upumoni, ta’uleagaina le taufaasese, ma avea ma “soo lotomaualalalo o Keriso.”6 O lona uiga o le filifili e ‘alo’ese mai soo se mea e alu’ese ai le Agaga. O lona uiga o le loto e “lafoai ese” e oo lava i a tatou agasala sili ona tatou fiafia i ai.7
Ia, o le manumalo i le lalolagi e mautinoa lava e lē faapea o le atoatoa i lenei olaga, po o le faapea foi o le a mou ese faamaneta ou faafitauli—auā e leai. Ma e lē faapea foi o le a e lē toe faia ni measese. Ae o le manumalo i le lalolagi o lona uiga o le a faateleina lou tetee atu i le agasala. O le a faamalūlūina lou loto a o faateleina lou faatuatua ia Iesu Keriso.8 O le manumalo i le lalolagi o lona uiga o le tuputupu a’e i le alofa i le Atua ma Lona Alo Pele e sili atu i lo lou alofa i soo se tasi po o soo se mea.
E faapefea la ona tatou manumalo i le lalolagi? Sa aoao mai e le Tupu o Peniamina ia i tatou le auala. Na ia aoao mai e faapea “o le tagata natura o se fili i le Atua” ma e tumau pea faapea e faavavau “vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii.”9 O taimi taitasi e te saili ai ma mulimuli i uunaiga a le Agaga, o taimi taitasi e te faia ai soo se mea lelei—mea e lē faia e “le tagata natura”, ua e manumalo i le lalolagi.
O le manumalo i le lalolagi e le o se mea e tupu i se aso se tasi pe lua. E tupu i le olaga atoa pe a tatou taliaina pea lava pea le mataupu faavae a Keriso. Tatou te faafaileleina le faatuatua ia Iesu Keriso e ala i le salamo i aso taitasi ma tausia feagaiga ia e faaee mai ai le mana ia i tatou. Tatou te tumau i luga o le ala o feagaiga ma faamanuiaina i le malosiaga faaleagaga, faaaliga faaletagata lava ia, faateleina o le faatuatua, ma auaunaga a agelu. O le ola i le mataupu faavae a Keriso e mafai ona tupu mai ai le taamilosaga mamana o le mamā, lea e fatua’i ai le malosiaga faaleagaga i o tatou olaga.10
Pe a tatou tauivi e ola i tulafono maualuluga atu a Iesu Keriso, o le a amata ona suia o tatou loto ma o tatou natura tonu lava. E siitia e le Faaola i tatou i luga a’e o faaosoosoga o lenei lalolagi pa’ū e ala i le faamanuiaina o i tatou i le alofa mamā sili atu, lotomaualalo, agaalofa, agalelei, loto-pulea, filemu, ma le malologa.
Ia, atonu tou te manatu e foliga mai o lenei mea o se galuega faaleagaga mamafa lava nai lo se malologa. Ae o le upumoni silisili lenei: e ui e manatu pea le lalolagi o le pule, o meatotino, lauiloa, ma mea faafiafia o le tino e aumaia ai le fiafia, ia e leai! E lē mafai lava ona latou aumaia. E leai se mea latou te fofoaina ae ua na o se suitulaga gaogao mo “tulaga manuia ma le fiafia” o i latou o e e “tausi i poloaiga a le Atua.”11
O le upumoni lava, e matua sili ona vaivai le saili o le fiafia i nofoaga e lē mafai ona e maua ai! Peitai, pe a e mulimuli oe lava ia ia Iesu Keriso ma faia le galuega faaleagaga e manaomia e manumalo ai i le lalolagi, o Ia, ma e na’o Ia lava, o loo i ai le mana e siitia ai oe i luga a’e o faaosoosoga o lenei lalolagi.
Ia, e faapefea e le manumalo i le lalolagi ona manuia ai o tatou olaga? Ua manino lava le tali: o le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu. Faamolemole ‘aua ne’i malamalama sese i a te a’u: Ou te le’i fai atu o le osia o feagaiga e faigofieai le olaga. O le mea moni, ia faamoemoeina ni mea faafeagai, ona e lē manao le fili ia te oe ia mauaina le mana o Iesu Keriso. Ae o lou mulimuli o oe lava ia i le Faaola o lona uiga e te mauaina Lona mana faamalosiau ma togiola.
Ou te toe faamautu atu se aoaoga loloto a Peresitene Ezra Taft Benson: “O alii ma tamaitai o ē ua liliu atu o latou olaga i le Atua o le a latou iloa e Na te mafai ona faia mea sili atu i o latou olaga nai lo mea latou te mafaia. O le a Ia faalolotoina lo latou olioli, faalautele la latou vaaiga, faamalamalama o latou mafaufau, … sii a’e o latou agaga, faatele o latou faamanuiaga, faateleina o latou avanoa, faamafanafana o latou agaga, faatulai uo, ma liligi mai le filemu.”12
O nei avanoa lē mafaatusalia e mulimuli atu ia i latou o ē saili atu i le lagolagosua a le lagi e fesoasoani ia i latou ia manumalo i le lalolagi. I lea tulaga, ou te faalautele atu ai i tagata o le Ekalesia atoa le poloaiga lava e tasi na ou tuu atu i o tatou talavou matutua ia Me talu ai. Sa ou augani atu ia i latou i lena taimi—ma aioi atu ia te outou i le taimi nei—ia pulea e oe lava ia lau lava molimau ia Iesu Keriso ma Lana talalelei. Galue i ai. Faafailele ina ia tuputupu a’e. Fafaga i upumoni. ‘Aua ne’i faaleagaina i filosofia sese o alii ma tamaitai lē talitonu. A o e faia le faamalosiga faifai pea o lau molimau ia Iesu Keriso ma au faamuamua sili ona maualuga, vaavaai mo ni vavega e tutupu i lou olaga.13
O la’u ‘ai’oiga ia te outou i lenei taeao o le saili lea ia maua le malologa mai le mau gasu, lē mautonu, ma tiga o lenei lalolagi e ala i le manumalo i le lalolagi e ala i au feagaiga ma le Atua. Ia faailoa atu ia te Ia e ala i au tatalo ma au amioga ua e manatu mamafa i le manumalo i le lalolagi. Ōle atu ia te Ia e faamalamalama lou mafaufau ma auina mai le fesoasoaniga o loo e manaomia. O aso taitasi, ia faamaumau ai mafaufauga e oo atu ia te oe a o e tatalo; ona mulimulita’i ai lea ma le filiga. Ia faaalu se taimi tele atu i le malumalu ma saili ia malamalama i le auala o loo aoao ai oe e le malumalu ia tulai a’e i luga atu o lenei lalolagi pa’ū.14
E pei ona ou ta’ua muamua, o le faapotopotoina o Isaraelu o le galuega aupito sili lea ona taua o loo tupu i le lalolagi i le taimi nei. O le tasi elemene taua o lenei faapotopotoina o le sauniaina lea o se nuu o ē malolosi, saunia, ma agavaa e talia le Alii pe a toe afio mai o Ia; o se nuu ua uma lava ona latou filifilia Iesu Keriso i lo le lalolagi pa’ū; o se nuu o ē olioli i lo latou faitalia e ola ai i tulafono maualuluga atu ma paia atu a Iesu Keriso.
Ua ou valaau atu ia te outou, o‘u uso e ma tuafafine pele, ia avea ma lenei nuu amiotonu. Ia faataua ma faamamalu au feagaiga i lo isi uma tautinoga. A’o e faamuamua ai le Atua i lou olaga, ou te folafola atu ia te oe le filemu sili atu, talitonuga maumaututu, olioli, ma ioe, le malologa.
Faatasi ai ma le mana o le tofiga paia faaaposetolo ua ia te a’u, ou te faamanuia ai outou i la outou sailiga ia manumalo i lenei lalolagi. Ou te faamanuia ia te outou ia faateleina lo outou faatuatua ia Iesu Keriso ma aoao atili pe faapefea ona utuvai mai i Lona mana. Ou te faamanuia ia te outou ia mafai ona outou iloatino le mea moni mai le mea sese. Ou te faamanuia ia te outou ina ia outou popole atili i mea a le Atua nai lo mea o le lalolagi. Ou te faamanuia ia te outou ia iloa manaoga o i latou o siomiaina outou ma faamalolosia i latou tou te alolofa i ai. Ona na manumalo Iesu Keriso i lenei lalolagi, tou te mafaia foi. O lea ou te molimau atu ai i le suafa paia o Iesu Keriso, amene.