Tohnpadahk kan en Kaun en Meleilei
Ni atail wie nannanti en koadoahke mwohmw kan en Krais, kitail kak wiahla mehn doadoahk kan en Sapwellime meleilei nan sampah.
Pwehn kapwaiada kokohp me kohieng Sekaraia,1 Sises ketilong nan kahnihmw sarawio ni ah dake ahs men, me wehwehki nan mwohmwen inting ehu e wia “kilelepen me lapalap ong mehn Suhs en mahs ako,”2 me udahn pwungehng Nahnmwarki en nahnmwarki kan oh Kaun en Meleilei.3 Tohtohn tohnpadahk pereperen kei me kapilpene Ih me perekipeseng arail likou kan, tehn pahm kan, oh soangen tehn tuhke teikan nan ahl me Sises ketin aluhier ie. Irail kepingahier Koht, ni arail wie weriwerki, “Koht en ketin kupwuramwahwih nanmwarki me ketiket kohdo ni mwaren Kauno: popohl ong nanleng oh kaping ong Koht.”4 Oh kapwurehieng, “Kaping ong Ih me kisehn kadaudok en Depit; Kauno en ketin kupwuramwahwih me ketket kohdo ni mwaren Kauno; Kaping ong Koht.”5 Kemwekid kaselel wet, me kitail kin kauawih rahnet me kahdaniki Rahn Sarawi en Rahmwus, wiahier ansoun popohl ehu mwohnte kemwekid kaweikek kan me pahn wiawi nan erein wihk me imwisek kihla meiroang en pein ih me atail Sounkomouro ketin wiahier oh mwekid kopwuriamwei en sousou tehno.
Ni atail wia Sapwelime werek kei, kitail wia Sapwelime aramas ehu soahng kei, me alehdier pwukoahn kalohngki Sapwelime kamwahu kan, 6 soun kakehlaka meleilei me sang Ih oh Sapwelime meiroang en tomwo. Meleilei wet wia kisakis en inou ehu ong koaros me pahn wekidehng arail mohngiong kan ong Sounkomouro oh momourki pwung, soangen meleilet pahn kalehlakai kitail en ahneki nsenamwahu nan mour wet oh elehieng kitail en kak powehdi songosong kamedek kan nan atail seiloaket.
Nan pahr 1847, Kauno ketkihda iren kaweid mengihtik pwukat ong Souleng en paionihr koa me anahnehda meleilei pwe irail en kak ahneki nsenamwahu oh ehupene ni arail sohpai kahpwal sohkasikpe koa nan arail seiloak lahng pali kapi. Kauno ketin kaweid ki Souleng koa irail en “uhdihsang akamaipene nan pwungarail, uhdihsang kauwe emen emen.”7 Pwuhk sarawi kan ketihtihki me irail kan me kin songosong wia doadoahk pwung kan oh nantiheng en ahneki karakarahk en Ngehn en Kauno alehdier inou en meleilei me irail anahne pwehn kak mourla nan rahn en pingiping kan me kitail mihmi loale rahn pwukat.8
Ni atail wia tohnpadahk kei en Kaun en Meleileio, kitail alehdier kaweid kitail en momour oh “katengepene ar mohngiong kan oh limpoakpene.”9 Atail soukohp kempoake, Preseden Russell M. Nelson, me keren kosoia, “Uhpene kin kauwehla soahng koaros me Sounkomouro ketin kasalehda oh padahngki.”10 Atail soukohp pil peki ni ngidingid me kitail en wia uwen atail kak en kauhdi pein atail pingiping kan me ansouwet inenen kehlail nan atail mohngiong kan oh atail mour kan.11
Kitail en medewe padahk pwukat me kasalehda Sapwelimen Krais limpoak mwakelekel ong kitail oh me kitail, nin duwen atail wia Sapwellime tohnpadahk kei, kin nantiheng limpoakpene. Pwuhk sarawi kan kawehwehda soangen limpoak wet me wehwehki limpoak mehlel.12 Ansou me kitail kin medewe limpoak mehlel, atail madamadau kan pak tohto kin medewehda doadoahk en kadek kan oh sawas akan ong epwelpen irail akan me ahneki kahpwal en paliwar, dipwisou, de kahpwal akan en palien pepehm. Pil duwehte, limpoak mehlel sohte ongete mehkot kitail sewesehki emen, ahpw e wia mwohmw ehu en Sounkomouro oh kak wiahla kisehn mwomwen pein kitail. E sohte kopwuriamwei me Kauno ketin kaweid kin kitail en likawihada ehupenehn limpoak mehlel, “me wia ehupenehn unsekla oh meleilei.”13 Ma sohte limpoak mehlel, sohte kitail mehkot14 oh kitail sohte kak sohsohki wasa me Kauno ketin kaunopehng kitailehr nan tehnpesen Samatail Nanleng.15
Sises ni unsek kasalehda ia wehwehn en ahneki ehupene wet en unsekla oh meleilei, ni mehlel ansoun sohpai irair kaweikek koa me wiawi mwohnte Ah kamakamalahu. Medewe ansou kis me pid dahme Sises ketin pehm ni Ah ni karakarahk widen nehn Sapwelime werek koa, ni Ah ketin wehwehki me emen irail pahn pangala Ih pwohngohte.16 De ansou me Sises, awa kei mwuri, ni mahk kamwahuihala salengen emen ohl me iangih Sudas koa, me pangala Ih o, pwehn ares Ih.17 De pil ansou me Sises, keskesihker mwohn Pailet, alehdi kopwung sapahrek sang prihsd lapalap oh elder koa, oh sohte lepin lokaia ehu me E ketin mahsanih me uhweng dihp likamw me irail karaunehki Ih, oh E ketin kahrehda kepina en mehn Roman o ah ahneki madamadau laud.18
Sang nan kemwekid kapahtou siluh pwukat, Sounkomouro, mendahte ah toutoukilahr pahtou oh kapwunod laud, kaweid kin kitail sang ni Ah karasaras me “limpoak me kanengamah, oh kadek; … sohte kin peirin; … de aklapalap, de pohnmwahso, limpoak sohte kin aklemei, e sohte kin mehwo, de kin mwadang lingerngerda, [oh] limpoak sohte kin perenkihda me sapwung.”19
Ehu pali kesempwal me konehng kasansalada, oh ehu me inenen kesempwal ong atail wia werek kei oh duwen atail pahn kasalehda meleilei en Sounkomouro, iei mwomwen atail kin ehu ong mehteikan. Erein Sapwelime doadoahk pohn sampah, Sapwelimen Sounkomouro padahk kan doke—kaidehnte, ahpw ni mehlel—me mwahu kan en limpoak, limpoak mehlel, kanengamah, karakarahk, oh kadek—kasalepen mwohmw keioun kesempwal kan ong irail kan me men karanihala Ih oh kalaudehla Sapwelime meleilei. Soangen mwohmw pwukat wia kisakis kei sang Koht, oh ni atail pahn nantiheng kakairada ong pein kitail, kitail pahn kak tepida kilang wekpeseng kan oh luwet akan en mehn impatail kan ni atail pahn poakehla, esehla kasawihada, wauneki, oh kanengamah. Ehu kilel me keioun sansal me kitail karanihalahr Sounkomouro oh duhduwehla Ih iei mwomwen atail kin kasalehda limpoak, kanengamah, oh kadek ong riatail kan, mehndahte irair kan.
Pak tohto kitail kin kilang aramas akan me kin iang wia lokaia me sohte mwahu oh pil laumwoahmw ong me pid mwohmw akan me irail esehda, luwet akan, oh en ekei pepehm kan, ni mehlel ansou me soangen mwohmw oh pepehm kan weksang de uhweng duwen arail kin wia mehkot de arail madamadau. E inenen man kitail en kilang soangen aramas kat me kin peuse koasoai kan ong mehteilan, me kin uhd kapwurehieng soahng kan irail rong ni arail sohte wehwehki soahng koaros me pidada irairo. Sohsal mihdia kin kangoange soangen tiahk wet ni eden me e kak mehlel ong emen ah sohte mehlel ong mehteio oh mengein kasawihada. Pwehki sohte mehkot kak kauhdi, lokolokaia penehn nan technology pak tohto kin elehieng ekei aramas en kak kauwe emen oh akamaipene, me kin wiahda kansensued kan, kauwehla mohngiong kan, oh kadaurpeseng mwekid in uhpene.
Nihpai kohpada me nan imwin rahn akan, aramas kailok kan pahn mwehlda oh arihada mehteikan en lingernger ong soahng kan me mwahu.20 Pwuhk sarawi kan padahngki me “soahng koaros me kin kahrehieng aramas en wia me mwahu, oh poakoahng Koht, oh papah Ih, kohsang rehn Koht.”21 Ahpw, “mehkot me suwed kohsang rehn tepilo; pwe tepilo wia imwintihti en Koht, oh kin uhwong ih ansou koaros, oh kin luke oh kasongsongeh aramas en wiahda dihp, oh en wia soahng kan me suwed ansou koaros.”22
Medemedewe padahk en kokohp wet, e sohte wia mehkot kopwuriamwei me ehu en imwintihtio ah doadoahk iei en arihada uhpene oh kailok nan mwohngiong kan en Sapwelimen Koht seri kan. E kin inenen peren ah kin kilang aramas kaukauwe, kokouruhrki, oh kamwamwahlih emen emen. Soangen tiahk wet kak kauwehla mwomwen aramas emen, ede, oh ah pepehm ong pein ih, mehlel ni ah pahn alehdi kopwung me sapahrek. E inenen kesempwal en kasalehda me ansou me kitail mweidehng soangen madamadau nan atail mourkan, kitail wiahda wasa nan atail mohngiong kan ong atail imwintihtio en padokedi weren uhpene nan pwungatail, me kak elehda kitail en pwupwidieng nan ah lidip.
Ma kitail sohte kanaiehng atail madamadau, lokaia, oh wiewia kan, kitail kak lohdiehng widing en imwintihtio, kauwehla nanpwungmwahu en kitail oh mehn mpatail oh kompoakepatail kan.
Riei kan, ni atail wia Sapwellimen Kauno aramas oh soun kalaude Sapwellime meleilei, kitail en dehr mweidehng soangen widing pwukat en tepelo en wiawi nan mwongiongatail kan. Kitail en dehr wahda soangen wisik toutou wet me kin kauwehla nsensamwahu, nanpwungmwahu, oh pil mour kan. Rongamwahu wet iei rongmwahu en popohl laud.
Ei mehlel, sohte emen kitail unsek, oh ni mehlel, mie ansou kan me kitail kin lohdieng nan soangen mwekid wet. Nan Sapwelime limpoak unsek oh marain unsek ong soahng kan kitail kin mengei en lohdieng pwehki atail wia aramas, Sounkomouro ansou koaros kin songosong keperkin kitail soangen kahpwal pwukat. E ketin padahkiheng kitail, “Pwe Koht pahn ketin kadeik kumwail nin duwen amwail kin kadeik meteikan: oh e pahn ketin sohngkin kumwail mehn sohngohte me kumwail kin sohngki meteikan.”23
Riei ohl oh lih akan, ni atail nantiheng alehdi soangen mwohmw kan me Sounkomouro ketin ahneki, kitail kak wiahla mehn doadoahk ong Sapwelime meleilei nan sampah me duwehte mwohmw me Pein Ih kauwadahr. I luke kumwail en medewehda ahl akan me kitail kak wekidehng pein kitail ong aramas ekei me kin kamarahda oh utungada, aramas ekei me ahneki mohngiong me kin wehwehki oh ahneki mahk, aramas ekei me kin kilang me mwahu rehn mehteikan, tamataman ansou koaros me “ma mie mehkot mwahu, kaselel, de adamwahu de konehng ale kapai, kitail kin kadoahke soahng pwukat.”24
I inou kiheng kumwail me ni atail pahn kadoahke oh ahnekihla soangen mwohmw pwukat, kitail pahn ahnekihla kadek oh kak kasawihada anahn en kempoakepahtail kan25 oh pahn ahneki popohl, meleilei, oh keirdahn palingehn.26 Ni mehlel, Kauno pahn kasawihada atail nannanti oh ketkiheng kitail kisakis kan kitail anahne pwe kitail en kakehng alehda oh ahneki kanengamah ong wekpeseng en lamalam kan, luwet akan, oh soh itarkan. Oh patehng, kitail pahn kak soikala pepehm en alehda saroh de kasarewe irail kan me kamedekei kitailla. Duwehte dahme Sounkomouro ketin wiahier, atail ineng en mahkeng irail kan me wie suwed ong kitail de kauwei kitail pahn udahn laudla oh pahn wiahla kisehn soangen aramas dahkei kitail.
Kitail en rahnwet, Rahn Sarawi wet, perekipeseng atail likoupuhp en limpoak oh tehn pahm en limpoak unsek en Krais, alialu nan lipwen Kaun en Meleilei ni atail kaukaunop en kawawih Rahn Sarawi kohkohdoh mwekid kopwuriamwei en sousou tehno. Ni atail wia perien ehu rehn Krais, kitail en ni popohl kalohngki, “Kaping ong ih me kisehn kadaudok en Depit: Koht en ketin kupwuramwahwih me ketiket kohdo ni mwaren Kauno: Kaping ong Koht.”27
I kadehde me Sises Krais ieias oh me Sapwelime limpoak unsek, me E ketin kasalehda Sang Sapwelime meiroangen tomwo, kohieng koaros me inangih ieiang Ih oh insenamwahuki Sapwelime meleilei nan sampah oh nan mour me pahn kohdo. I patohwan mepwukat ni mwahr sarawi en atail Sounkomour oh Soundoar, Sises Krais, ahmen.