Tiepene Lap
Ansou Koaros Pasapeng iei Sises Krais
Kapokon lap en Epreil 2023

Ansou Koaros Pasapeng iei Sises Krais

Sang Preseden Russell M. Nelson

Preseden en Mwomwohdiso en Sises Krais en Souleng en Imwin-rahn akan

Sohte lipilipil ahmw peidek oh kahpwal kan, ansou koaros pasapeng kin dierek nan mour oh padahk kan en Sises Krais.

Riei ko, pali ngenitail audaud dahr erein rahn riauet. Pwihn en koul pil ngilamwahu. Irail kan me padahk wia dipwsoun doadoahk kei rehn Kauno. I kapakapki me kumwail pahn peki Ngehn Sarawio en kaweid kin kumwail soahng koaros me mehlel me kumwail kilang oh rongehr sang wasahn padahk wet. Irail udahn pekeder dohsang nanleng.

Wihk ehu sang rahnwet pahn wia Rahnsarawi en Ihster. E wia kaudok keieu kesempwal ohng irail kan me kin idawehn Sises Krais. Udahn ih kahrepen atail kin kawauwih Krismas iei pwehki Ihster. Pwuhk en Kohdo, Idawehnie wasahn kaskuhl en wihket pahn kaweid kumwail en kaskuhlki Sapwellimen Sounkomouro ketlong en powehdi nan Serusalem, Ah ketin kamwakele tehnpas sarawio, Sapwellime lokolok nan Mwetuwel en Kedsemeni, Ah ketin kalohpwuhlao, Sapwellime Iasadao, oh Ah ketin pwarek irail kan me kin idawehn Ih.1

Alehda ire tikitik sarawi pwukat oh rapahkihda soangen wiepehkan me kumwail kak kaping kiong Samatail Nanleng pwehki Ah ketin kadaredohng kitail Sapwellime Iehroso.2 Pwehki Sises Krais, kitail kak koluhla oh ale mahkepen dipatail kan. Pwehki Ih, emen emen kitail pahn iasada.

I pil lukei kumwail en pwurehng onopki ire me pid Sounkomouro Ah pwarek mehn Nihpai kan nan Amerikao, me ntinting nan 3 Nihpai. E sohte werei mwohnte Ah pahn pwaradao, aramas akan rongadahr kepitiehu, ni ngil tikitik me masanih:

“Kumwail sohte pahn pwurodo rehi met, oh koluhkihla dipamwail kan, oh wekidala amwail mour, pwe ien kamwahuih kumwail la?

“… Kilang, I kapawehr limeikat pwe ien mahkong kumwail, eri mehmen me pahn kohdo, e pahn wiahla Sapwellimei.”3

Riei ohl oh lih kan, Sises Krais pil ketin wihwiahte soangen luhk wet ong kumwail rahnwet. I peki kumwail en kohdo Reh pwe en kamwahuih kumwailla! E pahn ketin kamwahuih kumwailla sang dipamwail kan ma kumwail koluhla. E pahn ketin kamwahuiala amwail nsensuwed oh masepwehk. E pahn kamwahuiala amwail ohla kan en sampah wet.

Sohte lipilipil ahmw peidek oh kahpwal kan, ansou koaros pasapeng kin dierek nan mour oh padahk kan en Sises Krais. Esehla laud duwen Sapwellime Tomwo, Sapwellime limpoako, Sapwellime mahko, Sapwellime padahk mehlelo, oh Sapwellime rongamwahu kopwurpwurdo en kamwahuiala oh kakairada. Pwuralahng Reh! Idawehn Ih!

Sises Krais iei kahrepen atail kin kauwada tehnpas sarawi kan. Ehu ehu iei Sapwellime tehnpas sarawi. Wiahda inou sarawi kan oh alehda tiahk sarawi kesempwal kan nan tehnpas sarawi, oh pil raparapahki pwe kumwail en karaniala Ih wasao, pahn kapaida amwail mour me sohte ehu soangen kaudok kak wia. Pwehki kahrepe wet, kitail wiewia uwen atail kak koaros pwe kapai kan en tehnpas sarawi en kak lelohng memper koaros nan sampah wet. Rahnwet, I pereniki ahi pakairki aht koasoandi en kauwada ehu tehnpas sarawi kapw nan ehu ehu wasa pwukat:

  • Retalhuleu, Guatemala

  • Iquitos, Peru

  • Teresina, Brazil

  • Natal, Brazil

  • Tuguegarao City, Philippines

  • Iloilo, Philippines

  • Jakarta, Indonesia

  • Hamburg, Germany

  • Lethbridge, Alberta, Canada

  • San Jose, California

  • Bakersfield, California

  • Springfield, Missouri

  • Charlotte, North Carolina

  • Winchester, Virginia

  • Harrisburg, Pennsylvania

Riei ko, I kadehde me Sises Krais kin kaweid koasoandihkan en Sapwellime Mwomwohdiso. I kadedeh me idawehn Ih iei ihte ahl me kitail kak dadaurki atail peren. I ese me Sapwellime manaman kin mihmi pohn irail kan me kin kolokol Sapwellime inou sarawi kan, irail kan me “silasilkihdi me pwungo oh manaman en Koht ni lingan lapalap.”4 I kadedeh, sang ni ahi limpoak oh kapaida emen emen kumwail, ni lengileng sarawi en Sises Krais, ahmen.

Nting