Tamataman Dahme Keieu Kesempwal
Ihme keieu kesempwal iei nanpwungen kitail oh Samatail Nanleng oh Sapwellime Iehroso, atail peneinei kan, oh men mpatail kan, oh atail kin mweidohng Ngehn en Kauno en kaukauweid kitail.
Ni atail tamanda imwin wihket ni ansou me atail Sounkomouro ketlong nan Serusalem mwohnte Ah pahn ketin tohnmeteikihla pein Ih, I men kapwurehiengete Sapwellime mahsen en koapwoaroapwoar oh koaloalamwahuo: “Ngehi me mour sapahl oh Sounkomour: Mehmen me pwoson ie, mehnda ma e pahn mehla, ahpw e pahn mour.”1
I poakohng Ih. I kamehlele Ih. I kadehde me Ih me Mour Sapahl oh Sounkomouro.
Kadehde wet kin kansenamwahuih ie oh kakehlakaie nan erein sounpar pahieu elep samwalahra, ahi pwoud Barbara ah mehsangiehu. I kin loaloidki.
Pak tohto, I kin wie medewemedewe duwen aht kapwopwoud soutuk oh aht kin wie mihmi pene ni ah momouro.
I ehukiong kumwailehr duwen ai tepin tuhong Barbara oh ia mwomwen dahme I lelohngo eh padahkiongie ien doadoahngki ahi koahiek en “kin nantiheng rapahki” me i esehla nan ahi misin. I kin tehkmwahu ansou koaros mwurin aht tepin tuhpenehu pwehki e masamwahu, oh eme kin kediropw. I mwadangete poakpoakehla pwehki e kin pereniki oh mwahu ehng aramas. I kapingki wen ah nohn kaded oh mwahu. I kehn me e koasoandi me kiht me pahn ehupene. Nan ahi madmadau e wia mehkot mengei.
Ngehi oh Barbara kin tuhtupenehr, oh aht ehupenehr wie kekeirda, ahpw e saik kamehlele me ma e pahn pwoudkinie wia pilipil pwung ehu.
Ohng ie I sohte anahne ese; ahpw ohng Barbara e anahne ese. I ese ma se pahn ehupene kaisihsol oh kapakapiki irehu, Barbara pahn alehdi pasapeng sang nanleng.
Se sohte tuhpenehki wihk ehu pwe sen kak kaisihsol oh kapakapki pwe emen emen kiht en kak pein esehda pasapeng. Wen ai paiamwahu, pwe e pil alehdi pasapeng me duwehte ahio. Luweh kau koaros, me koaros ese, me sohte anahne kapwkapwurehieng pwe e dehdehier.
Ansou me Barbara mehlahu, nait serihko kidiong pohn moangen ah sousouo mehn kaweid kei me e men irail en tamtaman. Ehu mehn kaweid ko iei “dahme keieu kesempwal pahn mihmi werei.”
Rahnwet I pahn ehukiong kumwail sang nan ahi mohngiong pepehm oh madamdau kei ong dahme keieu kesempwal.
Keieu, ehupenehn nanpwungen kitail oh Samatail Nanleng oh Sapwellime Iehroso, Kaun Sises Krais, me keieu kesempwal. Ehupene wet inenen kesempwal ong ansou wet oh pil nan mour soutuk.
Keriau, ehupenehn nanpwungen peneinei pil iang wia mehkot me keieu kesempwal.
Wasa koaros me I papah ie, I pwarek aramas tohto oh peneinei tohto me kin lelehng nan kahpwal laud pwehki sang ni ohlahn sahpw akan me rasehng rerrer en sahpw, melimel, de lapake ape. Tohto me anahne kohkohlahsang wasahn arail kouson oh kosoula ekis wasa, me duhpekla oh masepwehkada. Irail anahne sawas en wini, mwenge, oh ihmw.
Irail pil anahne arail peneinei kan.
I kak kilang me ekei irail sohte ahniki kapai en limpoak en peneinei me karanih irail, eri kahrehda I kapatahieng peneinei laud kan, kempoakepahrail kan, oh pil iangahki peneinei en nan ward kan en wiahki ehu “peneinei.” Ehupene pwukat inenen kesempwal ong pepehm en paliwar oh roson en paliwar.
Ehupene pwukat pil kin kiong kitail limpoak, popohl, peren oh madamadau ehute.
Kakairada ehupene kesempwal pwukat wia pilipil ehu. Pilipil en wia kisehn peneinei anahne en mie ngoang, limpoak, kanengamah, wehwepene, oh mahk.2 Mie ekei pak me kitail sohte pahn kin pwungpene, ahpw kitail kak wia ni atail pahn kin pilada en kin pwungkipenehte ehu. Ni ansou en kakahs oh ahnsou me pwopwoud, kitail sohte kin madangete limpoakehng emen de limpoak sohte kin mwadangete sohrasang kitail me likamw mehn seked ehu me kak kamwakid seli. Kitail kin pilada kitail en poakpene oh utuhtpene. Kitail pil kin wia soahngohte ong ehupenehn nanpwungen kitail oh atail peneinei kan de kempoakepahtail kan me duwehte atail peneinei.
Nan mahsen en peneinei kalohk ehu ong sampa koasoia me “pilahn sarawi en peren kin kahrehieng ehupenehn nanpwungen peneinei en kak doulahte mwurin sousouo. Tiahk oh inou sarawi kan me mie ihte nan tehnpas sarawi kan kin kahrehieng emenemen aramas en kak pwurala rehn Koht oh kahrehieng peneinei kan en kak patpene kohkohlahte.”3
Ehu mehkot me pil keieu kesempwal iei idawehn kaweid en Ngehno nan atail ehupene kesempwal kan oh atail kak koaros en poakoahng mehn mpatail kan duwehte pein kitail, iangahki atail sawas rir oh sansal kan. I esehla iren kaweid wet ni ansou me i wia bisop men.
Ehu pwohngo, ansou en sinoh udahn lomwlomwur, I pwandin pwurasang ni ahi ohpiso i ahniki pepehm kehlail ehu ien pwarek liohdi men en aht wardo. I kilang nei kuloako—kuloakehr 10:00 nihpwong. I nda me e nohn pwandala ien kohla pwarek. Oh pil ehu, sinoh wie mweremwer. I ahpw medewehda I nek pwarek nimenseng pwe I de kawehla ah onopek pwe pwongilahr. I lel nihmwo oh wendi ahpw I sohte nsenamwahuki oh wekwekidekkiseli nihpwongo pwehki Ngehno kamwkamwakid loaloi.
Ni menseng en mandahn rahno, I ahpw inenla ni imwen liohdio. Nah serepeino ritingadahte wenihmwo sengiseng nda, “Oh, Bisop, kalahngan en ahmw kohdo. Nohno mehla awa riau samwalahro”—ih inenen insensuwedla. I sohte kak manokehla pepehm en nan ahi mohngiong. I sengiseng. Ihs me pahn kesemwpwal sang lihodi kesempwal menet me anahne pisop en koledi peh, kaloalamwahu ih, oh mehlel kihong ah tungoal lahs en kapai? I sohte wia pwukoahu pwehki ahi sohte peikiong pepehm kehlail en Ngehno.4
Riei ko, mwahnakapw oh peinakapw akan, oh serih kan, I kadehdehki me idawehn kaweid en Ngehno wia ehu kisehn mehkot me keieu kesempwal nan atail ehuong mehtei kan.
Ni keimsekla, nan Rahn Sarawi en Rahmus en imwin wihk wet, I kadedehki me atail pahn alehda Kauno, oh kadedeh Ih, oh papah ih pil wia mehkot keieu kesempwal.
Pwoson Sises Krais wia poahsoan en atail kadehde. Kadehde iei kadehde en kamehlelepen me pwung poatoapoato me kin kohsang nan mohngiong en emen emen oh ngehn akan sang rehn Ngehn Sarawio. Kadehdepen Sises Krais, ipwikihdi oh kakehlailda sang ni Ngehno, kin wekidala mour—wekidala atail madamadau oh mwomwen atail momour. Kadehde kin wekid kitailahng Samatail Nanleng oh Sapwellime Iehroso.
Alma padahngki:
“Kilang, I kadehdeiong kumwail me I ese me soahng koaros me I koasoia mehlel. Oh dahme I kamehlelehki me mepwukat mehlel?
“Kilang, I ndahiong kumwail me Ngehn Sarawi en Koht me kasalehiongie. Kilang, I kaisihsol oh kapakap rahn tohto pwe ien kak ese me mepwukat mehlel. Eri met I ese me mepwukat mehlel; pwehki Kauno Koht ketin kasalehiong ie sang rehn sapwellime Ngehn Sarawio.”5
Atail ahnekihte kadehde, e sohte itar. Ni atail pahn momourki Krais ah pahn lalaudla, kitail udahn pahn inengiong eb kadehdehki Ih—Sapwellime kalahngan, limpoak, oh kadek.
Kitail kin kalapw rong nan Rahn Sarawi en kadehde kan, lepin mahsen me nda “I kapingki” oh “I poakoahng” tohto sang atail kin rong “I ese” oh “I kamehlele.”
I lukei kumwail en kin kalapw kadehde Sises Krais. Kadehde dahme kumwail ese oh kamehlele oh dahme kumwail kehn, kaidehn dahme kumwail kapingkihte. Kadehde dahme karehda amwail esehla oh poakoahng Sounkomouro, momourki Sapwellime padahk kan, oh Sapwellime manamano me e ketin doarekihla amwail mour. Ni amwail pahn kadehde dahme kumwail ese, kamehlele, oh pehm, Ngehn Sarawio pahn uhd kasalehiong me mehlelo ong irail kan me rongorong amwail kadehde. Irail pahn wia met pwe irail kilangehr me kumwail wialahr werek en Sises Krais ni mehlel. Irail pahn kilang ia wewehn wiahla Sapwellime tohnpadahk. Irail kak kehnda soahng kan me irail sohte kin kehn mwowe. Kadehde mehlel kin kohsang ni weklahn mohngiong oh Ngehn Sarawio kak wahla nan mohngiong en irail kan me onopadahr pwehn alehda.
Irail kan me kehnda mehkot sang amwail kadedeh pahn uhd kapakap oh idek rehn Kauno ma amwail kadehde mehlel. Irail ahpw pahn kak pein esehla.
Riei ko, I kadedeh oh wia soun kadehde ong kumwail me I ese me Sises Krais iei Ih Soundoar en sampah. E ketin ieias. Ih me Sapwellimen Koht Iehroso me ketin iasadahr, oh Sapwellime Mwomwohdiso met me mihmi pahn kaweid en soukohp oh wahnparon kan. I kapakapki me ma I pahn mour mwurin mour wet, ai kadehde pahn duhduwehte.
Ni ai kin wie papah, I esehla me dahme keieu kesempwal iei atail ehuong Samatail Nanleng oh Sapwellime Iehroso, atail peneinei kan, oh men mpatail kan, oh mweidohng Ngehn en Kauno en kaukauweid kitail ong ni ehupene pwukat pwe kitail en kak kadedeh dahme keieu kesempwal oh me pahn poatoapoat. Ni mwaren Sises Krais, amen.