Tiepene Lap
“Mihmi Rehi, oh Ngehi Rehmw; Eri, Ieiang Ie”
Kapokon lap en Epreil 2023
13:26

“Mihmi Rehi, oh Ngehi Rehmw; Eri, Ieiang Ie”

Sang Elder David A. Bednar

Sang Pwihn en Wahnpoaron Ehk-riemenko

Sapwellimen Sounkomouro inou iei en mihmi loaletail oh ritingadahng inou koaros en tohn Sapwellime Mwomwohdiso.

Soukohp en mahs Inok, me sansal nan Kadehde Mering, Doctrine and Covenants, oh Pearl of Great Price,1 inenen kesempwal ong koukoudahn kahnihmw Saion.

Soaiepen nan pwuhk sarawi duwen Inok ah alehdi pwukoahn papah kasalehda me “e rongada ngihl ehu me peido sang nanleng, indinda, Inok, nei pwutak, kohpadar ong aramas akan, oh indahng irail ren—Koluhla, … pwe arail mohngiong kan kekeluwakalahr, oh salengarail kan solahr kak rong, oh meserail kan solahr kak kilang wasa mwahu.”2

“Oh ansou me Inok rongadahr mahsen pwukat, e kelepwihkihdi nan pwehlo … oh mahsanihong Kauno, mahsani: Ia mwomwen ahi pahn wia mehkot mwahu mwohn Sihlangimwen, pwei wia kisin pwutak emen, oh aramas koaros kailongkin ie; pwe I loweteng; ahpw I pahn wia sapwellimwomwi ladu?”3

Menlau kilang me nan ansou me Inok alehdi pwukoahn papah, e kakehr kilang pein ah sohitar kan oh luwet akan. Oh I pepehm me kitail koaros nan ehu ansou me kitail kin papah nan Mwomwohdiso kan ahnekiher soangen pepehm me duwehte en Inok. Ahpw I kamehlele me Sapwellimen Kauno pasapeng ong en Inok ah kalelapako wia mehn kaweid oh e doke kitail koaros rahnwet.

“Oh Kauno ketin mahsani ong Inok: Kohwei oh wia dahme I kehkehlikiong uhk, oh sohte aramas pahn kemeiukala. Kihpeseng ewemwen, oh e pahn audauda, oh I pahn kihong uhk dahme ke pahn inda. …

“Kilang Ngeni pahn ti pohmw, pil iangahki mahsen koaros me I pahn kadehde; oh nahna kan pahn tangasang mwohmw, oh pihl akan pahn wekidekla arail kin pwiliwei; oh ke pahn mihmi rehi, oh ngehi rehmw: eri ieiang ie.”4

Inok wiahla emen soukohp wadawad oh e kapwaiada Sapwellimen Koht doadoahk laud ehu, ahpw e sohte tepte koahiek! Ansou reirei e nannanti lau ih esehla mwomwen mihmi Reh oh ieiang Sapwellimen Koht Iehroso.

I kapakapki ni ngidingid sawasepen Ngehn Sarawio ni atail pahn medewepene kaweid me kohieng Inok sang Kauno oh ia wehwehpe ong komwi oh ngehi rahnwet.

Ke Pahn Mihmi Rehi

Kaun Sises Krais ketkiheng emen emen kitail luhk en mihmi Reh.5 Ahpw ia mwomwen atail pahn esehla oh kohdo mihmi Reh?

Lepin lokaia mihmi kasalehda tengediong de soan oh tengedihte sohte mwekid. Elder Jeffrey R. Holland kawehwehda me “mihmiheng” wia mwekid ehu me iei “‘[en] mihmi—ahpw [en] mihmi erein.’ Met iei pwukoahn padahk en rongamwahu wet ong … koaros … nan sampah. Kohdo, ahpw kohdo mihmihla. Kohdo ni ahmw kamehlele oh men dadaurete. Kohdo mihmihla, ong pein kowe oh ong dih kan koaros me anahne idawehn uhkodo.”6 Kitail mihmi rehn Krais ni atail kehlail oh tengeteng nan atail loalapwoat ong Soundoaro oh Sapwellime kahrepe sarawi kan, nan ansoun mwahu oh suwed koaros.7

Kitail kin tapihada mihmiong Kauno ni atail kin doadoahngki atail saledek en pilipil en alehda Sapwellime wisiko8 sang inou sarawi kan oh tiahk sarawi kan en rongamwahu kopwurupwurdohu. Ehupenehn inou sarawi me kitail ahneki ong Samatail Nanleng oh Sapwellime Iehros me iasahdahu oh ieiaso wia lamalam me kohsang nanleng, koapwoaroapwoar, meleilei, oh popohl soutik; e pil wia poahsoan teng9 me kitail anahne kawada atail mour kan powe.

Kitail kin mihmi Reh ni atail nanantihong kakehlaka pein atail inou sarawi ong Sahmo oh Sapwellime Iehroso. Ni karasepe, kapakap ni mehlel ong Samatail Soutik ni mwaren Sapwellime Iehroso pahn kaloalehla oh kakehlakahla atail inou sarawi kan me kitail kolokol ong Ira.

Kitail kin ehu ong Ih sang ni wadek Sapwellimen Krais mahsen kan. Sapwellimen Sounkomouro padahk kin kakerenih kitailla Reh,10 pahn padahkieng kitail soahng koaros me kitail anahne wia.11

Kitail kin mihmi Reh sang ni atail kin iang towehda tiahk sarawi kan en kamadipw sarawi, oh pil tetehk oh medemedewe atail inou sarawi kan oh kolkoluhla ni mehlel. Warehng ale kamadipw sarawi wia kadehde ong Koht me kitail inangih alehieng kitail mwaren Sises Krais oh nantiheng “tamataman ih ansou koaros”12 mwurin atail alehier tiahk sarawi kesempwalo.

Oh kitail kin mihmi Reh sang ni atail kin papah Sapwellime seri kan oh apwalih riatail kan.13

Sounkomouro mahsani, “Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.”14

Met I kawehwedahr metohto wiepen atail kak mihmi rehn Sounkomouro. Oh met I luke emen emen kitail me wia Sapwellime werek kan en peki, rapahki, letelet, oh pein esehla sang ni manaman en Ngehn Sarawio ekei ahl tohrohr me kitail kak wiahieng Krais en mih nan atail mour kan nan soahng koaros kitail kin wia.

Oh Ngehi Rehmw

Sapwellimen Sounkokmouro inou ong Sapwellime werek kan mie pali riau: ma kitail mihmi Reh, E pahn ketin mihmi rehtail. Ahpw mehlel Krais kak mihmi rehmw oh rehi—rehn emen emen oh pein rehmw? Pasapengpen kalelapak wet iei lapalahn ei!

Nan Pwuhken Mormon, kitail esehla duwen en Alma padapadahk oh kadkadehde ong me semwehmwe me arail kahpwal kan elehieng irail en ahneki karakarahk. Nan ah kaweid, e karasahieng mahseno ong weren tuhke ehu me anahne en poadidi oh epwelda, oh e kawehwehda me “mahseno” wia mour, misin, oh meiroang en tomwpen Sises Krais.

Alma koasoaia, “Tepida kamehlele Sapwellimen Koht Iehroso, me e pahn ketdo oh doarehla sapwellime aramas akan, oh me e pahn lokolok oh pwoula pwe en tomwki diparail akan; oh e pahn iasada sang me mehla, pwe aramas koaros pahn uh mwowe, pwehn kadeik ni imwin rahno,sang arail wiewia kan.”15

Alma kawehwehdi, “mahseno” eri menlau medewe kamarain me kansansaldahr.

“Oh met … I men kumwail en padokedieng mahsen wet nan amwail mohngiong kan, oh ni ah pahn tepida masal apwaliheki omw pwoson. Oh kilang, e pahn wiahla tuhke ieu, me kekeirda loalemwen ong mour soutik. Oh Koht en ketkihong kitail atail wisik kan en marahra, pwehki popohl en sapwellime Iehroso. Eri mepwukat koaros e kak wiawi ma e men wia.”16

Weren tuhke me kitail anahne nantiheng padokedi nan atail mohngiong kan iei mahseno—pil mour, misin, oh padahk en Sises Krais. Oh ni mahseno ah epweldahsang pwoson e kak wiahla tuhke ehu me kekeirda loalatail ong mour soutik.17

Ia kilelepen tuhkehu nan en Lehi ah ouramano? Tuhkehu kak wia weliepen Sises Krais.18

Riei ohl oh lih kesempwal kan, Mahseno mihmi loalatail? Me mehlel akan en sapwellimen Sounkomouro rongamwahuo intingdier nan uduken atail mohngiong kan?19 Kitail kohkohdo Reh oh pahn duwehla Ih? Tuhkehn Krais wie kekeirda loalatail? Kitail nannantiheng “[weliakapwala]”20 Reh?21

Mwein mwekid kopwuriamwei wet kamarainih Alma en idek, “Kumwail ipwisangehr rehn Koht ni palingenamwail? Kumwail kileledier? Kumwail kehnehr weliakapw mehlelo nan mohngiongimwail kan?22

Kitail anahne tamataman ansou koaros Sapwellimen Kauno kaweid ong Inok: “Ke pahn mihmi rehi, oh Ngehi rehmw.”23 Oh I kadehdehki Sapwellimen Sounkomouro inou en mihmi loalatail oh en mweimweieng koaros me wia tohn Sapwellime Mwomwohdiso.

Eri Ieiang Ie

Wahnpoaron Pohl kadeikada irail me kamehlele oh aledahr Kauno: “Weweidki ih ni amwail miniminiong ih.”24

Idawehn ih oh ieiang Sounkomouro kasalehda pali kesempwal riau ong wia werek men: (1) kapwaiada Sapwellimen Koht kosonned akan, oh (2) tamataman oh wauneki inou sarawi kesempwal kan me kolokol uhk ong Sahmo oh Nahu.

Sohn padahngki:

“Ma kitail kin peikiong sapwellimen Koht kosonned akan, iei kasalepen atail ese Ih.

“Mehmen me pahn nda, I ese ih, ahpw sohte kin peikiong sapwellime kosonned akan, iei aramas likamw men ih, pwe me mehlelo sohte mi reh.

“Ahpw me kin peikiong sapwellime mahseno, iei ih me limpoak ong Koht unseko: eri iei soahng wet me kitail kak esehki me kitail ehuong Koht.

“Mehmen me inda me e mihmi Reh pil anahne en alu, rasehng Ih.”25

Sises ketin mahsani, “Kohdo, idawehnie”26 oh “iangiehla.”27

I kadehdehki me ni atail pahn nantihlahte mwowe ni pwoson oh weid nan Sapwellimen Kauno ngehno,26 kitail pahn kapaikihda manaman, kaweid, perehre, oh meleilei.

Kadehde oh Inou

Alma kawehwehda ni limpoak sang rehn Kauno ong me momour kan:

“Kilang, e ketin kadarewei sapwellime luhk ong aramas koaros, pwe sapwellime kalahngan en ketin kowehng irail, oh e mahsanih: Koluhla, oh I pahn alei kumwailda.

“… Kohdo rehi oh kumwail pahn tungoale wahn tuhkehn komouro; ei, kumwail pahn kang pilawa oh nim pihl en komour ni saledek.”29

I men kasalehda wen kesempwalpen soahng koaros me pid Sapwellimen Sounkomouro pekipek. E kupwurki Sapwellime mahk oh kalahngan en kapaiada aramas koaros pohn sampah.

Ekei tohn Mwomwohdiso wet kin alehda padahk mehlelo, kosonned akan, oh kadehde kan me kin kopwurupwurieng nan mwoahlo nan wasahn kapokon lap oh nan wasahn kaudek kan nan sampah—ahpw re ahneki kahpwal en kamehlele me mehlel soutuk pwukat doke arail mour kan. Irail kamehlele oh papah ni peik, ahpw arail momourki inou sarawi en Sahm oh Nahu saikinte pwung oh arail mour saikinte wekla ni mehlel.

I inouki me sang ni manaman en Ngehn Sarawi, ke pahn ese oh pehm mehlel akan en rongamwahuo sang dahme I kawehweh me e doke—emen emen kitail koaros.

I kadehde ni popohl me Sises Krais iei Sounkomour oh Soundoar me limpoak oh ieias. Ma kitail mihmi Reh, E pahn ketin mihmi rehtail.30 Oh ni atail pahn iang Ih, kitail pahn alehdi kapai tohto. I kadehdehki met ni mwar sarawi en Kaun Sises Krais, ahmen.

Ire kan

  1. Kilang Senesis 5:18-24; Doctrine and Covenants 107:48-57; Moses 6-7.

  2. Moses 6:27.

  3. Moses 6:31.

  4. Moses 6:32, 34; ire tohrohr patehng.

  5. Kilang Sohn 15:4–9.

  6. Jeffrey R. Holland, “Abide in Me,” Liahona, Mei 2004, 32.

  7. Kilang Sohn 15:10.

  8. Kilang Madiu 11:29–30.

  9. Kilang Helaman 5:12.

  10. Kilang 3 Nihpai 27:14–15.

  11. Kilang 2 Nihpai 32:3.

  12. Tehk Moroni 4:35:2

  13. Tehk Mosaia 2:17.

  14. Sohn 15:10.

  15. Alma 33:22.

  16. Alma 32:27; ire tohrohr patehng.

  17. Kilang Alma 26:13.

  18. I kawehwehda padahk wet nan devotional ehu nan pahr 2017:

    “Alma … ‘tepida padahngki mahsen en Koht ong aramas akan, pidelong nan arail sinakoke kan, oh nan imwarail akan; ei, oh irail pil padahngki mahseno pohn arail ahl akan’ [Alma 32:1; ire tohrohr patehng]. E pil karasaheing mahsen en Koht ong weren tuhke ehu.

    “‘Ahnsou wet, kitail pahn karasahiong mahseno kisin weren tuhke ehu. Eri, ma kumwail pahn kihong dewe, pwe kisin weren tuhkeo en kak poadidi nan mohngiongamwail kan, kilang, ma e pahn wia weren tuhke mehlel, de weren tuhke mwahu, ma kumwail sohte pahn kesehiei pwehki amwail soupwoson, me pahn kahrehda amwail uhwong Ngehn en Kauno, kilang e pahn tepida mpwospeseng nan mwaremwaramwail kan; oh ni ahnsou me kumwail pahn tepida kehn mwekimwekid en mwpwospesenget, kumwail pahn tepida nda nan loalomwail kan—E uhdahn wia weren tuhke mwahu ehu, de me mahseno mwahu, pwe e tepier katehlapahla palingeniet; ei, e tepier kamarainiehda, ei e tepier iou ong ie’ [Alma 32:28; ire tohrohr patehng].

    “Kaperenpe, weren tuhke mwahu ehu kin kak wiahla tuhke ehu ni ah poadidi nan mohngiong oh tepida mpwospeseng, keirda, oh lalaudla.

    “‘Oh kilang, ni en tuhkeo e pahn tepida kekeirda, kumwail pahn nda: Kitail apwalih mwahu, pwe en kak kadarala kalowe, pwe en kak keirda, oh kadarala wah ong kitail. Oh met kilang, ma kumwail pahn apwalih mwahu e pahn kadarala kalowe, oh kekeirda, oh kadarala wah.

    “‘Ahpw ma kumwail pahn pohnsehse tuhkeo, oh sohte medewe apwalih, kilang e sohte pahn kadarala kalowe; oh ansou me ketipino kin karakar oh kamwasikahla tuhkeo, e pahn mengila pwehki sohte kalowe, oh kumwail pahn usada oh kesehla.

    “‘Met, kaidehn pwehki weren tuhkeo sohte mwahu, de pwehki sohte me pahn inangih tungoale wahn tuhkeo; ahpw iei pwehki amwail pwehlo me sakanakan, oh kumwail sohte men apwalih tuhkeo, eri kumwail sohte kak alehdi waho.

    “‘Oh met, ma kumwail sohte pahn apwalih mahseno, kasikasik waho sang ni pwoson, kumwail sohte kak dolung wahn tuhkehn komouro.

    “‘Ahpw ma kumwail pahn apwalih mahseno, ei, apwalih tuhkeo ni e tepida kekeirda, sang ni amwail poadidiong pwoson laud, oh kanengamah, kasikasik waho, e pahn kadarala kalowe; oh kilang e pahn wia tuhke me kekeirdahng mour soutik’ [Alma 32:37–41; ire tohrohr patehng).

    “… Me keiou kaselel nan en Lehi ouramano iei tuhkehn mouro—me wia weliepen ‘limpoak en Koht’ [1 Nihpai 11:21–22].

    “‘Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, ah en ahneki mour soutuk’ [Sohn 3:16].

    En Kaun Sises Krais ipwidi, mour, oh meiroang en tomwo wia Sapwellimen Koht kasansal keiou laud duwen limpoak me E ketin ahneki ong Sapwellime seri kan. Nihpai kadehdehki, limpoak wet ‘me keieu anahnepe nan soahng koaros’ oh ‘keieu kaperen ong palingehn’ (1 Nihpai 11:22–23 pil kilang 1 Nihpai 8:12, 15 Irelaud 11 en 1 Nihpai kasalehda mengihtik en kawehwehpen tuhkehn komouro ni ah wia kilelepen mour, doadoahk, oh meiroang en Sounkomouro—me ‘pein ketkihdi pein Ih’ [1 Nihpai 11:16]. Tuhkehu kak wia weliepen Krais.

    “Ehu wiepen medewe wahntuhkehu nan tuhkehu iei e wia kilelepen kapai kan ong Tomwpen Sounkomouro. Wahntuhkehu kawehwehda ni ah wia ‘me anahn pwehn wiahng emen en peren’ [1 Nihpai 8:10] oh wiahda popohl laud oh ineng en ehukiheng mehteikan popohl wet.

    “Me kesempwal, kahrepen Pwuken Mormon, iei luke koaros en kohdo rehn Krais [kilang Moronai 10:32], me wia kisehn kasansal me kohieng Lehi o [kilang 1 Nihpai 8:19]” (“The Power of His Word Which Is in Us” [adres kohieng seminar ohng kaunen misin kapw, Suhn 27, 2017], 4–5).

  19. Tehk 2 Korint 3:3.

  20. 2 Korint 5:17.

  21. En Alma karasaraso padahkiheng kitail me inengieng en kamehlele poadokedier weren tuhkehu nan atail mohngiong kan, apwahpwalih weren pwosono kin kakairada tuhkehn komouro, oh apwalih mwahu tuhkehu kin miehda wahn tuhkehu, me “iou sang mem koaros” (Alma 32:42) oh me “keieu mwahu nanpwungen sapwellimen Koht kisakis kan” (1 Nihpai 15:36).

  22. Alma 5:14.

  23. Moses 6:34; ire tohrohr patehng.

  24. Kolose 2:6.

  25. 1 Sohn 2:3–6; ire tohrohr patehng.

  26. Luk 18:22

  27. Moses 6:34

  28. Kilang Doctrine and Covenants 19:23.

  29. Alma 5:33–34ire tohrohr patehng.

  30. Kilang Sohn 15:5