Anahnepen Soun Kamwahu
Mie ahmw pilipil en pilada uhpene de ehupene. I kangoange kin kumwail en pilada en wia soun kamwahu men, met oh kokolahte.
Riei ohl oh lih akan, I perenki ahi kak patehng kumwail. Nan erein sounpwong weneu samwalahro, I kin kalapw medewei kumwail oh kapakap kin kumwail. I kapakapki me Ngehn Sarawi pahn wehwehkiheng kumwail dahme Kauno kupwuriki kumwail en rong sang ahi pahn padahk ohng kumwail ansou wet.
Ansou mei kaskasukuhlehng en wiahla toahktehn pwal pahr kei samwalahro, I sewese toahktehn pwal men me lopukasang neh ieu me direkihla paikin. Koadoahko me inenen apwal. Eri, pwehn kapatahieng kapwunod en ansouo, emen tohn doadoahngko kasapwungehla mehkot, kahrehieng toahktehn pwalo ah lingeringerda. Ni ah lingeringerdahu, e koski nah naipin pwal samino. E pwupw nanpehiet!
Koaros me mih nan perehu—ihte toahkte lingerngerdahu—pwuriamweikihla wiepe keper ieu me kauwehlahr koasoandihn pwalo. Paiamwahu, I sohte alehdi soumwahu. Ahpw kemwekid wet kihengie mehkot me I pahn tamataman ansou reirei. Nan ansouwohte, I koasoanehdi me mehdahte dahmepahn pwarada nan ahi perehn koadoahko, I sohte pahn lingeringerda. I pil inoukihda rahno mei sohte pahn koski seli mehkot ni ei lingeringer—sohte lipilipil ma naipen pwal de lokaiahn lingernger.
Lel met, sounpar kei mwuri, I kin medmedewe ma paiking en naip me pwupwdieng nan pehiet sou suwedsang uhpene laud me kin kawehla ehupenehn nan kousoan kan oh limpoak en nan pwungen aramas tohto rahnwet. Mwekid en kadek oh pwung mwomwen sohralahr nan mwein liaktohrohr oh uhpene wet.
Laumwoahmw, repen pwung, oh kauwe ekei aramas inenen lalaudlahr. Tohtohla semen kan, soun politik kan, soun kamweit kan, oh me indand kan kin kalapw indahwei dahme irail men kawehki ekei. I inenen pwunodiki me diren aramas mwomwen kamehlele me e konehng ren kauwe, kailongki, oh uhweng koaros me sohte utung irail. Tohto me kin inengieng kawehla eden emen sang ni arail kasohwe oh kaweseli.
Lingeringer sohte kak wekidala en aramas madamadau. Sohte kamwahupen lemei. Uhpene sohte kak elehda pasapeng en kamarain ong kahpwal kan. E sohte mwahu, ahpw ekei pak kitail kin kilang soangen uhpene pwukat rehn tohn Mwomwohdiso kan. Kitail kin rong irail me kin kawe arail pwoud kan oh neirail seri kan, me kin ngilen lipwoar pwehn kaunda mehteikan, oh irail me kin kaloke peneinei kan ki “arail kin pohnsehse.” Kitail kin rong me pwulopwul oh seri kan me kin tiahk suwed oh tohn doadoahk kan me kin kawehla eden iengarail tohn doadoahk kan.
Riei kesempwal kan, kaidehn ih mwomwehn met. Nin atail wia tohnpadahk en Sises Krais, kitail anahne kasalehda karasaras en ehuieng mehteikan—mehlel ansou me atail madamadau kan wekpeseng. Ehu me keieu mengei pwehn kasalehda kahlmang mehlel en Sises Krais iei mwomwen emen aramas ah kin ngoangki sewese mehteikan.
Sounkomouro padahngki ni sansal mwahu ohng mehn Serusalem oh pil mehn Nihpai kan. “Kapai ong irail me kin wia soun kamwahu,“ E masanih.1 “Ma emen pahn pohr likin sepomwen, pil kihong apali en.“2 Oh eri, ni mehlel, E ketkihong kitail dahme apwalehng kitail en wia: “Kumwail poakohng amwail imwintihti kan oh kapakapki me kin kalokei kumwail.”3
Mwohn Ah ketin sipalla, E poahngoakiheng Sapwellime Wahnpoaron Ehk riemeno en poakpene nan pwungarail nin duwen Ah ketin poakohng irail.4 Ih eri ketin kapatahieng “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene nan pwungamwail.”5
Sapwellimen Sounkomouro mahseno sansal mwahu: Sapwellime tohnpadahk mehlel kan kin kakairada, pwokada, kangoange, kakehlailiada, oh kin kamarainda—mendahte wen apwal en irair kan. Sapwelimen Sises Krais tohnpadahk mehlel kan wia soun kamwahu kei.6
Rahnwet iei Rahn Sarawi en Powehdi. Kitail kaukaunop en kawauih kemwekid me keieu kesempwal me wiawi nan sampah, me iei Tomw oh Iasadahn Kaun Sises Krais. Ehu mwekid keieu mwahu me kitail kak wia pwehn kawauih Soundoaro iei en wiahla soun kamwahu men.7
Tomwpen Soundoaro kamangaila pwe kitail en kakehng powehdi soahng koarosme suwed—iangahki uhpene. Ni mehlel: uhpene iei mwekid en tepelo! Sises Krais kehkehlingki me mehmen me kin kolokol “ineng en uhpene” kaidehn sapwellime irail, ahpw e kin “kohsang rehn tepilo, me wia pahpahn uhpene oh [e kin] kamwakidada mohngiong en aramas akan en kin uhpene nan pwungarail.”8 Irail me kin kairada uhpene kin idawehnla en Sehdan koasoandi, mendahte ma irail kak kasawihada de soh. “Sohte aramas emen kak liduwih soumas riemen.”9 Kitail sohte kak utung en Sehdan pilahn sang ni atail wiakauwe mehteikan oh medewe me kitail kakete papah Koht.
Riei ohl oh lih kesempwal kan, atail mwekid ohng mehteikan inenen kesempwal! Mwomwen atail lokaiahieng oh koasoaia tohn nan imwatail kan, ihmw sarawi, wasahn doadoahk, oh nan interned inenen kesempwal. Rahnwet, I men peki rehtail en ehuieng mehteikan ni wahu oh wiepe sarawi. Menlau rong kanaiehng. “Ma mie mehkot me mwahu kaselel, de ronge me mwahu de konehng kapingpe en mie”10 me kitail kosoiahki emen aramas—sohte lipilipil ma aramaso mihmwo de soh—ih soangen koasoai kan me kitail konehng wia.
Ma pwopwoud iou mweipeseng, de misineri men pwurasang ah misin mwadang, de me pwulopwul men peikasalki ah kadehde, irail sohte anahne ken kadeik irail. Irail anahne kehn sapwelimen Sises Krais limpoak me sansal nan ahmw lokaia oh mwekid kan.
Ma emen iengomw kihda madamadau en politik de en aramas lamalam nan interned me kauwehla soahng koaros ke kamehlele, ke sohte anahne lingeringer kowe dopuk pwe e sohte pahn sawas. Kairada ohpampap pahn anahnepe laud rehmw, ahpw pil ihme iengomwo anahne.
Uhpene kin katangahsang Ngehno—ansou koaros. Uhpene kin kalaudehla madamadau likamw me tuhpenehn akamai wia mehn kamwahuiala wekpeseng en lamalam kan; ahpw sohte pak ehu e wia. Uhpene wia pilipil ehu Soun kamwahu wia pilipil ehu. Mie ahmw pilipil en pilada uhpene de ehupene. I ngoangki kumwail en piladaen wia soun kamwahu men, met oh kokolahte.11
Riei ohl oh lih kan, kitail anahne wekidala sampah—emen aramas oh ehu ehu mwekid ansou tehkis. Ia mwomwe? Mwomwen ahmw pahn kak sewese wekpeseng en madamadau en wauneki emen aramas oh pwihn en aramas ieu.
Wekpeseng en madamadau wia kisehn mour. I kin doadoahkehng soun papah poadidi kan en Kauno me sohte kalapw kilang kahpwal ehu ni mwohmw ehute. Irail ese me I kin men rong arail madamadau kan oh pepehm kan ni mehlel me pid soahng koaros me se kin kosoiapene—ni mehlel kemwekid keneinei kan.
Nei sounsawas sarawi riemeno, Preseden Dallin H. Oaks oh Preseden Henry B. Eyring, kin wia mehn karasaras ni ara kin kasalehda ara pepehm kan—mehlel ansou me ara pepehm kan kin wekpeseng. Re kin wia met ni limpoak unsek ong emen emen. Ira sohte kin wiahda me emente esehsang emen oh re sohte kin akamaiki isime pwung. Sohte pil sansalepen siai nan pwungara. Pwehki emente ah audaudki limpoak unsek, “iei limpoak unsek en Krais,”12 aht wie kuwpur kan kin kak kohsang ni Ngehn en Kauno. Udahn I poakehng oh wauniki ohl riemenet!
Limpoak unsek wia wini en uhpene. Limpoak unseko wia kisakis en ngehno me kin seweseikitail en pwilikihdi ineng en uduk, me kin liaktohrohr, akpwung, pohnmwahso, oh luwak. Limpoak mehlel wia padahk en wia soun kahlmang mehlel en Sises Krais men.13 Limpoak mehlel kawehwe duwen soun kamwahu men.
Ansou me kitail kin karakarahkala mwohn sihlangin Koht oh kapakap nan atail mohngiong unsek, sang ni kehlepen atail mohngiong, Koht pahn ketkiong kitail limpoak unseko.14
Irail kan me alehdi kapai en nanleng wet ahneki kanengamah oh kadek. Irail sohte kin luwangki mehteikan oh pohnmwahsohki pein irail. Sohte arail pali oh re sohte kin kauwe mehteikan.15
Riei ohl oh lih akan, limpoak mwakelekel en Krais kin powehdi uhpene me kin kamedekei kitailla rahn pwukat. Limpoak mehlel kin kaweid kitail “en sawaskipene atail wisik toutou kan”16 ahpw kaidehn en katoutouiala emenemen. Limpoak mehlel en Krais kiheng kitail “en wia sounkadehdehn Koht ahnsou koaros oh nan soahng koaros”17—mehlel nan ansou keieu apwal kan. Limpoak unseko kahrehieng atail kak ese mwomwen atail pahn lokaia oh mwekid nin duwen ohl oh lih en Krais kei—mehlel ansou me e kin apwal.
Met, I sohte koaskosoia uhwen “meleilei kak pweipweida.”18 I koskosoia ahmw mwekid ohng mehteikan ni mwohmw me kalapw wiawi sang ni kolokol inou kan me ke wiahda ansou me ke ale kamadipw sarawio. Kitail inouki me kitail pahn ansou koaros tamataman Sounkomouro. Nan ansou kan me kin udahn apwal oh direkihla uhpene, I lukei kumwail en taman Sises Krais. Kapakapki ken kakehlail oh kamarain ohng mwomwen ahmw pahn koasoai oh doaodahngki dahme E kupwurki. Ni atail pahn idawehn Nanmwarkien Popohlo, kitail pahn wiahla Sapwellime soun kamwahu kei.
Ansou wet mwein ke medmedewe me padahk wet udahn pahn sewese emen aramas me ke ese. Mwein ke koapwoaroapwoarki me e pahn sewese pwe re en mwahuienguhkala. I koapwoaroapwoarki me a pahn wiawi! Ahpw I pil koapwoaroapwoarki me kumwail pil pahn kasawih laud amwail mohngiong kan pwehn kilang ma sou mie pohnmwahso de luwak me kin perehsang uhk en wiahla soun kamwahu men.19
Ma ke mehlel ki ahmw men sewese kihpene mehn Israel kan oh kamwahuiala nan pwungen aramas akan kokolahte, metiei ansou en pwilikihdi kailok. Met wia ansou en pwilikihdi wia pein insenomw. Met wia ansou en uhdihsang wihwia mwohmw me kin kahrehieng mehteikan ren perki kasapwungehla insenomw. Met wia ansou en weliakapwala.20 Ma ahmw koasoai kan kin audaudkihla lokaia laumwoahmw oh likedipidip kan, met ansou mwahu en pwilikhdi.21 Kumwail pahn wiahla sapwellimen Krais aramas kehlail.
Tehnpas Sarawio kak sewesei kitail nan atail roprop. Wasahu kitail kin kasarawiheng Sapwellimen Koht manaman, pwehn kak powehdi Sehdan, me wia soun pahnehdo uhpenekoaros Kihieisang Ih nan ahmw mour! Taman me kitail pil kin soikala tepelo ansou koaros me kitail kin maiaudahsang atail sawehwe de sohte men insensuedla. Kitail kak uhd kasalehda mahk me wia mwekid en tohnpadahk mehlel en Sises Krais. Soun kamwahu kan kin irehdihsang tepelo ah doadoahk suwed akan.
Kitail nantiheng ni atail wia aramas ekei en wiahla marain en pohn dohlo—marain ehu me “sohte kak rirla.”23 Kitail kasalehda me kitail kak apwalihala kahpwal akan oh kapwungala uhpene kan ni wahu oh marain. Ni ahmw kin kasalehda limpoak mehlel nin duwen kahlmang en Sises Krais men, Kauno pahn ketin kamwahuiala ahmw doadoahk kan ni wen me ke sohte kak wehwehki.
Uhk en rongamwahu wet me keieu laud nan sampah. Koht ketin lukehieng koaros en kohdo Reh, “me toantoal oh pwetepwet, me sensel oh saledek, ohl oh lih.”24 Mie dewen koaros. Ahpw, ihte sohte dewen kailok, peirin, de soangen mwomwen uhpene ieu.
Riei ohl oh lih akan, ansou mwahu kohkohdo ohng irail me kin nanantiheng kakehlaka mehteikan. Rahnwet I lukei kumwail en kasawih nin duwen ahmw wia tohnpadahk men sang ni ahmw mwekid ohng mehteikan. I kihwei kapai en kamwahuihala wasahkan me mie anahnepe pwe ahmw mwekid en sarawihla, wahula, oh wiahla mehn kahlmang mehlel en Sises Krais.
I kangoangehkin kumwail en weliankihdi lemei karakarahk, kailok ohng ohpampap, oh uhpene ohng limpoak.
Koht ketin ieias! Sises iei ihme Krais. Ihme ketin wia moangen Mwomwohdiso wet. Kitail wia Sapwellime soun papah kei. E pahn ketin sewesei kitail en wiahla Sapwellime soun kamwahu. I kadehde mepwukat ni mwahr sarawi en Sises Krais, ahmen.