![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Faa%2F8c%2Faa8c48c3769ae5cace7d8eb5dfe5fc385846a55d%2Faa8c48c3769ae5cace7d8eb5dfe5fc385846a55d.jpeg/full/!250,/0/default)
Omrolel a Berotel el Ngau
A Dios a orrenges a bekl nglunguuch el doldars e onger er ngii rokui e loltirakl ersel rael el Ngii a mla dosechii el kirel a bode mecherungel.
Rodam ma rodos, ak mla subii a mle meringel losisechakl ra taem el ngar tial longededechaol er sera Ongeteruich el buil ra 2022. Sel suobel a: Alsekum meng ngdiak modersii a ungil chedecheduch, e kemo merek el diak ke mngara ikel bebil ra ongdibel. Kemiu tial lomes el blal bekngerchelak mak kumkokl el mora kot el longdibel er chelechal taem. Sel diak el sebechemiu el mesa a ngak el dechor e ra doltamt er ngii chesimer e kmal kerkikl el loreked er ngii. Alsekum tial cheldecheduch a diak bo lungil, eng dikea kisekemiu raikel bebil er a merael mei el ongdibel.
Sel reng er sel kmal klebokel chelitakl er a choir, eak mla suub a bebilo er a tekoi, el lokiu a ngesou er a Rubak, eng soak el ouchais er kemiu el kirel. Seikid a mo rulli tiang meng kmal ngara renguk el cheldecheduch.
Sel kmal meliud e ra renguk e meringel e ra ikal direke ke mlo rengii el blekeradel tial direke mlo dibus a betik era renguk el bechik e ra, Pat. Ng mlekot el mesisiich el redil el kudengelii—mle ungil bechiil e chedil, e kmal mle kedung, meduch el mengedecheduch, e mui ra reng. Ng mlo mengedecheduch el tekingel a mle “Fulfilling the Measure of Your Creation.” Ak kumelchesiu el ngii a chirengelii sel lolkael kirela klengar er ngii el liluut el mle ungil sel bol lolbedebek a ngidil chad. Ng mle erungel el ngelekel a Dios, e lokesiul a kle redil el ngara Kristo. Ak mle ngeltengat ra rechad el iloit a okolem el rak e ra klengar er ngak el lobengkel. Alsekum mak kedung , esel lulebak a belkul a kmo ngak a sebechek el lobengkel el diak a ulebengelel.
A tara blekeradel ra omesuub a ulemuchel e ra okeuang ma eiai el sikang ra uriul e ra le medakl a bechik. Seikid el taem, e ak mlo rimel elmo niuing ra ospitar el kmal mle meringel a secherek. Mak iloit a temek e ra ikel mle kot e leual sandei er tial tal buil ma erul sandei delengcheklek el soiiseb e tuobed e ra ukeruul elmo medengelii a renguk e kuk mo diak.
Ng blechoel el bekl el tekoi el blak siseber ngii e seikid el mlora ospitar ersel taem a diak kudengelii. Sel dimlakel riid e ra uldesuek sel lomerael ra ikrela ospitar, elmo re eroid e lomechesiu er ngii el likrel sel diak a ulebengelel. Ngdiak el sebechek elmo ungil smodii seikid el blekeradel er tiang, di ng sebechek elmo dulii a telkib ra kngiluu e lulekrael el melisiich ra lmuut el mora ngerechelek loba blak el reng, mui e loldars, mui el lomes e ra Osobel, e mo mui a klaumerang ra tekingel.
Kora mlo diak kutebengar engdi ak mlo melchesiu el melai a ikel locholt el kuk di kirek di uai ikel mlora ra Teruich ma terung el bekord el erul dart el rak e ra memong.
“Ko mo olsisechakl el loba ngklek … [e] omerek e ra tekingek el mora beluulechad el rokir. …
“… Tutau elmo tutau: e tara sils el kuk mo tara sils a mesisiich el tekoi bol tobed; e sel bocha el kebesengei ea rechad ra beluulechad lak el bechiuaiu e leng tekingiu. …
“Bekiis[,] … mchelengii a kerus er kau, [e] moltirakl er ngak.”1
Betik e ra renguk el odos ma rodom, ngar seikid el blekeradel, e ak mla mengai el lmuut elmo blak a renguk el chelungel ra kerus er ngak, el meduch a renguk e losiik ersel mo sebechek el lodersii sel ngor ra apostol el mekekeald e lomeklatk sel tutau, ma teleal sils elmo ra klebesengei.
E lomdedelid el bedul sel longedei el klemerang el dilubech el mlo rengii ra ikel buil ral dibus, secher, ma ringel. Ng mlei a beches el locholt el kirel mesel diak a ulebengelel el lomereng el saul ersel klisichel a mlodars el klengeltengat el nglunguch ra Ikelesia—el nglunguchiu—el ngii a blok mlungeltengat el kirel. Ngdiak kubes a sulir el kirel nglungungir a re telal telael el chad el tir, el uai ngkel mengesang el melakl el dil,2 el loutekangel el losiik ra ulengesuir a babeluades el kirek. Ak ngiluu a klengeltengat ra priesthood e milsterir a re kim dilak el ngara skuul el lulsengerengel el kirek, me a rebebil ra ward e ra Ikelesia el rokir. Ma ngklek a ultebechel el mlara nglunguuch ra bekl el templo ra Ikelesia.
Ngara elsel a renguk e loureng a saol el kirel a ikal rokui el tekoi, e ak mo bengkel a G. K. Chesterton, el milekoi ra tara taem “el omerreng el saul a ikel kot el ngarbab el blebelel a uldasu; ea … tmolech el lomerreng el saol a deurreng el elisois el mengasireng.”3 Ng renguk el rokir e loba “deurreng el elisois el mengasireng,” a kurreng a suliu el rokui e ourreng a sulel a Demak ra Babeluades, el rirenges a nglunguchiu e ulemekngeltengat e ra klengar er ngak.
Rodom ma odos, a kuchais el kmo a Dios a orrenges a bekl nglunguuch el doldars e onger er ngii rokui e loltirakl ersel rael el Ngii a mla dosechii el kirel a bode mecherungel. Ak miltebengar el kmo seikid e losisiu el taem el betok el chad a miluluuch me bo lungil mesisiich a bedengek, eng ngosisiu el lochur—luldimukl er ngak—a miluluuch el kirell a lluut elmo mesisiich a bedengel a bechik. A kuchais el kmo ngil lerung el nglunguuch a mlo renges e mlo nger ra chedaol e chubechub e ra Demad ra Babeluades, molmuut ra nglunguuch el kirel Pat a dimlak el monger lokiu sel soak. Ngdi ikel moktek eldi tal Dios a medengei el ngerang ma nglunguuch a morenges a ngodech e ra ikel dourreng—ea ikang a morenges, eng morenges e loltirakl ersel diak el mesim el beltikerreng er Ngii ersel temel.
Alsekum me kede “olengit el lungil,”4e ngdiak a tomer ra kmong oingerang, ngarker, malechub eng ngera kede meluluuch el kirel. Sel doltirakl e ra ocholts, kid a kired el “blechoel meluluuch.”5 E kired el meluluuch, a Amulek a dilung, el kirir “tirkel lileuekl er kemiu, ”6loba sel klaumerang el kmo a ikel “ngara rengrir sel loluluuch a re melmalt el [chad] a klou a bol nguu.”7 A nglunguched a kirel morenges sel blol di kid me doldars.8 Alsekum meng diak el sebechel, eng kirel mo medung el mengululau el ngara rengud.9 Kede mengitakl ma nglunguched el “lomrolel[s] a berotel el ngau,”10el blechoel el modars e loltirakl er Ngii e Losobel ,mora Dios el Diak a Ulebengelel el Demad e loba ngklel a Di Tal Ngelekel.11
Betik ra renguk el resechelik, a nglunguched a kot el klebekel sikang el de ngara chelsel,12aikel kot el “soal a rengud,”12sek kot el beot, e klikiid el bedengel a omengull.14 Ngdi kid el tang el meluluuch, kede telungalk, ma de ngara ongdibel el betok el chad.15 Kede ousebech a nglunguuch el tomer a ongitikaik,16alsekum meng ngarngii a ngidil taem el dolchesuar el diak ke bo doluluuch, ke dungil medengei el kmo seikid el koskes a diakel ngara Dios el mei, ngii el kmal soal el mengedecheduch el mora rengelekel ra ngidil ma bekl el taem. Ng uaisei, bebil ra omeruul el melers er kid el meluluuch a di melmalt el mei el mlara cherareu.17 Esel lak ke dodengei el dokerang malechub e ngara kede meluluuch el kirel, e kede omuchel, e melmolm, di le merkmo a Chedaol Reng lorael er kid el morsel nglunguuch el kired e loldars er ngii.18 Tial teletael a locha sel ngii e kired el melekoi er ngii sel doluluuch el kirir a re cherareu me tirkel mekngit er kid.19
Esel rekil, e domes el mora okesiul Osobel el mekedekudem eldi meluluuch. Ngdi mle blechoel el soak elmo medengei el kmo a Jesus el melchesuar ra usbechelel el meluluuch ra bekl el taem. Ngii dimlak el cherungel? El kirel a ngerang el Ngii a meluluuch el kirel? Ngak a mocha medengei el kmo Ngii meng dirrek, el uai kid, a mle soal “mesa [Demal] ra medal, oltirakl a tekingel, e oumerang e ra krasia er ngii.”20 Betok el taem, Ngii a morecheroid e ra rechad eldi mo ngiltang ruchei ra bol lomekedong ra babeluades e lokiu ra Nglunguchel.21 Ea bebil ra taem, Ngii a meluluuch e lobengterir a re bebil ra rechad. E Ngii a mocha osiik ra babeluades el lomtechei ra rubdois el chad el sebecherir el mekekii a bital ked. Bebil ra taem ea nglunguchel a mo mengebkall e ra bilel.22 Bebil ra taem eng mengebkall ra medal.23 Bebil ra taem Ngii a dechor elmo meluluuch, bebil ra taem Ngii a mo tubareuach elmo meluluuch, e ngarngii a tal blol meterob ra medal el meluluuch.24
A Lukas a silodii a Jesus ra le mei el morsel Ngii a mo melngakireng el kirel Ngii a mo meluluuch el“blechoel loba blak el reng. ”25 Ngdi ng mekerang a chad el mle erungel a loluluuch e loba blak el reng? Kede domdasu el kmo a rokui el nglunguchel a mlara rengul, engdi sel mo toketekii el melenget e ra tngakireng er Ngii e okiu ra ringel el diak a mo mechesengar, Ngii a melchesuar elmo meluluuch el lmuut el lolengit, mesel beraod el Ngii a melenget el kirel a mlo uchul a tebedel a rasech ra bedengel rokir.
Ngokiu seikid el siasing e ra Kristo ra bol mesisiich e ra kodall ma tial beches el sengk er Ngii el me rengak e ra kesai el sandei malechub eng buil el kchad, e ak beches e louchais ersel klemerang ra diak a ulebengelel klengar ma usbeched elmo blak a rengud el lomdasu el kirel.
A kuchias el kmo sel mei a Kristo, Ngii a kirel medengelkid—el diak kede kuk di ngara mlamo mechut el rekord e ra techolbechelid ngdi kede chemolt el loltirakl, meral loumerang, el mengeluoleu a telbiil el chedal. Tiang a orechudel el tekoi el kired el rokui, dil le merkmo de rengesii sel mekngit el kle uchel reng: “Ngdiak kudengelkemiu,”26malechub, el ua Joseph Smith ra loliuid ersel tekoi, “[Kau] a dimlak a tal modengelkak.”27
Kle ngeltengat, kid a ngarngii a ngeseu el kirel tial lureor—betok el ngeseu. Ng kired elmo oumerang ra re anghel me a ongasireng ma telbiil e ra chedaol priesthood. Ng kired elmo oumerang er a sengk ra Chedaol Reng, blekerdelir a rungalk telungalk ma re sechelid, mesel klisichel a klikiid el beltikelreng e ra Kristo. Ng kired el mo oumerang a ocholt, me tirkel omes mar olecholt me a President Russell M. Nelson. Ng kired e loumerang el kmo ngokiu ra nglunguched ma ongtid me kid el mekedung, eng meral sebeched el mersel morra “Rois ra Zion, … sel belual a ngar el Dios, basio el babeluades, ng chedaol ra rokui el tekoi. ” 28
Rodam ma rodos, mesel douuchel a kengtid e de mesisiich el lomakes el bedul sel “lolsechelel a krasia,”29loldars elmo re Ngii a ongtid ma nglunguched, e kede mo nguu a klubechub ma klausubes e ra bekokeuii el imal a Chedam el Diak a Ulebengelel ma kedung, el melmalt e klikiid el Ngelekel. E uaisei, lobengkel a Job me a re ngelitel el mekedung, kede mo mesang a beluulechad el “limis el klebokel”30el diak kede betebengar. El ngara a ngklel a Jesus Kristo, amen.