![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F62%2F31%2F6231d5d693e47bab01cf8455ef4093d34d4d7d0e%2F6231d5d693e47bab01cf8455ef4093d34d4d7d0e.jpeg/full/!250,/0/default)
Di Mo Tang Lobengkel a Kristo
Kid a mla mo tang lokiu a beltikelreng me a klaumerang er a Jesus Christo me a Tngakireng er Ngii. Sel rengul a meral uldimukl a kirel di mo tang lobengkel a Kristo.
Ak meral mla melchesuar er a Tngakireng er a Jesus Kristo er se er ak dirk kekerei, engdi a klemerang er a Tngakireng er a Osobel a mlei er sera lluich me a eim a rekik. Ak dirk tilobed er a daingak er a Standord Law School e milsuub el mo melai er a bar exam er a California. A delak a ulemekedong e dilu el kmo a demak el rubak er a Crozier Kimball, el kiei er a Utah, a metkung. Ng dilu el uase a lsekum eng soak el mo mesang, eng kirek el mo remei er chelechang. A demak el rubak a mle okai me a elolem a rekil e meral mle smecher. Ng mle ungil odngelek. Ng mle ungil a rengul mesekak e mlo ouchais er a klaumerang er ngii el merngak.
A Crozier sera ledei a rekil, ea demal el, David Patten Kimball, a mlad el mle okeua ma euang a rekil.1Crozier a ulureng el kmo a demal me a demal rubak el, Heber C. Kimball, a kongei er a klengar er ngii e melchesuar el ngii a milengull er a uldelid el resechel.
A kot el omellach er a demak el rubak el merngak a mo mengroid er ngak er a lekong blingelek malechub eng techellek ele uchul tirka el blak a rengrir el rebeldekek. Ng dilur ngak el kmo a osengek a mobedul a Osobel me a Tngakireng er a Osobel. Ng dilu el kmo kid a rokui el ngelekel a oubeltik el reng el Chedam er a Babeluades. Ng diak el iior er a kmo tengera rucheled er tial beluulechad, derta er kid a mo onger el mora Osobel el kirel a kmong mle uangera otirekled er a Llechul.
A demak el rukab a mle melekoi er a Osobel el “Mengkar er a Siseball,” mengai er a 2 Nephi 9:41. Ng dilu er ngak el kmo ngoureng el locha ngungil besul a ouchelreng er ngii meng mo sebechel nguu a klechubechub er a Osobel.2
Ng meral rirtechii a renguk. Ak medengei el kmo ngii a mle melemalt el chad. Ngii a mle patriarch e mlo mesiou el betok el taem el misionari. Ng ulsisecheklak el kmo ng diak a dita el chad el kaeri el mora Dios lokiu a ungil urerel e merkong el diak luldimukl sel klungiaol el ngara Tngakireng er a Osobel. Ak lotkii el merchelechal sils sel klou el beltkil a rengul a Demak el rubak el mora Osobel me a Tngakireng er Ngii.
Sera 2019 el kngara ureor el mora Jerusalem,3 e ak mlo oldingel er sel delmerab el ngara erul chellibel el ngii a locha kmeed er sel basio el Osobel a milrisou a ocherir a re Apostil er Ngii ruchei er a le Mekerus. Ng rirtechii a renguk e ulemsadu er sera lollach er a re Apostol er Ngii el mo kau beltik el reng.
Ak dobedebekii sel nglunguuch longtil Osobel el kired. Tial nglunguuch a dilubech er a mochu ulebongel el sesei el sikang er a klengar er Ngii er a beluulechad el ngii a llechukl er sel Ebangkelio er a Johanes.
Tial nglunguuch a millutk el kirir tirke loltirakl er a Kristo, uldimukl er kid el rokui.4 Ngar sel ongtil a Osobel el mora Demal, e Ngii a ulelngit “me tir bol tang; el di uai kau e, Chedam, el ngar ngak, me a Ngak a ngar kau, me tir el dirrek bol sebechir el mo tang el ngar kid.” A Osobel a millemolem “Me a klebkall el omngiluu el meskak a blak besterir; me bol sebechir el di mo tang, el uaikid el di tang.”5 Kltalreng a ble loluluuch el kirel a Kristo ruchei er a le motelechakl e bol Mekerus. A kltalreng lobengkel a Kristo me a Chedam er a Babeluades a sebechel morngii lokiu a Tngakireng er a Osobel.
A klechubechub el olsobel el ngara Rubak a diak lultuil er a uldelid el rasech, skuul, deruchall ra buai, malechub a iro. Tiang a ultuil er a di tang lobengkel a Kristo me a Llechul.
A Prophet Joseph Smith me a Oliver Cowdery a ngiluu ocholt er a teketekel a Ikelesia me a kabelment er sera 1830, el di mle mereched er a le meteketek a Ikelesia. Sel ngii er chelechang a section 20 a le chiliuii a Prophet Joseph er sel kot el klou el ongdibel er a Ikelesia e mle kot el ocholt el ngii a le ngiluu a kengei er ngii a rokui el chad.6
A ikel ngara chelsel tial ocholt a meang el tekoi. Ngosisecheklid er a klou el ultutelel me a ngerchelel a Tngakireng er a Osobel e mekera dolail er tial klisiichel me a klengeltengat er Ngii lokiu a klechubechub el tngakireng er Ngii. A Prophet Joseph a mle lluich me a eua rekil e mla ngmai a lmuut el betok el ocholt e mla rokir a oidel a Babier er a Mormon lokiu a sengk me a klisichel a Dios. Tir el terung el Joseph me a Oliver a mla medangch el mla mechedaol el Apostol, me toba ngerachel el mo omtebechel er a Ikelesia.
Bades 17 el mora 36 a olab a kedeb el klou a ultutelel osisechakl er a Ikelesia, uldimukl a olechotel a Dios el meral ngarngii, Blebelir a rechad, Rebet, me a uldesuel a Chedam er a Babeluades er a mo suobel lokiu a Tngakireng er a Jesus Kristo. Bades 37 a ngarngii a meklou a ultutelel ruoll el kirel a techolbechelid el mora Ikelesia er a Rubak. Bades 75 el mora 79 a beldukl a nglunguuch er a chedaol belsoil el dousbech sel bek el Chedaol Sils.
Osisechakl, llach, chedaol belsoil, me a omeruul el Rubak a milkdubech lokiu a Joseph smith, el Profet er a Oluut, aika meral uchelel.7
A ulsbechall el mo nguu a techolbechelid, a kmal dmolech, e ngodech el beot. A ika uldimukl a klengariou el reng er medal a Dios, chelam el reng e melemalt a rengul,8 ouchel reng el kirel a rokui el klengit, nguu el mo obang a ngklel a Jesus Kristo, outekangel el mora ulebongel, e ulecholt er a urered el kmo kede mla nguu a Reng er a Kristo.9
Ng klou a ultutelel el rokui el mekedmokl el kirel a techolbechelid a okiu a chedaol tekoi. A ngiul a ilteet me a ngarmab el deruchall er a buai a diak a ultutelel. A remechebuul me a remerau a diosisiu el mortir a ngiul a chedaol tekoi.
Ng diak a iro, bedengel, belual a chad el ulsbechall. A Babier er a Mormon a meketeklii el kmo arokui a loleker er tir el momelai er a klungiaol el ngar a Rubak, chedelekelek ma becheleleu, kelebus ma mimokl, sechal me a redil; … rokui a diosisiu er medal a Dios.10 A Rubak a millekoi el kmo a rokui el chad a ngar ngii a techellir el di ua tang, e diak a loldik er tir.11
El bleob el di “osisiu” er medal a Dios, eng rulii meng diak a belkul el domriuch a klekakerous er kid. A rebebil a cheleuid el mengesuseu er kid “el mo omdasu er a rechad me a derta er kid el imong el ngodech er kid el ngii a diak el merang. A [rebebil] a nguu a merang, engd di telkib el kle kakerous, e mkukii el meral mo imis luldirkork.”12
A lmuut el tang, a rebebil a cheleuid lomdasu el kmo leng rokui el chad a lolengit er tir el monguu a klungiolel a Rubak me a diak a ulebengelel klengar, eng diak a longerchir el kirel a omerellir.13
Engdi, a chedaol llechukl a melekoi el kmo a rokui el mla mukngerachel chad a kirir el mo ouchel a rengrir er a kngterir e oltirakl a Llechul.14 A Rubak a mla meketeklii el kmo a rokui a ngarngii a llemeltir el mo melilt er a ilmolk me a diak a ulebengelel klengar, lokiu er ngikel Olngeseu er a rokui el chad, … e orrenges a ngarbab el llach; e blak a rengrir er a tekingel, e ngiltii a diak a ulebengelel klengar.15. Sel mo nguu a klengeltengat er a Tngakireng er a Osobel, eng kired el melilt el mo ngiltii a Kristo e olengesenges a Llechul.
Chelsel a klengar er ngak, ea “melilt” me a ”mimokl el reng” a mla meketiit e ngara klau titekangel. Ng mla ngarngii e melemolem el morngii a klautitekangel er a uldasu er a ikal tekoi.
A llechukl el dirk tilobed er a babier er a daingak, e a merael chisel sensei a melekoi el kmo, “Ng diak a mimokl lemeltel a chad.”16 E mechas a rengid, le ngika el sensei a dirrek el melekoi el kmo, “Ng diak a Dios, … e diak a mimokl lemeltel a chad, … e tiang a klou, el ngodech, el beluulechad.”17 Ak mesisiich el diak kumerang er ngii.
A dodai er a osisecheklel a klaumerang er kid a kmo kid a obang a mimokl llemelted, 18 el uldimukl er ngii a mimokl el reng.19 A Mimokl a msa chad a llemeltel el melilt e meruul. Tiang a klou a ultutelel el morsel uldasu er a mo suobel. A lak a lemeltel a chad el melilt, eng diak el sebeched el mesuub, e ngoriakl, malebuch e dolilt el mo di tang lobengkel a Kristo. E le uchul a llemeltel a chad, e kid “a mimokl el melilt er a ilmokl me a diak a ulebengelel klengar.”20 Ngar ongdibel ra babeluades er a klengar ruchei, ea uldesuel a Chedam a uldimukl er ngii a mimokl el ngii a klou a belkul el teletael. A Lucifer a ulemtok e mle soal melemall er a llemeltel a chad el melilt.21 Maluaisei, e sel techall el nguu a bedenged ra tech a milengai el diak el bora Diablong me tirkel mlo oltirakl er ngii.
Tirkel kuk rebebil er a reng el ngalek ruchei ra beluulechad a ultutii a llemeltir el melilt el moltirakl er a uldesuel a Chedam er a Babeluades. A rengalek el reng el mlukngeltengat er a cheroll el mertial klengar er a beluulechad a melemolem el ngarngii a llemeltir el melilt. Kid a mimokl el melilt e meruul, eng di diak el sebeched el ngodechii sel mo urebetellel. “A omelilt lungil me a llemalt a omdid el mora deureng, budech me a diak a ulebengelel klengar, e a bai omelilt er a klengit me a mekngit e kuk omdid el mora chelemuul reng me a klengitelreng.”22 El uaikel le dilu Alma, “A mekngit a diak el deulreng.”23
Tia el ulis el kausichai a rechad er ngii el beluulechad, eng ngarngii a di blechoel el blakelreng er a mo ngarbab. A melasem el mo kot lungil el sebeched a sebechel lokiu a llemalt e ungil a belkul lomeruul. Tiang a osisiu ngii me a osisecheklel a Rubak. A omeruul el mo mengkekerei malechub a melemall er a rebebil malechub a omekdubech a mekngit el mo merrob a mo klungiolir a rechad a omtok er a osisecheklel a Rubak. Ng diak el kired loltelechakl er a dengara chelsel tekoi malechub a rechad el kirel a dolib el mo meruul a tekoi lomtok a llechul a Dios.
Chelechal beluulechad, eng beot el domes el bedul a klalo me a ungil deruchall er a ureor. A rebebil a chemoit a llach el kirel a diak a ulebengelel me a omelilt el meskid a meklou a ultutelel el kirel a diak a ulebengelel. Ke de mo ungil sel bo doltirakl er a omellach er a President Russell M. Nelson el mo “Omdasu er a Ngarbab el Klebkall.”24
A kot el klou a ultutelel omelilt a sebechel mekedmokl er a bekord el rokui el chad el diak el iior er a duch, sebechel remuul, techall, malechub a udoud. A melisiich meng ngaruchei a lolilt a telungalek a klou a ultutelel. Tia kmal bleketakl er a chelsel a chedaol llechukl. Ka di bo momdasu er sel llechukl el ngara 1 Nephi el Lehi “a chiliis el mora oreomel. E mlo iikrii a blil, me a chetemel, me a kloklel me a ududel kolt me a silber, me a meringel chad el kloklel, ngii el rokui el di mlo medechel, ng di ngiluu a telungalek er ngii.”25
Me sel bodechau a chetituokel er a klengar, eng betok el tekoi a dubech el diak el sebechel el mekerang. Secherel a bedenged me a aksident a sebechel uldimukl er a tial teletael. Tial dirk mlorngii el klou el secher er a COVID-19 a meral mla klou a le ngedechii ra rechad el tir a milruul a rokui el melemalt. A betok el meklou a ultutelel lomelilt, kid oba klisiich. Deluultel morsel taem er ak misionari, Elder Marion D. Hanks, el mission president er kemam, a mle soal a ki bo modengelii sel poem er a Ella Wheeler Wilcox:
Ng diak a techall, diak a de borngii, diak a ngarmedad,
Sebechel ngodechii malechub el temelii malechub e loba klisichel
Sel mesisiich el blakelreng er a uldalem a rengul chad.26
A tekingel a llach, omeruul, omengull er a klechelid, me a kiei el ngara llemalt, kid a oba klisiich. A klaumerang er kid el mengull er a Dios el Chedam me a Ngelekel, el Jesus Kristo, a omelilt el kid a meruul.27
A kulengit el kmo ngak a diak kuldubech er sel diak a klemeriar reng el kirel a skuul malechub a ureor. A kulekoi er ngii a kmo sel sekum me a omerelled el kirel a skuul me a ureor a dengai el morbab er a telungalek me a mo tang lobengkel a Kristo, e sel diak domdasu er ngii el mekedmokl a sebechel momekngit ruriul.
Sel bleketakl e beot el suobel el ngara Doctrine and Covenants 20 a rutechii a rengud e mengesuseu e le ngii el kilungii e meketeklii cheledaol teletael. Ngolisechakl el kmo a mo suobel a morngii le Jesus Kristo a omeklemalt e mengedaol a reng el ouchel e leng sel krasia er a Osobel.28 Ng dmedesii a rael el kirel sel ngarbab el ngerchelel a Tngakireng er Ngii.
Ng kired el mo blak a rengud el melai er a rebebil el mo uldimukl er a kltalreng el de ngara chelsel. A lsekum meke de oltirakl er a omellach er a President Russell M. Nelson el mo mengideb er a mla meterakl el Israel er a ikal erul el beluu er tiang me sel bitang, eng kired el melai er a rebebil el mo uldimukl er a kltalreng el de ngara chelsel. El uasel klebokel losisecheklel a President Nelson: “Ngara rokui el meklou el beluu el mora iuns el ngara daob, blak a rengrir el chad a bla longideb er tir el mora Ikelesia er a Jesus Kristo er a Uriul-klebesei el Santo. Klekakerous er a siukang, omelekoi, bedengir, iro, me a belurir a nguemed el mo diak a belkul sel belsiseb er a rael er a telbiil tirkal blak a rengrir el merael el mora betik ra rengud el Osobeled.”29
Kid a mlo uldak lokiu a beltkil a rengud me a klaumerang er kid er a Jesus Kristo me a kid el ngelekel a oubeltikelreng el Chedam er a Babeluades. Sel rengul a meral uldimukl a kirel di mo tang lobengkel a Kristo. A chedaol ruoll er a techolbechelid me a chedaol belsoil el ngara Doctrine and Covenants 20, el dmak lobengkel a telbiled er a templo a oldak er kid er a ileakl el rael e meskid a techall el mo tang er a bek el meklou a ultutelel teletael e mo kiei er a budech me a kltalreng.
A kuchotii a meral sioning el kmo a Jesus Kristo a ngar, e le uchul a Tngakireng er Ngii, e kid a sebeched el di mo tang er a Kristo. El ngara chedaol ngklel a Jesus Kristo, amen.