![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F6f%2F5c%2F6f5cc328d78a97009bd80cf58ed999d2b8122c68%2F6f5cc328d78a97009bd80cf58ed999d2b8122c68.jpeg/full/!250,/0/default)
Telbiil me a Ngerachel
A Ikelesia er a Jesus Kristo a lodengelii el ikelesia el lomeketakl ra omengetmeklel a telbiil lobengkel a Dios.
“Ng mekera e a Ikelesia er kau a ngodech er a rebebil?” A nger er ngak el mertial kmal klou a belkul el ker a mla mengodech er tial bla bok klungang me a Ikelesia el mla meleketek. Sera kbechell er a Utah er a rak ra 1932, e a cherengelel a rechedal a ikelesia a mle bekord el 700,000, el ulumesingd el cheldull er a Utah me beluu el kmeed er ngii. Sel taem, engdi mle euid a templo. Elechal taem e a cherrengelel a rechedal a Ikelesia er a Jesus Kristo ra Uriul-klebesei el Santo a mla chengelakl er a 17 miliol er a bekord el 170 el beluu er a beluulechad. Mel muut e ra April 1, e kede mla oterkokl a 189 el templo er a betok el beluu me a 146 a ngara kakerous el telengtengil a uldasu me a okedecheraol. Ak mla melchesuar elmo mengedecheduch el kirel a moktek e ra ikal templo me a reksii ma rmoktek ra ikal telbiil el kirel sel dosiou. Tiang a mo dochel a ikel mellomes el osisechakl er tirkel milngedecheduch ruchei.
I.
A telbiil a sel blakelrreng el mo kudmokl a kltukl el ngerachel. A keltmokl el telbiil el ngara rengud a kmal klou a ultutelel el kirel a semcheklel a klengar er kid ma ikel ngerchelel a buai. Chelechal taem e tia el uldasu a betok a remelsemai er ngii. A remekesai a omtok el kirel a omerredel er a chelechad e kmo a chad a kirel di ngii el mimokl ra ngidi el ngerang el mo uchul el lorob aikel mui el lemeltir mel mimokl. Engdi kede medengei ra ikal telael el blekeradel el kmo a chad a chemoit a bebil ra lemeltel el mo ngmai a ikel klungiaol el kiei el ngara ikel klebechel el chelechad. Tial mo imikl ra lemeltel a tang a kot el klou a belkul leng ngultuil er a blakerreng a lechub eng telbiil, el lolekoi me a lechub eng omeruul.
Aikakid a bebil a olechotel a orretel a telbiil el ngerachel er a chelsel a buai: (1) rechad er a kerekeriil, (2) soldau, (3) rechad er a osbitar, me a (4) rechad er a seseb. Tirke el rokui el tir a ulsiseb er a chelsel aika el ureor a ngara blakerreng—el blechoel el mouak el okiu ra miltib me a lechub eng chedaol telbiil—el mo kudmokl a ngerchelir. Tiang a osisiu el mora re mui el mesiou el misionari. Aikel kltukl el bilir malechub eng olechotel a ngklir a ngarngii el ouchais el kmo ngika el loubail aikang a ngara cheungel a telbiil e ngarngii a ngerchelel el mo olisechakl e mesiou e kirel nguu a ngeseu er seikid el lomesiou. A tara dirrek el belkul a omeklatk er tirka el oubail aikang ra aikel ngerchelir er a telbiil. Ng diak a olai er a ikel kltukl el bilir me a olengchelir, ng di ngusbechall e luleklatk el kirel a ikel tokubets el ngerachel el tirkal lobail a mla ngmai. Tiang a dirrek el merang er a ikel olangchelel a kebkab ra telbiil ma kebkab er a chebechiil ma ikel moktek el louchais e ra rechad malechub eng ngomeklatk e ra ruukebkab e ra ngerchelir kirel a ikel telbiil.
II.
A ikal blak dung el kirel a telbiil el ngii a dodai er a ikel lolkael ra klengar er kid a melutk el tokubets el kirel a re mengull a telbiil. A dodai me a reksi er a betok el chelechad er a klechelid me aikel ultebechelel a ultuil er a telbiil. Tara okesiu, a Abrahamic covenant a kmal klou a ultutelel el mora bebil er a uldelid el klaumerang er a bebil er a klechelid. Ng ngochotii sel chedaol luldasu el Dios a lolib a telbilel lobengkel a Rengelekel. A Chuodel Renged a blechoel lomtutk a ikel telbilel a Dios el mora Abraham me a rengelekel.1
Sel kot el tebechedel a Babier er a Mormon, el ngii a milluches er a taem ra Chuodel el Renged, a bleketakl el ochotii a ngerchelel a telbiil er a reksi me a loldanges a re Israelite. A Nephi a lsilbedii el kmo a re Israelite er sel taem a mle “rekord ra re Jews, el ngii a ulsiseb er ngii a telbilel a Rubak, el ngii a mla rullii lobengkel a blai er a Israel.” 2 A hong er a Nephi a blecheol el mesaod el kirel sel telbiil mora Abraham3 ma mora Israel “el rechedal a Rubak er a telbiil.”4 Tia el omeruul el ngara telbiil el obengkel a Dios ma remengeteklel a ikelesia a dirrek el ngara chelsel a Babier er a Mormon omeluches el kirel a Nephi, Joseph el ngara Egypt, King Benjamin, Alma, ma Captain Moroni.5
III.
Sera lemei sel taem ra Olutel sel cherengelel a ebangkelio ra Jesus Kristo, ea Dios a ulemekedong e ra profet, Joseph Smith. Ng diak dodengelii sel kmal cherrengelel a sodel aikel mle kot el omesodel a anghel el Moroni el mo er ngika el klunga el ngeasek el profet. Kede di medengei el kmo ng dilu ra Joseph el kmo “Dios a ngarngii a [urerel] bo loruul” e a “cherrengelel a diak a ulebengelel el Ebangkelio” a kmal kirel mo mutaut, el uldimukl er ngii “aikel yaksok el ngii a riruul lobengterir a rechedam.”6 Kede dirrek el medengei el kmo aikel chedaol llechukl el ngeasek el Joseph a mle blak a rengul menguiu—el lmuut el ruchei ra bol mokedong el mo meleketek ra ikelesia—a mle betok el osisechakl el kirel a telbiil el ngii a mle oleiuid ra Babier ra Mormon. Sel babier ea klou el madedok ersel Olutel a cherengelel a ebangkelio, luldimukl ra uldesuel a Dios el mora Rengelekel, me a Babier ra Mormon a mui a omsodel kirel a telbiil.
El kmal mla mo ungil subii a Biblia, a Joseph a locha kmal mle ungil medengelii a hong ra Hebru el mesaod ersel kmal moktek ra Osobel “el mo meruul ra beches el telbiil el obengkel a blai ra Israel ma blai ra Judah.”7 A Hebru a dirrek el mesaod e ra Jesus el ngii a “mesebechakl ersel beches el telbiil.”8 Klou ultutelel, a ngklel a osisecheklel a Osobel er a beluulechad ra chedaol llechukl a “Beches el Renged,” el tara ngklel a domekedong er ngii el “Beches el Telbiil.”
A telbiil a mle dodai er a Olutel a ebangkelio. Tiang a mucholt er aikel uchelel a telengtengil a Rubak ra longedereder ra Profet el mo meleketek ra Ikelesia er Ngii. Ng kmal di mlo merek el meluches a Babier ra Mormon, e a Rubak a milngedereder ra teketekel a mla moluut el Ikelesia er Ngii, el ngii a uriul eng mungakl el Ikelesia ra Jesus Kristo ra Uriul-klebesei el Santo.9 Ocholt el mlodars ra Ongeua el buil ra rak e ra 1830 melekoi el kmo a rechad “a mo kiu ra techolbechelid e mo chedal a ikelesia er ngii” ra uriul ra le “sioning” (el belkul a kmo te meral olecholt ra klaumerang) “el kmo te kmal meral louuchel a rengrir ra rokui el kngterir, e kongei el mo nguu a ngklel a Jesus Kristo, e blak a rengrir el mo mesiou er ngii el mora ulebongel.”10
Tia el osisiu el ocholt a mekrolii a Ikelesia elmo “blechoel mo kebetech e mo nguu a blauang ma wine [ralm] el melbedebek e ra Rubak el Jesus.” A ultutelel tial chedaol ruoll a de betik er ngii ra chelsel a nglunguuch el kltukl el mora elder malechub eng prist el ngii a melekoi er ngii. Ngii a mengedaol aikal blauang el mora rokui el tir a mo nguu el kmo te mo sioning er kau, Choi e Dios el Diak a Ulebengelel Chedam, e tir a kongei el mo nguu a ngklel a Ngelekem, e mo blechoel melatk er ngii e oltirakl a llechul el Ngii a mla mesterir.11
Sel kmal kelulul a deruchelel a telbiil er a mla moluut el Ikeleisa a liluut el smisichii a ikel mle ngaruchei el Ocholt el Rubak er sel kot el omelchesel Ngii a ulecholt. Sei ea Rubak a ouchais el kmo ngii a mla mekodongii a Joseph Smith e le re kiei ra beluulechad a mla mo cheroid er a chedaol ruoll el kirek, e mla tomall a diak a ulebengelel telbilek.12 Tial el ocholt a lmuut el smodii el kmo aikel Llechul a mlo er ngii meng mo uchul eng sebechel morngii a diak a ulebengelel telbilek.13
Chelechal taem e ke dungil medengei a ikel moktek e ra telbiil er a mla moluut el Ikelesia me a oldanges el rechedal. A President Gordon B. Hinckley a uldersii tial bleketakl lomsodel sel lotbechel a techolbechelid er kid ma bekl el sandei el dolai ra sakrament: “A bekl el chedal tial ikelesia el mla modulb ra ralm e ra techolbechelid a mlamo chedal sel chedaol telbiil. Sel bek el taem el denguu a sakrament ra belsilel a Rubak, e kede omekbeches er sel telbiil.”14
Te betok el milngedecheduch er tial ongdibel a ulmeklatk er kid el kmo a President Russell M. Nelson a blechoel lomekedong er sel uladasu er a deurreng el “rael er a telbiil” el ngii “a omekerael er kid el lemuut el mo er a [Dios]” me a “deleuill er kid lobengkel a Dios.”15 Ngii a olsisechakl el kirel sel klou a ultutelel a telbiil er a chelsel a templo e omekduch er kid el mo mesang a ulebongel er a uchelel e mo “omdasu el celestial.”16
IV.
Chelechang e ak lmuut el mesaod a telbiil ra templo. Mesel chirengelii a ngerchelel el mlo oluut e ra cherrengelel a ebangkelio ra Jesus Kristo, e a Profet Joseph Smith a chiloit a klou el temel ra ikel ulebengelel a klengar er ngii el mengedereder ra okedecherul a templo ra Nauvoo, Illinois. Okiu ngii e a Rubak a ulecholt a chedaol suobel, osisechakl, me a telbiil el mor tirkel mle oltirakl er ngii el mo mesiou ra templo. Tirkel tir a milchedaol sel ngklel a mlosisechakl ra uldesuel a Dios ra mo suobel e siotai el mo kudmokl a chedaol telbiil. Tirke el tir a kiei el oba klaumerang el mora ikel telbiil a mo nguu a diak a ulebengelel klengar, el ngii a rokui a kloklir e tir a mo kiei el obengkel a Dios ma Kristo el mo cherechar.18
Tial omengemedaol ra Templo ra Nauvoo a milkedmokl uchei er tirka el ruchelel a rechedal a ikelesia a mlodik e mo omuchel rsel omerollir el mora rois el bedul Ngebard. Kede olab a betok el olechotel a klaumerang er tirkel mle uchelel a ikelesia el kmo sel klisiich el ngiluu ra lemorenged el mora Kristo ra lemechedaol ra Templo ra Nauvoo a milsterir a klisichir el mo rokir tial kmal mle meringel el omerael e ulemuchel a delengcheklir ra Ngebard.18
A rechad el tir a mla mechedaol ra chedaol templo a kirir el oubail a mamed ra templo, el ngii a tebechedel a bail el diak el mocholt e leng ruul el moubail er cheungel a bail. Ng omeklatk er tirkel mla mechedaol el rechedal a ikelesia ra ikel chedaol telbiil el tir a mla remuul ma dirrek el klengeltengat el tir a mla yaksok ra chelsel a chedaol templo. El mo ngmai aikal chedaol moktek, kid a bla lolekoi er kid el mo blechoel oubail aikal mamed ra templo, el di mo ior eng kirel mengodech e leng kmal kirel. E le telbiil a diak “lolengull,” sel mengubet a memedel a tang e te medengei el kmo te mo merrob aikel ngerachel ma klengeltengat el tir a medengei. A mo klekakerous er ngii, a chad el ngii a blechoel el oubail a memedel el lobang a klaumerang er ngii e oltirakl aikel telbiil ra templo a melisiich a ngerchelir el mesiungel a Rubak el Jesus Kristo.
A Ikelesia er a Jesus Kristo er a Uriul-klebesei el Santo a omekedechor a templo ra beluulechad el meliuekl. A moktek er ngii a mo omekngeltengat er a ngara telbiil el rengelekel a Dios el oba odanges ra templo me a dirrek el oba chedaol ngerachel ma klisiich ma klebechel el klengeltengat el lulekrael el mora Kristo mete mo ngmai lokiu er tial telbiil.
A Ikelesia ra Jesus Kristo a lodengelii el ikelesia el lomeketakl ra omengetmeklel a telbiil lobengkel a Dios. A telbiil a de betik e ra bekl el chedaol lureor ra olsobel ma ngarbab el klebkall el tial mla moluut el Ikelesia a mengetmokl. A chedaol ruoll ra techolbechelid ma ikel telengtengil a telbiil a klou a ultutelel el kirel a mo soiiseb ra kot el ngarbab el renged. A chedaol ruoll ma ikel telengtengil a telbiil er a templo a klou a ultutelel kirel a mo soiiseb ra kot el ngarbab el renged, el ngii a diak a ulebengelel klengar, el ngii sel kot el ngarbab el sengk ra Dios.19 Sei a lultab er ngii a Ikelesia er a Jesus Kristo er a Uriul-klebesei el Santo.
A kuuchais er a klaumerang er ngak er a Jesus Kristo, el ngii a bdelul sel Ikelesia, ma klengeltengat er Ngii el mo tirkel rokui loltirakl a ikel chedaol tebilir. El ngara a ngklel a Jesus Kristo, amen.