“Bom Chelellakl, e Modengei el Kmo Ngak a Dios”
Ng sebeched el mo chelellakl e medengei el kmo a Dios a Demad er a Babeluades, e kid a Ngelekel, e a Jesus Kristo a Osobeled.
A dirk mla er ngii el open house er a beches el blil a Rubak, e a kulbengkel a cheldebechel er a re journalist lomais lomes er tial chedaol omekedecheraol. Ak silodii a moktek er a templo er a Ikelesia er a Jesus Kristo er a Uriul-klebesei el Santo e ulenger a betok el ungil ker tir.
Uchei er a ki msiseb er a celestial room, eak silodii el kmo tiakid el tokubets el delmerab er a blil a Rubak a olchotel a budech ma klebekelel a blai er a babelaudes el sebeched el mo er ngii ruriul er tial klengar. Ak silodii el mo er tir el kmo ng diak dechadecheduch sel desiseb er a chelsel a celestial room, eng di sebechek el mo onger a ker tir sel ki bem tobed.
Uriul er a ki mtobed ra celestial room e kim kldibel rokui er a telkib el basio, e a kulker el kmo ngarngii a lilsang el sorir louchais el kirel. A tara journalist a dilul kmo, “Ng dirkak a ta me kumelchesiu el uaisei er a chelsel a klengar ngak. Ng dimlak kudengei el kmo a uai tial teletael a ngarngii er a beluulechad; e dimlak kumerang el kmo ng sebechel ngarngii a kellechakl el teletael uai tiang.”
Ng mlo mechas a renguk er a tekingel ngika el chad. A tekingel ngika el journalist a meketeklii a chimol utebengall el tekoi el kirel a kellechakl—mo ikrii a nglemuu ma cheliseksikd el beluulechad er kid.
Uriul e kulbedebek er a tekingel ngkal journalist e kumtab a teletael er a klengar kid er chelechang—a demechesang er ngii el tekoi, cherrodech, kakerous el chad, olibesongel, me a techukill el mengurs er kid—e ak mlo melatk er a chimol bades er a chedaol llechukl: “Bo mchelellakl, e modengei el kmo ngak a Dios.”1
Nglunguchek me a Chedaol Reng bo lomekellomes er kid er chelechal dolbedebek er a ngarbab e chedaol delechel a kellechakl er a klengar kid—me a chelellakl el reng er a rengud el rullid meng mo sebeched el medengei e melbedebek el kmo a Dios a Demad er a Babeluades, e kid a Ngelekel, e a Jesus Kristo a Osobeled. Tial meang el klengeltengat a ngarngii el mora rechedal a Ikelesia el tir a melasm el blak a rengrir “chedal a Rubak er a telbiil.”2
Bom Chelellakl
Sera 1833, e a Resanto el mlara Missouri a mlara meringel odechelakl. A remekngit el chad a mla oldik er tir er a rekeblirir er a Jackson County, e a rebebil er a rechedal a Ikelesia a mla melasm el mengedmokl a delengcheklir er aikel kmeed el beluu. Eng di odechelakl a millemolem, el mle betok a mlo cherur a kodall. Tiaikid el meringel taem, e a Rubak a dilu iakid el tekoi el mora Profet Joseph Smith er a Kirkland, Ohio:
Bol chelellakl a rengmiu el kirel a Zion; le rokui el chad a blebelek; bom chelellakl e modengei el kmo ngak a Dios.”3
A kumera el kmo a tekingel a Rubak el kmo “bom chelellakl” a lmuut el dmolech a belkul ra di ku di mo diak dongedecheduch me a diak dongitengtik. A moktek er Ngii a bai locha kired el mo melbedebek e ultuil er Ngii me a Klisichel er a rokui el taem, me a rokui el tekoi, er a rokui el basio el [kid] a ngara chelsel.”4 A leuaisei, e a “mo kellechakl” a locha rael el dengai a moktek er kid el bedul Osobel el ngii a kot el ngarbab el uchul chedaol kellechakl er a reng el smisichid er a ikel meringel tekoi.
Dechor er a Mesisiich el Bad
A meral klaumerang a blechoel ultuil er a Rubak el Jesus Kristo— el Ngii a Chedaol e Di Chimong el Ngelekel a Diak a Ulebengelel Chedam me a urerel lolsobel el Ngii a kildmeklii.
“Le ngii a mla onger a rokui el llach, e ngoiteterir tirkel rokui loumera er ngii; e tirkel loumera er ngii a mo ngmai a rokui el ungil; le ngii a mesebechakl er a rokui el ngelekel a chad.”5
A Jesus Kristo a Osobeled,6 e Mesebechakl er kid,7 e Omtechei er kid 8 lobengkel a Diak a Ulebengelel Chedam e bad el kired el toketekii a chedaol dodai er a klengar kid.
A Helaman a milsaod el kmo molatk, e molbedebek el kmo ngokiu a bedul a Osobel, el ngii a Jesus Kristo, el ngelekel a Dios, e ng uaisei el kirem el mekedecherur a dodaier kau; me se el le mei a se el sesengel a eolt er a diabelong el ongiterbis er ngii, e lolsiu a cheltel el me er kau, e ng mo diak a klisichel er kau e mo diak a techelel el orretau el ruebet er riou er a diak a ulebengelel el ongarm me a ringel, le ng okiu a bad el kau a milkdecherur , el ngii a mesisiich a dai er ngii, el dai er ngii a lulekedechor er ngii a rechad e ng diak el sebechel el ruebet.9
A okesiu er a Osobel el uaia le “bad” el kired el toketekii a dodai er a klengar kid a kmal klou a belkul. Kulengit bomodengei el kmo a Osobel a diak el dodai. Ng bai, kid a kired el toketekii a chedaol dodai er Ngii.10
A dodai a tebechedel a omekedecheraol el bereked er a chutem. A mesisiich el dodai a omecheliu er a omekedecheraol er a kerior el duubech me a mesisiich el ngera el melemall. A ungil dodai a tabesul a berredel omekedecheraol er a basio meng diak el sal mo oberaod cheungel a chutem e rulii bebul meng oberberk el kirel a ureor.
A klisichel a chutem me a dodai a meklou a ultutelel alsekum a omekedecheraol a mo melemolem el mesisiich e diak el mukel ra kemanget el taem. A bebil er a omekedecheraol ousbech, a loruul otil e osubech a deel lomech ra dodai er a omekedecheraol el mora “chelsel a chutem,” el medecherechel, bad el ngara cheungel a chutem el rua baras.
Osisiu el teletael, e a dodai er a klengar kid a kirel ulak el mora bedul a Kristo alsekum ekede melemolem el mesisiich e diak demukel. A chedaol telbiil me a ruoll er a mla moluut el ebangkelio er a Osobel a sebeched lomekeisu el mora ikel otil ma deeel lousbech lomech er a omeekdecheraol mora chutem. Bek el taem el dengai, domes, e domekbeches a chedaol telbiil, e a chedaol otil a rengud a mesisiich e diak el mesim e ulak el mora “bedul” a Jesus Kristo.
A leuaisei, e ngike el oumerang er a Dios a sebechel morngii a urungulel er a ungil beluulechad, oi, ng basio el ngara kadikm er a Dios, el urungulel a msa klaumerang, el mo otil a rengul a chad, el rulterir el mo delalm e mesisiich, el blechoel meruul a ungil omeruul, e mo kobkelii a Dios.11
Mesel lorael mo mesisiich “e cherengel a taem,”12 “ea kldung [a soiseb] er a uldesued,” e kid “a mo ansing [el merale mo mesisiich] er medal a Dios,” ea “Chedaol Reng [a mo] blechoel kldemed.”13 Kede mo mesisiich, el delalem, e teleketek, e selbechakl.14 A dodai er kid sel delalem er a Osobel, e kede ngeltengat el mo “chelellakl”—e oba chedaol klisiich el medengei el kmo a Dios a Demad er a Babeluades, e kid a Ngelekel, e a Jesus Kristo a Osobeled.
Chedaol Taem, Chedaol Basio, me a Blai
A Rubak a meskid a chedaol taem me a chedaol basio el ngosukid el mesuub el kirel tial kellechakl reng er a rengud.
Okesiul tiang, a Chedaol sils a sils er a Dios, el chedaol taem el mla moterekokl el dolbedebek e mengull er a Chedam el ngara ngklel a Ngelekel, e ngara omeruul er a chedaol urerel a priesthood, e ngmai e omekbeches a chedaol telbiil. Bek el sandei e kede ngar omengull el mora Rubak sel dengara blid e dosuub ma dirrek sel dedak el “mesuub el santo”15 ra temel a sakrament me a bebil er a miting. Tiaikid el chedaol sils, e a uldesued, omerelled, me a teleteled a ocholt el debsa Dios lolchotel a beltkil a rengud el mo er Ngii.16 Bek el Sandei, omko kede mo uaisei, el sebeched el mo chelellakl e medengei el kmo a Dios a Demad er a Babeluades, e kid a Ngelekel, e a Jesus Kristo a Osobeled.
A kmal moktek er a omengull er kid er a Chedaol sils a mora blil a nglunguuch e melai er a sakrament ra chedaol sils er a [Rubak].”17 A blil a nglugnuuch el kid a mo kldibel er ngii ra temel Chedaol sils a ikel blal kengei el omekedecheraol—el chedaol basio er a odanges, omengull, me a omesuub. A bek el omekedecheraol a mla moterekokl er a klisiich er a priesthood el ngii a basio el Chedaol Reng er a Rubak a sebechel ngarngii e a rengelekel a Dios a mo medengelii a Osobeleir.18 Omko ng sebeched, el mo chelellakl ra ikel chedaol basio el dengarngii e mo mui el medengei el kmo a Dios a Demad er a Babeluades, e kid a Ngelekel, e a Jesus Kristo Osobeled.
A templo a tara chedaol basio el tokubets el mla moterekokl el dengara omengull e mesiou er a Dios e mesuub a diak a ulebengelel klemerang. Kede omdasou, e ngara omeruul, e oubail el ngodech er a chelsel a blil a Rubak ra ngii dil basio el de borngii. Tiaikid el Chedaol basio, omko ng sebeched, el mo chelellakl e medengei el kmo a Dios a Demad er a Babeluades, e kid a Ngelekel, e a Jesus Kristo a Osobeled.
A ngaruchei el moktek ra chedaol taem ma chedaol basio a kmal osisiu: el ngmai a uldesued el bedul a Demad er a Babeluades ma moktek er Ngii, ma Rubak el Jesus Kristo ma Tngkaireng er Ngii, ma klisichel a Chedaol Reng, ma yaksok lobengkel a chedaol ruoll ma telbiil el ngara mla moluut el ebangkelio er a Osobel.
Chelechal sils eak klmuut el dulii a tekoi el mla medung. A rekeblid a kirel ngii a kot el chedaol taem e chedaol basio el dersta el chad ma telungalek a sebechir el mo chelellakl e medengei el kmo a Dios a Demad er a Babeluades, e kid a Ngelekel, e a Jesus Kristo Osobeled. A mo cheroid ra blid el mo mengull ra Chedaol sils ra blil a Rubak a meral klou a belkul. Eng di luut e rkid el mo remei loba chedaol ues ma klisiich el dengai ra chedaol basio ma omeruul a meral sebeched el melemolem el medengelii a moktek er tial klengar e mo cheroid ra ongetikaik er tial beluulechad.
A melemolem lomengull ra Chedaol sils, templo, ma blai a smisichid el mo oba klisiich ra Chedaol Reng, e melemolem loba mesisiich el telbiil elmora Chedam ma Ngalek, lobengkel a cherrungel urunguled”19 ra ikel diak a ulebengelel yaksok er a Dios.
A blai ma Ikelesia sel bol dak el chimong el ngara Kristo,20 e kede locha mo chemau a bek el ongarm, eng diak bol mechitechut a uldesued ma rengud. Ng locha mo rrau a rengud ra teletael ma ringel, eng di diak bol mesaul a rengud. Kede locha mo ngara odechelakl, eng di kede mo mednegei el kmo ng diak dil kid el tang.21 Kede mo ngmai chedaol klsiiich el melemolem el mesisiich, diak demesim, e ngara klemerang.
Yaksok me a Klaumerang
Ak yaksok el kmo sel deteketekii a dodai ra klengar kid ra bedul a Jesus Kristo, kede mo ngeltengat lokiu Chedaol Reng el mo chelellakl a rengud el rullid el mo medengei e melbedebek el kmo a Dios a Demad er a Babeluades, e kid a Ngelekel, e a Jesus Kristo a Osobeled, e ngeltengat el sebeched el remuul e mo mesisiich ra meringel tekoi.
Ng dmeu a renguk el sioning el kmo a Dios a Demad er a Babeluades, e kid a Ngelekel, e a Jesus Kristo a Osobeled e bedud ra mo suobel. A kuuchais loba chedaol ngklel a Rubak el Jesus Kristo, amen.