Olechotel a Klaumerang er a Jesus
A ongtik a mo oureor er chelechang el mo sobecheklii a basio er kau el mo bekeu er a olechotel a klaumerang er a Jesus.
Sera 1832, a Joseph smith me a Sidney Rigdon a ngiluu a meang el ues el kirel a diak a ulebengelel basio el mora rengelekel a Dios. Tial ues a uluchais el kirel a edei el rengedel a babeluades. President Dallin H. Oaks a milngedecheduch el kirel aikal “dauch er a klebkall” er tial mlo merek el Ongeteruich el buil,1 el kmul kmo “ngokiu a klisiich me a klebkellel a Sib,”2 ngdi bebil er a dersta el chad a mo suobel el mora chelsel a tara ikal dauch, el “lultuil er a ikel soal a rengrir el mlocholt lokiu a teletael el lullilt.”3 Uldesuel a Dios er a mo suobel a ngarngii a techellel el mo er a rokui el Rengelekel, er a ngidil taem ma ngidil basio el kiei er ngii er a beluulechad.
Me sel klebkellel a kot el ngariou er a ikal edei el dauch, el telestial, a engelakl er a rokui el klemedengei, 4 eng urungulel a Demad el kmo kede mo melilt—e, okiu a krasia er a Ngelekel eng mo sebeched el nguu—sel kot el ngarbab a klebkellel er aikal dauch, el celestial, el bo doutkeu er a diak a ulebengelel klengar e “mo ngmai a dikesed el obengkel a Kristo.”5 President Russell M. Nelson a mla melekoi er kid el mo “omdaseu el celestial,” el rengedel a celestial ngii sel moktek er kid e “meral mo kerekikl el lomes a bekl dolib el tekoi er tial klengar el kmong mo terkekeklid er ker er sel tara beluulechad.”6
Tirkel ngara rengedel a celestial a tirkel ngarngii a olechotel a klaumerang er tir er a Jesus, … el tirkel melemalt el chad el mla mo cherrungel lokiu a Jesus el ngikel merrenged er sel beches el telbiil.7 E tirkel ngarsel ongeru el renged a lechub eng terrestrial, a tirkel chetengakl rechad er a beluulechad, e milchebelad er a rechad. Sel llach el melekael er tir a kmo ng diak el bekeu er a olechotel a klaumerang er tir er a Jesus.8 Sel kuk kakerous er ngii, e tirkel ngar sel kot el ngariou,el renged er a telestial a tirkel direkak el nguu a ebangeklio, e diak a olechotel a klaumerang er tir er a Jesus.9
Ka momes el kmo sel teletael el kakerous er a teletelir tirkel mo er a ikal renged a sel “olechotel a klaumerang er a Jesus,” el ngara (1) meral mui ra blakerreng (2) diak el bekeu (3) di mereched el lotngakl er ngii. A diak a ulebengelel klengar er a dersta el chad a ultuil er a ikel omerellir.
I.
Ngera olechotel a klaumerang er a Jesus?
Ng sioning er a Chedaol Reng el kmo Ngii a chedaol Ngelekel a Dios, e Messiah e Osobel. Ng mle olechotel a klaumerang er a Johanes el kmo a Jesus a ulbengkel a Dios er a uchelel, e Ngii a milebii a babeluades me a beluulechad, e “ngii a ebangkelio, ea ebangkelio a uchelel a klengar, e ngii el klengar a ngiluu a llomes el me ra rechad.”10 Ng “olechotel a klaumerang er a re Apostol me a re Profet, … el kmo Ngii a mlad, e mildakl, e milekiis er a chelsel a edei klebesei , e mlo er a babeluades.”11 Ngarngii el klemedengei el kmo “ng diak ngodech el ngakl el ngarngii el mo uchul eng mei osobel.”12 Sel ongingil a olechotel a klaumerang a mla er a Profet Joseph Smith el “kmo a Jesus Kristo a ngar! … E ngii a Dital Ngelekel a Chedam—e okiu ngii e a beluulechad a ulbeob, ea rechad el ngarngii a ngelekel a Dios el sechal me a redil.13
II.
Nguldekial tial olechotel a klaumerang a sel nger el kmo: Me kede mekera el kirel?
Tirkel mo nguu a rengedel a celesital “a nguu” olechotel a klaumerang er a Jesus lokiu a techolbechelid, nguu a Chedaol Reng, e mlo mesisiich lokiu a klaumerang.14 A osisechakl me a klemerang er a ebangkelio er a Jesus Kristo a oungerachel a ikel ngara rengrir me a ikel lolilt. A klaumerang er a Jesus a mo chemolt el kmo te uangerang e merael mo uangeral bedengel a chad. A moktek er tir a beltik el reng, “bliochel el beltik el reng er a Kristo.”15 Sel moktek er tir “a kmal di mo cherrungel el ua teletelel a Kristo.”16
Ngbai bebil er tirkel mo ngara rengedel a terrestrial a ngarngii a olechotel a klaumerang er tir er a Jesus, ngdi te medengelterir el kirel aikel dimlak e louedikel kirel. Sel lak kom bekeu el sioning er a Osobel a olechotel a dauch el diak e ra rengum ma lechub ke kora di omekbeot a tekoi el kirel—e “ouralmsils”17— el kuk ngodech er tirkel rechad er a Ammon el ngara Babier er Mormon, el uai tial okesiu, te medangch ele te mle smiich a blakerreng er tir el mo er a Dios.18
Tirkel ngara rengedel a telestial a tirkel luletngakl er a olechotel a klaumerang el mo er a Jesus lobengkel a ebangkelio er Ngii, Telbilel, me a re profet er Ngii. Tirka tirkel Abinadi a ulechais el kmo tirka di tir loltirakl a uldesuir me a ikel sorir e dirrekak a tal lomekedong er a Rubak ser a lodars a klechubechub el mo er tir e le klechubechub a mlodars el mo er tir, eng di tir a dimlak el sorir el nguu. 19
III.
Ngera belkul sel mo bekeu er a olechotel a klaumerang er a Jesus?
Ngarngii a bebil sebechel luchul eng mo onger er tial ker. Ak mo ouchais a bebil. A blekeu er a olechotel a klaumerang er a Jesus a kmal uldimukl el lomekerreu e melisiich er ngii el klaumerang. A mera el roltirakl a diak loumechad er tir er a ikel mekekerei el tekoi el ngii a olngeseu e melisiich a olechotel a klaumeranger tir er a Jesus, el uai a nglunguuch, mesuub a chedaol llechukl, mengull er a Chedaol sils e melai er a sakrament, oldingel, mesiou, e mengull el ngara chelsel a blil a Rubak. President Nelson a omeklatk er kid el kmo “ng kmal mereched, a klaumerang el mo moalech a lsekum eng diak dongoeas er ngii er a bek el sils ‘lolab a tekingel a Dios’ [Moroni 6:4 a sebechel el mo diak. A le uaisei, … kede ousbech el mengull er a Rubak er a bek el sils e mesuub er a ebangkelio er Ngii.” E mle dochelir: “A kulengit er kemiu me a Dios bo lomtebechel a klengar kemiu. Bsa Rubak a klebech a iidisel temem. Sel bom uaisei, e momtab el kmo ngera duubech er a ungil blakereng er a chedaol klechad er kau.”20
A blekeu a dirrek el uchul ng sebechem el di beot louchais a ikel omsioning el mo er a bouai. Sel techolbechelid, e kede kongei el “mo dechor el sioning er a Dios er a rokui el taem me a rokui el tekoi, me a ngidil basio el [kid] a ngarngii, el di merekemo kodall.”21 Tokuni tial temel a Baskua, e kid outkeu, el mo er a buai, e diak a orreked er kid sel douchais er a sioning er kid el kirel a mla mekiis er a kodall, e ngar el Kristo.
A tara teletelel a de bekeu er a olechotel a klaumerang er a Jesus a sel mo orrenges er a re oderchelel. A Dios a diak lorrimel er kid el mo er a ungil rael, el rael er a telbiil, eng di Ngii a olsisechakl er a re profet er Ngii me bo louchais er kid elmo medengei a ikel mo urebetellel a ikel bo dolilt. E diak el dil bo er a rechedal a Ikelsia er Ngii. Ngokiu a re profet me a re apostol er Ngii, e Ngii a ulengit er a beluulechad el rokir el mo orrenges a klemerang me bol mengubt el mo diak el sibai, 22 melak el bo er a ringel, el nguu a diak a ulebengelel deurreng.
Mo bekeu er a olechotel a klaumerang er a Jesus a belkul a mo omekduch a rengrir a rebebil, lokiu a tekoi me a okesiu, el mo bekeu, tokuni tirkel ngara telungalek er kid. Elder Neal A. Maxwell mle tal lolekoi el kmo “a meklou ultutelir el ‘chetengakl’ rechedal [a Ikelesia] el di orechereched er sel beot ra bai bol blak a rengrir melisiich a omerolir a roltirakl e di ouralmsils ra ngerchelir ra bai le ‘blak a rengrir er a ureril’ [Doctrine and Covenants 76:75; 58:27].”23 Ngouchais el kmo a rokui el mimokl el melilt, a Elder Maxwell ngoumekikngit el reng a melekoi: “Ng mekngit el dolekoi, el uaisei, el rebebil a melilt louralmsils, tia diak di lolilt el kirir, ng dirrek el mo er tirkel merael mei el telcheroll. A roungalek se lak el bleketakl omerellir a sebechel ngarngii a klou el rellii el mo mengeroid er a rengelekir! Tirkel luchelir a re telungalek a locha mle blak a rengrir, e a rkuk rebebil longalk er chelechal taem a olechotel ikel omerellir el di omekbeot a tekoi. Klengit el reng, ra ngar medad, le a rebebil a mo melilt a klautok meng mengai el mo meringel.”24
Sesel rak er a memong, ea Elder John H. Groberg a uluchais er a cheldechedechal a tal telungalek el dirk mekekerel chad el kiliei er a kekerel branch er a Hawaii er sera uchelel a 1900. Tirka dirk mlo chedal a ikelesia el mocha erul rak sera bolsecher a ngelekir el redil er a diak lodengelii el secher el ngii a mlo niuing. Sera bol temel a Ikelesia, a chedam ma ngelekel sechal a mengedmokl ra sakrament el uai ikal mla mo merek el Sandei, me sera ngkal ngeasek el chedam bocha loutubaruach el mo omekngeltengat a blauang, ea branch president, a metebengar el kmo ngtecha a ngar tial tebel er a sakrament, meng di milkerokel e kmul uaisei, “Mstob. Kau a diak el sebechem el merutech a sakrament. A ngelekem el redil a oba rakt el diak lodengelii el kirel. Mereched el morcheroid ma tara chad luut el mo ngmai a beches el blauang er a sakrament. Ng diak el sebechem el ngar tiang. Morael.” Ngkal chedam a mlo mechas a rengul e omes er ngkal branch president me a tial seked, e kmal kora merrengang, meng ngolechau er a telungalek er ngii, mete merolang el tuobed er a ikelesia.
Ng dimlak a ta mel kadecheduch, e mekngengtei a rengir, e tirkal telungalek a merael mo er a blirir. Te dengchokl el meliuekl, e ngkal chedam a kmul uasei, “Lak mongerodech el di merekmo bo kungedecheduch.” Ngkal ngelekel sechal a omdasu el kmo ngera lebo rellii el mo metechir tial rur el blol chau er ngii: te locha mo mekodir a cheremel a branch president el babii, a lechub e te sosebii a blil, a lechub e te mora ngodech el ikelesia? Eim, teruich, lluich me a eim el bung a mla engelakl el diak a mengerodech.
Tial chelimetemet el chimal ngkal chedam a mocha chellelakl e obok, e mocha mui a chiuosech er a medal. A chedil a chomchelang el lemangel, me a tirkal rengalek mete mocha medidelangel. A chedam a ulebult lomes er a bechil e kmul uasei, “Ng betik a renguk er kau” e omelekl a ikal tekoi el loudersta er a rengelekel. “Ng betik a renguk er kemiu rokui e soak kid a bo dedak, el mo chererechar, el telungalek. Ea di tal rolel e tia mo meruul sel kid el rokui a mo ungil chedal a Ikelesia er a Jesus Kristo er a Uriul-klebesei el Santo e mo merenged lokiu a chedaol priesthood er a chelsel a templo. Tiang a diak el ikelesia er a branch president. Tiang a Ikelesia er a Jesus Kristo. Ng diak bo debecherei a ngidil chad a lechub a telemall a lechub a rur a lechub a kldidai el reng el merrob er kid el dmak el mo cherechar. Sel mei el Sandei e kede lmuut el mo er a ikelesia. Ng di kid el dmak el di merekmo bo dodengelii a secherel a ngeleked el redil, engdi kede lmuut el mo er a ikelesia.”
Te liluut el mo er a ikelesia, a ngelekir a mlo ungil diak el secher, e tial telungalek a mlo merenged er a chelsel a Laie Hawaii Templo sera le bol merek a okedecherur. Chelechal taem, ng bekord er a betok er a dart el chad a omekedong er a demerir, demerir rubak, me a demal a demerir rubak el ngeltengat e le osengel a kmal di ulemes el kirel a diak a ulebengelel.25
Sel ongingil teletael er a blekeu el kirel a olechotel a klaumerang er a Jesus el bo kulekoi er ngii a sel omerolel a dersta el chad el kirel a chedolir. A Rubak a klou a belkul Osobeled,26 e Ngii a ulengit, “Bo mouuchel a rengmiu, kemiu el ngara ulebongel er a beluulechad, e mei er Ngak e bo metecholb er a ngklek, me bo mechedaol er a ngeuil a Chedaol Reng, me bol sebechem el dechor el klikiid er medak ra uriul klebesei.”27
A profet Mormon a ulechais er a chimol cheldebechel er a re Santo el mle blak a rengrir er a chelsel tial teletael e bai uluutekangel el chemau a betok el ringel:28
A Mormon a milekoi el kmo te mle blechoel lolsengerenger e meluluuch, e merael mo mesisiich a klengariou el reng er tir, e merael mo mesisiich a klaumerang er tir er a Kristo, el mo mui a rengrir er a deurreng, oi, el mo mengikiid a rengrir, el ngii el klikiid el reng a mei le tir lotilii a rengrir el mo er a Dios.24 Ng tiakid el klou el lomelodech er a reng—lotilii a rengud el mo er a Dios e mo mechell el beches lokiu a krasia er a Osobel—el ngii a dosiik er ngii.30
A ongtik a kmo moureor er chelechang el mo sobecheklii a basio er kau el mo bekeu er a olechotel a klaumerang er a Jesus. A ouchel el reng a mo usbechall, “melak mongeteket er a sils er a ouchel reng,” 31 leng “mei er sel taem el diak momdasu er ngii ea kleald a me ngelakl, ma omeridm a mla mo merek, e kid a dirkak de mosobel.”32 Bol blak a rengum loltirakl a telbilem lobengkel a Dios. Lak el ngasech a rengum er a melemalt e bleketakl el tekingel a Dios.33 “Bo molatk lorreked er a ngklel [a Kristo] me di llechukl er a rengmiu, … mebo mrengesii e modengelii a ngorel mo omekedong er kemiu, me a, mesel ngaklel bo lomekedong er kau.”34 Sel mo meng ulebongel e, “bol delalm er a chelsel a rengmiu, el mo meruul aikel tekoi el [Jesus] a mo olsisechakl, e dmu er kemiu.”35
A Demad a soal a rokui el Rengelekel el mo oldeu a rengrir el ngara diak a ulebengelel klengar Lobengkel el ngar sel kot el ngarbab el Rengedel. A Jesus a mlo chemau a ringel, e mlad, e milekiis er a kodall meng uchul sei a mlo sebechel. Ngii “a mla ngmasech el mo er a babeluades, meng kiei er a klisiichel a chimal a Dios, el mlo melai er a Chedam a klisichel er a klechubechub lobang el mo er a rengelekel a chad.”36 Ak meluluuch el kmo kid el rokui bo de mukngeltengat loba mesisiich el olechotel a klaumerang er a Rubak el Jesus Kristo, e oldeu e mo bekeu er a klaumerang, e ungil a rengud el melemolem el melai a klungiolel a krasia er Ngii er a chelsel a klengar er kid. El ngara a ngklel a Jesus Kristo, amen.