![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fc4%2F09%2Fc409e80ccdbed7f9c959ce0ac19630122bad5e0f%2Fc409e80ccdbed7f9c959ce0ac19630122bad5e0f.jpeg/full/!250,/0/default)
A Rokui el Tekoi a Di mo Ungil Besul Leng Telbiil er a Templo Uchul
Ng diak a ngodech el klou a ultutelel er a mengull a telbiil el de riruul ma lechub e kede mo meruul er a chelsel a templo.
Betik er a renguk el rodam me a rodos er ngak, tial klou el ongdibel er chelechang, a denguu er ngak, eng kmal chedaol taem. Ak mereng a saul er a ngerachel el kungedecheduch el mo ra remilion el Uriul-klebesei el Santo me a resechelid el meliuekl er a beluulechad. Ng betik a renguk er kemiu, e medengei el kmo a Rubak a betik a rengul er kemiu.
Kmeed el okeim me a derengel rak er a memong, eng mla er ngii a techellek el mesiou el merredel er a Ricks College, el ngara Rexburg, Idaho. A tal tutau er a June 5, 1976, e a bechik, er a Kathy, me ngak a ulemekall el mo er a Rexburg el mo er sel Idaho Falls Temple el mlo er a merengel a chebechielel a kmal kmeed el sechelimam. Ng uaisei, el mla er ngii a reteua el mekekerei el ngelekam el sechal ngara blai er sel taem, me tial omerollam el mo er a templo ea ku ulusbech er a meduch a rengul chad lomes er tir! Me te di kiliei a rengelekam lobengkel a chad lomes er tir, e kemam a merolang el kmeed lokedei el bung el ki momekall.
Ng kmal mle klebokel a temam el ngara templo er tiaikid el sils, el blechoel uaisei sel tal kibong. Eng di, uriul er a omerenged er a chebechiil—er a ki bocha morech er a luut el mo remei—e a kimilsterir a roureor er a templo el kora uaia le ngara sebekreng e chadecheduch er a delongelir er a chelsel a templo. Di mle telkib, ea tara oureor er a templo a ouchisa er kemam el kmo sel beches el dirk mlo dechor el Teton Dam er a ongos er a Idaho a mla metemall! Kmeed el okai el bilion el kalong (300 milion cubic meters) el ralm er tial dam a mla metengel el bedul aikel 300 square miles (775 square km) el basio el ngara bita er ngii. Klou er a chelsel a beluu er a Rexburg a di mlo mui er a ralm, el blai me a mlai a di mlengukl er a baoch. Eru er a edei el tiud er a chelsir a retetiu el telael chad a di mlo diak a blirir.1
Me ko medengei el kmo ngerang, a uldesuam me a sebekreng er kemam el kirir a rengelekam, me a redart el ngalek ra skuul ma resensei, me tial betik er a rengmam el basio. Ng okedei el mael (50 km) a cheridam er a blimam, e tiaikid el taem, eng diak a rua cellphone me a text, meng diak el sebecham el mereched el mengedecheduch er a rengelekam, ma lechub el sebecham lomekall el ngara Idaho Falls el mo er a Rexburg, le rokui el rael a mle chelsimer.
A di mle tal sebecham el rullii a mo kiei er a hotel er sel kesus er a Idaho Falls. A Kathy me a ngak a mocha outubaruach er sel kesus er a hotel e ulelengit er a Chedam er a Babeluades el kirel a sebecheklir a rengelekam me a retelael chad el ngara chelsel tial kerior. Ak medengelii a Kathy el di ulemais er a ulaol medesii a llomes, el suebek a rengul meng dimlak a cheliuel. Ng uaisei el dirrek el mle suebek a renguk, eng di mle sebechek el cholleklii a uldesuek e imiit a medak.
Di mle telkib e ngika el bechik okisak e kmo, “Hal, ke mekera mechiuaiu er a uai tial taem?”
A ikakid el tekoi a kmla mle bleketakl el mei er a renguk me a uldesuek. Ak uluchais ra bechik: “Kathy, ngii di el ngera el duubech, a rokui el tekoi a di mo ungil besul leng templo a uchul. Kede mla soiseb er a telbiil lobengkel a Dios e mla merenged el telungalek el mo er a ulebongel.”
Tiaikid el taem, eng uaia blel Chedaol Reng er a Rubak a ulterkeklii er a rengmam me a uldesuam sel kemam el terung a mle medengelii el kmo ng klemerang: el chedaol ruoll er a omerenged, el di debetik er ngii er a chelsel a blil a Rubak el mekedmokl lokiu a ulterekokl el ngerachel er a priesthood, el mla omak er kemam el kaubuch, me a rengelekam a ulak el mei er kemam. Ng dimlak el kiram el medakt, e mereng a saul ruruil el mlo medengei el kmo a rengelekam a mle selbechakl.
Tiakid el tekingel a President Thomas S. Monson a locha ungil okesiul sel Kathy me ngak a ulemelchesiu er ngii er sel kesus. “Sel de ngara templo, e ngarngii a denguu el teletael er a chedaol tekoi el kid a melchesuar a budech. … Kede mo ungil medengelii sel meral belkul a tekingel Osobel er a le du el kmo: ‘A budech ak beskemiu, budech el kubang ak beskemiu. … Lak louedikel a rengmiu, e lak ko medakt [Johanes 14:27].’”2
Ak ngeltengat el melchesuar er tiaikid el budech er a bek el taem sel ksiseb er a templo. Ak lotkii sel kot el sils er ak siseb er a chelsel a Salt Lake Temple. Ak mle ngeasek el sechal.
Ak kulmes el bedul bab er tial becheleleu el tensio el rirellii tial delmerab el kmal mellomes el uai a blel blok el mo er a eanged. Tiaikid el taem, ea uldasu el mlei er a uldesuek a mle bleketakl el tekoi el kmo: “Ngak a mla ngar tia el mellomes el basio er a uchei.” E ng di mle mereched el mei er a uldesuek, el diak el otto ra ngerek, a ikakid el tekoi: “Ng diak, kau a dirrekak a ta el omei er tiang. Kau a melebedebek er a taem ruchei er a omechell. Ke mla er a chedaol basio el uai tiang el sebechel a Rubak el mei er ngii.”
Rodam me a rodos, a kmla ouchais el kmo sel de bo er a templo, eng sebeched el dobedebekii sel diak a ulebengelel blebelel a delbenged, me a deleuill er kid lobengkel a Chedam me a Chedaol Ngelekel, me sel klemeriar reng er kid el muut el mo er a blid er babeluades.
Tial direke mlomerek el klou el ongdibel, ea President Russell M. Nelson a ulsisechakl:
“A kot el selbechakl el basio el bo mui er a chedaol tekoia sel omkiei rachelsela telbilem er a templo!”
“A rokui el tekoiel doumerang me a bekel telbiil el Dios a mla kutmokl el mora Rechedal er a telbiil a di mo dmak el rokui er a chelsel a templo.”3
“A dersta el chad el sosiseb er a telbiil … er a templo—e oltirakl—a kmal klou a techellel ngmai a klisiich er a Jesus Kristo”4
Ng dirrek el ulisechakl el kmo “sel tal desiseb er a telbiil lobengkel a Dios, e kede di mereko el ulterekokl a delcherud el mo cherechar. A Dios a diak el bol chitii a deleongel er Ngii lobengterir a re mla mekur a ungil deleuill Lobengkel. Ea mera er ngii, tirkel rokui el mla soiseb er a telbiil lobengkel a Dios a ngarngii a rolir el mo nguu a tokubets el beltikelreng me a chubechub.”5
Ngokiu a chedaol dereder er a President Nelson, e a Rubak a mla orchedii, e melemolem lorreched, a okedecherul a templo er a beluulechad el rokir. Tia mo uchul ea rokui el ngelekel a Dios a ngmai chedaol ruoll el kirel a mo suobel me a diak a ulebengelel klengar e mo meruul e oltirakl a chedaol telbiil. A mo uchul a ngeiul chedaol telbiil a diak di el tal mekedmokl el merekong ng teletael er a chelsel a klengar kau rokir. A Rubak a mla dmu el kmo ng rengul a chad el rokir, me a blakelreng, me a uldesuel, me a klisichel.6
A blechebech lomeruul er a chedaol ruoll er a templo a sebechel mekdebechii a blakereng el mo er a Rubak. Sel moltirakl a telbiil er a templo e molbedebek, e ke siotai er a Chedaol Reng el mo melisiich e mengikiid er kau.
Seikid e ke mo melchesuar a llomes louchais el kmo aikal yaksok a klemerang. Ko mo medengei el kmo a bek el telbiil lobengkel a Dios a techall el mo kmeed er Ngii, el rullid el mo blak a rengud loltirakl a telbiil deruul er a templo.
Kede mla nguu a yaksok el kmo, “Ngokiu a telbiled lobengkel a Dios, e Ngii a diak a tang me bol mesaul a rengul lolengeseu er kid, me kid a diak a tang me bo dokngemedii sel chubechub e kllouelreng er Ngii el kired.”7
Ngokiu a telbiil er a omerenged er a chelsel a templo eng mo meklou a rengud el kirel a deleuill er a telungalek ruriul er a kodall e melemolem el mo cherechar. A omengull er a chebechiil me a telbiil er a telungalek er a chelsel a templo er a Dios a mo omecheliu er kid er a kngtil a bechechelingaol reng me a kldidai el reng.
A mekudem el ulekerreu er a delongelir a rochad me a rodos a duubech sel sekum ng blak a rengmiu lomekrael a telungalek er kemiu lolitrakl er a teletelel a Rubak. Besterir a techall a rengalek el meluluuch el kirel a ta me a tang. Bo mereched el mtab a ikel mo uchul a mondai, e mungil mes aikel omerull er a bechechelingaol reng, el mo er a ta me a tang. A rochad sel sekum e te meluluuch el kirel a ta me a tang e mesiou er a ta me a tang, ea rengrir a mo medemdemk e obult el kirel a ta me a tang me a rechad er a blirir.
Tiaikid, sel lulsaod er ngii a Malaki ra lomlaoch el kirel a profet Elijah: “Ngii a mo mult a rengrir a rengalek el kirel sel yaksok el mlo er a redemerir, me a rengrir a rengalek a mo obult el mo er a redemerir. E le lak, e tial beluulechad el rokir a mo nguemed er a luut er ngii.”8
A kerior, olibesongel, me a melemall a reng a di mei er kid el rokui. Ng diak a ta er kid el mochib er a “ringelel a tech.”9 Eng di, sel de bo er a templo e dolbedebek a telbiled, e kede mo kldmokl el ngmai chedaol ocholt er a Rubak.
A Kathy me ngak er a ki bo bechiil el mlerenged er a Logan Utah Temple, e a mle-Elder Spencer W. Kimball er sel taem a milngedmokl er a omerenged. A bebil er a tekoi el lulekoi, eng milskemam tial osisechakl: “Hal me a Kathy, mkiei me sel mei a okedong, e di bo el beot er kemiu a merael.”
A kot, eng dimlak ki modengei el kmo tia lomellach ngera belkul mei er kemam, eng di aki mlo er sel tkul rebab el mengedmokl er kemam sel lemei okedongel a Rubak. Uriul er a ki bla mkaubuch el kmeed el teruich el rak, e a dimlak ki molsingch er ngii lokedong a mlei lokiu a Commissioner er a Church Education, el Neal A. Maxwell.
Sel omellach el mla er a President Kimball el mo sebechel di mo “beot el merael“ a mlo meral tekoi. A Kathy me ngak a ngiluu okedong el mo mechei a kora ungil klengar er a California e mo mesiou er a basio el ngii a diak a ngeral kudengelii el kirel. Eng di, a telungalek er kemam a mle keldmokl el merael mong e le profet, el ngara chelsel a chedaol templo, el basio er a ocholt, a milsa ngarmedal teletael el kemam a mle keldmokl el kirel.
Kemiu el rodam me a rodos er ngak, ak sioning el kmo ng diak a ngii di el ngerang el muut el klou a ultutelel er sel omengull er kau er a telbiil el bla mruul ma lechub e ke mo meruul er a chelsel a templo. Ng diak el iior er a kmo ke ngar ker er a rolel a telbiil, ak di mengelechel er kemiu el mo sebechiu el mo soiseb er a templo. Bo blechoel mong sel bol techelliu. Moruul e moltirakl a telbiil lobengkel a Dios. Ak sioning er kemiu osisiu el klemerang el kuluchais er ngii er a Kathy er sel metud er a klebesei er a kmeed el okeim el rak er a memong er a ki mngara hotel er a Idaho Falls: “Ngii di el ngera el duubech, a rokui el tekoi a di mo ungil besul el templo uchul.”
A kuchotii a meral sioning er ngak el kmo a Jesus a Kristo. Ngii a ngar e omekrael er a Ikelesia er Ngii. A rokui el templo a blil a Rubak. A President Russell M. Nelson a ngar el profet er a Rubak el ngara beluulechad. Ng betik a renguk er ngii, e betik a renguk er kemiu. El ngara chedaol ngklel a Jesus Kristo, amen.