Ngarbab el Deurreng

Mla er a Elder Dieter F. Uchtdorf

Er a Chelechad er a Teruich me a terung el Apostol

Mei e derokui el mo osiik e metik er sel ngarbab el deurreng el ngii a mei sel dodersii a klengar er kid el mora Chedam er a Babeluades me a Betik ra rengul el Ngelekel.

Ak ngeltengat el mengedecheduch er a klou el ongdibel el mla mo okedei el rak. Chelsel a ikal rak, e ak mla ngmai a ker el kirel a klemechek el mlara betok el chad el liueklii a beluulechad. Ea, tara blechoel ker a di mekudem el medemedum. Ng blechoel el lomuchel el ua tiang: “Elder Uchtdorf, a kmal mlo ungil lorrenges er a cheldechedecham, eng di … dimlak a tang mek rengesii a kmong ngerang el kirel a skoki.”

Me, a uruil er chelechal sils, eng locha mo diak rengesii tial ker el telkib el meketeket.

Ngar a “sel Tumbling Mirth of Sun-Split Clouds”¹

Ng meringel er kid lomdasu el kmo tia kmal dirk mle dart ma lluich el rak ra mla memong sera Wilbur me a Orville Wright re le kot el mekider el sebek er a bebul a chelechol er a Kitty Hawk, North Carolina. Eual mekedeb el sebek er seikid el sils er a December el ngildechii e mekengii a chesimer el mora tara kot el ngarbab lomekdubech a klalo er a reski er a beluulechad.,

Suebek ra skoki a mle kengaol er sera uchelel. Tirka el odam e mle medengelii tiang. Me a demerir er a Milton, el dirrek. Uaisei, el meral mle medakt a lemad tirkal terul ngelekel sechal a lemetemall a skoki meng te mle iaksok er ngii el kmo ngdiak a tang me bol dak el ngara skoki el terung.

Meng dimlak a ta mel dak el suebek—eng di mle ngarngii a ta el taem. Euid el rak ruruil er tial milkedmokl el reksi er a Kitty Hawk, ea Milton Wright a mocha kongei e ulemes er a Wilbur me a Orville el mocha kot el taem el le dak el suebek el ngara skoki. Uriul er a leberior, ea Orville a milngeluch er a demal me bol ketengel e di chimol taem el bol sebek me bo sebechel di ngii el mo medengelii el kmo ngua ngerang.

Sera le mekider a skoki ra bebul a chutem, ea okai me a eru rekil el Milton a meral mlo ulis el semeriar er tial suebek el skoki meng di mlo diak el medakt. A Orville a ulecherechur er a demal ra loldiu lungil a rengul, “Morbab, Orville, morbab!”²

Ng kakid a chad loba kmal di ua renguk!

Meng locha moktek er ngak el mengedecheduch er kirel a reua skoki sel bebil ra taem a kmo ngak a medengelii a telkib er sel ble lomelchesiu er ngii a reua Wright. Ngak el dirrek el mla “silebek el mora bebul a Beluulechad el ngara bebul a yabed el locherchur el ngara silver a osebekel skoki.”³

Sera lekot el suebek a Rodam el Wright, el ngii a dilubech el kmal di okedei me a euid el rak ruchei er a cherellek, eng milkengii a chesmerel a omerael mora cheroid, klebokel el ues, me a mechellins el deurreng el mera klengar er ngak.

Meng uaisei, el osir a rengud seikid el deuil a reng, eng di ngarngii a lmuut el ngarbab el bedengel a deurreng. Chelechal sils, loba sel rengul a Milton Wright er a deurreng loldiu el kmo, “Morbab, Orville, morbab,” Ng soak el mo mengedecheduch el kirel tiaikid el ngarbab el deurreng—mla er ker el mei, e mekera belsiseb er a rengud, e mekera bo dolchesuar er sel kot el ngarbab el teletelel.

Sel Rokir el Moktek er a Klengar er a Chad

Ng locha diak a belkul dolekeoi er tiang el kmo a rokui el chad a sorir el mo ungil a rengrir.⁴ E dirrek, el diak a belkul dolekeoi er tiang el kmo ng diak el rokui el chad a ungil a rengrir. Mekngit a rengud, le denguu er a rebetok el chad, eng meringel er tir a metik er a deurreng.⁵

Ngera uchul? A lsekum me a deurreng a kot el tekoi el kid a rechad a kmal soad, e ngera uchul meng diak el sebeched el metik er ngii? Ak mo dulii sel chelitakl er a beluu, kid a locha osiik er a deurreng er a rokui el basio el diak el ngarngii.⁶

Ngar Ke de Borngii e Kede Metik er a Deurreng?

Uchei er a bo dosaod er a osiik a deurreng, e knguu a techall louchais el kmo a rokui el secherel a bdelud me a reng a meral ngarngii, e a nger el kirel a diak el dil beot el kmo, “Molasem el dmeu a rengum.” A moktek er chelechang a diak kungoit malechub e kungkekerei er a tekingel a secherel a btelud. A lsekum e ke chelbangel er a choua tial ongarm, e ak mekngit a renguk lobengkem, e dechor er a bita er kau. A denguu er a rebebil, e sel mo metik er a deurreng a locha uldimukl a skel a ngesou er a meduch e semmong er a secherel a btelud el tir a chemoit a klengar er tir lomekungil lolab a duch er tir. Ng kired el mo oba omereng el saul el kirel a ikal ngesou.

A klengar a diak el di lolemolem lungil a rengud. “Ng kirel ngar ngii, erbitang el kautok er a rokui el tekoi.”⁷ Me a Ngii el Dios a lmangel, el chedaol llechukl a ouchais el kmo Ngii a lmangel,⁸ ma le uaisei e kau me a ngak a mo lmangel el dirrek. A omelchesiu el ngara klengit el reng a diak el olangch el kmo ke mla ruebet. Ngar tial klengar, ea deurreng mea klengit el reng a diak el kakeakl el ombil a tang.⁹ El di uai kemiu, ak dirrek el mla mo merat a renguk, ngara klengit el reng, oumekikngit el reng, e ouchel a renguk.

Engdi, ak dirrek el mla melchesuar sel klebokel el reng el mui er a deurreng el meral lulis el ngarbab meng meringel dongemekl er ngii. Ak dirrek el mla metik er ngii el kmo tial mengellakl el kloulreng a mengai er a oltirakl er a Osobel e merael er a Rolel.

Sel budech el Ngii omeskid a diak el uaisel beluulechad omeskid.¹⁰ Tia ungil. Ng ngarbab e chedaol. A Jesus millekoi, “Ak mlei me bol nguu a klengar, me bo lobang el mui er a klungiaol.”¹¹

A ebangkelio er a Jesus Kristo a mera el “ungil chais er a deuelreng”!¹² Ngii a klumech er a diak a mtechir el urunguled! Ng klumech er a oltekau a chellungel e mengol a berraod.¹³ Er a omengideb a llomes. Me a rengellitel er a babeluades, ngarbab el klemedengei, ngarbab el telbiil, selbechakl el mo cherechar, me a diak a ulebengelel a klebkall!

A deuil a reng a kot el moktek er a uldesuel a Dios el kirir a rengelekel. Tiakid a ble mobeob el kirel—“me [kau] bol sebechel el mo oba deurreng”!¹⁴ Kau a ulebeob el kirel tiang!

A Demad er a Babeluades a dirkak el bertii tial rael el mora babeluades. Ng diak el berrotel. Tia ngarngii el mora rokui el chad!¹⁵

Tiang a blal iaksok er ngii el mora rokui el merael er a rolel a telbiil, loltirakl a osisechakl me a okesiul a Osobel, olab a Llechul, e mengull a telbiil el riruul lobengkel a Dios. Tiang a kmal ungil iaksok!

A Dios a Ngarngii a Lmuut el Bebil el bo Lomeskid

Ke de medengelterir a rechad el tir a kmo ng diak lousbech er a Dios el mo ungil a rengrir, tir a ungil a rengrir el diak lousbech a klechelid.

Ak melekoi e olengesenges aika el lomelchesiu. A betik ra rengud el Chedam er a Babeluades a soal a rokui el ngelekel el mo ngmai a deuelreng, me Ngii a mla mekekii tial beluulechad era klebokel, me a ungil loldeu a reng, ngii lerung lungil osenged er ngii … me a rengud.¹⁶ Sel denguu er ngak, ea suebek ra skoki a meskak a klou el deureng. A kuk rebebil a metik er ngii er a chelitakl, sunga, me a sorir el meruul el tekoi, malechub aikel blebelel a Chelid.

A siotai er a rebebil me a omerk er a ungil chais el mlara Osobel el kirel a ngarbab el deurreng, eng diak dongoit aikaikid el lungil tekoi lomuchel a deurreng. Kid a di melekoi el kmo a Dios a ngarngii a lmuut el betok el bo lodars. Ng ngarbab el muut el dmolech el deurreng—ng deurreng el ngii a a lmuut el ngarbab er a rokui el lomeskid a beluulechad. Ng deurreng el ngii a otekengelii a ringel, oibekii a klengit el reng, e choroid a klsabisi.

E a deurreng er a beluulechad, a dongaisisiu er ngii, a diak el bol meketeket. Ng diak el sebechel. Tiang a tetelel a rokui el tekingel a beluulechad el mukeroul el mo mechuodel, mo nguemed, malechub eng mo mechut. Engdi a chedaol deurreng a diak a ulebengelel, e le a Dios a diak a ulebengelel. A Jesus Kristo a mlei el mo kiuekuid er tial beluulechad e mo mtechei a mechut er a diak el bol mechut. Ngii el ditang a oba tial klisiich, me a dital deurreng er Ngii a di melemolem.

A lsekum me komelchesiu el sebechel tial bedengel a deurreng el mobetok er a klengar er kau, e ak olengit er kau el mo omuchel er tial rael er a oltirakl er a Jesus Kristo me a Rolel. Ng melemolem el teletael er a klengar—el mo er a ulebongel. Kulengit me kuuchais a bebil er a uchelel a terebel er tial klou a belkul lomerael er a mo metik a mera el deurreng.

Molekeed el Mora Dios¹⁷

Kau ke lotkii ngkel redil el ngara Beches el Renged el uluutekangel er a secherel el merael a rasech er ngii el teruich ma erul el rak?¹⁸ Ng mla chemoit a rokui el lolab el momes er a toktang, eng di milrael el mo imis a rektel. Ng mla remenges a chisel a Jesus; a klisichel el omekungil a merael chisel. Engdi Ngii ng sebechel lomekungil ra rektel? E mekera bol keed er Ngii? A secherel a rullii meng “kikiongel” a dioltirakl er a llechul a Moses, ma le uaisei eng kirel cheroid er a rokui el chad.¹⁹

A bolecholt el merael mo er Ngii e olengit omekungil a ual diak el sebechel.

Engdi, ngulemdasu, “A lsekum me ak rutechii a bilel, e ngak a moungil.”²⁰

A uriul, ea klaumerang er ngii a mlo mesisiich er a dektel. Ngultekengelii sel diak el kengei er ngii el tekoi a rebebil e milrael el moruchei el bedul Osobel.

Ng, kmal mocha kmeed el sebechel rutechii. Meng uldersii chimal.

Meng mlo ungil er a rektel.

Kid ng diak de rokui el di uai ngikal redil?

Ng locha ngarngii a betok el uchul e kede omai er a rengud el merael mo kmeed el mora Osobel. Ke de locha mo obangel a ulekakou me a otuub er a rebebil. Me a rengud el kedidai, e ke de mecherei tial techall el ngii a kmal beot e klou a ultutelel. Kede locha omdasu el kmo a de ngarngii el tekoi a torbengid el melai er a omekungil el ngar Ngii—a cherroid me a kngtid a kmal betok.

El di uai ngika el redil, e ak mla subii el kmo sel dorael lolekeed el mora Dios e odersii chimad el mo rutechii, eng sebeched el metik er a omekungil, budech, me a deurreng.

Mosiik er Ngii

a Jesus a ulsisechakl, “Mosiik, me bo betik.”²¹

A kuumerang el kmo tial beot el tekoi a diak el dil chedaol iaksok; tiang a meral tekoi.

A lsekum meke dosiik a uchul eng mo kesib a rengud, mo oumededenger, mo kesib a rengud a lechub e kede sabisi, e ke de mo metik aikaikid.

Engdi, a lsekum meke dosiik a deurreng—a lsekum meke dosiik a uchul e kede mo outkeu e mo ungil a rengud e moltirakl er a Osobel, e kede mo metik aikaikid.

Ng blechoel el diak debetik er a kmong ngerang el kid a diak dosiik.

Kau kosiik er a deurreng?

Mosiik, me bo betik.

Bom Motekur a Chelngelel a Tang²²

A Jesus a ulsisechakl, “Ng klou el klengeltengat a denguu er a doldars er a bai dolai.”²³

Ng sebechel uaisei el sel dosiik a deurreng, e sel kot lungil rolel a sel dosiik er a deureng el mo er a rebebil?

Rodam me a rodos, kemiu me ngak el medengei el k mo tia klemerang! A deurreng a diua barril er a merikengko malechub a cheluch el diak a tang me bolak.²⁴ A mera el deurreng a obdois sel domerk er ngii.

Tia diak lousbech a kmong ngera el klou malechub eng chetituokel.

Ng sebeched el meruul a beot el tekoi.

EL uaia meluluuch el kirir a rebebil loba rengud el rokir.

Melekoi a ungil tekoi el mora tang el meral ngara rengud.

Olngeseu el outkeu er a tang, mengull, cholecholt er a klou el ututelir, me a oubeltikereng.

Olecholt a soad el bades me a belkul el merkid.

Malechub e kede kuk di orrenges.

“Sel mosiou el kirel a ngii dil chad e kau, a merang el mesiou er a Dios er kau,”²⁵ me a Dios a mo meskau a omeksullem e le ke bekokouii. ²⁶ A deurreng el omnguu el mesterii a rebebil a mo moluut le korkau “ungil telkelel, mosarch, e murachem, el me olsesiseb.”²⁷

“Me Kede Mekerang?”²⁸

A ikal mei el klebesei, sandei, ma buil, e kulengit er kemiu el mo:

Chemoit a temem el meral, ngara rengum el mo merael el mo kmeed er a Dios.
Mosiik er a bek el sils a taem er a oureng, budech, me a deurreng.
Besterir a deuelreng el mora rebebil el meliuekl er kau.

Rodam me a rodos er ngak, me a resechelei, sel mosiik a tekingel a Dios el kirel a dmolech el klemedengei er a diak ulebengelel uldesuel a Dios,e mkengei a ikal ongit, e molasem el mo merael er a Rolel, e ke mo melchesuar “a budech er a Dios, el diak el sebechel a chad el mo cherrungel el medengelii,”²⁹ me a le ngara klengiterreng. Ke mo melchesuar er a klou el chengelakl er a rokui el beltkil a rengul a Dios el mekukii a rengum. A llemsel a celestial a mo omekllomes a olibesongel er kau, e kau mo chemau a teletael el kmal klebokel e mengasireng el meringel er kau a mo mesaod. Ke mo omelchesiu el mesisiich er a chedaol tekoi meng diak a ngidi ngeral lorekeed er kau.

E di uai ea Milton Wright, el locha mo kiderii a ngerem el outkeu el loldiu, “Morbab, Chedam, morbab!”

Mei e de rokui el mo osiik e metik er sel ngarbab el deurreng el ngii a mei sel dodersii a klengar er kid el mora Chedam er a Babeluades me a Betik ra rengul el Ngelekel. El meral ngara renguk el nglunguchek el ngara chedaol ngklel a Jesus Kristo, amen.