![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fca%2Fc3%2Fcac32fe9ee71fde1beac2c8555123726e8ffee9e%2Fcac32fe9ee71fde1beac2c8555123726e8ffee9e.jpeg/full/!250,/0/default)
Klou el Reng er a Telbiil el okiu a Jesus Kristo
Sel de soiseb ra blil a Rubak, e kede soiseb ra chedaol omerael el mesuub el mo ngarbab e lmuut el kmal mo chedaol el oltirakl er a Kristo.
Betik ra renguk el rodam me a rodos er ngak, ak meluluuch mel sebeched el mo omekbeches aikel chedaol tekoi er a rengud er a klumech el kid a mo remenges ra re mengetekled er chelechal sandei e doldeu a rengud ra soak lomekedong er ngii el kmong “klou el reng er a telbiil el okiu a Jesus Kristo.” Tia el klou el reng sel chelellakl engdi ng ultebechel el sebecheklel a reng el melai a klengeltengat el Dios a mla yaksok el mortirke el tir a oltirakl a telbilir e usbechall raikal kmal ongarm er chelechal taem.
A okedecherul a beches el blil a Rubak er a beluulechad, el ngar cheungel a ulekrael el omerredel er a President Russell M. Nelson, a mla muchelii a klou el deureng er a delongelir a rechedal a Ikelesia e ngii a olechotel a meklou a belkul el olangch er a berkel a rengedel a Rubak.
Kulbedebek er a kmal mle mengasireng el tekoi el dilubech el merngak ra omengedaol ra Feather River California Templo er tial mlo merek el Ongeteruich el Buil, e ak mo melechedech el kmo sel bebil ra taem e kede kmal di mo chemau a diul a rengud kirel a beches el templo el ngara beluad e obes aikel chedaol moktek er a telbiil el meruul er a chelsel a templo.
A delasech el tekoi ra bek el templo a omelekoi el kmo: “Chedaol el mora Rubak.”1 Aika el ulekrael tekoi a bleketakl el olechotel, e siotai el kmo sel de soiseb ra blil a Rubak, e kede soiseb ra chedaol omerael el mesuub el mo ngarbab e lmuut el kmal mo chedaol oltirakl er a Kristo. Sel meruul a telbiil el ngara chedaol er medal a Dios e tibir er a rengud el oltirakl ra Osobel, ekede mo nguu a klisiich el mo omult a rengud, omekbeches a rengud, e smisichii a delongeled me Ngii. Tial tokubets el omeruul a mo mengikiid a rengud e omekdubech a chedaol delongeled kid ma Dios ma Jesus Kristo, el tir a yaksok el kmo kede mo nguu a sengk ra diak a ulebengelel klengar.2 A metuobed er tial chedaol omerael a kmo kede mo ngmai a lmuut el chedaol e ngarbab el klou el reng el kirel a klengar er kid ra bek el sils er a chelsel aikel telbiil el okiu a Jesus Kristo.
Tia el klou el reng a kmal rengul sel chedaol delongeled ma Dios e sebechel ngosukid el menglou ra blakelreng el kid ma omereng el saul el mora, Jesus Kristo ma uldersel er a tngakireng. Ng smisichii sel dechad el mo oubeltikelreng e mesiou er a rebebil e smisiich a rengud eldi mo kiei ra diak el chedaol beluulechad el ngii a merael mo mui ra ilkolk e diak a klemeriar reng er kid er ngii. Ng rullid el mo mesisiich ra ikel tekingel omededenger ma sebekreng, dakt ma omekseselk el reng, ringelel a reng me a mekurt el reng el cherrarou melasem olsiseb er a chelsel a rengud tokuni sel bol meringel a klengar, cheuarem el meketeket, ma ringel a chetituokel. A chedaol bades a meskid a bleketakl el omellach el mora derta er kid sel dulsirs ra ringel el cheltel a ringel er chelechal taem: “Lak omchitii sel klou el rengum.”3
Betik er a renguk el rodam ma rodos er ngak, tirkel tir a nguu sel kmal meral klou el reng ra telbiil el meruul ra blil a Rubak el okiu a Jesus Kristo a obang a tara kmal mesisiich el klisiich el kid a sebeched el nguu er tia el klechad.
Me sel kid a mla subii a Babier er a Mormon er a Mei, Moltirakl er Ngaker a chelechal rak, e kede mla sioning ra Nephi ra lungil el ochotii sel klisichel tial klou el reng ra telbiil el okiu a klaumerang er ngii sel bol chelbangel a olibesongel ma ringel el uai sera bo lolai aikel tiberberek el sinstsyu el Rubak a dilu er ngii el mo ngmai. A Nephi, el mle kot el ngara klengit er reng e medakt el kirel a Laman me a Lamuel el diak a klaumerang er tir, a di ulebang a kllou el reng el kmo a Rubak a mo mesterir a ikal sintsiu el chedaol llechukl. Ng milkinga ra rubekul, “El Rubak a kiei, me kid, e ng diak dorael mora demad ra chereomel el di merekmo sel bo dekedmeklii sel ngii a Rubak a mla melekoi er kid el mo rullii.”4 El uchul a klou el rengul a Nephi ra yaksok ra Rubak, e ng mlo sebechel el kudmeklii sel ngii a mlo kirel rulii.5 Uriul, ra ues er ngii, a Nephi a ulba tia el klou el reng, e milluches, “Ngak, el Nephi, el milsa klisichel a Ngelekel a Dios, el mle metengel el me er a resanto el mla er a ikelesia er a Ngelekel a Dios, me a rchedal a Rubak er a telbiil, … e te mle bleiull er a llemalt e oba klisichel me a klebkellel a Dios.”6
Ak mla mesang er medak a beltkil a rengul yaksok ma klisichel a Rubak el omaoch el mora klengar er tirkel rengelekel a Dios, el melisiich er tir el mo chemau a ringelel a klechad. A tara sils ea bechik a mle remei uriul ra lengara omengull ra templo e ulechisa er ngak ra tekoi el dilubech el merngii ra le ngarsei. Sera lesiseb ra blil a Rubak, eng milsa a chad el ngara wheelchair el kmal soro me a mechas el meringel el merael oba skersel, tir el terung el kmal mesisiich a rengrir el me mengull e oldanges ra Rubak ra chelsel a Blil. Tia ra bel siseb a bechik er a basio er a cheaol omengedmokl, e ng milsa ungil odos el ngii a mle chelmus a bital chimal e di mle bita chimal, e ungil meruul a ngerchelel.
El ngak ma bechik a milngedecheduch el kirel tial dilubech, e aki mlo metebengii el kmo ng di klikiid ma kmal ngara rengud el klou el reng el kirel a diak a ulebengelel yaksok el Dios a meskid el okiu a chedaol telbiil el Obengkel er a Blil a rulterir tirkel kmal mengasireng el oltirakl ra Kristo el chemoit a rekeblirir er tial kmal mle mekelekolt el sils, el diak el ior ra ikel ringel el chelbangel.
Betik ra renguk el resechelik, alsekum eng ngarngii a di chimo el tekoi el sebeched el obang—ma chimo el ngerang el sebeched el nguu el mesterir a rengeleked ma rengelekir a rengeleked el ngii a mo ngosuterir ra omelasem ma ringel el bol chelbangel—e ng sel klou el reng ra telbiil el okiu a Jesus Kristo. Oba tia el kmal chedaol el tekoi a mo ngosuterir el mo kiei el uaike el blal yaksok a Rubak el mortirkel blak a rengrir el oltirakl er Ngii: “Kemiu el oltirakl er Ngak a mo dechor ra chedaol basio, e diak mouedikel.”7
Ng mekerang e kede nguu tial klou el reng el okiu a Jesus Kristo? Ng mei el okiu a klengariou el reng, nguu a Osobel el mo kelulul a klengar er kid, kiei el oltirakl a llechul a ebangkelio ra Jesus Kristo, ngmai a chedaol ruoll ra mo suobel ma ngarbab el klebkall, e oltirakl aikel telbiil el kid a mla remuul el obengkel a Dios ra chedaol blil.
Ngarisei el milngesimer el cheldechedechal er sel klou el ongdibel ra Ongeteruich el buil ra rak ra 2019, e a betik ra rengud el profet er kid a ulmeklatk er kid el kirel a klou el ultutelel bakes el mo nguu a klou el reng ra telbiil, el kmo: “A klikiid ra tang el mo soiseb ra blil a Rubak a ultuil ra kedmeklel a tekoi ra reng ra tang. Klikiid er a tal chad a kirel mobult a uldesuel me a rengul el mo uai a Rubak, el mo melemalt el chad er a buai, e mo ungil okesiu, e mo chedaol el chad.”8 Ma leuaisei, alsekum ekede mengodech a omengedmekled el mo soiseb ra templo, e kede mo ngodechii a blekeradel el merkid er a templo, el ngii a mo omult a klengar er kid ra ikrel a templo. “E a klaumerang er kau a mo mesisiich er medal a Dios; e a osisechakl er a priesthood a mo mui er a rengum el di uaia ngusech er a babeluades.”9}
A bisop el kudengelii a melekoi ra ngarbab el klass ra Primary el diak el klass ra “Primary” ng bai klass ra “omengedmokl el kirel a templo”. Sera Kot el buil e ngii el bisop ngiltiterir a rengalek er tial klass ma rolsisechakl er tir el mei ra obis er ngii mete mengedecheduch el kirel a kmo te mekerang e mo mengedmokl er tir el mo soiseb ra templo er tial rokir el rak. A bisop a mo omes aikel kltukl el ker ra temple recommend interview, el ngii a uldimukl ra chelsel a subelir ra Primary. Ng siotai ra rengalek mete mo kldmokl mesel mei sel taem el bera obis ra bisob er sel merael mei rak, e te mo meklou a rengrir, klou a rengrir el kirel a telbiil, e kldmokl el mo nguu a temple recommend el mo soiseb ra blil a Rubak. Chelecha el rak ea bisob a mlarngii a re teua el mekerei el redil el kmal mle semeriar, kldmokl, e klou a rengrir el mora templo mete kmal sorir a bisob a le print a kengei el mora templo er tir sel bol 12:01 a.m. ra Beches el Rak.
A omengedmokl a diak el dil kirel a ketengem el mo soiseb ra templo. Kid el rokui a kired el di mengedmokl er kid el mora blil Rubak. A tara stake el kudengelii a mla mo outekoi er sel kmo “Uldalem el Blai, Ulsirs ra Ikelesia, e rrengodel ra templo.” Rrengodel10 a tara kmal meang el tekoi el belkul a kmo ng uldalem ra chederdellel, e ngdi sebechel dirrek el belkul a kmo ng dellemakl e delibuk er a, mesisiich, e ulterekokl, e sebechel. Mesel de rrengodel ra templo e kede melibuk er kid el mora Osobel, meskid a meral dereder ma semechokl el mo uchul a klou el reng ra telbiil el okiu a Jesus Kristo. El uaisei, e kid el rokui a kired el blak a rengud el melisiich aika el omerenged el meruul a temel a osengeled el obengkel a Rubak ra chedaol el Blil, el diak el iior ra kmo ng kmeed ma lechub eng cheroid a templo.11
A profet er kid el, President Russell M. Nelson, a ulmeklatk er kid el kirel aikal meklou a belkul osisechakl sera lolekoi el kmo: “A templo a blengkangk er a belngel a omelisiich el klaumerang me a chedaol klengar er kid e le a Osobel me a Osisecheklel a rengul a templo. A rokui el mosisechakl er a templo, lokiu osisechakl me a Reng, a dochel a klemedengei er kid er a Jesus Kristo. A ikel klou a ultutelel chedaol ruoll er Ngii a lochetid el mo er ngii lokiu a chedaol telbiil er a priesthood. Me sel, doltirakl a telbiled, e Ngii a ousengk el merkid loba omekungil er Ngii me a mesisiich el Klisichel. E, kid a kmal mo ousbech a Klisichel er a ikal merael mei el klebesei.”12
Ng urungulel a Osobel mekede mo kldmokl el morngii a klaumedengei er kid, e bleketakl, e morsel meral teletelel a kmo kede mekerang e meruul a telbiil el obengkel a Demad el Babblades el ngara Ngklel. Ng soal kid a bo de kldmokl el mo melchesuar aikel lemelted, yaksok, me a ngercheled; el mo kldmokl el mo olab llemesel a reng ma beches el ues el kid a ousbech er tial klengar. Ak medengei el kmo a Rubak sel lesang a kekerei el ngeuil a blakerreng ma lechub eng omelasem el melemalt el kongei el Nguu el mo kelulul a klengar er kid, me a ikel chedaol ruoll ma telbiil el kid a remuul ra Blil, Ngii a mo omekngeltengat er kid, el ngara cherrungel el Teletelel, lolab a ongasireng ma klechubechub el kid a ousbech.
A blil a Rubak sei a sebeched el mo obult el mo ngarbab e muut el mechedaol. Uaisei, sel detobed ra templo, obult el okiu a yaksok ra telbiil, olab a ngar bab el klisiich, kede nguu a templo el obengked el mora blid ma klengar er kid. Ak subedau el kmo sel doba Reng ra blil a Rubak a meltid, el rokir.
Kede medengei el lokiu a templo el kmo sel sekum eng soad a Reng ra Rubak el diak el mengubet er a klengar er kid, e ng diak el sebeched e diak el kired el ngarngii a klsib el reng er kid el mora ngidi el chad. Sel de lecha mekngit el omeruul ma uldasu ra chelsel a rengud ma uldesued a mo mukdubech a diak el ungil el omelekoi ma omeruul, er a social media ma dirrek el rekeblid, el mo uchul ea Reng ra Rubak a mo mengubet ra rengud. Ma leuaisei, a kulengit melak mchitii a klou el reng er kau, bai, bo becherei a klou el reng er kau me bol mesisiich.
Tia el dirk merael el teketekel a templo a melemolem el omeksemeriar, omellomes, e omekngeltengat er kid. E ng di lmuut el klou ultutelel, sel dengodech a ongedmekled el mo soiseb ra templo, e kede mo ngmodech aikel meruul el merkid ra chelsel a templo, el ngii a mo mult a klengar er kid ra ikrel a templo. Mei me tia me bol omult er kid e lebeskid a mui el klou el reng el ngara chedaol telbiled el obengkel a Dios el okiu a Jesus Kristo. A Dios a ngar, Jesus a Osobeled, e tiaia mla moluut el Ikelesia er Ngii ra beluulechad. Ak mengull el ouchais aika el klemerang loba chedaol el ngklel a Osobeled, Jesus Kristo, amen.