Oldak aike el Eru el Ngarbab el Llach
A duch er kid loltirakl ra Jesus Kristo a ultuil ra klisiched el mo oltirakl ra kot ma ongeru llach el tabesul e osisiu.
Omesodel
A bechik, er a Lesa, me ngak sel ki momais el meliuekl er a beluulechad, eng dmeu a rengmam el kebetech lobengkemiu er a meklou me a mekekerei el ongdibel. A blakelreng er kemiu er a urerel a Rubak a smisichemam e sioning er a ebangkelio er a Jesus Kristo. A luut er kemam el mo remei e a ki melbedebek el kmo ngarngii a betok el ki mriruul er aikel ki mngilai er kemiu.
A ikal bisam, eng kmal kekerei a techellam el mesarch e omes a beluu. Engdi, sel sebchel, eak nguu a telkib taem melbedebk er selk semeriar ngii. Ak semeriar er a okedecherul a blai e kmal soak okedecherul a did. A okedecherul a did a kmal osir a renguk. A le Rainbow Bridge ra Tokyo, ma Tsing Ma Bridge ra Hong Kong, Tower Brodge ra London, a lechub a bebil el blak ues, eng kmal mechas ra resemmong lulmekedechor aikal chetituokel lomekedecheraol. A did a ngoikid el mora basio el ngii a locha diak el sebeched el morngii. (Uche ra kulemolem, eak lotkii kmo ucher tial klumech al meketmokl, ng mlarngii a klou el aksident ra did er a Baltimore. Kede melatk er tirkel mlo smecher e melatk er a rechad er a telungalek er tir.)
Kmal Meang el Did
Ak dirk mlo er a tekoi er a ureor er a California, elk liluut el mo er tial mengasireng el Golden Gate Bridge, el ngii a tara kmal tokubets el okedecheraol er a beluulechad. Tial mengasireng el omkedecheraol a kmal klebokel a teletelel, ma moktek er ngii, ma okedecherul. Ng mesisiich el did el ruul, ra mesisiich el tengal. Aikel mekedelal e mesisiich el tengal el mo ulech ra belengel er bebul a daob a mle kot lomekedecheor. Ngii el teblong orreked ra berraod ra seng ma klekedall lorreked ra rael e riou. A tokubets el klisichel—klisichel tial talikera—a ngii a mengasireng el urerel tial did.
Golden Gate Bridge District
A siasing ra uchelel a urerel tial did a sioning ra okedecherul. A bek el klekedellel tial did a ngarngii a mesisiich el talikerab loltekau ra berraod, el ngii el teblong a ulech.
Getty Images/Underwood Archives
Sel bol merek tial did, e a ikal eru el talikerab a ungil lulech e a tengal a ngara bertakl, lolchotel a klisichel ma klebekelel.
Chelechal sils eak siotai er kemiu el mo omes er tial did—ma ikal erul el talikerab el dechor ra meisiich el dodai—er sel kuk osengiu ra ebangkelio.
Mocha ra ulebongel ra urerel a Jesus Kristo, sel chelecha e kede omekedong er ngii el Holy Week, e a Farasi el mle chad ra llach1a uleker ra Osobel a ker el ngii a mle medengei el uase ng meringel a longer ngii:2Mastang, ngera ngarbab llach?” Ngkal chad ra llach, “a ulemedikl er ngii” e ulsiik ra soal nger, el mle moktek er ngii a melemall, e bai ngiluu a bleketakl, e chedaol, e klebokel nger.
“A Jesus a dilu er ngii el kmo, Ng kirel betik a rengum er a Rubak el Dios er kau loba rengum el rokir, me a rokir el klengar kau, me a uldesuem el rokir.
“Tiaikid a kot el ngarbab el llach e kot el klou a belkul.” A domekesiu er ngii ra okesiu ra did, e sel kot el talikerab!
“E a ongerung el longingil, Bol betik a rengum er a kmeed er kau el di ua sel kau a betik a rengum er kau.” Tia sel ongeru el talikerab!
“A cherrengelel a llach me a osisechakl er a re profet a ultuil er a ikal eru el llach.”3 A ikel medechel klekedellel a did!
Locha sebeched lungil omes aikal eru el ngarbab el llach, el mle nger ra Jesus Kristo. Mesel momes, a siasing ra klebokel mesisiich el did, el kedidai el bedul a eanged, bol melcheluches ra uldesuem.
Bol betik a renguk er a Rubak.
A kot, bol betik a rengum ra Rubak loba rengum el rokir, bedengem, ma uldesuem.
A nger ngii, e a Jesus Kristo a milngedeb a belkul aikel chedaol Llach el mosisechakl er a Chuodel Renged. A mo betik a rengum ra Rubak a kot lomuchel ra rengul a chad—sel teletelel a chad. Ea Rubak olengit mou beltikelreng loba bedengem4—e mereko—oubeltikelreng loba uldesuem—klemedengei ma llemesem. A beltikelreng el mora Dios a diak a telkelel a lechub el dil tang. Ng diak a ulebengelel.
A denguu er ngak, ea otireklel sel kot el ngarbab el llach a bebil ra taem ngkora terrakl e kdekudel. Eng di, sel kumtab a tekoi el Jesus a dilu ra remesiungel, e tial llach a mo bleketakl: “A lebetik a rengum er ngak, e moltirakl a llechuk.”5 Tiaikid a sebechek el rulii. Ng sebechek el oubeltikelreng el mora Chedam er a Babeluades me a Jesus Kristo, el rullak el mo meluluuch, mesuub chedaol llechukl, e ngara omengull ra templo. Ng betik a rengud ra Chedam ma Ngalek sel dolecha ongeltacher, mengull er a chedaol sils, kiei er a klikiid el klengar, e olngesenges a llach.
A beltikelreng el mora Dios a ultuil ra mekekerei el omeruul, ra rael ra telbiil: a rengeasek a sebechir lousbech ra social media lolngeseu ra rebebil e diak lolemall; mo cheroid ra omilil, ma movie a lechub a kmo ngerang el mekngit; e mengull a chedaol tekoi.
Ka momtab er tiakid el medemdemk el okesiu. Ng mle fast sandei ea Vance6me ngak a melngod er a chesmerel, a tara kekerei el blai. Kemam me a cheldebechel er a deacons a mla mo smau er tial tekoi el “Choi, bem tuu,” el loldiu er ngii tirkal chad ra Dois el sebched rongesii er a ikrel a chesimer. A Sister Mueller a tar tirkel mekesai el chad er a ngodch el beluu er a ward. Ng dimlak el sebechel ungil mekengii a chesmerel a blai, leng mle mikeu. Aki tmuu er tial kora milkolk el blai, eng mal ungil a ngerel oker kemam: Kemiu techa ngkliu? Kom uangerang? Ng betik a rengmiu er a Rubak? Aki ulnger e uase ki mle el melai er a uldersem er a klengerenger. Dirrek el kim dirk ngeasek, aikel ngelsengesel a me chemolt, eng di sel klaumerang er ngii ma nger ngii a mal silbechak: “Ak ngiluu a ten sens el loia ra bebul a tebel er chelchal tutau. Ng mral ungil a renguk el meskemiu a uldersek er a klengerenger. Ng sebchiu el lotungii ra blil e luchesii sel babier er a uldars ra klengereng? A beltikelreng er ngii el mo er a Rubak a smilsichii a klaumera er kemam er a bek el taem el ki morael.
A King Benjamin a mle yaksok a tokubets el klisiich el mo er tirkel loltirakl ra kot el ngarbab el llach. “Osisiu, ak dirrek loureng me bo momtab er tirkel ngeltengat e ngara deurreng el chad le tir loltirakl a llechul a Dios. … Te ngeltengat er a rokui el tekoi, … e a lsekum te outekangel el mo er a ulebongel e te mora babeluades … e mo kiei el ngara diak a ulebengelel deurreng.”7
A beltikelreng el mora Dios a ngoikid elm ora diak a ulebengelel deureng!
Mou Beltikereng el mo ra Ngarbita er Kau
Ea Jesus a dilu el kmo, “A ongerung el klou a belkul a di uai ngii, Bo el betik a rengum er a ngar bita er kau el ua le betik a rengum er kau.”8 Tia sel ongerung el talikerab er a did.
Tiaikid a Jesus a mechir osenged el bedul babeluades, el mo betik a rengud ra Rubak, el mora osenged ra beluulechad, el mo betik a rengud er a bebil er kid el sechal me a redil. A tang a ultuil ra chimong. A beltikelreng el mora Rubak a diak el cherrungel a lsekum eng diak doubeltikereng el mo er tirkel ngarbita er kid. Tial beltikelreng er a rebebil a uldimukl er ngii a rokui el ngelekel a Dios el diak el iior ra kmo te sechal te redil, deruchellir, chad er ker beluu, teletael ra deleuill, kerkerengir, rekrir, a lechub e te ngeral chad. Kede osiik er tirkel ngara ringel ma chelebuul, le tir el “rokui losisiu er medal a Dios.”9 Kede “mesebechakl er a remechebuul, ma rengesool, ma remechitechetong.”10
Ka momdasu er tiang: A Brother Evansa mlo mechas a 11 rengul ra lomelchesiu el stob ra mlil e bo lolengod ra chesmeral a tal obliil. A melakl el dil el derrir a reteruich el ngalek a ngiluu a chesimer, ea meringel teletael ngara chelsel a mlo bleketakl er ngii. A kot e kora mle beot, a osberberii a blirir, e a uriul eng mle betok el rak loldars aikel lousbech a bedengir ma reng er tir.
Ngkal mereng a saul mechas a uriul eng milluches el kirel ngkal sechelil: “Ke mla choitii a klengar kau el mesiou er kemam. Ng kmal soak el mo remenges a tekoi el Rubak a mo dmu er kau sel lochotii omereng el saul er Ngii ra ungil omerellem ra udoud ma chedaol tekoi, el mora rechad el di kau me Ngii a medengelterir. Ke mesulang lomekngeltengat er kemam ra betok el teletael … ma remisionari er kau. … Ak melbedebek el kmo a Rubak ng locha ngileltau, a lechub e ke kuk di ulerenges.”
A beltikelreng el mora rebebil a uldimukl a blekokeuii ma omesiou el Blekerdelel a Kristo. Ng sebechem el mo mechei a klsib el reng, ousubes ra chereuem, oldingel e omes ra re ngarbita er kau, e olngeseu ra remechuodel? A dersta er kemiu a mo mui ra llomes sel moleketek ra beltikelreng er kau el mora rebebil.
A President Russell M. Nelson a ulsisechakl: “A ngesou el dodars el mo er a rebebil—el blak a rengud lomekerreu er a rebebil el muut el omkerreu er kid a ngii—a deureng el mei er kid. Oumesingd … sel desal meriked el betok a doruul e dirrek el ngoikid lotebedid er sel lungil dengarngii. Doltirakler tial ongeru el ngarbab el llach a ngii a klisiich er a meral loltirakl er a Jesus Kristo.”12
Dmak Loureor
A Jesus a liluut el olisechakl, “A cherrengelel a llach me a osisechakl er a re profet a ultuil er a ikal eru el llach.”13 Tia kmal bleketakl. Ngarngii a klou el ultutelel a deleuill ra beltikelreng el mora Dios ma ta ma tang. A uchul ea Golden Gate Bridge a sebechel dechor el meruul a urerel, le ikal teblong el talikerab a di diul mesisiich loltekau ra berraod ra seng, ma rael, ma mlai el merael ra bebul a did. A lak aikang el mesisiich el klekedall, e tial did a sebechel metemall, e mukel. Ngi dil did el sebechel meruul a moktek er ngii, e a ikel talikerab er ngii a kirel dmak el oureor. Osisiu, a duch er kid loltirakl ra Jesus Kristo a ultuil ra klisiched el mo oltirakl ra kot ma ongeru llach el tabesul.
A di merael mo klou el nglemuu ra beluulechad a ochotii er kid, el kmo bebil ra taem e kid obes el melbedebek er tiang. A rebebil a kuk mal mo blak a rengrir loltirakl a llach me te obes er tirkel kuk diak el sal melemalt el chad. A rebebil a kuk meringel tir el mo oubeltikelreng er tirkel kuk diak el ngara rolel a telbiil a lechub eng diak el teloi ra omeruul ra klechelid.
Eng di, te ngarngii tirkel kuk uase ng di betik a rengud ra rebebil a diak a ngeral doruul mora Dios. A rebebil a kuk diak loumerang el uase ngarngii a mal klemerang a lechub a ungil ma mekngit sel kired el meruul ngii a di mechei e kongei a ikel lolilt a rechad el meruul. Aikal erul tekoi a sebechel uchul a did er kau a meuitech e mukel.
A President Dallin H. Oaks a silodii ra ledul kmo: “Kid a mla modurch el mo oubeltikelreng ra rokui el chad, le sel cheldechedechal a Jesus re ngkel ungil chad ra Samaria osischeklid el uase rokui el chad a tirkel ngarabita er kid. Eng di a blakereng er kid el mo oltirakl er tial ongeru el llach a diak el rellid lobes er sel kot, el ngii a mo betik a rengud er a Dios loba rokir rengud, bedenged, me a uldesued.”14
Ulebongel
Ma ker el me er kid el rokui a kmo, Ng mekera doleketek ra did er kid ra klaumerang ma blakelreng—el mo betik a rengud ra Dios ma re ngara bita er kid? Kede, di omuchel. A uchelel a urered a locha sebechel di kekerei llechukl el ngara kmo ngerang er sel did el soad el mo omekedechor ngii. Ng sebechel ngarngii a telal ungil moktek er ngii losiik el mo ungil medengelii ebangkelio ra Rubak a lechub eng mo diak desal merritel ra rebebil. Ng diak a kuk mal kekerei a lechub eng kuk mal klou el diak el sebechel omuchel.
Ea cherengel a taem, el mngara nglunguuch e molib, e a chetiteuokel uldasu a mo ungil. A beches lomeruul a mo kse er kid. Ea omeluches ra uchelel a mo klebokel blueprint. Kede mekedechor a chedaol did ra rengud ma uldesued el mesiou ra Chedam ra Babeluades ma Di Chimol Ngelekel ma dirrek el rodam ma rodos el doureor, milil, e kiei el obengterir.
Aikal meral mei el sils, e sel mengelakl ra mesisiich el did a lechub e mesa siasing, e mues a mekedidai el talikerab, eak siotai er kemiu el mo melatk aikal eru el ngarbab el llach, el Jesus Kristo silaod ra Beches el Renged. A tekingel a Rubak bo lomekellomes er kid. A rengud ma uldesued bol bedul bab el mo betik a rengud ra Rubak e le bedul iou el mo betik a rengud ra odam er kid.
Tiang bo lolisiich a klaumera er kid ra Jesus Kristo ma Tngakireng er Ngii a kuuchais, el ngara ngklel a Jesus Kristo, amen.