E tu’u ’outou i tā te Fatu ra tā Iesu Mesia i ni’a iho ia ’outou
Nā roto i te ha’apa’ora’a i tā tātou mau fafaura’a e fa’ati’a tātou i te Atua, ’ia nīni’i mai i te mau ha’amaita’ira’a e rave rahi i parau-fafau-hia mai, e tū’ati i teie mau fafaura’a.
’A pa’ari ai tā’u nā tamari’i hōpe’a, ’ua ’itehia mai iā’u te mau buka fa’a’ana’anataera’a ’e te tītaura’a, ’o tē fa’a’ohipa ato’a nei rā i te mau taipe i roto i tā rātou ’ā’amu. ’A tai’o ’āmui ai mātou i te pō, ’ua au roa vau i te tauturu atu i tā’u nā tamari’i ’ia ta’a i te taipe ’o tā te ta’ata pāpa’i buka e fa’a’ohipa nei nō te ha’api’i i te mau parau tumu hōhonu a’e, ’oia ato’a te mau parau tumu o te ’evanelia.
’Ua ’ite au e tupu mai te reira i te hō’ē mahana, ’ia tae ana’e i te ’ōmuara’a ’o te taure’are’ara’a o tā’u tāmaiti hōpe’a. ’Ua ha’amata ’oia i te hō’ē buka ’āpī ’e ’ua hina’aro noa ’oia e fana’o i te ’ā’amu, ’ua tāmau noa rā tōna vaerua i te tāmata i te ’imi i te aura’a hōhonu a’e o te mau mea ato’a tāna e tai’o ra. ’Ua fifi ri’i tōna mana’o, i roto rā iā’u ’ua ’ata’ata vau.
’Ua ha’api’i Iesu nā roto i te mau ’ā’amu ’e te mau taipe,—hō’ē huero sinapi nō te ha’api’i i te mana o te fa’aro’o, te māmo’e i mo’e ra nō te ha’api’i i te faufa’a o te mau vaerua ta’ata, te tamaiti pūhura nō te ha’api’i i te huru o te Atua. Tāna mau parabole e mau taipe ïa nā roto i te reira ’oia e nehenehe ai e ha’api’i i te mau ha’api’ira’a hōhonu a’e i te feiā « e tāri’a ’ei fa’aro’ora’a ra, e fa’aro’o ïa ». ’Āre’a rā, te feiā ’o tē ’ore e ’imi i te aura’a hōhonu a’e e’ita ïa rātou e hāro’aro’a, ’oia ato’a nō te feiā e rave rahi e tai’o nei i teie ā mau buka ’o tā’u e tai’o nei i tā’u mau tamari’i, ’aita roa i ’ite tē vai nei te mau aura’a hōhonu a’e ’e hau atu ā e ha’api’i mai nā roto mai i teie mau ’ā’amu.
I tō te Atua te Metua pupura’a i tāna Tamaiti Fānau Tahi ’ei tūsia nō tātou, ’ua riro mai Iesu Mesia iho ’ei taipe teitei roa a’e nō te here mure ’ore ’o tō tātou Metua i te ao ra nō tātou tāta’itahi. ’Ua riro mai Iesu Mesia ’ei ’Ārenio nā te Atua.
E fana’ora’a ’e e ha’amaita’ira’a nō tātou ’ia tītau-manihini-hia i roto i te hō’ē tā’amura’a o te fafaura’a ’e te Atua, i roto i te reira e nehenehe tō tātou iho orara’a e riro mai ’ei taipe nō taua fafaura’a ra. E fa’atupu te mau fafaura’a i te huru tā’amura’a ’o te fa’ati’a i te Atua ’ia tarai ’e ’a taui ia tātou i te roara’a o te tau ’e ’ia fa’ateitei ia tātou nō te riro hau atu ā mai te Fa’aora, ma te tāmau noa i te ha’afātata atu iāna ’e i tō tātou Metua i te ao ra ’e ma te fa’aineinera’a ia tātou i te hōpe’a nō te tomo atu i mua i tōna aro.
Te ta’ata tāta’itahi i ni’a i te fenua nei, e tamaiti ’e e tamāhine herehia nā te Atua. ’Ia mā’iti ana’e tātou ’ia riro ’ei tuha’a nō te hō’ē fafaura’a, e ha’amaita’i ’e e fa’ahōhonu te reira i tō tātou tā’amura’a e ’ōna. ’Ua ha’api’i te peresideni Russell M. Nelson ē ’ia mā’iti ana’e tātou i te rave i te mau fafaura’a ’e te Atua, e nehenehe tō tātou tā’amura’a ’e ’ōna e riro mai ’ei mea fātata roa atu ā i nā mua a’e nei i tā tātou fafaura’a, ’e e fa’ati’a te reira iāna ’ia ha’amaita’i ia tātou i te hō’ē fāito hau atu ā nō tōna aroha ’e tōna here, te here nō te fafaura’a tei pi’ihia hesed nō roto mai i te reo Hebera. Te ’ē’a nō te fafaura’a ’oia ho’i tō tātou ïa tā’amura’a ’e te Atua—tō tātou tā’amura’a hesed e ’ōna.
Tē hina’aro nei tō tātou Metua i te hō’ē tā’amura’a hōhonu ’e tāna mau tamaiti ’e tāna mau tamāhine, tei ia tātou rā te mā’itira’a. ’Ia mā’iti ana’e tātou i te ha’afātata atu iāna nā roto i te hō’ē tā’amura’a o te fafaura’a, e fa’ati’a te reira iāna ’ia ha’afātata mai ia tātou ’e ’ia ha’amaita’i rahi atu ā ia tātou.
Nā te Atua e ha’amau i te mau tītaura’a ’e te mau fa’ahepora’a o te mau fafaura’a tā tātou e rave. ’Ia mā’iti ana’e tātou i te tomo i roto i taua tā’amura’a ra, tē fa’a’ite pāpū nei tātou iāna nā roto i te mau ravera’a taipe o te fafaura’a tāta’itahi ē, ’ua ineine tātou i te ha’apa’o ma te ’ā’au tae i te mau tītaura’a ’o tāna i ha’amau. Nā roto i te ha’apa’ora’a i tā tātou mau fafaura’a, e fa’ati’a tātou i te Atua ’ia nīni’i mai i te mau ha’ama’ita’ira’a e rave rahi i parau-fafau-hia, e tū’ati i teie mau fafaura’a, e tae noa atu i te hō’ē mana rahi nō te tāui ’e nō te riro hau atu ā mai tō tātou Fa’aora. ’O Iesu Mesia te pū nō te mau fafaura’a ato’a ’o tā tātou e rave nei, ’e nehenehe e roa’a te mau ha’amaita’ira’a o te fafaura’a maoti tāna tūsia tāra’ehara.
Te bāpetizo-utuhi-ra’a ’o te ’ūputa o te taipe ïa nā roto i te reira tātou e tomo ai i roto i te hō’ē tā’amura’a o te fafaura’a ’e te Atua. ’Ia utuhihia ’outou i raro i te pape ’e ’ia fa’ati’a-fa’ahou-hia mai, e taipe te reira nō te pohera’a ’e te ti’afa’ahoura’a mai o te Fa’aora i roto i te hō’ē orara’a ’āpī. ’A bāpetizohia ai tātou, ma te fa’a’itera’a taipe e pohe tātou ’e e fānau-fa’ahou-hia mai tātou i roto i te ’utuāfare o te Mesia ’e e fa’a’ite tātou ē ’ua ineine tātou nō te rave i tōna i’oa i ni’a iho ia tātou. ’O tātou iho te taipe nō te reira fafaura’a I roto i te Faufa’a ’Āpī, tē tai’o nei tātou : « ’O ’outou ato’a ho’i i bāpetizohia i roto i te Mesia ra, ’ua ’ahuhia ïa i tā te Mesia ra ». Nā roto i tō tātou bāpetizora’a, ’ua ’ahuhia tātou ma te taipe i te Mesia.
E fa’a’ite ato’a te ’ōro’a mo’a i te Fa’aora. Te pane ’e te pape e taipe ïa nō te tino ’e te toto o te Mesia i nīni’ihia mai nō tātou. Te hōro’a o tāna tāra’ehara, ’ua pūpū-taipe-hia mai te reira ia tātou i te mau hepetoma ato’a, ’ia mono ana’e te tāne tei mau i te autahu’ara’a i te Fa’aora iho ’o tē hōro’a nei i te faraoa ’e te pape. ’Ia ’amu ’e ’ia inu ana’e tātou i te mau tāpa’o ’o tōna tino ’e ’o tōna toto, e riro mai te Mesia mai te taipe ’ei tuha’a nō tātou. E ’ahu fa’ahou tātou i te Mesia ’a rave ai tātou i te hō’ē fafaura’a ’āpī i te hepetoma tāta’itahi.
’A rave ai tātou i te mau fafaura’a ’e te Atua i roto i te fare o te Fatu, e fa’ahōhonu atu ā tātou i tō tātou tā’amura’a e ’ōna. Te mau mea ato’a tā tātou e rave nei i roto i te hiero, tē fa’a’ite pāpū nei i te fa’anahora’a a te Metua nō tātou, i rōpū i te reira tē ti’a nei te Fa’aora ’e tāna tusia tāra’ehara. E ha’api’i mai te Fatu ia tātou ma te rēni i ni’a i te rēni nā roto i te taipe o te mau ’ōro’a ’e te mau fafaura’a, ’a ’īriti ai tātou i tō tātou ’ā’au ’e ’a ’imi ai nā roto i te pure ’ia hāro’aro’a i te mau aura’a hōhonu a’e.
’Ei tūha’a nō te ’ōro’a o te hiero, ’ua fa’ati’ahia tātou ’ia ’ahu i te ’ahu o te autahu’ara’a mo’a. E fa’ahepora’a mo’a te reira ’e e fāna’ora’a moʼa ato’a.
I roto i te mau peu e rave rahi a te mau ha’apa’ora’a fa’aro’o, e ’ō’omohia te mau ’ahu tāpo’i ta’a ’ē ’ei taipe nō te mau ti’aturira’a ’e nō te mau tītaura’a a te hō’ē ta’ata i te Atua, ’e e mea pinepine te mau ’ahu ’ōro’a i te ’ahuhia e te feiā e fa’atere nei i te mau ’ōro’a ha’amorira’a. E aura’a hōhonu tō teie mau ’ahu mo’a nō te feiā e ’ahu nei i te reira. Tē tai’o nei tātou i roto i te mau pāpa’ira’a mo’a ē, i tahito ra, e ’ahu-ato’a-hia te mau ’ahu o te ’ōro’a mo’a i te mau ’ōro’a o te hiero.
’Ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei, te feiā i rotopū ia tātou ’o tei mā’iti i te rave i te mau fafaura’a ’e te Atua i roto i te fare o te Fatu, e ’ahu nei rātou i te mau ’ahu ’ōroto o te ’ōro’a mo’a i te taime nō te ’ōro’a i roto i te hiero, e taipe ïa nō te mau ’ahu i ’ahuhia na i roto i te mau ’ōro’a i tahito ra i roto i te hiero. Tē ’ō’omo ato’a nei tātou i te ’ahu o te autahu’ara’a mo’a, i te taime ānei o te ha’amorira’a i roto i te hiero ’e i te mau mahana ato’a o tō tātou orara’a.
Te ’ahu o te autahu’ara’a mo’a e taipe hōhonu ïa ’e e fa’a’itera’a ato’a nō te Fa’aora. I tō Adamu ’e ’o Eva ’amura’a i te hotu ’e ’a fa’aru’e atu ai i te ’ō i Edene, ’ua hōro’ahia ia rāua te ’ahu ’iri nō te tāpo’i ia rāua. Mea pāpū paha ’ua fa’atusiahia te hō’ē animara nō te hāmani i taua nā perēue ’iri ra—taipe nō te tūsia a te Fa’aora iho nō tātou. Kaphar ’o te ta’o tumu Hebera ïa nō te tāra’ehara, ’e te hō’ē ’o tōna mau tātarara’a ’o te « tāpo’i » ïa. Tē fa’aha’amana’o mai nei tō tātou ’ahu o te hiero ia tātou ē, e tāpo’i te Fa’aora ’e te mau ha’amaita’ira’a o tāna tāra’ehara ia tātou i te roara’a o tō tātou orara’a. ’A ’ahu ai tātou i te mau mahana ato’a i te ’ahu o te autahu’ara’a mo’a, e riro mai teie taipe nehenehe ’ei tuha’a nō tātou.
I roto i te buka a Roma nō te Faufa’a ’Āpī, tē tai’o nei tātou : « ’Ua poto roa te ru’i, ’ua fātata roa te ao : E teie nei e ha’apae atu tātou i te mau ’ohipa o te pōuri, e ahu tātou i te ’ahu o te ao […] E tu’u ’outou i tā te Fatu ra tā Iesu Mesia i ni’a iho ia ’outou ».
Tē māuruuru nei au i te fana’ora’a ’ia ’ahu i te ’ahu o te autahu’ara’a mo’a nō te fa’aha’amana’o iā’u ē, te tāpo’i tāmau nei te Fa’aora ’e te mau ha’amaita’ira’a o tāna tāra’ehara mure ’ore iā’u i te roara’a ’o tō’u tere i te tahuti nei. Tē fa’aha’amana’o ato’a mai nei te reira iā’u ē, ’ia ha’apa’o ana’e au i te mau fafaura’a tā’u i rave ’e te Atua i roto i te fare o te Fatu, ’ua tu’u ato’a vau ma te taipe i ni’a i te Mesia, ’o ’oia iho te ha’ana nō te māramarama. E pāruru ’oia iā’u i te ’ino, e hōro’a mai iā’u i te mana ’e te ’aravihi rahi atu ā, ’e e riro ’ei māramarama ’e ’ei arata’i nō’u nā roto i te pōiri ’e te mau fifi o teie nei ao.
Tē vai nei te aura’a taipe hōhonu ’e te nehenehe i roto i te ’ahu o te autahu’ara’a mo’a ’e tōna tā’amura’a i te Mesia. Tē ti’aturi nei au ē, tō’u hina’aro ’ia ’ō’omo i te ’ahu mo’a, e riro mai ’ei taipe nō’uiāna. E tāpa’o teie nō’u iho i te Atua, e’ita i te tāpa’o nō vetahi ’ē.
Tē māuruuru roa nei au nō tō’u Fa’aora, ’o Iesu Mesia. ’Ua riro tāna tūsia tāra’ehara ’ei taipe rahi roa a’e nō tōna here hope ’ore ’e nō tō tātou Metua i te ra’i, nō tātou tāta’itahi, te mau taipe e fāfahia nō teie here ’e teie tūsia—te mau tāpa’o i roto i nā rima, te ’āvae ’e te ’ao’ao o te Fa’aora—e vai noa ïa i muri a’e i tōna ti’afa’ahoura’a.
’A ha’apa’o ai au i tā’u mau fafaura’a ’e mau fa’ahepora’a ’e te Atua, ’oia ho’i i te ’ahura’a i te ’ahu o te autahu’ara’a mo’a, e riro mai tō’u iho orara’a ’ei taipe nō tō’u here ’e tō’u ’ā’au mehara hōhonu i tō’u Fa’aora ’o Iesu Mesia ’e tō’u hia’ai ’ia pārahi noa mai ’oia i pīha’iho iā’u.
Mai te mea ’aita ā ’outou i nā reira, tē ani atu nei au ia ’outou ’ia mā’iti i te hō’ē tā’amura’a hōhonu a’e ’e te Atua, ma te ravera’a i te mau fafaura’a ’e ’ōna i roto i te fare o te Fatu. ’A tuatāpapa i te mau a’ora’a a tō tātou peropheta (tae noa atu i te mau ha’api’ira’a nehenehe e vai ra i roto i te mau fa’ata’ara’a i raro o teie mau a’ora’a ’e te rahira’a o te mau a’ora’a o te ’āmuira’a). ’Ua parau tāmau noa ’oia nō ni’a i te mau fafaura’a e rave rahi matahiti, ’e mai te taime iho ā rā ’a riro mai ai ’oia ’ei peresideni nō te ’Ēkālēsia. ’A ’apo mai nā roto mai i tāna mau ha’api’ira’a nō ni’a i te mau ha’amaita’ira’a nehenehe ’e te mana ’e te ’aravihi rahi atu ā ’o tā ’outou e nehenehe e fa’ari’i ma te ravera’a ’e te ha’apa’ora’a i te mau fafaura’a ’e te Atua.
Tē fa’ahiti nei te Buka arata’i rahi ē, ’aita e tītauhia ’ia fa’ari’i i te hō’ē pi’ira’a misiōni ’aore rā ’ia momo’ahia nō te rave i te mau fafaura’a o te hiero. Tītauhia i te hō’ē ta’ata ’ia ti’a i te 18 matahiti, ’aita e haere fa’ahou nei i te ha’api’ira’a tuarua ’aore rā hō’ē ā fāito ha’api’ira’a, ’e ’ia riro ’ei melo nō te ’Ēkālēsia hō’ē a’e matahiti te maoro. Tē vai ato’a nei te mau fa’aturera’a nō te mo’ara’a o te ta’ata iho. Mai te mea e hina’aro ’outou e fa’ahōhonu i tō ’outou tā’amura’a ’e tō ’outou Metua i te ao ra ’e ia Iesu Mesia, nā roto i te ravera’a i te mau fafaura’a mo’a i roto i te fare o te Fatu, tē ani manihini nei au ia ’outou ’ia paraparau i tō ’outou ’episekōpo ’aore rā te peresideni ’āma’a ’e ’a fa’a’ite atu iāna i tō ’outou hina’aro. E tauturu ’oia ia ’outou ’ia ’ite nāhea ’ia fa’aineine nō te fa’ari’i ’e nō te fa’atura i te reira mau fafaura’a.
Nā roto i te tā’amura’a o te fafaura’a ’e te Atua, e nehenehe tō tātou iho orara’a e riro mai ’ei taipe ora nō tā tātou tītaura’a ’e tō tātou here hōhonu nō tō tātou Metua i te ao ra, tō tātou hesednōna, ’e nō tō tātou hina’aro ’ia haere i mua ’e ’oia ato’a ’ia riro mai mai tō tātou Fa’aora, ma te ineine i te hō’ē mahana nō te tomo atu i mua i tō rāua aro. Tē fa’a’ite pāpū nei au ē, e ho’onara’a mau te mau ha’amaita’ira’a rahi o taua tā’amura’a ra o te fafaura’a. I te i’oa o Iesu Mesia, ’āmene.