Pure, tei ’ō nei ’oia
Tē ani nei au ia ’outou ’ia pure nō te ’ite tei ’ō nei te Metua i te ao ra, e pure nō tupu i te rahi ’ia riro mai mai iāna te huru, ’e ’ia pure nō te fa’a’ite atu i tōna here ia vetahi ’ē.
Te mau taea’e ’e te mau tuahine, tē putapū nei au i te ’oa’oa ’a pāhono ai au i te hō’ē fa’auru’ā’ī nō te paraparau atu i te mau tamari’i.
Te mau tamāhine ’e te mau tamāroa, i te vāhi tei reira ’outou nā te ao nei, ’ua hina’aro vau e fa’a’ite atu ia ’outou i te hō’ē ’ohipa.
’Ua here tō tātou Metua i te ao ra ia ’outou ! E tamari’i ’outou nāna. ’Ua mātau maita’i ’oia ia ’outou. Tē hina’aro nei ’oia e ha’amaita’i ia ’outou. Tē pure nei au ma tō’u ’ā’au ato’a ’ia putapū ’outou i tōna here.
E hina’aro ānei ’outou e fa’ari’i i te mau tao’a hōro’a ? Tē hina’aro nei au e paraparau atu ia ’outou nō ni’a i te hō’ē tao’a hōro’a ta’a ’ē, ’o tā te Metua i te ao ra i hōro’a mai ia ’outou nō te tauturu ia ’outou. ’O te tao’a hōro’a ïa nō te pure. E aha te hō’ē pure ha’amaita’ira’a ! E nehenehe tātou e paraparau i te Metua i te ao ra i te mau taime ato’a, i te mau vāhi ato’a.
’A ora ai Iesu i te fenua nei, ’ua ha’api’i ’oia ia tātou i te pure. ’Ua parau ’oia, « e ani, e roa’a ïa ia ’outou ».
E aha te tao’a hōro’a tā ’outou e nehenehe e pure atu ? E rave rahi ïa, i teie rā mahana tē hina’aro nei au e fa’a’ite atu e toru :
-
Pure ’ia ’ite.
-
Pure ’ia tupu i te rahi.
-
Pure ’ia fa’a’ite atu.
E paraparau ana’e tāta’ihō’ē i te reira.
’A tahi, pure ’ia ’ite
E aha tā ’outou e tītau nei ’ia ’ite ?
Tē vai nei hō’ē hīmene nō ni’a i te pure ’o tā te mau tamari’i o te Paraimere nā te ao nei e hīmene nei. E ha’amata te reira nā roto i te hō’ē uira’a. ’Ua ’ite ānei ’outou e aha taua hīmene ra ? ’Āhiri au e mea itoito mau, e hīmene atu vau nō ’outou !
« E te Metua, tei ’ō nei mau ’oe ? Fa’aro’o nei i te tama ’ia pure ? »
Nāhea ’outou e ’ite ai tei ’o nei mau te Metua i te ao ra, noa atu ’aita ’outou e ’ite mata atu iāna ?
’Ua ani manihini te peresideni Russell M. Nleson ia ’outou ’ia « nīni’i atu i tō ’outou ’ā’au i tō ’outou Metua i te ao ra […] ’E i muri iho, ’a fa’aro’o atu ! » ’A fa’aro’o i te mea tā ’outou e putapū i roto i tō ’outou ’ā’au ’e te mau mana’o e tae mai i tō ’outou ferurira’a.
E tino ’i’o ’e te ivi hanahana tō te Metua i te ao ra ’e ’o ’oia te metua nō tō ’outou vaerua. Nō te mea e mana tā’āto’a tō te Metua i te ao ra ’e ’ua ’ite i te mau mea ato’a, e nehenehe ’oia e hi’o i te mau tamari’i ato’a ’e e nehenehe e fa’aro’o ’e ’e pāhono i te pure tāta’itahi. E nehenehe ’outou e ’ite nā roto ia ’outou iho ē, tei ’ō nei oia ’e ’ua here ’oia ia ’outou.
’Ia ’ite ana’e ’outou ē e mea mau te Metua i te ao ra ’e ’ua here ’oia ia ’outou, e nehenehe ’outou e ora ma te itoito ’e te tīa’ira’a ! « ’A pure, tei ’ō nei ’oia ; ’a parau, tē fa’aro’o nei ’oia »
’Ua putapū a’ena ānei ’outou i te vai-’ōtahi-ra’a ? I te hō’ē mahana i te ’onora’a o te matahiti o tā māua mo’otua ’o Ashley te i’oa, ’o ’oia āna’e e ’aita tōna e hoa nō te ha’uti atu i roto i te ’āua ha’utira’a a te fare ha’api’ira’a. ’A ti’a noa ai ’oia i reira, ma te putapūra’a i te faufa’a ’ore ’e te hi’o-’ore-hia, ’ua tae mai te hō’ē mana’o ta’a ’ē i tōna ferurira’a : « E mea ! ’Aita vau e vai ’ōtahi nei ! Tei iā’u ra te Mesia ! » ’Ua tūturi atu Ashley i rōpū i te ’āua ha’utira’a, ’ua tūfene i tōna rima ’e ’ua pure atu i te Metua i te ao ra. I te taime ’a ’ara’ara ai ’oia i te mata, tē ti’a ra te hō’ē tamāhine nō tōna matahiti i reira ’e ’ua ani mai iāna e hina’aro ānei ’oia e ha’uti. ’Ua ha’api’i mai Ashley, « e mea faufa’a roa tātou nō te Fatu, ’e ’aita iho ā tātou e vai ’ōtahi noa ».
I te tahi taime e hina’aro paha ’outou e ’ite nō te aha tē tupu nei te tahi mau mea fifi i roto i tō ’outou orara’a ’aore rā nō te aha ’aita ’outou i fa’ari’i i te ha’amaita’ira’a nō te reira ’outou i pure ai. Pinepine te uira’a maita’i roa a’e e ui atu i te Metua i te ao ra e ’ere nō te aha, e aha rā.
Tē ha’amana’o ra ’outou i te tau o Nephi ’e tōna ’utuāfare ’a po’ia ai rātou, i tō rātou rāterera’a nā roto i te mētēpara ? ’A haere ai Nephi ’e tōna mau taea’e e a’ua’u i te ’ānimara ’ei mā’a nā rātou, ’ua fati te fana a Nephi. ’Aita rā ’oia i ui nō te aha.
’Ua hāmani Nephi i hō’ē fana ’āpī ’e ’ua ani i tōna metua tāne, ia Lehi, i hea ’oia e haere ai nō te ’imi mai i te mā’a. ’Ua pure Lehi, ’e ’ua fa’a’ite te Fatu ia rātou i hea Nephi e haere ai. E arata’i te Metua i te ao ra ia ’outou ’a ani ai ’outou iāna e aha tā ’outou e nehenehe e rave ’e e aha tā ’outou e nehenehe e ha’api’i mai.
Te piti, pure ’ia tupu i te rahi
Tē hina’aro nei te Metua i te ao ra e tauturu ia ’outou ’ia tupu i te rahi ! Nō tōna here rahi ia ’outou ’ua tono mai ’oia i tāna Tamaiti, ’o Iesu Mesia, nō te fa’a’ite ia ’outou i te ’ē’a nō te ora. ’Ua māuiui Iesu, ’ua pohe ’e ’ua ti’afa’ahou mai, ’ia nehenehe i tā tātou mau hara ’ia fa’aorehia ’e ’ia tupu i te rahi nō te riro mai mai iāna te huru.
E hina’aro ānei ’outou ’ia tupu i te rahi i roto te fa’a’oroma’i ’aore rā te ha’avare ’ore ? E hina’aro ānei ’outou ’ia tupu i te rahi i roto te hō’ē ’aravihi ? Pēnei a’e e mea māmahu ’outou ’e tē hina’aro nei ’outou ’ia tupu i te rahi i roto te itoitora’a. « Pure, tei ’ō nei ’oia ! » Maoti tōna Vārua, e nehenehe tō ’outou māfatu e taui ’e e nehenehe ’outou e fa’ari’i i te pūai.
’Ua pāpa’i tō’u hoa ’āpī ’o Jonah, « pinepine au i te putapū i te haura’i i ni’a i te ’ē’a o te fare ha’api’ira’a i te po’ipo’i. E ha’ape’ape’a vau i te mau mea mai te taerera’a, te mo’era’a i te tahi ’ohipa ’e te ravera’a i te mau hi’opo’ara’a. I te 10ra’a o tō’u matahiti, ’ua ha’amata vau i te pure, ’a haere ai au i te fare ha’api’ira’a ’e tō’u māmā. E ani au i te tauturu ’o tā’u e hina’aro ’e e pure ato’a vau nō tō’u ’utuāfare. E feruri ato’a vau i te mau mea ’o tā’u e māuruuru nei ? [Te purera’a i te Metua i te ao rā] ’ua tauturu iā’u. I te tahi taime ’aita vau e putapū i te māmāra’a ’ia pou mai au i rāpae i te pereo’o, i roto ana’e rā vau i tā’u piha ha’api’ira’a e ’ite au i te hau ».
Tē tupu i te rahi nei te fa’aro’o o Jonah ’a pure ai ’oia ’e ’a haere ai i mua.
Te toru, pure ’ia fa’a’ite atu
E nehenehe ’outou e pure nō te tauturu ’ia fa’a’ite atu i te here o te Metua i te ao ra ia vetahi ’ē. Nā roto i tōna Vārua, e tauturu mai te Metua i te ao ra ia ’outou ’ia hi’o atu i te hō’ē ta’ata e ’oto ra, ’ia nehenehe ia ’outou e tāmahanahana iāna. E nehenehe ’oia e tauturu ia ’outou ’ia fa’a’ite atu i tōna here ma te fa’a’orera’a i te hara a vetahi ’ē. E nehenehe ’oia e hōro’a ia ’outou te itoito nō te tāvini ia vetahi ’ē ’e ’ia fa’a’ite atu ia rātou e tamari’i rātou nā te Atua ? E nehenehe ’outou e tauturu ia vetahi ’ē ’ia ’ite ’e ’ia here ia Iesu ’e te Metua i te ao ra mai tā ’outou e rave ra.
I te roara’a o tō’u orara’a, ’ua pure au ’ia riro mai tō’u metua tāne ’ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei. ’Oia ato’a ’ei feiā ’āpī tamāhine, ’ua ’ite au e hia mau ha’amaita’ira’a tāna e nehenehe e fa’ari’i. E nehenehe tō mātou ’utuāfare e fa’ari’i i te mau ha’amaita’ira’a ’ia tā’atihia nō te tau mure ’ore. ’Ua pure pinepine tō’u ’utuāfare, te mau hoa ’e ’o vau nōna, ’aita rā ’oia i riro mai ’ei melo nō te ’Ēkālēsia. ’Aita te Metua i te ao ra e fa’ahepo i te hō’ē ta’ata ’ia rave i te hō’ē mā’itira’a. E nehenehe ’oia e hōro’a mai i te mau pāhonora’a i tā tātou mau pure nā roto i te tahi atu mau rāve’a.
I tō’u pa’ari-ri’i-ra’a mai, ’ua fa’ari’i au i tō’u ha’amaita’ira’a patereāreha. I taime o te ha’amaita’ira’a, ’ua parau mai te patereāreha iā’u ē, te ’ohipa maita’i a’e e ti’a iā’u e rave nō te tauturu i tō’u ’utuāfare ’ia ’āmuihia mātou i te ra’i, ’o te rirora’a ’ei hi’ora’a maita’i nō te ’evanelia a Iesu Mesia. ’O te mea ïa ’o tā’u e nehenehe e rave !
’Ua ora tō’u pāpā e 86 matahiti. E pae mahana i muri a’e i tōna pohera’a, ’ua fa’ari’i au i te hō’ē nino’a mana’o mo’a o te ’oa’oa. ’Ua fa’a’ite mai te Metua i te ao ra iā’u nā roto i tōna Vārua ē, ’ua hina’aro tō’u pāpā e fa’ari’i i te mau ha’amaita’ira’a o te ’evanelia a Iesu Mesia ! E’ita roa atu e mo’ehia iā’u i te mahana ’a tūturi ai au ’ati a’e te fata o te hiero, ’e tō’u tuahine ’e tō’u mau taea’e ’ia tā’atihia i tō’u nā metua. ’Ua ha’amata vau i te pure nō teie ha’amaita’ira’a i te taime tei roto vau i te Paraimere, ’e ’ua fa’ari’i au i te reira i tō’u rirora’a e māmā rū’au.
Pēnei a’e tē pure nei ’outou nō te mau ha’amaita’ira’a nō tō ’outou ’utuāfare ’e nō vetahi tei herehia e ’outou. ’Eiaha e faʼaru’e ! E fa’a’ite mai te Metua i te ao ra ia ’outou e aha tā ’outou e nehenehe e rave.
’A fa’a’ite i te Metua i te ao ra i te mea e vai ra i roto i tō ’outou māfatu. ’A ani ai ’outou ma te hina’aro mau i tāna tauturu, e fa’ari’i ’outou i tōna Vārua nō te arata’i ia ’outou. Te purera’a i te mau mahana ato’a, e ’ī ’outou i te here nō te Metua i te ao ra ’e nō Iesu Mesia. E tauturu te reira ia ’outou ’ia hina’aro e pe’e ia Rāua i te roara’a o tō ’outou orara’a !
’A feruri na e aha te ’ohipa e tupu ’āhiri te mau tamari’i ato’a nō Afirita, Marite ’apato’a, ’Asia, Europa, Marite ’apatoerau ’e Auteraria e pure i te mau mahana ato’a ? Te ao tā’āto’a nei te ha’amaita’ihia ’e te here rahi roa a’e o te Atua !
Tē ani nei au ia ’outou e pure ’ia ’ite tei ’ō nei te Metua i te ao ra, e pure ’ia tupu i te rahi nō te riro mai mai iāna te huru, ’e e pure ’ia fa’a’ite atu i tōna here ia vetahi ’ē. ’Ua ’ite au tē ora nei ’oia ’e ’ua here ’oia ia ’outou. « Pure, tei ’ō nei ’oia » Nā roto i te i’oa mo’a o Iesu Mesia, ’āmene.