E maita’i te mau mea ato’a māoti te mau fafaura’a o te hiero
’Aita e mea faufa’a a’e i te fa’aturara’a i te mau fafaura’a tā ’outou i rave ’aore rā ’o tā ’outou e rave atu i roto i te hiero.
E au mau taea’e ’e au mau tuahine, ’ua riro teie tuha’a purera’a o te ’āmuira’a rahi ’ei taime mo’a nō’u. ’Ua māuruuru roa vau nō te anira’a ’ia paraparau i te mau milioni feiā mo’a i te mau mahana hope’a nei ’e i tō tātou mau hoa nā te ao ato’a nei. ’Ua here au ia ’outou ’e ’ua ’ite au ’ua here te Fatu ia ’outou.
’A 50 matahiti i ma’iri a’e nei, ’ua tāvini na vau ’ei peresideni nō te fare ha’api’ira’a tuatoru nō Ricks College, i Rexburg Idaho. I te po’ipo’i 5 nō Tiunu 1976, ’ua tere atu māua tā’u vahine ’o Kathy mai Rexburg e haere ti’a atu i te hiero nō Idaho Falls, nō te tā’atira’a o te hō’ē hoa piri. ’Oia mau, nō nā e maha tamari’i tamāroa i te fare i taua taime ra, e’ita tō māua tere nō te hiero e tupu, ’āua’e ra te tauturu a te hō’ē ta’ata ha’apa’o tamari’i itoito ! ’Ua vaiiho atu māua i tā māua mau tamari’i tao’a rahi i roto i tāna ha’apa’ora’a maita’i, ’e ’ua tere atu māua i te āteara’a e 30 minuti.
Mea fa’ahiahia roa te ’ohipa i tupu nō māua i roto i te hiero taua mahana ra, mai tei mātauhia. Teie rā, i muri mai te fa’aotira’a te ’ōro’a tā’atira’a—’e ’a fa’aineine ai māua e ho’i atu i te fare—’ua ’ite atu māua e rave rahi rave ’ohipa ’e te feiā haere hiero i te ’āparaura’a ma te pe’ape’a i roto i te vāhi fa’ari’ira’a o te hiero. I roto noa te tahi ma’a taime poto, ’ua fa’a’ite mai te hō’ē o te mau rave ’ohipa ia māua ē, ’ua hi’a te ha’apahura’a pape i patu-’āpī-hia nō Teton i te pae hitia’a o te rā nō Idaho ! Hau atu i te 300 mirioni metere tiupa pape tei tahe mai nā roto i te ha’apahura’a pape haere ti’a atu i roto i te mau ’āfa’a tāpiri e 775 kilometera tuea. Tei raro a’e te rahira’a o te ’oire nō Rexburg i te pape, ’ua ’āfa’i-’ē-hia te mau fare nohora’a ’e te mau pere’o’o nā te mau pape tiruvi. ’Ua vai tā’ue mai e piti i ni’a te toru o te 9 000 huira’atira i roto i te nohora’a ’ore.
Mai tā ’outou e nehenehe e feruri mai, ’ua fāriu atu tō māua mana’o ’e mau pe’ape’a i ni’a i te pārurura’a o tā māua mau tamari’i here, te mau hānere pīahi ’e mau ’orometua ha’api’i, ’oia ato’a i te huira’atira o te ’oire tā māua i here. Tei te 50 km ri’i noa māua i te āteara’a i tō māua nohora’a, ’e nō reira i te reira mahana, ’aita te mau niuniu ’āfa’ifa’i ’e te mau putu poro’i, ’aita tā māua e rāve’a nō te paraparau ’oi’oi atu i tā māua mau tamari’i, ’aita ato’a tā māua e nehenehe e ho’i i Rexburg mai Idaho Falls atu, nō te mea ’ua ’ōpanihia te mau purūmu ato’a.
Tē rāve’a noa nō māua ’ia tā’oto mai i te hō’ē hōtēra iti i Idaho Falls. ’Ua tūturi ’āmui māua o Kathy i roto i tō māua piha iti o te hōtēra ’e ’ua tāparu ma te ha’eha’a i te Metua i te ao ra ’ia vai pāruru-maita’i-hia tā māua mau tamari’i here ’e te tauatini atu feiā e fa’aruru nei i teie ’ati pe’ape’a. Tē ha’amana’o nei au ia Kathy i te ta’ahi-noa-ra’a i ni’a i te tahua e tae roa i te ’ā’ahiatara’a, ma te ha’ape’ape’a i tāna mau tamari’i. Noa atu tō’u iho mau ha’ape’ape’ara’a, ’ua ti’a iā’u ’ia tāmarū i tō’u ferurira’a ’e ’ua vare’a atu i te ta’oto.
’Aita i maoro roa i muri iho, ’ua fa’aara mai tō’u hoa here mure ’ore iā’u ’e ’ua parau mai iā’u, « e Hal, nāhea e ti’a ai ia ’oe e ta’oto i teie huru taime ? »
Tae mai nei teie mau parau ma te māramarama i tō’u ’ā’au ’e i tō’u ferurira’a. ’Ua parau atu vau i tā’u vahine : « Kathy, noa atu te hope’ara’a, e maita’i te mau mea ato’a maoti te hiero. ’Ua rave tāua i te mau fafaura’a ’e te Atua ’e ’ua tā’atihia ’ei ’utuāfare mure ’ore ».
I taua taime ra, e au ra ē tē ha’apāpū mai nei te Vārua o te Fatu i roto i tō māua ’ā’au ’e tō māua ferurira’a i te mea tā māua i ’ite a’ena ’ei parau mau : te mau ’ōro’a o te tā’atira’a, e ’ite-noa-hia i roto i te fare o te Fatu ’e e fa’aterehia nā roto i te ha’amanara’a ti’a o te autahu’ara’a, ’ua tā’ati-’āmui-hia māua ’ei tāne ’e ’ei vahine fa’aipoipo, ’e tā māua mau tamari’i. ’Aita roa atu e tumu nō te mata’u ’e ’ua māuruuru roa māua i te ha’api’ira’a mai i muri iho ē, ’ua vai-pāruru-hia tā māua mau tamāroa.
E fa’ahōho’a maita’i paha teie fa’ahitira’a parau a te peresideni Thomas S. Monson i te mea tā māua Kathy i putapū i te reira pō e ’ore e mo’ehia. « ’Ia haere ana’e tātou i te hiero, e nehenehe tātou e fa’ari’i i te hō’ē fāito rahi mau o te pae vārua ’e te nino’a mana’o o te hau […] E ’apo mai tātou i te aura’a mau o te mau parau a te Fa’aora ’a parau ai ’oia : ‘E hau tā’u e vaiiho ia ’outou nei, ’o tō’u nei hau tā’u e hō atu nō ’outou […] ’Eiaha e taiā tō ’outou ’ā’au, ’eiaha ho’i e mata’u [Ioane 14:27] ».
’Ua ha’amaita’ihia vau i te putapūra’a i te reira hau i te mau taime ato’a, ’a tomo ai au i roto i te hiero mo’a. Tē ha’amana’o nei au i te mahana mātāmua ’a tomo ai au i roto i te hiero nō Roto Miti. E taure’are’a vau i te reira taime.
’Ua hi’o atu tō’u mata i ni’a i te aroaro ’uo’uo teitei ’o te ha’amāramarama roa i te piha, e au ra ē fātata roa e vētea atu te reira i ni’a i te ra’i. ’E i taua taime ra, ’ua tae mai te mana’o ma te mau parau pāpū maita’i i tō’u ferurira’a : « ’ua vai a’ena vau i roto i teie vāhi māramarama ». I reira ra iho rā, ’ua tae mai teie mau parau i tō’u ferurira’a, e ’ere nā roto i tō’u iho reo : « ’Aita, ’aita a’enei ’oe i haere mai i’ō nei nā mua a’e nei. Tē ha’amana’o ra ’oe i te hō’ē taime hou tō ’oe fānaura’a. ’Ua vai na ’oe i roto i te hō’ē vāhi mo’a mai teie te huru, i reira te Fatu e nehenehe ai e haere mai ».
Te mau taea’e ’e te mau tuahine, tē fa’a’ite pāpū nei au ma te ha’eha’a ē, ’ia haere ana’e tātou i te hiero, e fa’aha’amana’ohia tātou i te nātura mure ’ore o tō tātou vaerua, tō tātou aura’a ’e te Metua ’e tāna Tamaiti Hanahana, ’e tō tātou hina’aro hope roa ’ia ho’i i tō tātou fare i te ra’i ra.
I roto i te mau a’ora’a o te ’āmuira’a rahi ’aita i maoro a’enei, ’ua ha’api’i te peresideni Russell M. Nelson :
« Te vāhi pāpū roa a’e nō te ora i te pae vārua tei roto ïa i tā ’outou mau fafaura’a nō te hiero ».
« I te mau mea ato’a tā tātou e ti’aturi nei ’e te mau parau fafau ato’a tā te Atua i rave i tōna nūna’a o te fafaura’a, e ’āmuihia i roto i te hiero ».
« Te mau ta’ata ato’a e rave i te mau fafaura’a […] i roto i te mau hiero, ’e e ha’apa’o i te reira, ’ua fa’ari’i rahi atu rātou i te mana o Iesu Mesia ».
’Ua ha’api’i ato’a ’oia ē, « i te taime ’a rave ai tātou i te hō’ē fafaura’a ’e te Atua, e fa’aru’e tātou i te rēni rōpū ē a muri noa atu. E’ita te Atua e fa’aru’e i tōna tā’amura’a ’e te feiā tei fa’atupu i te reira huru natira’a ’e ’ōna. ’Oia mau, te feiā ato’a tei rave i te hō’ē fafaura’a ’e te Atua, e fa’ari’i rātou i te hō’ē huru ta’a ’ē o te here ’e te aroha ».
I raro a’e i te fa’aterera’a fa’auruhia a te peresiteni Nelson, tē fa’a’oi’oi nei te Fatu, ’e te tāmau noa nei i te fa’a’oi’oi i te patura’a i te mau hiero nā te ao ato’a nei. E fa’ati’a te reira i te mau tamari’i ato’a a te Atua i te rāve’a nō te fa’ari’i i te mau ’ōro’a nō te fa’aorara’a ’e te fa’ateiteira’a ’e ’ia rave ’e ’ia ha’apa’o i te mau fafaura’a mo’a. E ’ere te fa’ati’amāra’a nō te rave i te mau fafaura’a mo’a i te hō’ē tauto’ora’a nō te hō’ē noa taime, e hōho’a rā nō te hō’ē orara’a tā’āto’a. ’Ua parau te Fatu ē e tītau te reira i tō tātou ’ā’au ato’a, te pūai, te mana’o ’e te pūai hope roa.
E nehenehe te ’āmui-pinepine-ra’a i roto i te mau ’ōro’a o te hiero e fa’atupu i te hō’ē hōho’a o te aurarora’a i te Fatu. ’Ia ha’apa’o ana’e ’outou i tā ’outou mau fafaura’a i roto i te hiero ’e ’a ha’amana’o ai ’outou i te reira, tē ani manihini ra ïa ’outou i te auhoara’a o te Vārua Maita’i nō te ha’apūai ’e nō te tāmā ia ’outou.
I reira ’outou e putapū ai i te hō’ē nino’a mana’o o te māramarama ’e te tīa’ira’a e fa’a’ite pāpū nei ē, e parau mau te mau parau fafau. E ’ite mai ’outou ē te mau fafaura’a ato’a ’e te Atua e rāve’a ïa nō te ha’afātata atu ā iāna, ’o te fa’atupu mai i reira i roto i tō ’outou ’ā’au i te hina’aro ’ia ha’apa’o noa i te mau fafaura’a o te hiero.
’Ua fafauhia mai ia tātou ē, « nō tā tātou fafaura’a ’e te Atua, e ’ore roa ’oia e ha’aparuparu i tāna mau tauto’ora’a nō te tauturu ia tātou ’e e ’ore roa tātou e ha’apau i tōna fa’a’oroma’i aroha nō tātou ».
Māoti te mau fafaura’a o te tā’atira’a i roto i te hiero, tātou e fa’ari’i ai i te ha’apāpūra’a nō te mau tā’amura’a o te ’utuāfare here, ’o tē vai noa i muri a’e te pohe ’e e tāmau noa nō te tau mure ’ore. E ’āfa’i mai te fa’aturara’a i te mau fafaura’a o te fa’aipoipora’a ’e nō te ’utuāfare tei ravehia i roto i te hiero o te Atua, i te pārurura’a i mua i te ’ino o te rima pu’u ’e te te’ote’o.
Nā te mau tauto’ora’a tu’utu’u ’ore noa nō te arata’i i tō ’outou ’utuāfare i ni’a i te ’ē’a o te Fatu, e fa’ati’a ia ’outou ’ia aupuru i tō ’outou mau taea’e ’e mau tuahine te tahi ’e te tahi. ’A hōro’a i te mau tamari’i i te mau rāve’a nō te pure nō te tahi ’e te tahi. ’A ’ite ’oi’oi mai i te mau ha’amatara’a o te ’āmahamahara’a, ’e ’a ha’apopou i te mau ’ohipa tāvinira’a pipiri ’ore, te tahi ’e te tahi iho ā ra. ’Ia pure ana’e te mau taea’e ’e te mau tuahine nō te tahi ’e te tahi ’e ’ia tāvini te tahi i te tahi, e tāmarūhia te mau ’ā’au ’e e fāriu atu te ’ā’au i te tahi ’e te tahi ’e i te mau metua.
’O te ’ohipa ïa tā Malaki e fa’ata’a nei ’a tohu ai ’oia nō ni’a i te taera’a mai o Eliaha : « E tanu ’oia i roto i te mau ’ā’au o te mau tamari’i te mau fafaura’a i fafauhia i te mau metua, ’e e riro te mau ’ā’au o te mau tamari’i i te fāriu i tō rātou ra mau metua. ’Āhiri ’aita rā, e ha’amouhia te fenua i tōna taera’a mai ».
Mea pāpū e fa’aruru tātou pa’ato’a i te mau tāmatara’a, te mau fifi, ’e te mau ’oto. ’Aore roa hō’ē o tātou e ’ore e fa’aruru i te « tara o te tino nei ». Teie rā, ’a haere ai tātou i te hiero ’e ’a ha’amana’o ai i tā tātou mau fafaura’a, e nehenehe tātou e fa’aineine nō te fa’ari’i i te arata’ira’a o te ta’ata iho a te Fatu.
I tō māua Kathy fa’aipoipora’ahia ’e te tā’atira’ahia i roto i te hiero nō Logan i Utaha, nā Elder Spencer W. Kimball i rave i te reira ’ōro’a. I roto i te tahi mau parau o tāna i fa’ahiti, ’ua hōro’a mai ’oia i teie parau a’o : « Hal ’e Kathy, ’a ora mai te huru ra ē, ’ia tae ana’e mai te pi’ira’a e ti’a ia ’ōrua e haere ’ōhie atu ».
I te ha’amatara’a, ’aita māua i māramarama i te aura’a o teie parau a’o nō māua, ’ua rave rā māua mai tā māua i nehenehe ’ia ora i tō māua orara’a mai te huru ra ē, ’ia vai ineine noa nō te tāvini i te Fatu ’ia tae ana’e mai te pi’ira’a. I muri mai e 10 matahiti tō māua fa’aipoipora’a, ’ua tae mai te hō’ē pi’ira’a mana’o-’ore-hia nā roto mai i te Tomitera nō te Ha’api’ira’a a te ’Ēkālēsia, Neal A. Maxwell.
’Ua tupu mau iho ā te parau a’o here tei hōro’ahia mai e te peresideni Kimball i roto i te hiero « ’ia haere ’ōhie atu ». ’Ua tae mai te pi’ira’a ia māua Kathy ’ia fa’aru’e i te mea tei riro ’ei orara’a ’utuāfare huru au ’e te maita’i i Tarifonia, nō te tāvini i ni’a i te hō’ē ti’ara’a ’e i te hō’ē vāhi ’aita roa vau i mātau. ’Ua ineine rā tō māua ’utuāfare ’ia haere atu, nō te mea ’ua ’ite te hō’ē peropheta i roto i te hiero mo’a, e vāhi nō te heheura’a, i te hō’ē tupura’a nō ’ananahi tā māua i fa’aineine.
E au mau taea’e ’e mau tuahine here ē, tē fa’a’ite pāpū atu nei au ē, ’aore e mea hau atu i te faufa’a rahi i te fa’aturara’a i te mau fafaura’a tā ’outou i rave ’aore rā e nehenehe e rave atu i roto i te hiero. Noa atu te vāhi tei reira ’outou i ni’a i te ’ē’a nō te fafaura’a, tē a’o atu nei au ia ’outou ’ia fa’ata’ahia ’e ’ia ti’a-mā nō te haere i te hiero. ’A haere pinepine i te hiero mai te mea e vata ’outou. ’A rave ’e ’a ha’apa’o i te mau fafaura’a mo’a ’e te Atua. Tē ha’apāpū atu nei au ia ’outou i te hō’ē ā parau mau o tā’u i fa’a’ite ia Kathy i taua pō ra fātata e pae ’ahuru matahiti i ma’iri i roto i te hō’ē piha iti o te hōtera nō Idaho Falls : « Noa atu te hope’ara’a, e maita’i te mau mea ato’a maoti te mau fafaura’a o te hiero ».
Tē hōro’a atu nei au i tō’u ’itera’a pāpū ē, o Iesu te Mesia. Tē ora nei ’oia ’e tē arata’i nei i tāna ’Ēkālēsia. Te mau hiero ’o te mau fare ïa o te Fatu. ’O te peresideni Russell M. Nelson te peropheta ora a te Atua i ni’a i te fenua nei. ’Ua here au iāna, ’e ’ua here au ia ’outou tāta’itahi. Nā roto i te i’oa mo’a o Iesu Mesia, ’āmene.