Te mana’o o te Atua, ’o te fa’aho’ira’a ïa ia ’outou i te fare
Te mau mea ato’a nō ni’a i te fa’anahora’a a te Metua nō tāna mau tamari’i herehira, ’ua ’ōpuahia ïa nō te fa’aho’i i te tā’āto’ara’a i te fare.
Tē hina’aro nei au e ha’amāuruuru ia ’outou nō tā ’outou mau pure i te ha’amatara’a vau i te fa’atano i ni’a i teie pi’ira’a, i nā roto i te peresideni Nelson, nō te tāvini ’ei ’āpōsetolo nō te Fatu Iesu Mesia. ’Ua ti’a roa paha ia ’outou ’ia feruri i te mana’o ha’eha’a i tae mai, ’e ’ua riro ïa ’ei taime ta’a ’ē nō te tauira’a rahi ’e te hi’opo’ara’a māite iāna iho. Noa atu rā, e tura rahi mau nō’u nei te tāvinira’a i te Fa’aora, noa atu te ti’ara’a, ’e te ’ohipara’a nā muri ia ’outou i roto i te fa’a’itera’a i te parau ’āpī maita’i nō tāna ’evanelia nō te ti’aturi.
Hau atu, ’ua parauhia ē, i muri i te hō’ē ’āpōsetolo ’āpī e metua ho’ovai vahine tei māere roa. ’Aita i pāpū ’ua parau-mau-hia ānei te reira, nō’u nei rā, ’ua ti’a roa ïa. Tē mana’o nei au ē, noa atu ā ’aita fa’ahou ’oia i rotopū ia mātou, e ’ere paha ïa i tōna māere i iti rahi.
’A tau ’āva’e i ma’iri, i te terera’a māua tā’u vahine i te tahi atu fenua nō te mau fa’auera’a ’ohipa rau a te ’Ēkālesia, ’ua ara mai au i te hō’ē po’ipo’i ’e ’ua fā’ao tō’u mata mohimohi nā te ha’amāramarama o te hōtēra. I raro mai i ni’a i te purūmu apiapi, tē ’ite ra vau i te hō’ē ārai’ē’a tei tu’uhia ’e te hō’ē mūto’i i pīha’i iho nō te fa’aho’i i muri i te mau pere’o’o e haere mai ra i terā ’ōpanira’a purūmu. I te ha’amatara’a e ma’a pere’o’o noa tei tere mai ’e tei fa’aho’ihia atu i muri. Ē ’a ma’iri noa ai te hora ’e i te rahira’a te pere’o’o, ’ua ’āna’i noa atu ra ïa.
Nā roto atu i te ha’amāramarama, tē hi’o ra vau i te mūto’i, e au ē, e mea au nāna terā mana e tāpe’a i te terera’a pere’o’o ’e te fa’aho’ira’a i te mau ta’ata i muri. Inaha, e au ē, tē pe’epe’e noa atu ra tōna ’āvae, mai te huru tē ha’amata ra ’oia i te hō’ē ’ori, ’a fātata noa mai te pere’o’o tāta’itahi i teie ’ōpanira’a purūmu. Mai te mea e ’ino’ino ri’i te ta’ata fa’ahoro i terā ’ōpanira’a purūmu, e au ē, e’ita e nehenehe e ti’aturi i te mūto’i nō te tauturu mai ’e nō te fa’a’ite mai i te tahi tāpa’o aroha. E tā’iri’iri noa tōna upo’o ma te fa’atoro atu te rima e ho’i i muri.
E au mau hoa, tō’u nei aupipi i ni’a i te ’ē’a nō te orara’a tāhuti nei, te fa’anahora’a nehenehe a tō tātou Metua, ’oia ho’i tāna fa’anahora’a « fa’ahiahia », ’ua ’ōpuahia ïa nō te fa’aho’i ia ’outou i te fare, ’eiaha nō te tāpe’a ia ’outou i rāpae. ’Aita roa atu e ārai’ē’a tei patuhia ’e ’aita e ta’ata i tu’uhia nō te fa’aho’i ia ’outou i muri. Inaha ’o te huritua mau ïa. Tē tāpapa tu’utu’u ’ore nei te Atua ia ’outou. ’Ua hina’aro ’oia « ’ia mā’iti tāna mau tamari’i ato’a ’ia ho’i i pīha’i iho iāna », ’e tē fa’a’ohipa nei ’oia i te mau rāve’a ato’a nō te fa’aho’i mai ia ’outou.
’Ua hi’o tō tātou Metua here i te Hāmanira’a o teie nei ao nō te fa’afāna’o ia ’outou ’e iā’u nei i te mau ’ohipa i te tāhuti nei e fa’a’ā’ano ’e e ha’amaita’i ia tātou, e fāna’ora’a ’ia fa’a’ohipa i tō tātou ti’amāra’a mōrare tei hōro’ahia mai e te Atua nō te mā’iti iāna, nō te ’apo i te ha’api’ira’a ’e nō te tupu i te rahi, nō te hāhape, nō te tātarahapa, nō te here i te Atua ’e i tō tātou ta’ata tupu, ’e ’ia tae i te hō’ē mahana, nō te ho’i atu iāna ra.
’Ua tono ’oia i tāna Tamaiti here i teie nei ao hi’a, nō te rātere i te tā’āto’ara’a o te orara’a ta’ata nei, nō te hōro’a i te hi’ora’a nō te toe’a o tāna mau tamari’i ’ia pe’e ’e nō te tāra ’ē i te hara ’e nō te fa’aora. E ’īriti te hōro’a rahi a te Mesia nō te tāra’ehara i te mau ārai’ē’a ato’a o te pohe pae tino ’e o te pohe pae vārua, ’o tē fa’ata’a ’ē ia tātou i tō tātou ’utuāfare mure ’ore.
Te mau mea ato’a nō ni’a i te fa’anahora’a a te Metua nō tāna mau tamari’i herehira, ’ua ’ōpuahia ïa nō te fa’aho’i i te tā’āto’ara’a i te fare.
E aha te i’oa tā te mau ve’a a te Atua, tāna mau peropheta, i parau i te reira fa’anahora’a i roto i te mau pāpa’ira’a mo’a nō te fa’aho’i-fa’ahou-ra’a ? ’Ua parau rātou te [fa’anahora’a] rahi nō te fa’aora, te [fa’anahora’a] nō te aroha, te [fa’anahora’a] rahi nō te ’oa’oa ’e te [fa’anahora’a] nō te fa’aorara’a nō te tā’āto’ara’a, « nā roto i te toto o tā’u ra Fānau tahi. »
Te mana’o nō te fa’anahora’a rahi nō te ’oa’oa a te Metua, ’o tō ’outou ïa ’oa’oa, i’ō nei, i teienei, ’e i roto i te mau tau mure ’ore. E ’ere te tāpe’ara’a i tō ’outou ’oa’oa ’e mono atu ai i te ha’ape’ape’ara’a ’e te ha’amata’ura’a.
Te mana’o nō te fa’anahora’a rahi nō te fa’aora a te Metua, ’o tō ’outou ïa tāra’ehara, te fa’aorara’a ia ’outou maoti te mamae ’e te pohe o Iesu Mesia, te ti’amāra’a i te tītīra’a a te hara ’e a te pohe. E ’ere te vaiihora’a ia ’outou i roto i tō ’outou vaira’a.
Te mana’o nō te fa’anahora’a nō te aroha a te Metua, ’o te tu’ura’a mai ïa i te tahiti’a, ’a fāriu fa’ahou ai ’outou iāna ’e ’a fa’atura ai i tā ’outou fafaura’a ’ia ha’apa’o maita’i iāna. E ’ere nō te tāpe’a i te tahiti’a ’e nō te ha’amāuiui ’e nō te fa’atupu i te ’oto.
Te mana’o nō te fa’anahora’a nō te fa’aorara’a a te Metua, ’o tō ’outou ïa fa’aorara’a i roto i te bāsileia nō te hanahana tiretiera, ’a fa’ari’i ai i te ’itera’a pāpū nō Iesu ’e te pūpūra’a i tō ’outou vairua ato’a iāna. E ’ere te tāpe’ara’a ia ’outou i rāpae.
E nāhea, e rave ānei i te mau mea ato’a tā tātou e hina’aro i roto i tō tātou orara’a ? ’Aita e hi’ora’a i te huru tātou e fa’a’ohipa ai i tō tātou ti’amāra’a ’ia mā’iti ? E nehenehe e ha’apa’o ’aore rā e fa’aru’e i te mau fa’auera’a a te Atua ? ’Aita roa ïa. Te hō’ē o te mau anira’a tāmau a Iesu ’e te tāparura’a i roto i tāna tāvinira’a i te tāhuti nei, ’o te tauira’a ïa ’e te tātarahapara’a ’e te haerera’a mai iāna. Te anira’a niu i roto i tāna mau ha’api’ira’a ato’a ’ia ora i te hō’ē fāito pae mōrare teitei a’e ’o te pi’ira’a ïa ’ia haere tātou tāta’itahi i mua, i te fa’aro’o fa’ataui i roto i te Mesia, i te tauira’a pūai o te ’ā’au.
Te hina’aro o te Atua nō tātou, ’o te tauira’a rahi ïa i te ’avei’a mai tō tātou mau ’umera’a pipiri ’e te te’ote’o, te ha’apaera’a i te ta’ata nātura, ’ia « haere [tātou] ’eiaha rā ’ia hara fa’ahou. »
Mai te mea e ti’aturi tātou ē ’o te mana’o nō te fa’anahora’a a te Metua nō te tā’āto’ara’a te fa’aorara’a ia tātou, te tara-’ē-ra’a i tā tātou hara, te tahiti’ara’a ia tātou, ’e nā roto i te reira te fa’ataera’a mai ia tātou i te ’oa’oa, e aha ïa te mana’o o te Tamaiti e nā roto iāna teie fa’anahora’a rahi i te fa’atupuhia ?
Nā te Tamaiti iho i parau mai : « I pou mai nei ho’i au mai te ra’i mai e ha’apa’o i tō tei tono mai iā’u nei hina’aro, ’eiaha tō’u iho hina’aro. »
Te hina’aro o Iesu, ’o te hina’aro hāmani maita’i ïa o te Metua ! ’Ua hina’aro ’oia ’ia ti’a i te ta’ata hope’a ato’a o nā tamari’i a tōna Metua ’ia fa’ari’i i te fā hope’a o te fa’anahora’a—te ora mure ’ore ’e rāua. ’Aita e ta’ata e pāto’ihia teie fāito pūai hanahana.
Mai te peu tē huru ha’ape’ape’a ra ’outou e’ita ’outou e tae i terā fāito, ’aore rā tei ni’a noa te rima here ’e te tahiti’a o te tāra’ehara tā’ōti’a ’ore o te Mesia ia vetahi ’ē, ’eiaha rā ’outou, ’ua hape ïa tō ’outou mana’o. Tā’ōti’a ’ore ra, tā’ōti’a ’ore iho ā ïa. Tā’ōti’a ’ore ra, tei ni’a ïa ia ’outou ’e ia rātou tā ’outou i here.
Tē fa’ata’a nei Nephi i teie parau mau nehenehe : « ’Aore ho’i ’oia e rave i te hō’ē a’e ’ohipa, maori rā nō te maita’i o te ao nei ; ’e ’ua here ’oia i tō te ao nei, ’e ’ua hōro’a ’oia i tōna iho ora, ’ia ti’a iāna ’ia ’ume mai i te mau ta’ata ato’a iāna ra. Nō reira, ’aita ’oia i fa’aue mai i te ta’ata nei ’eiaha rātou e fāri’i i tāna ra fa’aorara’a. »
Tē haere nei te Fa’aora, te Tīa’i māmoe maita’i, e ’imi i tāna māmoe mo’e ē ’ia ’itehia mai rātou iāna. ’Aita ’oia i « hina’aro ē ’ia pohe atu te hō’ē. »
« ’Ua fa’atorohia atu tō’u nei rima nō te aroha ia ’outou na, ’e ’o ’oia ’o tē haere mai iā’u nei ra, ’o tā’u ïa e fāri’i. »
« Tē vai ra ānei te feiā ma’i i rotopū ia ’outou ? ’A hopoi mai ia rātou i’ō nei. E piri’o’i ānei tō rotopū ia ’outou, e matapō ānei, e feiā paruparu ānei, e lēpera ānei, e feiā hāpepa ānei, e tari’a turi ānei, e feiā ro’ohia ānei i te tahi atu mau huru ’ati ? ’A hōpoi mai ia rātou i’ō nei, ’e e fa’aora vau ia rātou, e aroha ho’i tō’u ia ’outou na. »
’Aita ’oia i tīahi i te vahine e tapahi tōna ; ’aita ’oia i ’ōtohe i mua i te lēpera ; ’aita ’oia i vahavaha i te vahine i haruhia i roto i te fa’aturi ; ’aita ’oia i pāto’i i te ’ā’au tātarahapa—noa atu ā te hara. ’E e’ita ’oia e pāto’i ia ’outou ’outou ’e te feiā tā ’outou i here, ’ia hōpoi mai ’outou iāna ra i tō ’outou ’ā’au ’oto ’e te vārua haeha’a. E erete reira tōna mana’o ’aore rā tāna ’ōpuara’a, e ’ere ato’a tāna fa’anahora’a, tāna fā, tōna hina’aro ’e tōna ti’aturi.
’Aita, ’aita ’oia e tu’u nei i te mau ārai’ē’a ’e te mau ’ōpanira’a ; e tātara ’oia i te reira. ’Aita ’oia e ’ōpani ia ’outou i rāpae ; e fa’ari’i ’oia ia ’outou ’ia tomo mai. ’O tāna tāvinira’a tā’āto’a te fa’a’itera’a ora nō teie mana’o.
’E tē vai nei iho ā ïa tāna iho tūsia tāra’ehara, e mea pa’ari atu ā nō tātou ’ia māramarama, tei ’ō atu i tō tātou ’aravihi tāhuti nei ’ia hāro’aro’a. Terā rā, ’e e mea faufa’a teie « terā rā », tē māramarama nei tātou ’e e nehenehe tātou e hāro’aro’a i te mana’o mo’a ’e te fa’aora nō tāna tūsia tāra’ehara.
’Ua mahae te pāruru o te hiero i te pohera’a Iesu i ni’a i te sātauro, e tāpa’o nō te matara-’ā’ano-ra’a te ’ē’a nō te ho’i i mua i te aro o te Metua—nō te mau ta’ata ato’a e fāriu i ni’a iāna, e ti’aturi iāna, e tu’u i tā rātou hōpoi’a i ni’a iāna ’e e rave i tāna zugo i ni’a ia rātou, i roto i te natira’a fafaura’a.
E nehenehe e parau ē, e ’ere te fa’anahora’a a te Metua i te mau ārai’ē’a. ’Aita a’enei ’e e’ita roa atu. E mau mea ānei tei tītauhia ia tātou ’ia rave, te mau fa’auera’a e ha’apa’o, te tahi pae o tō tātou nātura e taui ? ’Oia ïa. Nā roto rā i tōna maita’i rahi, e noa’a ia tātou te reira, ’aita i ātea roa nō te haru mai i tō tātou rima.
Terā te parau ’āpī maita’i ! E’ita e nehenehe e parau i tō’u māuruuru i teie mau parau mau ’ōhie. Te ’ōpuara’a a te Metua, tāna fa’anahora’a, tāna fā, tōna mana’o, tōna hina’aro ’e tōna ti’aturi, ’o te fa’aora ana’e ïa i tō ’outou māuiui, ’o te hōro’a ana’e ïa i te hau ia ’outou, ’o te fa’atae ana’e ïa ia ’outou, ’e ’ia rātou tā ’outou i here, i te fare. E ’ite au nō te reira, nā roto i te i’oa o Iesu Mesia, tāna Tamaiti, ’āmene.