Te mau mea ato’a ’ei maita’i nō tātou

Nā Elder Gerrit W. Gong

Nō te pupu nō te Tino ’Ahuru Ma Piti ’āpōsetolo

I roto i te tau ’e te tau mure ’ore, te tumu nō te Hāmanira’a, nā reira ato’a te nātura o te Atua iho, ’o te fa’ataera’a mai ïa i te mau mea ato’a ’ei maita’i nō tātou.

I teie mahana ’o te 6 nō ’Ēperēra, te mahana ha’amana’ora’a nō te fa’aho’ira’a mai Iesu Mesia i tāna ’Ēkālesia i te mau mahana hope’a nei, ’e te tuha’a nō te pu’e tau Pāsa tātou e parau pāpū ai ma te ’oa’oa nō te orara’a maita’i roa o Iesu Mesia, ’e tāna tūsia tāra’ehara ’e tōna ti’afa’ahoura’a hanahana.

Tē fa’ati’a nei te hō’ē ’ā’amu tinito nō te tamaiti o te hō’ē ta’ata tei ’ite mai i te hō’ē pua’ahoro fenua nehenehe.

« Fāna’o ’oia », ’ua parau te mau ta’ata tupu.

« E hi’o tātou », ’ua parau te ta’ata.

Topa atu ra te tamaiti mai ni’a mai i te pua’ahorofenua ’e pēpē roa atu ra.

« ’Auē ho’i te pāoa », ’ua parau te mau ta’ata tupu.

« E hi’o tātou », ’ua parau te ta’ata.

Tae mai nei te tāpa’ora’a fa’ehau ’e ’aita i ravehia te tamaiti pēpē.

« Fāna’o ’oia », ’ua parau te mau ta’ata tupu.

« E hi’o tātou », ’ua parau te ta’ata.

Pinepine teie ao tāuiui haere noa mai te huru ē, e ao tā’ue’ue ’e te pāpū ’ore ’e i te tahi taime e mea fāna’o, ’e pinepine roa atu ā e mea pāoa. Tēra rā, i roto i teie ao pohe, « ’ua ’ite ho’i tātou ē, tē fa’atupu nei te mau mea ato’a i te maita’i nō te feiā hina’aro i te Atua. » ’Oia mau, ’ia haere tātou ma te parauti’a ’e ’ia ha’amana’o ho’i i tā tātou mau fafaura’a, « e ’āmuihia mai te mau mea ato’a ’ei maita’i nō ’outou. »

Te mau mea ato’a ’ei maita’i nō tātou.

E parau fafau fa’ahiahia mau ! E ha’apāpūra’a tāmarū nō ’ō mai i te Atua iho ! Mai te hō’ē temeio, te tumu nō te Hāmanira’a, nā reira ato’a te nātura o te Atua, ’o te ’itera’a ïa i te hope’a mai te mātāmua mai, ’o te fa’ataera’a mai i te mau mea ato’a ’ei maita’i nō tātou ; ’e ’o te tauturura’a ia tātou ’a ha’amo’ahia ai ’e ’a ra’ahia ai nā roto i te maita’i rahi ’e te tāra’ehara a Iesu Mesia.

E ti’a i te tāra’ehara a Iesu Mesia i te fa’ati’amā ’e i te fa’aora ia tātou i te hara. ’Ua ta’a ato’a rā ia Iesu Mesia ’o roto roa, tō tātou mau māuiui ato’a, te ’ati ’e te ma’i, te ’oto, te ’āta’a. I roto i te tau ’e te tau mure ’ore, e nehenehe tāna upo’oti’ara’a i ni’a i te pohe ’e hade e fa’a’āfaro i te mau mea ato’a. E tauturu ’oia i te tātā’i i tei fati ’e tei vahavahahia, i te fa’afaite i tei riri ’e tei ta’a, i te tāmāhanahana i tei ’āta’a ’e tei mo’emo’e, i te fa’aitoito i tei pāpū ’ore ’e tei ’ore i maita’i roa ’e i te fa’atae mai i te mau temeio tā te Atua noa e fa’atupu.

Tē hīmene nei tātou i te haleluia ’e tē tuō nei i te hōsana ! I te mana mure ’ore ’e te maita’i fāito ’ore, i roto i te fa’anahora’a nō te ’oa’oa a te Atua, e ’ohipa ’āmui te mau mea ato’a ’ei maita’i nō tātou. E nehenehe tātou e fa’aruru i te orara’a ma te ti’aturi ’e te mata’u ’ore.

’Āhani ’o tātou noa iho, e’ita paha tātou e ’ite i tō tātou iho maita’i. ’Ia « mā’iti au iā’u iho », e mā’iti ato’a vau i tō’u iho mau tā’ōti’ara’a, tō’u mau paruparu ’e tō’u nava’i ’ore. I te hope’a roa, nō te rave rahi i te maita’i, ’ei maita’i ïa tātou. ’E nō te mea ’aita atu e ta’ata maita’i maori rā te Atua, e tītau tātou i te maita’i-roa-ra’a i roto ia Iesu Mesia. E tae tātou i tō tātou fāito mau roa a’e ’e te au roa a’e ’a fa’aru’e ai tātou i te tāne ’e te vahine nātura ’a riro atu ai ’ei tamari’i i mua i te Atua.

Ma te ti’aturi ’e te fa’aro’o i te Atua, e ti’a i tō tātou mau fifi ’e tō tātou mau ’ati ’ia ’āmuihia ’ei maita’i nō tātou. ’Ua ho’ohia Iosepha ’ei tītī i ’Aiphiti, ’e i muri iho ’ua fa’aora i tōna ’utuāfare ’e tōna mau ta’ata. ’Ua ha’api’i te peropheta Iosepha Semita tei mau i te fare tāpe’ara’a nō Liberty ē, « e noa’a ia ’oe te ’ite nā roto i teie mau mea ato’a, ’e e riro ho’i ïa ’ei maita’i nō ’oe na. » ’Ia orahia ma te fa’aro’o, e ti’a i te mau fifi ’e te fa’atūsiara’a e’ita roa tātou iho e mā’iti, ’ia ha’amaita’i ia tātou ’e ia vetahi ’ē mai te mana’o-’ore-roa-hia.

E fa’arahi tātou i te fa’aro’o ’e i te ti’aturi i te Fatu ē e ’ohipa ’āmui te mau mea ato’a ’ei maita’i nō tātou mai te mea e noa’a mai tā tātou hi’ora’a mure ’ore ; e māramarama tātou ē tō tātou fifi « nō te hō’ē taime iti noa » ; e ta’a ia tātou ē e ti’a i te ’ati ’ia ha’amo’ahia ’ei maita’i nō tātou ; e fā’i tātou ē e tuha’a nō te orara’a tāhuti nei te mau ’ati, te pohe tā’ue, te ma’i ha’aparuparu ’e te ma’i fa’ahuma ’e e ti’aturi tātou ē ’aita te Metua here i te ao ra e hōro’a nei i te mau fifi nō te fa’autu’a ’e nō te ha’avā. E’ita ’oia e hōro’a i te ’ōfa’i i te ta’ata e ani i te fa’aroa ’e te ’ōphi i te ta’ata e ani i te i’a.

’Ia tae mai te mau fifi, pinepine te mea tā tātou e hina’aro roa ’o te ta’ata ïa nō te fa’aro’o mai ’e nō te fa’aea mai i pīha’i iho. I terā taime, e riro te mau pāhonora’a mataro i te tauturu ’ore, noa atu ā te hina’aro ’ia tāmarū. I te tahi taime e ’imi tātou i te tahi ta’ata nō te heva, nō te māuiui ’e nō te ta’i nā muri ia tātou ; ’ia vaiiho mai e fa’a’ite atu i te māuiui, te ’ino’ino ’e i te tahi mau taime te riri ato’a ; ’e ’ia fā’i nā muri ia tātou ē e mau mea ’aita tātou i ’ite.

’Ia ti’aturi tātou i te Atua ’e i tōna here ia tātou, e ti’a i tō tātou mau auma’i, i te hope’a, ’ia ’ohipa ’āmui ’ei maita’i nō tātou.

Tē ha’amana’o nei au i te mahana ’ua tae mai te parau ē ’ua tupu te hō’ē ’ati purūmu ri’ari’a nō te feiā tā’u i here. I taua taime ra, ma te ’ā’au fāfati ’e te fa’aro’o, e parau noa tātou mai ia Ioba ra : « Nā Iehova i hōro’a mai, ’e nā Iehova i rave mai ; ’ia ha’amaita’ihia te i’oa o Iehova. »

’Ati a’e i te ’Ēkālesia nā te ao nei, e 3 500 titi ’e mata’eina’a ’e e ma’a 30 000 pāroita ’e ’āma’a e fa’afāna’o nei i te ha’apūra’a ’e te pāruru i te mau vero. I roto rā i tā tātou mau titi ’e mau pāroita, e rave rahi ’utuāfare ha’apa’o maita’i ’e te ta’ata hō’ē e fa’aruru nei i te mau fifi rahi, noa atu ē ’ua ’ite ē e ’ohipa ’āmui te mau mea ato’a ’ei maita’i nō tātou (’aita rā i ’ite nāhea roa).

I Huddersfield, i Peretāne, ’ua māhu’ihia te ma’i mariri ’aita’ata fāito maha o te taea’e Samuel Bridgstock, nā mua noa i te pi’ira’a o te peresideni titi ’āpī. Nō terā māhuira’a ma’i, ’ua ui atu ’oia i tāna vahine, ia Anna, e aha pa’i te ’āpī e haere i te uiuira’a.

Pāhono mai nei te tuahine Bridgstock : « Nō te mea e pi’ihia ’oe ’ei peresideni titi. »

’Ua parauhia i te ha’amatara’a ē hō’ē ’aore rā e piti matahiti toe, tē tāvini ra te peresideni Bridgstock i teienei (tei ’ō nei i teie mahana) nō te mahara’a o te matahiti. E mau mahana maita’i ’e e mau mahana fifi. Tē ’āmuitahi nei tōna titi ma te fa’aro’o rahi atu ā ’e te tāvinira’a ’e te hāmani maita’i. E ’ere i te mea ’ōhie, tē ora nei rā tāna vahine ’e tōna ’utuāfare ma te fa’aro’o, te māuruuru ’e te ’oto e ta’ahia, ’o tā rātou e ti’aturi nei e riro mai ’ei ’oa’oa mure ’ore nā roto i te tāra’ehara fa’a’ana’anaea a Iesu Mesia.

I te taime e fa’atupua tātou ma te vai māhorahora ’e ma te mana’o tura, e putapū tātou i te nehenehe ’e te fā ’e te hau nō te tā’amura’a fafaura’a tā te Fatu e pūpū nei. I te mau taime mo’a, e riro ’oia i te vaiiho ia tātou ’ia hi’o poto i te vaira’a mau ’e te mure ’ore ’e te ’ā’ano o te mau mea e ’itehia ai te tuha’a o tō tātou orara’a tāmahana, i reira te mau mea ri’i ’e te ’ōhie e ’ohipa ’āmui ai ’ei maita’i nō te ta’ata hōro’a ’e te ta’ata fa’ari’i.

’Ua fa’ati’a mai ’o Rebekah, te tamāhine a tō’u peresideni misiōni mātāmua, i te huru te Fatu i te pāhonora’a i tāna pure nō te tāmāhanahanara’a, ma te rāve’a tīa’i-’ore-hia nō te pāhono i te pure a te tahi atu ta’ata.

I te hō’ē pō, tē heva ra Rebekah nō te mo’era’a a’enei tōna metua vahine, ’ua tae mai te mana’o pāpū e haere e ho’o mai i te mōrī nō tōna pere’o’o. I te taera’a atu ’oia i te vāhi tītōra’a mōrō, ’ua fārerei ’oia i te hō’ē vahine ruhiruhiā tē huti ra i te aho ’e tāna tura mata’i rahi. A muri a’e, ’ua roa’a ’ia Rebekah i te hōro’a i teie vahine i te mātini hō’ō’ava ’āfa’ifa’i a tōna metua vahine. Ma te māuruuru ’ua nā ’ō mai teie tuahine : « ’Ua ti’amā fa’ahou vau ia ’oe. » E ’ohipa ’āmui te mau mea ato’a ’ei maita’i nō te ta’ata, ’ia aupuru tātou i te ta’ata mai tā Iesu Mesia e aupuru.

’Ua fa’ata’a mai te hō’ē metua tāne tei tu’uhia ’e tāna tamaiti fāito matahiti ha’api’i ’ei hoa aupurura’a : « Te aupurura’a, ’o te rirora’a ïa te ta’ata tupu ’ōpere cookie ’ei hoa ti’aturihia ’e te tauturu pae vārua mātāmua. » Te tā’amura’a fafaura’a ia Iesu Mesia, e tāmāhanahana ïa, e fa’atū’ati, e ha’amo’a.

Noa atu te ’ohipa ’oto rahi, e ti’a i te fa’aineinera’a pae vārua ’ia fa’aha’amana’o ia tātou ē ’ua ’ite tō tātou Metua i te ao ra tē ’ite ra tātou i te pāruru ’ore rahi ’e te mana’o ’āta’a. ’Ei hi’ora’a, e ’utuāfare tei utahia te tamari’i i te fare ma’i, ’e a muri a’e ’ua ’ite i te tāmāhanahanara’a i te ha’amana’ora’a i tā te Vārua Maita’i i muhumuhu a’ena nō te ’ohipa e tupu.

I te tahi taime te vaira’a mau ’e te mure ’ore ’e te ’ā’ano o te mau mea tā te Fatu e ha’aputapū mai, tei roto ato’a ïa te fēti’i i’o mai i te pāruru. E tuahine tei ’ite i te ’oa’oa i roto i te fa’afāriura’a i te ’evanelia a Iesu Mesia i fa’aho’ihia mai. Terā rā e piti mea tei ha’apēpē mau i tōna orara’a—te ’itera’a tōna mata i te hō’ē ’ati pahī ’e te ’ōnohira’a tōna metua vahine, tei rave i tōna iho ora.

Noa atu rā ’ua upo’oti’a teie tuahine i tōna mata’u i te pape nō te bāpetizo utuhi iāna. ’E i te hō’ē mahana ’oa’oa mau, ’ua hi’o ’oia i te hō’ē ta’ata i te monora’a i tōna metua vahine pohe, ’ia bāpetizohia i roto i te hiero. « ’Ua ora mai tō’u metua vahine i te bāpetizora’a hiero, ’e ’ua fa’ati’amā iā’u », ’ua parau te tuahine. « ’A tahi ra tō’u mana’o hau mai te pohera’a mai ā tō’u metua vahine. »

Tē tāvevo nei tā tātou pehe mo’a i tāna ha’apāpūra’a ē e ’ohipa ’āmui te mau mea ato’a ’ei maita’i nō tātou.

’A fa’atupua tō’u vārua : Tei te Fatu ’oe

Nō te arata’i i te ananahi mai i muta’a ra.

Tō tīa’ira’a, tō ti’aturi, ’eiaha e ’āueue ;

Te mea ’aro i teie nei, i te hope’a e māramarama roa ai.

’A haere ā, te feiā mo’a ē,

Ma te ’oa’oa,

E au ānei, ’e ’ati tō ’outou?

Haere ā i mua […]

Pohe paha tātou nā te ’ē’a,

Maita’i ra te reira! ’Arohi !

E fa’a’itera’a te Buka a Moromona i roto i tō tātou rima ē, ’o Iesu te Mesia. ’e tē fa’atupu nei te Atua i tāna mau tohura’a. Pāpa’ihia e te mau peropheta fa’auru tei ’ite i tō tātou ’anotau, tē ha’amata nei te Buka a Moromona ma te ’ohipa ’ōhie, e ’utuāfare e tāfifi ra i tō rātou mau ta’a-’ē-ra’a. ’Ia tai’o māite rā tātou ’e ’ia feruri ho’i i te 1 Nephi 1 ē tae atu i te Moroni 10, tē umehia nei tātou ia Iesu Mesia ra ma te ’itera’a pāpū ’āueue ’ore ē te mea i tupu i terā ra vāhi ’e terā ra tau, e ha’amaita’i ïa ia tātou i’ō nei ’e i teienei.

’A ha’afātata ai te Fatu nā roto i tāna peropheta ora e rave rahi atu ā fare a te Fatu i te mau e rave vāhi rahi atu ā, e ’ohipa ’āmui te mau ha’amaita’ira’a o te hiero ’ei maita’i nō tātou. E haere mai tātou nā roto i te fafaura’a ’e te ’ōro’a i te Atua tō tātou Metua ’e ia Iesu Mesia, ’a noa’a ato’a ai tā tātou hi’ora’a mure ’ore i te orara’a tāhuti nei. Hō’ē hō’ē, te hō’ē i’oa i muri i te tahi, e pūpū tātou i te mau melo here o te ’utuāfare fēti’i—te mau tupuna—i te mau ’ōro’a mo’a ’e te mau ha’amaita’ira’a nō te fafaura’a, mai te au i te hōho’a a te Fatu nō te feiā fa’aora i ni’a i te mou’a ra i Ziona.

’A fātata noa mai te mau hiero ia tātou i te mau vāhi e rave rahi, te hō’ē fa’atūsiara’a hiero tā tātou e nehenehe e pūpū, ’o te tītaura’a ïa te huru mo’a i roto i te fare o te Fatu ma te pinepine atu ā. E rave rahi matahiti te maoro ’ua fa’aherehere tātou i te moni, ’ua fa’anaho ’e ’ua fa’atūsia nō te haere mai i te hiero. I teienei, mai te mea e nehenehe, ’a haere mai ma te pinepine atu ā i te Fatu ’e tāna fare mo’a. ’Ia ha’amaita’i ’e ’ia pāruru ’e ’ia fa’auru te haere-pinepine-ra’a e ha’amori ’e e tāvini i te hiero ia ’outou ’e tō ’outou ’utuāfare—tō ’outou ’utuāfare i teienei ’aore rā te ’utuāfare nō ’outou ’e ’o tā ’outou e riro mai ’ia tae i te hō’ē mahana.

’E mai te mea ato’a e nehenehe, ’a feruri na i te ho’o mai i tō ’outou iho mau ’ahu nō te hiero. ’Ua parau te hō’ē māmā rū’au nō te hō’ē ’utuāfare ha’eha’a ē, te mea tāna e hina’aro roa i roto i teie nei ao ’o tōna iho ïa mau ’ahu nō te hiero. ’Ua nā ’ō mai tāna mo’otua tāne : « ’Ua muhumuhu Māmā’ū : ‘E tāvini au i roto i tō’u mau ’ahu nō te hiero, ’e ’ia pohe atu vau, e tanuhia vau ma te reira ’ahu. » ’O te mea iho ïa i tupu i te taera’a taua taime ra.

Mai tā te peresideni Russell M. Nelson e ha’api’i : « Te mau mea ato’a tā tātou e ti’aturi ’e te mau fafaura’a ato’a tā te Atua i rave i tāna nūna’a nō te fafaura’a, e ’āmuihia mai te reira i roto i te hiero. »

I roto i te tau ’e te tau mure ’ore, te tumu nō te Hāmanira’a, nā reira ato’a te nātura o te Atua iho, ’o te fa’ataera’a mai ïa i te mau mea ato’a ’ei maita’i nō tātou.

’O teie te tumu mure ’ore nō te Fatu. ’O tāna hi’ora’a mure ’ore. ’O tāna parau fafau mure ’ore.

’Ia huehue tō tātou orara’a ’e ’ia pāpū ’ore te tumu, ’ia hina’aro ’outou i te orara’a maita’i a’e ’aita rā i ’ite nāhea, ’a haere mai na i te Atua tō tātou Metua ’e ia Iesu Mesia. ’A ti’aturi ē tē ora nei rāua, ’ua here ia ’outou ’e ’ua hina’aro i te mau mea ato’a ’ei maita’i nō ’outou. Tē parau pāpū nei au tē nā reira nei rāua, ma te fāito ’ore ’e te mure ’ore, i te i’oa mo’a ’e te ra’a o Iesu Mesia, ’āmene.

Fa’ata’ara’a

1. Hi’o Ioane 16:33.

2. Roma 8:28.

3. Te Ha’api’ira’a Tumu ’e te mau Fafaura’a 90:24. E mea mātau tātou i te parau « maita’i roa », te aura’a ra ’aita e fifi ’e ’ua ’āfaro te mau mea ato’a, terā rā ’aita terā fa’ahitira’a ē ’ei maita’i te reira nō tātou.

4. Hi’o Mose 1:3.

5. Hi’o Alama 7:11.

6. Hi’o 2 Nephi 9:10–12. E mea fa’atura te Atua i te ti’amāra’a mōrare, ’e tae noa atu i te fa’ati’ara’a i te mau ’ohipa ti’a ’ore i te tupu i ni’a ia tātou. Terā rā ’ia ineine tātou i te ’imi i te mau mea ato’a tā tātou e nehenehe e rave, nā te maita’i rahi o Iesu Mesia ’e tōna mana ha’apūai ’e te tāra’ehara e tāmā, e fa’aora i te māuiui, e fa’ate’a, e fa’afaite ia tātou ia tātou iho ’e ia vetahi ’ē, i nā pae e piti o te pāruru.

7. Hi’o Moroni 7:6, 10–12. ’Ua pāpa’i tano maita’i te ’orometua tuatoru nō ni’a i te reira tumu parau.

8. Hi’o Roma 3:10 ; Moroni 10:25.

9. Hi’o Moroni 10:32.

10. Hi’o Te Ha’api’ira’a Tumu ’e te mau Fafaura’a 122:4, 7.

11. E ’apo tātou i te ha’api’ira’a nā roto i te mau ’ohipa e’ita roa atu tātou e mā’iti. I te tahi taime, e nehenehe te amora’a i te mau hōpoi’a ma te tauturu a te Fatu e fa’arahi i tō tātou fāito ’ia amo i taua mau hōpoi’a ra ; tē fa’ahōho’a nei te Mosia 24:10–15 i te parau fafau a te Fatu ē e « hi’o aroha [vau] i tō’u mau ta’ata i roto i tō rātou mau ’ati » ’e e « ha’apūai [vau] ia rātou ’ia ti’a ia rātou ’ia fa’a’oroma’i i te mau hōpoi’a. » Tē ha’api’i nei te Alama 33:23 ē e « ha’amāmā mai te Atua i tā [tātou] mau hōpoi’a, nā roto i te ’oa’oa i tāna ra Tamaiti. » Tē fa’aha’amana’o mai nei te Mosia 18:8 ē « ’ia amo te tahi i tā te tahi mau hōpoi’a […] ’ia māmā te reira. »

12. « Tei ni’a iā’u te vārua o te Fatu ra ’o Iehova, nō te mea, ’ua fa’atāhinu mai Iehova iā’u ; ’ua tono mai ’oia iā’u ’ei fa’a’ite i te parau ’oa’oa i te ’ā’au marū ra : ’ei fa’aora ho’i i te feiā ’ā’au ’oto […] ’ia ha’amāhanahana i te feiā i mihi ra ; ’Ei hōpoi atu i te re’are’a i te feiā ’oto i Ziona ; ’ei horo’a atu ia rātou i te ’una’una ’ei mono i te rehu auahi ; ’e te mono’i ra i te ’oa’oa ’ei mono i te ’oto : ’e te ’ahu pū ra i te ha’amaita’i ’ei mono i te ’ā’au taiā » (Isaia 61:1–3). Nā reira ato’a, tē pūpū nei te salamo i te hi’ora’a tā te Fatu i parau fafau : « ’Ia tāpae noa mai te ’oto i te ahiahi ; e riro rā i te ’oa’oa ’ia po’ipo’i » (Salamo 30:5). Tei roto ato’a te mau parau fafau hanahana i te feiā parauti’a i te po’ipo’i nō te ti’afa’ahoura’a mātāmua.

13. Te Ha’api’ira’a Tumu ’e te mau Fafaura’a 122:4. Te ti’aturira’a ē te mau fifi e « taime iti » i roto i te tau mure ’ore, e ’ere ïa i te ha’afaufa’a-’ore-ra’a, ’aore rā te fa’aitira’a i te teimaha ’e te māuiui o te ahoaho ’e o te mamae tā tātou e nā roto i terā mahana ’e terā mahana o teie orara’a, te mau pō ta’oto ’ore e pau i te fa’a’oroma’i, ’aore rā te fē’a’arua ri’ari’a o te mahana ’āpī tāta’itahi. Pēnei a’e i terā parau fafau nō te fāna’ora’a i te hi’o i te tau i ma’iri ’e i te ’ite i tō tātou mamae i te tāhuti nei ma te tūramahia e te aumihi a te Atua ’e i te hi’ora’a mure ’ore, e rahi atu ā ïa tō tātou māramaramara’a i te tāhuti nei ’e tō tātou tīa’ira’a ’ia fa’a’oroma’i ma te fa’aro’o ’e te ti’aturi iāna ē tae noa atu i te hope’a. ’Oia ato’a, e mata tō tātou nō te ’ite ra, pinepine tātou i te ’ite i te maita’i i roto i te teinei ; ’aita i tītauhia ’ia tīa’i i te ananahi nō te ’ite i te maita’i.

14. Hi’o 2 Nephi 2:2.

15. Hi’o Mataio 7:9–10. Te vaiihora’a i te Atua ’ia upo’oti’a i roto i tō tātou orara’a, e ’ere ïa te tīa’i-noa-ra’a ’e te fa’ari’i-noa-ra’a i te mau mea ato’a e tupu. ’O te fa’aitoitora’a rā i te ti’aturi ē ’ua hina’aro tāmau noa te Metua i te ao ra ’e tō tātou Fa’aora Iesu Mesia i te mea maita’i a’e nō tātou. ’Ia tā’iri mai te ’ohipa ’oto rahi, e nehenehe tātou e ui ma te fa’aro’o, ’eiaha « Nō te aha pa’i i ni’a iā’u ? », e ui rā « E aha te ha’api’ira’a tā’u e nehenehe e ’apo mai ? » ’E e nehenehe tātou e ’oto ma te ’ā’au ’oto ’e te vārua haeha’a i te ’itera’a ē, i tōna taime mau ’e i tāna rāve’a mau, e tae mai te mau ha’amaita’ira’a ’e te mau fāna’ora’a fa’atuea.

16. ’Ua fafau tātou e ’oto ’e te feiā ’oto ra ’e e tāmāhanahana i tei au ’ia tāmāhanahanahia (hi’o Mosia 18:9).

17. Ioba 1:21.

18. Hi’o Te Ha’api’ira’a Tumu ’e te mau Fafaura’a 115:6.

19. Te fa’aro’o i roto i te fifi ; ’o te huritua ïa nō te ’ā’au fāfati i tōna vaira’a ’e te taiā tā te Buka a Moromona e vauvau nei nō rātou tei « fa’a’ino […] i te Atua, ma te hina’aro ’ia pohe », ’āre’a rā tei « ’aro atu […] ma te fa’a’ohipa i tā rātou ’o’e nō te pāruru i tō rātou ora » (Mormon 2:14).

20. « Be Still, My Soul », Hymns, N°124.

21. « Haere mai, e te feiā mo’a », Te mau hīmene, N°18. E nehenehe ato’a e feruri i teie :

    ’Auē te rahi o te pa’ari ’e te here […]

    O te mau ’ōpuara’a,

    I reira te parauti’a, te here ’e te tahiti’a e tū’ati ai

    Ma te au ’e ma te hanahana !

    (« How Great the Wisdom and the Love », Hymns, N°195.)

    I roto i te fē’a’arua o te orara’a, ’ua ’ite tātou ē e fa’atae mai te ’ōpuaraʼa rahi nō te tāra’ehara i te parauti’a, te here ’e te tahiti’a ’ei maita’i nō tātou.

22. Hi’o Obadia 1:21. ’Ua ha’api’i te peropheta Iosepha Semita : « E nāhea rātou [te feiā mo’a i te mau mahana hope’a nei] i te riro ’ei fa’aora i ni’a i te mou’a Ziona ? Nā roto […] i te patura’a i tā rātou mau hiero, te patura’a i tā rātou mau ’āua bāpetizora’a, ’e te haerera’a e fāri’i i te tā’āto’ara’a o te mau ’ōro’a […] nō tō rātou mau tupuna ato’a tei pohe » (Te Mau Ha’api’ira’a a te Mau Peresideni o te ’Ēkālesia : Iosepha Semita [2007], 537).

23. E nehenehe te mau melo e haere nei i te hiero nō te taime mātāmua e ho’o mai i te mau ’ahu nō te hiero ma te moni māmā a’e.

24. Russell M. Nelson, « Te hiero ’e tō ’outou niu pae vārua », Liahona, Novema 2021, 94.