Ha’apa’o noa e tae roa i te hope’a
Ma tōna rima, e nehenehe ’outou e fa’atopa i te mau Golia ato’a e fā mai i roto i tō ’outou orara’a.
E te mau hoa feiā ’āpī ē, i teie mahana tē hina’aro nei au e paraparau ’āfaro ti’a atu ia ’outou, te feiā ’āpī o te ’Ēkālēsia.
Hō’ē matahiti i teienei, te pi’ira’ahia tā tātou peresidenira’a rahi o te Feiā ’Āpī Tamāhine. E rave rahi ’ohipa tei tupu i roto i teie matahiti i ma’iri !
’Ua fārerei mātou e rave rahi o ’outou ’e ’ua ’imi ’āmui maita’i i te mau ha’api’ira’a a te Mesia. ’Ua hīmene tātou i te mau hīmene, ’ua fa’ahoa mai i te mau hoa ’āpī ’e ’ua tāvini ’e ’outou i roto i tā tātou mau ’āmuitahira’a. ’Ua ha’apūaihia mātou i te fa’aro’ora’a i tō ’outou mau ’itera’a pāpū i roto i te mau ’āmuira’a a te feiā ’āpī ’e te mau tupura’a ’ohipa nā te ao nei. ’E ’ua ha’amori ’āmui tātou i roto i te fare o te Fatu.
I te mau taime ato’a, e fa’a’ite atu mātou i te hō’ē parau poro’i nō ’ō mai i tō tātou Fatu ra ’o Iesu Mesia. I teie pō ’aita e ha’apurorohia, e parau poro’i tā’u nō ’outou, te feiā ’āpī o te ’Ēkālēsia a Iesu Mesia.
Te mau uira’a rarahi
’Ua uiui a’ena ānei ’outou ia ’outou iho, nāhea ’ia vai ha’apa’o noa i te Atua, ma te orara’a i roto i te hō’ē ao hara ? I hea ’outou e tāipu mai ai i te pūai nō te haere i mua ’e ’ia tāmau noa i te rave i te maita’i ? Nāhea ’ia ora i te ’oa’oa mau ?
Tē mana’o nei au e nehenehe te ’ohipa i tupu nō Davida ’e ’o Golia e tauturu.
Davida ’e ’o Golia
I roto i te Faufa’a Tahito, tē aro ra te nu’u Philiseti i te ’āti ’Īsera’ela, ’e i te po’ipo’i ato’a ’e i te pō ato’a, e tāmata te hō’ē ta’ara rarahi Philiseti ’o Golia te i’oa i te aro atu i te hō’ē ’āti ’Īsera’ela rau te huru.
I rotopū i te nūna’a ’Īsera’ela, tē ora ra ’o Davida, e taure’are’a ha’apa’o mamoe, mea na’ina’i roa ia Golia e fa’aro’o rarahi rā tōna nō Iesu Mesia ! ’Ua ani Davida e hina’aro ’oia e aro atu. ’Oia ato’a te ari’i ’ua tāmata i te tāparu iāna ’eiaha e haere e aro, ’ua mā’iti rā Davida e tu’u i tōna ti’aturira’a ia Iesu Mesia
Nā mua a’ena, ’ua aro atu Davida i te hō’ē liona ’e ’oia ato’a i te hō’ē pea Ma tōna iho ’itera’a, ’ua ’ite ’oia ē ’ua pāruruhia ’oia e te Atua ’e ’ua fa’aupo’oti’a iāna. Nō Davida, te tumu a te Atua ’o te tumu faufa’a rahi roa a’e ïa. Nō reira, ma te ’ī i te fa’aro’o i te hō’ē Atua ’o te ’ore roa e fa’aru’e iāna, ’ua ha’aputu ’oia e pae ’ōfa’i manino, ’ua rave mai i tāna ma’a [fronde] ’e ’ua haere atu e aro i te ta’ata rarahi.
Tē parau nei te mau pāpa’ira’a mo’a ē, te ’ōfa’i mātāmua tei tāorahia e Davida, ’ua tano i ni’a i te rae o Golia, tei fa’aoti i tōna orara’a.
Mā’imira’a i te pāhonora’a
Nō reira ’ua fa’a’ohipa Davida hō’ē noa ’ōfa’i nō te tāparahi pohe ia Golia, ’ua fa’aineine ho’i ’oia e pae. Terā e pae ! ’Ua ha’aferuri te reira iā’u, nāhea vau e nehenehe ai e fa’aineine iā’u nō te fa’aruru atu i te ao nei.
’Āhiri pai te mau ’ōfa’i tāta’itahi a Davida e mono i te hō’ē pūai ’o tā tātou e hina’aro nō te upo’oti’a i roto i tō tātou orara’a ? E aha ïa tā te reira mau ’ōfa’i e pae e mono ? ’Ua mana’o vau i teie mau rāve’a :
-
Te ’ōfa’i nō tō’u here i te Atua.
-
Te ’ōfa’i nō tō’u fa’aro’o i tō tātou Fa’aora, ia Iesu Mesia.
-
Te ’ōfa’i nō te ’itera’a i tō’u ihota’ata mau.
-
Tē ’ōfa’i nō tō’u tātarahapara’a i te mau mahana ato’a.
-
Te ’ōfa’i nō tō’u fa’ari’i i te mana o te Atua.
E paraparau ana’e, nāhea tātou i te ha’amaita’ihia e teie mau pūai.
A tahi, te ’ōfa’i nō tō’u here i te Atua. Te herera’a i te Atua ’o te fa’auera’a rahi mātāmua ïa. Tē ha’api’i nei te arata’i Nō te Pūai o te Feiā ’Āpī ia tātou : « ’Ua here te Atua ia ’oe. ’O ’oia tō ’oe Metua. E nehenehe tōna here fāito hope e fa’auru ia ’oe ’ia here iāna. ’Ia riro ana’e tō ’outou here nō te Metua i te ao ra ’ei fa’aurura’a faufa’a roa a’e i roto i tō ’outou orara’a, e rave rahi fa’aotira’a e riro mai ’ei mea ’ōhie ».
E hōro’a mai tō tātou here nō te Atua ’e tō tātou aura’a fātata ’e ’ōna ia tātou i te pūai ’o tā tātou e hina’aro nō te fa’ataui i tō tātou ’ā’au ’e nō te fa’a’oroma’i ’ōhie a’e i tō tātou mau tāmatara’a.
Te piti, te ’ōfa’i nō tō’u fa’aro’o i tō tātou Fa’aora, ia Iesu Mesia. I tō Iesu Mesia haerera’a mai i te fenua nei, ’ua mamae ’oia nō tā tātou mau hara ’e ’ua rave i ni’a iāna iho i tō tātou mau ’oto, mau māuiui, mau paruparu ’e mau ma’i pae tino ’e pae ferurira’a. Nō reira ’ua ’ite ’oia nāhea i te tauturu ia tātou. Te aura’a ’ia roa’a te fa’aro’o ia Iesu Mesia, ’ia ’ī ïa i te ti’aturira’a i tōna pa’ari, i tōna taime, i tōna here ’e i tōna mana nō te fa’a’orera’a i tā tātou mau hara. E upo’oti’a te ’ōfa’i o te fa’aro’o ia Iesu Mesia e rave rau « ta’ata rarahi » i roto i tō tātou orara’a. E nehenehe tātou e upo’oti’a i ni’a i teie a’o tāhuti, nō te mea ’ua ’upo’oti’a mātāmua ’oia i ni’a i te reira.
Te nūmera toru, te ’ōfa’i nō te ’itera’a i tō’u ihota’ata mau. ’Ua ha’api’i mai tō tātou peropheta here, te peresideni Russel M. Nelson ia tātou ē, tō tātou ihota’ata faufa’a roa a’e ’oia ho’i ’ei mau tamari’i na te Atua, mau tamari’i nō te fafaura’a ’e e mau pipi na Iesu Mesia.
E taui te mau mea ato’a ’ia ’ite ana’e au ’o vai mau vau. ’Ia pāpū ’ore ana’e au i tō’u mau ’aravihi, e fa’ahiti pinepine au i roto i tō’u ferurira’a ’aore rā ma te parau pūai, « e tamāhine au na te Atua, e tamāhine au nā te Atua », hau atu i te taime e hina’arohia e tae roa e ’ite fa’ahou mai au i te ti’aturira’a nō te tāmau ā.
Te maha, tē ’ōfa’i nō tō’u tātarahapara’a i te mau mahana ato’a. I roto i te arata’i Nō te Pūai o te Feiā ’Āpī, e tai’o tātou : « E ’ere te tātarahapara’a i te fa’autu’ara’a nō te hara ; ’o te rāve’a ho’i e fa’ati’amā ai te Fa’aora ia ’oe i te hara. E tātarahapa ra, e taui ïa—e fāriu ’ē i te hara ma te fāriu i ni’a i te Atua. Te aura’a o te reira e ha’amaita’i ia ’oe ’e e fa’ari’i i te fa’a’orera’a hara. E ’ere teie huru tauira’a i te tauira’a nō te hō’ē noa taime ; e ’ohipa tāmau rā ».
’Aita e mea hau atu i te fa’ati’amāra’a i te putapūra’a i te fa’a’orera’a hara a te Atua ’e te ’itera’a ē, mea mā tātou ’e ’ua fa’ahau tātou iāna. E noaʼa te fa’a’orera’a hara i te mau taʼata atoʼa.
Te pae, te ’ōfa’i nō tō’u fa’ari’i i te mana o te Atua. Te mau fafaura’a tā tātou e rave ’e te Atua, mai terā tā tātou i rave i te ’ōro’a nō te bāpetizora’a, e hōro’a ia tātou ’ia roa’a te mana o te paietira’a. Te mana o te Atua ’o te mana mau ïa ’o te tauturu ia tātou ’ia fa’aruru i te mau tāmatara’a, ’ia rave i te mau fa’aotira’a maita’i ’e ’ia fa’arahi i tō tātou ’aravihi nō te fa’a’oroma’i i te tupura’a fifi. E mana teie nā roto i te reira tātou e nehenehe ai e fa’ananea i te mau ’aravihi ta’a ’ē ’o tā tātou e hina’aro.
Tē fa’ata’a nei te arata’i Nō te Pūai o te Feiā ’Āpī : « E fa’atū’ati te mau fafaura’a ia ’oe i te Metua i te ao ra ’e i te Fa’aora. E ha’amara’a te reira i te mana o te Atua i roto i tō ’oe orara’a ».
E paraparau ana’e nō teie tū’atira’a. Tē ha’amana’o ra ’outou i te taime, ’a ha’api’i ai te Mesia i te ta’a-’ē-ra’a i roto hō’ē fare tei hāmanihia i ni’a i te papa ’e te tahi ra i ni’a i te one ? ’Ua fa’ata’a mai Elder Dieter F. Uchtdorf : « ’Aita te hō’ē fare e ora mai i te hō’ē vero nō te mea e mea pa’ari te fare. ’Aita ato’a te reira e ora mai nō te mea e mea pa’ari te papa. E ora mai te fare i te vero nō te mea e tā’amura’a pāpū tō te reira i ni’a i te papa pa’ari. Nā te pūai o te tū’atira’a i ni’a i te papa te mea faufa’a a’e ».
E hōro’a mai tō tātou tū’atira’a ta’ata hō’ē ’e Iesu Mesia ia tātou te itoito ’e te ti’aturira’a e hina’arohia nō te haere i mua i rotopū i te mau ta’ata o te ’ore e fa’atura nei i tō tātou mau ti’aturira’a ’aore rā o te ha’amata’u nei ia tātou. Tē ani manihini nei te Mesia ia tātou ’ia ha’apa’o tāmau noa i tō tātou mau ferurira’a ; ’ua parau ’oia ia tātou, « ’a hi’o mai iā’u nei i tō mana’o ato’a na ». Te mana’ora’a i te Fa’aora e hōro’a ia tātou i te māramarama o te ferurira’a nō te rave i te mau fa’aotira’a, te ravera’a ma te fea’a ’ore, ’e te paraura’a ’aita i te mau mea e fa’ahape i te mau ha’api’ira’a a te Atua. ’Ia fifi ana’e tō’u mahana ’e ’ia ’ite au ’aita tā’u e nehenehe fa’ahou, te mana’ora’a i te Mesia e hōpoi mai iā’u i te hau ’e e hōro’a mai iā’u te tīa’ira’a.
Nāhea tātou i te fa’atupu i teie mana o Iesu Mesia ? Te tāviri ’o te ha’apa’ora’a ïa i tā tātou mau fafaura’a ’e te fa’arahira’a i tō tātou fa’aro’o ia Iesu Mesia.
Te parau mau, ’ua hina’aro vau ’ia vai ia Davida ra hō’ē atu ’ōfa’i ; te ’ōfa’i ïa o tō’u ’itera’a pāpū. E patuhia tō tātou ’itera’a pāpū i ni’a i te mau ’ohipa i tupu i te pae vārua nō tātou iho, i roto i te reira tātou e ’ite ai i te fa’aurura’a hanahana i roto i tō tātou orara’a. ’Aita te hō’ē ta’ata e nehenehe e ’īriti ’ē ia tātou i teie ’itera’a. Te ’itera’a i te mea tā tātou i ’ite i muri a’e i te orara’a i tō tātou iho mau ’ohipa i tupu i te pae vārua, ’aita e ho’ohia. Te vai ha’apa’o-noa-ra’a i te reira ’itera’a e hōro’a mai ia tātou te ti’amāra’a. E hōro’a mai te reira ia tātou te ’oa’oa ! Mai te peu ’ua here tātou i te parau mau, e mā’imi ïa tātou i te reira, ’e i te taime e ’itehia mai te reira ia tātou, e pāruru tātou i te reira.
E anira’a manihini
Mai tā’u i mā’iti i te ’ōfa’i nūmera ono, tē ani nei au ia ’outou ’ia fārerei atu i tā ’outou piha, tā ’outou pupu ’aore rā tō ’outou ’utuāfare ’e ’ia feruri i te tahi atu mau pūai ’o tā ’outou e ti’a e fa’ari’i nō te vai ha’apa’o noa i te Atua ’e ’oia ato’a, ’ia upo’oti’a i ni’a i te ao nei.
E parau fafau
E te mau hoa here ē, tē hina’aro nei te Mesia e ’āpiti mai ia tātou i ni’a i te ’ē’a o tō tātou orara’a. Tē fafau atu nei au ia ’outou, ’a tāpe’a ai ’outou i ni’a i te ’āuri, e haere ’outou ma te tāpe’a i te rima ’e tō Iesu Mesia. E arata’i ’oia ia ’outou, ’e e ha’api’i ’oia ia ’outou. Ma tōna rima, e nehenehe ’outou e fa’atopa i te mau Golia ato’a e fā mai i roto i tō ’outou orara’a.
’Itera’a pāpū
Tē fa’a’ite pāpū nei au tē vai ra te ’oa’oa ’ia pure i te mau mahana ato’a, ’ia tai’o i te Buka a Moromona i te mau mahana ato’a, ’ia rave i te ’ōro’a mo’a i te mau sābati ato’a ’e ’ia haere i te seminaire—’oia ato’a i te po’ipo’i roa ! Tē vai ra te ’oa’oa i roto i te ravera’a i te maita’i.
Tē vai ra te ’oa’oa i roto i te vai ha’apa’o-noa-ra’a i te Atua o te ao nui, i te Fa’aora o te ao nei, i te Ari’i o te mau ari’i Tē vai ra te ’oa’oa ’ia riro ’ei pipi nā Iesu Mesia.
’O te Atua tō tātou Metua. ’Ua ’ite ’oia i te hina’aro o tō ’outou ’ā’au ’e tō ’outou mau rāve’a ’e tē ti’aturi nei ’oia ia ’outou.
E te feiā ’āpī ē, e tauturu mai Iesu Mesia ia ’outou ’ia vai ha’apa’o noa e tae roa i te hope’a. Nō teie mau parau mau, tē fa’a’ite pāpū nei au, i te i’oa Iesu Mesia, ’āmene.