Hop Bae I Win
Hop i wan presen we i laef i stap, wan presen we i gro taem yumi mekem fet blong yumi long Jisas Kraes i kam antap.
Ol dia brata mo sista blong mi raon long wol, taem yumi statem spesel taem ia blong jeneral konfrens, ae blong heven bae i lukluk nomo long yumi. Bae yumi harem voes blong Lod tru long ol wokman blong Hem; bae yumi filim, paoa blong Tabu Spirit i lidim, daerektem, mo kamfotem yumi” mo fet blong yumi bae i kam strong moa.
Tri yia i pas finis, Presiden Russell M. Nelson i statem jeneral konfrens wetem ol toktok ia: “Revelesen we i stret gud blong ansarem ol kwestin insaed long hat blong yu, bae i mekem konfrens ia bae i nambawan mo bae yu no save fogetem. Sapos yu no lukaotem yet givhan blong Tabu Spirit blong helpem yu blong harem wanem we Lod i wantem yu lisin long hem long tufala dei ia, mi invaetem yu blong mekem naoia. Plis, mekem konfrens ia i wan taem blong lafet long ol mesej we oli kam long Lod tru long ol wokman blong Hem.”
Ol skripja oli joenem tri toktok i kam strong tugeta: fet, hop, mo jareti. Hop i wan presen we i kam fri nomo long God.
Toktok ia hop oli yusum long plante samting we yumi wantem blong i hapen. Eksampol, “mi hop se bae i no ren,” o “mi hop se tim blong mifala bae i win.” Be wanem we mi wantem blong tokbaot hem i hop blong yumi we i tabu mo i no save finisa long Jisas Kraes mo gospel we i bin kambak bakegen, mo “[ol] tras we yumi gat long … ol blesing we oli promesem long olgeta we oli stret mo gud.”
Hop blong Yumi blong Laef We I No Save Finis
Hop blong yumi long laef we i no save finis i hapen tru gladhat blong Kraes mo ol joes blong yumiwan, we i givim long yumi ol blesing blong gobak long hom blong yumi long heven mo laef oltaem long pis mo hapines wetem Papa blong yumi long Heven, Pikinini blong Hem we i Lavem Tumas, ol fetful famli blong yumi mo ol naes fren blong yumi, mo ol gud mo stret man mo woman blong evri kantri mo evri senturi.
Long wol yumi eksperiensem glad mo sore taem yumi kasem tes blong pruvum yumi. Viktri blong yumi i kam tru fet long Jisas Kraes taem yumi winim ol sin blong yumi, ol hadtaem, ol temtesen, fasin we i no stret, mo ol jalenj blong laef ia.
Taem yumi mekem fet blong yumi long Jisas Kraes i kam moa strong, yumi save lukluk long ol blesing mo promes blong taem we i no save finis. Olsem laet we i stap gro, hop i givim laet long wok we i tudak, mo i luk i go long fiuja blong yumi we i gat glori.
Hop we I Kam long God
Stat long stat, Papa blong yumi long Heven mo Pikinini blong Hem we i lavem tumas, Tufala i wantem tumas blong blesem olgeta we oli stret mo gud wetem ol naesfala presen blong hop.
Afta we tufala i lego garen, wan enjel i bin tijim Adam mo Iv abaot promes blong Jisas Kraes. Presen blong hop i givim laet long laef blong tufala. Adam i talem, “[Ol] ae blong mi i bin open; mo long laef ia, bae mi gat glad.” Iv i bin tokbaot “glad long fasin blong pemaot man [blong tufala], mo laef we i no save finis we God i stap givim long evri man we i stap obei.”
Semmak olsem we Tabu Spirit i givim hop long Adam, paoa blong spirit blong Lod i givim laet long olgeta we oli fetful tedei, i mekem save blong laef we i no save finis i kam moa klia.
Sevya i sendem wan Kamfota long yumi, Tabu Spirit, wan kompanion we i givim fet, hop mo pis we “i no olsem pis we ol man blong wol oli save givim.”
“Long wol,” Sevya i talem, “bambae yufala i harem nogud tumas: be yufala i no fraet. [Kipim wan hop we i saen strong]; Mi mi winim paoa blong olgeta samting blong wol ia finis.”
Long taem blong hadtaem, yumi jusum blong trastem Lod tru long fet. Yumi prea kwaet nomo, “i no olsem we mi mi wantem, be olsem we yu nomo yu wantem.” Yumi filim apruvol blong Lod blong mekem wanem Hem i wantem, mo wet long promes pis we Lod bae i sendem long taem blong Hem.
Aposol Pol i bin tijim, “[God blong hop bae i fulumap yufala wetem] … glad mo pis …, [we bambae yufala i fulap wetem hop]” “[stap glad long hop; gat longfala tingting long hadtaem;]” “from we Tabu Spirit i stap givim paoa long yufala.”
Wan Lesen blong Hop
Profet Moronae i bin save tru eksperiens blong gat hop long Kraes long taem blong hadtaem. Hem i eksplenem taem blong harem nogud blong hem:
“Mi stap miwan Mi no gat … eni ples blong go.”
“Mi no soem miwan … from nogud bae oli kilimded mi.”
Long taem blong tudak ia taem Moronae i stap hemwan, hem i raetemdaon ol toktok blong papa blong hem abaot hop:
“Sapos wan man i gat fet i nid blong hem i mas gat hop; from sapos i no gat fet, i no save gat eni hop.”
“?Wanem ia nao bae yufala i gat hop from? … Yufala i gat hop tru long Atonmen blong Kraes mo paoa blong laef bakegen long ded, blong girap long laef we i no save finis.”
Ol brata mo sista blong mi, hop i wan presen we i laef i stap, wan presen we i gro taem yumi mekem fet blong yumi long Jisas Kraes i kam antap. “Fet i pruf blong ol samting we i gat hop from.” Yumi bildim ol pruf—blong fet blong yumi—tru long prea, ol tempol kavenan, kipim ol komanmen, gohed blong kaekae long ol skripja mo ol toktok blong ol profet blong tedei, tekem sakramen, givim seves long ol narawan mo wosip evri wik wetem Ol Sent.
Wan Haos blong Hop
Blong mekem hop blong yumi i kam moa strong long wan taem we fasin nogud i stap kam antap bigwan, Lod i daerektem profet blong Hem blong bildim ol tempol long plante ples long wol.
Taem yumi go insaed long haos blong Lod, yumi filim spirit blong God, i konfemem hop blong yumi.
Tempol i testifae abaot emti tumb mo we laef blong evri man i stap gohed afta long ded.
Blong olgeta we oli no gat wan kompanion blong taem we i no save finis, ol odinens oli konfemem se evriwan oli stret mo gud, bae oli kasem evri promes blesing.
I gat wan naesfala hop i stap taem wan yang kapol i nildaon krosem olta blong sil, i no blong taem ia nomo be blong taem we i no save finis.
I gat wan bigfala hop blong yumi long ol promes we oli mekem long famli laen blong yumi, nomata wanem situesen blong olgeta.
I no gat wan harem nogud, sik, fasin we i no stret, safaring, o samting we i save daonem hop blong yumi taem yumi bilif mo holemtaet ol kavenan blong yumi wetem God insaed long haos blong Lod. Hem i wan haos blong laet, wan haos blong hop.
Taem Hop I Nomo Gat
Yumi krae sore long taem yumi luk olgeta we oli harem nogud mo lusum hop from we oli no gat hop long Kraes.
I no longtaem mi stap luk wan kapol we long wan taem oli bin gat fet long Kraes be afta oli bin lego bilif blong olgeta. Oli bin gat sakses long laef blong wol ia, oli harem gud long waes tingting blong olgeta mo fet blong olgeta we oli sakemaot.
Evri samting i bin go gud kasem taem we hasban, we i yangfala mo gat paoa yet, i bin sik mo i ded. Olsem wan taem we mun i blokem laet blong san long dei (eklips), oli bin blokem laet blong Pikinini ia blong God, mo risal blong hem i olsem wan eklips blong hop. From we waef i no bilif, ol filing blong hem oli olbaot, i mekem hem i no rere gud mo i no save givim kamfot long ol pikinini blong hem. Save blong hemwan i talem long hem se laef blong hem i stap long stret oda kasem taem hem i sek se hem i nogat hop blong fiuja. From we hem i nogat hop, i mekem hem i stap long tudak mo i konfius.
Hop long Taem blong Ol Bigfala Harem Nogud
Bae mi komperem laef blong hem we i no gat hop wetem nara famli we oli gat hop long Kraes long wan taem blong bigfala harem nogud.
Twante wan yia i pas, nefiu blong mi, Ben Andersen, mo waef blong hem Robbie, tufala i gat wan bebi we i jes bon mo bebi i mas flae from wan emejensiaot long komuniti fam blong olgeta long Aedaho i go long Sol Lek Siti. Mi kasem hospital, mo Ben i eksplenem se hat blong bebi blong tufala i stap long nogud kondisen we i mekem laef blong hem i stap long denja. Mifala i putum ol han blong mifala long smol hed blong Trey. Lod i blesem hem blong i gohed blong laef.
Trey i bin gat operesen blong hat long fas wik blong laef blong hem, mo plante moa operesen i bin tekem ples afta. Ol yia oli pas, i kam moa klia se Trey i nidim wan niu hat. Nomata we bodi blong hem i no save mekem fulap samting, fet blong hem i kam moa bigwan. Hem i bin raetem, “mi neva filim sore long miwan from oltaem mi save hamas i impoten blong gat fet long Jisas Kraes mo wan testemoni abaot plan ia blong sevem man.”
Trey i gat wan toktok blong Presiden Nelson we oli save gud i stap long fon blong hem: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.”
Trey i bin raetem: “Mi stap luk fored oltaem blong givim seves olsem wan fultaem misinari, be … dokta blong mi i no letem blong mi go long wan misin kasem wan yia afta we mi kasem wan niu hat. … Mi bin putum fet blong mi long Jisas Kraes.”
Trey i bin glad bigwan se oli bin akseptem hem blong tekem akaonting long BYU, stat long semesta ia, be hem i glad moa kolosap long en blong Julae, taem hem i kasem fon kol we hem i stap wet from blong go long hospital blong hem i kasem wan niu hat.
“Wan yia,” Trey i talem, “mo bae mi go long misin blong mi.”
I bin gat bigfala hop taem Trey i go insaed long operesen rum. Nomata long hemia, long taem blong operesen i bin gat ol wok we i no gudgud tumas mekem se hem i neva kambak nomol bakegen.
Mama blong hem Robbi, i talem: “Fraedei i bin wan dei blong bigfala harem nogud … taem mifala i stap traem blong andastanem situesen. Mi bin wekap let from mi stap traem blong andastanem evri samting. … Be long Satedei, mi wekap wetem wan filing blong glad we i fulwan. I no pis nomo, i no filing blong no akseptem samting. Be mi filim mi glad from boe blong mi, mo mi glad blong stap olsem mama blong hem. … Ben i bin wekap fastaem long mi, mo taem mitufala i gat janis ia blong save toktok, Ben i bin wekap wetem semmak filing we mi gat.”
Ben i eksplenem: “I klia gud long sol blong mi, taem God i tijim mi tru long Tabu Spirit blong Hem. Mi wekap long 4 klok moning mo mi fulap wetem pis mo glad we toktok i no save eksplenem. ?Olsem wanem nao hemia i posibol? Ded blong Trey i soa bigwan, mo mi misim hem bigwan. Be Lod i kamfotem mifala. … Mi stap luk fored long taem ia we bae mifala i glad blong kam tugeta bakegen.”
Promes blong Hop
Trey i bin raetemdaon ol toktok blong jeneral konfrens blong Presiden Nelson long jenol blong hem: “I luk se i no posibol blong filim glad taem pikinini blong yu i kasem wan sik we i no gat meresin, o taem yu lusum wok, o taem hasban o waef i no fetful. Be yet, hem i stret glad ia nao we Sevya i stap givim. Glad blong Hem i stap oltaem, i stap givim hop long yumi se ‘safaring blong yumi i blong wan smol taem nomo’ [Doktrin mo Ol Kavenan 121:7] mo oli blong gud blong yumi.”
Ol brata mo sista, pis we yu stap lukaotem oli no save kam kwiktaem olsem we yu yu wantem, be mi promesem yu se taem yu trastem Lod, pis blong Hem bae i kam.
Bae yumi lukaotgud long gudfala fet blong yumi, wokbaot i go fored wetem wan stret mo klin hop. Mi testifae se hop blong yumi i Sevya Jisas Kraes. Tru long Hem, evri drim blong yumi we i stret mo gud bae i kam tru. Hem i God blong hop—we bae i win. Hem i laef mo i lavem yu. Long nem blong Jisas Kraes, amen.