Fidim Ol Rus, mo Ol Branj Bae Oli Gro
Ol branj blong testemoni blong yu bae i karem moa paoa taem yu mekem fet blong yu long Papa long Heven mo Pikinini blong Hem we Hem i lavem, i kam moa dip.
Wan olfala japel long Zwickau.
Yia 2024 i makem wan impoten yia blong mi. Hem i makem 75 yia stat long taem we mi baptaes mo oli konfemem mi olsem wan memba blong Jos Ia blong Jisas Kraes blong Ol Lata-dei Sent long Zwickau, Germany.
Membasip blong mi long Jos Ia blong Jisas Kraes i gat i spesel tumas long mi. Blong oli kaontem mi insaed long ol kavenan pipol blong God, wetem yufala ol brata mo sista blong mi, i wan long ol ona we i moa bigwan long laef blong mi.
Taem mi tingbaot rod blong miwan olsem wan disaepol blong Kraes, plante taem mi stap tingting i gobak long wan olfala haos long Zwickau, we mi gat ol naesfala memori blong stap go long ol sakramen miting long Jos Ia blong Jisas Kraes, taem mi wan pikinini. Hem i long ples ia we sid blong testemoni blong mi, i kasem fas kaekae blong hem blong gro.
Japel ia i gat piano we i yusum ea blong plei long hem. Evri Sandei, bae oli asaenem wan yang man blong stap pamem ea i go insaed long piano blong mekem piano i wok. Samtaem mi mi gat spesel janis ia blong help long impoten wok ia.
Taem kongregesen i stap singsing ol naesfala hym blong yumi, mi stap pam wetem evri paoa blong mi blong mekem se piano bae i no sot long ea. Long ples we mi stap sidaon long hem blong pam, mo save lukluk gud ol naes kalakala windo, we wan i stap soem Sevya Jisas Kraes, mo wan narawan i soem Josef Smit long Tabu Bus.
Mi save tingbaot yet ol tabu filing ia we mi bin gat taem mi bin luk ol windo ia we glas i stap saenem, taem mi stap lisin long ol testemoni blong Ol Sent mo stap singsing long ol hym blong Saeon.
Long tabu ples ia, Spirit blong God i bin serem witnes long maen mo hat blong mi se i tru: Jisas Kraes i Sevya blong wol. Hemia i Jos blong Hem. Profet Josef Smit i bin luk God Papa mo Jisas Kraes, mo hem i bin harem voes blong Tufala.
Eli long yia ia, taem mi stap long wan asaenmen long Europe, mi bin gat janis ia blong gobak long Zwickau. Sore we olfala japel ia we mi lavem, i nomo stap. Oli bin brekem daon plante yia i pas blong mekem spes blong wan bigfala apatmen bilding.
?Wanem I blong Taem We I No Save Finis, mo Wanem I No blong Taem We I No Save Finis?
I tru mi harem nogud blong save se bilding we mi lavem taem mi pikinini, naoia i wan memori nomo. Hem i bin wan tabu bilding long mi. Be hem i wan bilding nomo.
Long narasaed, witnes we mi kasem long saed blong spirit tru long Tabu Spirit long plante yia ia we i bin pas, i no go lus o pas nomo. I tru, hem i bin kam moa strong. Ol samting we mi lanem taem mi yangfala abaot ol stamba prinsipol blong gospel blong Jisas Kraes, oli bin stap olsem strong fandesen blong mi truaot long laef blong mi. Kavenan we mi bin mekem wetem Papa blong mi long Heven mo Pikinini blong Hem, i bin stap wetem mi—i go long taem moa bitim taem we oli brekem daon japel long Zwickau mo ol kalakala glas ia oli lus.
Jisas i talem “Bambae skae mo graon, tufala i lus, be tok blong mi bambae i no save lus samtaem.”
“Taem ol bigfala hil bae oli aot mo taem bae oli tekemaot ol smol hil, be fasin blong mi blong stap kaen bae i no aot long yu, mo tu, bae mi no tekemaot kavenan blong pis blong mi, Lod i talem.”
Wan long ol samting we oli moa impoten we yumi save lanem long laef ia, hem i wanem i defren bitwin samting we i blong taem we i no save finis, mo samting we i no blong taem we i no save finis. Taem yumi andastanem hemia, evri samting i jenis—ol rilesensip blong yumi, ol joes we yumi mekem, wei we yumi stap tritim ol pipol.
Blong save wanem i blong taem we i no save finis, mo wanem we i no blong taem we i no save finis, hem i impoten blong mekem wan testemoni i gro long Jisas Kraes mo Jos blong Hem.
No Miksim Ol Rus mo Ol Branj
Olsem we Profet Josef Smit i bin tijim se gospel blong Jisas Kraes we i kambak, “i blong evriwan, mo evri samting blong trutok.” Be hemia i no minim se evri trutok i impoten semmak. Sam trutok oli impoten mo, yumi nidim long ol rus blong fet blong yumi. Ol narawan oli hang o oli stap olsem ol branj—oli impoten nomo taem oli joen wetem ol stamba trutok.
Profet Josef Smit i talem tu se, “Ol stamba prinsipol blong relijin blong yumi oli ol testemoni blong ol Aposol mo ol Profet, long saed blong Jisas Kraes, se Hem i bin ded, oli bin berem Hem, mo Hem i bin girap long nambatri dei, mo i bin go long heven; mo evri narafala samting abaot relijin blong yumi, oli go wetem hemia.”
Long ol nara toktok, Jisas Kraes mo sakrifaes blong Atonmen blong Hem oli rus blong testemoni blong yumi. Evri nara samting oli ol branj.
Hemia i no blong talem se ol branj oli no impoten. Wan tri i nidim ol branj. Be olsem we Sevya i bin talem long ol disaepol blong Hem, “han blong rop i no save karem frut sipos i no joen gud long stamba blong hem.” Taem yumi no joen i go long Sevya, we i olsem kaekae blong ol rus, bae branj i slak mo ded.
Mi stap tingting sapos samtaem yumi stap miksim ol rus mo ol branj, taem hem i taem blong stap fidim testemoni blong yumi abaot Jisas Kraes. Hemia i mistek we Jisas i bin luk long Ol Farisi long taem blong Hem. Oli lukluk tumas long smosmol samting blong loa mekem se long en, oli no luksave wanem we Sevya i singaotem “ol nambawan tok blong Loa”—ol stamba prinsipol olsem “[jastis, sore mo fet].”
Sapos yu wantem fidim wan tri, yu no wasem ol branj. Yu wasem ol rus. Semmak nomo sapos yu wantem ol branj blong testemoni blong yu blong gro mo sakem frut, yu wasem ol rus. Sapos yu no sua abaot wan doktrin o praktis o pat blong Jos histri, lukaotem blong andastanem gud samting wetem fet long Jisas Kraes. Lukaotem blong andastanem sakrifaes blong Hem, lav blong Hem, mo tingting blong Hem from yu. Folem Hem wetem tingting we i stap daon. Ol branj blong testemoni blong yu bae i karem moa paoa taem yu mekem fet blong yu long Papa long Heven mo Pikinini blong Hem we Hem i lavem, i kam moa dip.
Eksampol, sapos yu wantem wan testemoni long Buk blong Momon we i moa strong, lukluk moa long witnes blong hem we i Jisas Kraes. Luksave olsem wanem Buk blong Momon i testifae abaot Hem, wanem i tijim abaot Hem, mo olsem wanem hem i invaetem mo givim inspiresen long yu blong kam long Hem.
Sapos yu stap lukaotem wan eksperiens we i gat moa mining long ol miting blong Jos, o insaed long tempol, traem blong lukaotem Sevya long ol tabu odinens we yumi stap kasem longwe, Faenem Lod insaed long tabu haos blong Hem.
Sapos yu filim se yu filim i tumas mo yu taet from Jos koling blong yu, traem blong lukluk moa long seves blong yu i go long Jisas Kraes. Soem lav blong yu from Hem long ol aksen ia.
Fidim ol rus, mo bae ol branj oli gro. Mo long stret taem, bae hem i sakem frut.
Laef blong Yufala I Mas Stanap long Hem Olsem We Rus blong Tri I Holem Graon
Strong fet long Jisas Kraes i no hapen kwik. No, long wol ia, hem i ol ropnil mo rabis gras blong tu tingting we oli stap gro olbaot. Tri blong fet we i helti mo i sakem plante frut, i nidim traehad we oli wiling blong givim. Mo wan impoten pat blong traehad ia i blong stap mekem sua se ol rus blong yumi oli stanap strong long Kraes.
Eksampol:Maet long fas taem, yumi kam kolosap long gospel blong Sevya mo Jos from yumi laekem ol kaen memba o wan gudfala bisop, o bilding blong japel we i luk naes mo klin. Ol samting ia oli impoten blong mekem Jos i gro.
Be, sapos ol rus blong testemoni blong yumi oli neva gro moa dip bitim hemia, ?wanem bae hapen taem yumi muv i go long wan wod we bilding blong olgeta i no naes tumas, wetem ol memba we oli no kaen tumas, mo bisop i talem wan samting we i mekem yumi harem nogud?
Wan nara eksampol: ?I no stret blong hop se sapos yumi obei ol komanmen mo sil long tempol, bae yumi gat blesing blong wan bigfala hapi famli, wetem ol pikinini we oli obei mo oli smat, mo evriwan oli stap aktiv long Jos, oli givim seves long ol misin, singsing long kwaea, mo volontia blong help blong klinim mitinghaos evri Satedei moning?
Mi hop se bae yumi evriwan bae i luk samting ia long laef blong yumi. ?Be sapos i no hapen olsem? ?Bae yumi fasemtaet yumi long Sevya nomata long ol situesen—blong stap trastem Hem mo taem blong Hem?
Yumi mas askem yumiwan: ?Testemoni blong mi i stanap long wanem mi hop blong i hapen long laef blong mi? ?Hem i dipen long ol aksen mo fasin blong narawan? ?O hem i stanap strong long Jisas Kraes “olsem we rus blong tri i holem graon,” nomata long ol situesen blong laef we i stap jenis?
Ol Kastom, Ol Fasin, mo Fet
Buk blong Momon i tokbaot wan pipol we “oli strong blong folem stret ol odinens blong God.” Be afta wan man blong kwestinim samting we nem blong hem Koriho i kam mo i jikim gospel blong Sevya. mo i singaotem se i “krangke” mo oli “ol krangke kastom blong ol papa blong olgeta.” Koriho i lidim “hat blong plante oli go longwe, i mekem olgeta oli leftemap hed blong olgeta long ol fasin nogud blong olgeta.” Be i gat ol narawan we hem i no save giaman long olgeta, from long olgeta, gospel blong Jisas Kraes i moa bitim wan kastom.
Fet i strong taem hem i gat ol strong rus long eksperiens blong wanwan man, komitmen blong wanwan i go long Jisas Kraes, mo i no dipen long ol kastom blong yumi o wanem ol narawan oli talem o mekem.
Bae oli testem mo traem testemoni blong yumi. Fet i no fet sapos oli neva testem. Fet i no strong sapos oli neva stap agensem. So no lusum hop sapos yu gat ol tes blong fet o ol kwestin we i no gat ansa long hem.
Yumi no mas tingting blong andastanem evri samting bifo yumi tekem aksen. Hemia i no fet. Olsem we Alma i tijim, “fet i no blong gat wan stret save long ol samting.” Sapos yumi wet blong kasem ol ansa long evri kwestin blong yumi bifo yumi tekem aksen, yumi stap stopem bigwan hamas gudfala samting yumi save mekem i hapen, mo yumi putum limit long paoa blong fet blong yumi.
Fet i naes from hem i gro iven taem ol blesing oli no kam olsem we yumi hop from. Yumi no save luk fiuja, yumi no save evri ansa, be yumi save trastem Jisas Kraes taem yumi stap go fored mo antap, from Hem i Sevya mo Ridima blong yumi.
Fet i stanap strong long ol hadtaem mo ol situesen blong laef we i no sua, from se rus blong hem i stanap strong long Kraes mo doktrin blong Hem. Jisas Kraes mo Papa blong yumi long Heven we i sendem Hem, tugeta Tufala i mekem se yumi save trastem Tufala fulwan mo bae Tufala i no save lidim yumi rong.
Wan testemoni i no wan samting we yu bildim wan taem mo bae i stanap blong oltaem. Hem i olsem wan tri we yu mas fidim oltaem. Blong planem tok blong God long hat blong yu i fas step nomo. Taem testemoni blong yu i stat blong gro, !naoia nao wok i stat! Long taem ia nao “bae [yu] givim gudfala kaekae mo lukaot gud long hem, blong mekem se i save gat rus, blong mekem se i save gro i kam antap, mo givim frut.” I tekem fasin blong “wok strong wetem strong tingting” mo “fasin blong save wet longtaem wetem trutok.” Be ol promes blong Lod oli sua: “Bae yufala i save kasem ol pei blong fet blong yufala, mo hadwok blong yufala, mo fasin blong save wet longtaem blong yufala, mo gotru long hadtaem wetem longfala tingting, mo stap wet kasem taem we tri ia i givim frut long yufala.”
Ol dia brata mo sista, ol dia fren blong mi, i gat wan pat blong mi we i misim olfala japel long Zwickau mo ol kalakala glas blong hem. Be ova long ol 75 yia we i pas, Jisas Kraes i bin lidim mi long wan wokbaot long laef we i moa naes bitim we mi save pikjarem. Hem i bin kamfotem mi long ol hadtaem blong mi, helpem mi blong luksave ol samting mi no strong long hem, hilim ol so blong mi long saed blong spirit, mo fidim fet blong mi we i stap gro.
Hem i prea blong hat blong mi mo blesing se bae yumi oltaem fidim ol rus blong fet blong yumi long Sevya, long doktrin blong Hem, mo long Jos blong Hem. Abaot hemia, mi testifae long tabu nem blong Sevya blong yumi, Ridima blong yumi, Masta blong yumi—long nem blong Jisas Kraes, amen.