God I Lavem Evri Pikinini blong Hem
Oltaem Jisas Kraes i stap singaotem yumi, mo Hem i yusum yumi, ol nomol wokman blong Hem, blong help blong karembak ol pikinini blong Hem i kambak long Hem.
?Wanem nao Papa blong yumi long Heven i wantem yu blong mekem? ?Yu yu andastanem se taem yu stap long laef bifo wol ia, Papa long heven i stap rere long yu blong kam laef long wol ia? Presiden Russell M. Nelson i stap tijim ol yut se: “Papa blong yumi long Heven i holemtaet plante long ol haeman mo haewoman spirit blong Hem—maet… hemia i nambawan tim blong Hem—blong oli kam long las dispensesen ia.” From se oli holemtaet yumi blong ol las dei ia; hem i impoten blong yumi lanem blong stap olsem ol disaepol blong Jisas Kraes.
Lod Jisas Kraes Hem Gudfala man ya blong lukaot long sipsip [mo hem i save ol sipsip blong hem], mo ol sipsip oli save Gudfala man ya blong lukaotem sipsip from se “hem i stap singaotem ol sipsip blong hem wanwan long nem blong olgeta.” Oltaem Hem i stap singaotem yumi, mo Hem i yusum yumi, ol nomol wokman blong Hem, blong help blong karembak ol pikinini blong Hem i kambak long Hem.
Samtaem i pas, wan stek presiden mo mi i stap visitim ol memba blong Jos long wan lokol komuniti. Afta we mitufala i finis long ol visit blong mitufala, stek presiden i askem sapos i oraet bae mitufala i save go luk wan moa famli. Hem i kasem insperesen ia se bae mitufala i sud toktok wetem olgeta.
Mitufala noknok long doa mo wan sista i openem doa. Hem i lukluk mi, be hem i no save se mi huia, mekem se hem i no talem tumas samting. Afta mi poenem stek presiden, we i singaotem nem blong hem. Taem we hem i harem mo luk Presiden nomo, sista ia i glad. Tufala i stanap long doa mo haggem tufala mo krae tugeta. Hemia i mekem visit ia i go gud kasem en. Mitufala i no bin save se sista ia i jes kasem tritmen blong kansa blong hem yestedei. Hem i no gat inaf paoa blong lukaotem adalt boe blong hem. Mekem se mi mo stek presiden i jenisim boe blong hem, mo putum hem long wiljea blong hem. Mitufala i fidim hem long kakae we wan gudfala sista long wod i bin karem i kam, mo mitufala i bin helpem hem wetem ol narafala wok. Bifo mitufala i lego haos blong hem, mitufala i blesem hom blong hem.
Wanem we i stap long maen blong mi long visit ia i wan konfemesen se Jisas Kraes i lavem olgeta tumas. Hem i andastanem olgeta mo save wanwan harem nogud blong tufala long spesel situesen we tufala i stap long hem. Long taem blong ful visit ia evri samting i hapen kwaet nomo. Long taem ia mitufala i no prij bigwan o serem wan fevret skripja blong mitufala, be Lod i blesem mitufala fulap wetem Spirit blong Hem.
Wan long ol bigfala risen from wanem Papa blong yu long Heven i sendem yu long taem ia, i blong yu save luksave hamas paoa yu gat. Prijim Gospel blong Mi i tijim yumi se olsem ol disaepol blong Kraes, yumi sud stop blong komperem yumi long ol narafalawan. Ol paoa we yu gat long saed blong Spirit hem i spesel, hem i blong yuwan, mo yu bon wetem; mo Papa blong yu long Heven i wantem blong helpem yu developem ol paoa ia. Oltaem bae i gat wan man we yu save helpem blong i filim lav blong Papa blong yu long Heven. Paoa blong yu i tabu. Nomata we hem i impoten tumas blong rere long yuwan blong win long wol ia we i fulap long kompetisen, wan long ol impoten misin truaot long laef blong yu i blong kam wan disaepol blong Jisas Kraes mo blong folem ol toktok blong Spirit. Taem yu mekem olsem, God bae i blesem laef blong yu, bae Hem i blesem famli we yu gat naoia o fiuja famli blong yu, mo bae Hem i blesem ol laef blong ol pikinini blong Hem we bae yu mitim.
Yumi stap laef long wan wol we i gat fulap janis i stap. Nomata we yumi stap go tru fulap hadtaem, mi save se ol hadtaem ia oli stap blong helpem yumi blong helpem ol narafalawan blong filim lav blong Papa blong yumi long Heven. Presiden Nelson i tijim: “Long ol dei we i stap kam, bae yumi luk Sevya bae i soemaot bigfala paoa blong Hem we wol i neva luk.” Yumi gat janis ia blong lukaotem ol pipol we oli nidim help, nidim wan hag, filing blong kamfot, o blong yumi stap nomo wetem olgeta. Sapos yumi save mekem ol harem nogud blong olgeta i kam laet, iven blong wan sot taem, nao bae yumi save luk Sevya i soemaot bigfala paoa blong Hem long laef blong olgeta.
Olsem ol disaepol blong Jisas Kraes, Ol Lata-dei Sent oli save mekem wan gud samting i defren long wol. Yumi save givim glad we ol narawan oli save luk long yumi—wan glad we yumi serem tru long ol toktok blong lav, mo ol aksen blong stap kaen. Bae yumi stap ol gud neba, ol gudfala bos, ol gudfala man blong wok. Bae yumi traehad blong stap olsem ol gudfala Kristin man oltaem.
Lod i putumbak gospel blong Hem wetem evri odinens we yumi nidim mekem se ol pikinini blong Papa long Heven oli save gat evri promes ia we i fasem yumi i go long Hem. Taem yumi stap helpem ol sista mo brata blong yumi long ol evri dei jalenj blong olgeta, letem yumi tingbaot tu blong helpem olgeta blong mekem mo kipim ol tabu promes blong olgeta wetem Papa long Heven mekem se long en Hem bae i save promesem ol rij blesing long olgeta blong laef ia mo taem we i no save finis. Ol promes ia bae i save hapen nomo tru long Restoresen blong gospel blong Jisas Kraes mo ol ki blong prishud blong Hem.
Long ol narafala toktok, yumi save helpem ol narafalawan blong stap long rod ia blong kavenan. Sam long yumi bae i kamaot long rod wanwan taem, mekem se yumi mas tingbaot se wetem Papa blong yumi long Heven, oltaem yumi gat janis ia blong gobak long Hem. Iven sapos rod blong yumi i no stret evriwan, Sevya oltaem i rimaenem yumi se “evri taem we [yumi sakem sin] mo [lukaotem] blong kasem fogivnes, wetem tru tingting, [Hem i] fogivim [yumi].”
Wan long ol wok blong enemi tedei i blong mekem yumi tingting mo blong bilif se bae i nogat wan narafala wei blong yumi save jenis o se yumi nomo gat hop i stap. Ol kaen rabis tingting olsem ia nao i stap mekem plante long yumi i stop blong traem. Mo stret long taem ia taem lav blong yumi, ol toktok blong yumi blong leftemap tingting mo givim sapot, taem blong yumi, mo help blong yumi, i save givim hop long ol man blong traem bakegen.
Maet bae yu stap tingting “OK, ?be hu i givhan long mi?” Blong stap go mo blesem laef blong ol brata mo sista blong yumi, bae yumi karem ol testemoni we bae i fulumap laef blong yumi wetem fet long Lod Jisas Kraes. Ol testemoni ia bae oli leftemap tingting blong yumi blong traem bakegen. Tabu Spirit bae i wekemap yumi mo helpem yumi wetem ol testemoni we oli strong bakegen blong gohed wetem ol hadtaem blong yumiwan. Enitaem we yumi lukaotem blong blesem ol laef blong ol narawan, Lod bae i gat moa sore long yumi; Hem i mekem yumi kam moa strong mo i helpem yumi long ol laef blong yumi.
Plis tingbaot se Lod Jisas Kraes i Sevya blong yu mo i save gud yu. Hem i save wanem yu gat blong mekem gud koling blong fogetem yuwan mo helpem ol pikinini blong God. Hem i gat paoa blong blesem yu long evri samting, sapos yu bilif long Hem mo nogat tu tingting.
Ol dia brata mo sista blong mi, long dei ia we wan prishud lida i kasem insperesen blong visitim wan mama mo boe blong hem we i no stap long plan blong mitufala, mi talemaot se God i save se oli nidim mitufala. Mo long en, mi nao oli givhan long mi. Long dei ia, mi bin lanem wan bigfala lesen abaot lav blong Sevya long yumi.
Mi testifae se Jisas Kraes i Sevya blong wol, se Hem i stap laef, Hem i bin laef mo i ded from yu mo mi, mo Hem i bin girap bakegen long ded from yu mo mi mekem se yumi save gat hop blong kam tugeta bakegen long selestial glori we i fulap long glad wetem olgeta we oli stap narasaed long vel. Mi save se Hem i save gud yu mo mi. Hem i save gud wanwan hadtaem blong yumi, mo Hem i gat paoa blong helpem yumi long ol taem we yumi filim se yumi no sef. Mi save se Lod Jisas Kraes mo Papa long Heven i kamaot long profet Josef Smit blong putumbak gospel long ol dei ia. Mi save se dia profet blong yumi, Presiden Russell M. Nelson, i wan profet blong Lod, mo mi testifae abaot ol samting ia long nem blong Jisas Kraes, amen.