Trastem Papa Blong Yumi
God i trastem yumi blong mekem plante impoten desisen mo long evri samting, Hem i askem yumi blong trastem Hem.
Long 1 Jun 1843, Addison Pratt i lego Nauvu, Ilinoa, blong go prijim gospel long Aelan blong Hawae, mo livim biaen, waef blong hem Louisa Barnes Pratt blong i tekem kea long yang famli blong tufala.
Taem fasin blong agens long Nauvu i kam antap, i fosem Ol Sent blong muvaot, mo afta long Winta Kwota, taem oli stap rere blong muv i go long Sol Lek Vale, Louisa i fesem desisen ia blong muv o no muv wetem grup. Bae i moa isi blong stap mo wet long Addison blong kambak bitim blong wokbaot olgetawan.
Long tugeta taem ia, hem i askem profet Bringham Yang blong givim advaes. Profet i leftemap tingting blong hem blong go. Nomata long bigfala hadtaem mo we i no tingting blong hem blong go, hem i bin gat sakses evri taem long wokbaot ia.
Long stat, Louisa i no glad tumas blong stap travel. Be, smoltaem afta hem i stat glad blong luk graon we i fulap long grin gras, ol wael kala flaoa, mo ol pis blong graon long saed blong ol reva. “Ol harem nogud i nomo gat,” hem i talem, “mo i no bin gat wan moa hapi woman long ful grup ia.”
Stori blong Louisa i tajem mo givim insperesen long mi bigwan. Mi laekem tingting ia blong hem blong putumaot ol samting we hemwan i wantem, paoa blong hem blong trastem God mo olsem wanem hem i yusum fet blong hem, i helpem hem blong luk situesen long defren wei.
Hem i rimaenem mi se yumi gat wan Papa long Heven we i gat lav, we i kea long yumi long wea ples yumi stap mo se yumi save trastem Hem moa bitim eniwan o eni nara samting.
Stamba blong Trutok
God i trastem yumi blong mekem plante impoten desisen mo long evri samting, Hem i askem yumi blong trastem Hem. Hemia i had speseli taem jajmen blong yumi, o tingting blong pablik, i defren long tingting blong Hem we i blong ol pikinini blong Hem.
Sam oli talem se yumi nid blong jenisim bakegen wanem we i stret mo wanem we i rong from oli talem se trutok i dipen, wanwan i save talem trutok blong hemwan, o God i gud tumas mekem se Hem i no strik tumas long wanem yumi stap mekem.
Taem yumi stap lukaotem blong andastanem mo akseptem tingting blong God, tingbaot se blong setem ol baondri bitwin raet mo rong i no stap long yumi blong talem. God i putum ol baondri ia Hemwan, folem ol trutok we i no save finis blong benefit mo blesing blong yumi.
Tingting blong wantem jenisim trutok blong God ia we i no save finis i gat wan longfala histri. I bin stat bifo wol ia i stat, taem Setan i go agensem plan blong God, hemwan i lukaotem blong spolem ejensi blong evri man long wol. Folem paten ia, ol pipol olsem Serem, Nehor, mo Koriho oli bin talem se fet hem i wan krangke samting, revelesen i no stret, mo se hem i stret blong yumi save mekem wanem yumi wantem. Sori tumas, plante taem, aksen ia blong go longwe long trutok blong God i bin lid i go long bigfala harem nogud.
Sam samting i dipen long situesen, be i no evri samting. Presiden Russell M. Nelson oltaem i tijim se ol trutok blong God blong sevem man oli fulwan, oli stanap olgetawan, mo God Hemwan i putum.
Joes blong Yumi
Huia yumi jusum blong trastem, hem i wan long ol impoten desisen long laef. King Benjamin i givim instraksen long ol pipol blong hem, “Biliv long God, biliv se hem i stap… ; biliv se hem i gat evri waes tingting … ; biliv se man i no save andastanem evri samting we Lod i save.”
I gud, yumi gat ol skripja mo gaed we i kam long ol profet we oli stap laef blong helpem yumi andastanem trutok blong God. Sapos yumi nidim moa eksplenesen long wanem we yumi gat, God i givim tru long ol profet blong Hem. Mo Hem bae i ansarem ol tru prea blong yumi tru long Tabu Spirit taem yumi lukaotem blong andastanem ol trutok we yumi no akseptem fulwan yet.
Elda Neil L. Andersen i bin tijim wantaem se bae yumi no sek se “samtaem, ol tingting blong [yumi] i no oltaem agri, long fas ples, wetem ol tijing blong profet blong Lod. Ol taem ia, oli ol taem blong lanem samting,” hem i talem, “blong putum tingting i stap daon, taem yumi go daon long ol ni blong yumi blong prea. Yumi wokbaot fored wetem fet, yumi trastem God, yumi save se long stret taem bae yumi kasem samting i klia moa long saed blong spirit we i kam long Papa blong yumi long Heven.”
I helpem yumi evri taem blong tingbaot tijing blong Alma se God i givim toktok blong Hem folem strong tingting mo taem we yumi givim long hem. Sapos yumi lisin long toktok blong God, bae yumi kasem moa; sapos yumi no lisin long kaonsel blong Hem, bae yumi kasem smolsmol nomo go go kasem we yumi nomo gat. Save ia we i lus i no minim se trutok ia i rong; be, i soem se yumi nomo gat inaf paoa blong andastanem.
Lukluk long Sevya.
Long Kapaneam,Sevya i tij abaot aedentiti mo misin blong Hem. Plante oli faenem toktok blong Hem se i had blong harem save, mekem se oli tanem baksaed long Hem mo oli no moa “[wokbaot] biaen long hem bakegen.”
?From wanem nao oli wokbaot i gowe?
From oli no bin laekem wanem Hem i talem. Oli trastem jajmen blong olgetawan, oli wokbaot i gowe, sakemaot ol blesing blong olgetawan we sapos oli stap bae oli save kasem.
Hem i isi blong hae tingting blong yumi i kam bitwin yumi mo trutok we i no save finis. Taem yumi no andastanem, yumi save stop smol, stretem tingting blong yumi fastaem, mo afta jusum olsem wanem blong ansa. Sevya i askem yumi blong “lukluk long [Hem] long evri tingting blong [yumi]; no gat tu tingting, no fraet.” Taem yumi lukluk nomo long Sevya, fet blong yumi i save stat blong winim ol wari blong yumi.
Olsem Presiden Dieter F. Uchtdorf i leftemap tingting blong yumi blong mekem: “Mi plis long yufala, faswan, gat tu tingting long ol tu tingting blong yufalawan, bifo yufala i gat tu tingting long fet blong yufala. Yumi neva mas letem fasin blong gat tu tingting i holemtaet yumi olsem prisena blong no kasem lav we i kam long heven, pis, mo ol presen we oli kam tru long fet long Lod Jisas Kraes.”
Ol Blesing Oli Kam long Olgeta We Oli Stap
Taem ol disaepol oli wokbaot aot long Sevya long dei ia, nao Hem i askem Ol Twelef, “?Yufala tu i wantem gowe long mi?”
Pita i ansa:
“Masta. ?Bambae mifala i save go long hu? Yu nomo yu gat ol tok blong laef ia we i no save finis.
“Mo mifala i bilif finis long yu. Mifala i save finis we yu yu Tabu Man blong God.”
Nao, ol Aposol oli bin laef long semmak wol mo fesem semmak hadtaem insaed long sosaeti olsem ol disaepol we oli bin wokbaot i gowe. Be, long taem ia, oli jusum fet blong olgeta mo trastem God, mekem se God i givim ol blesing we Hem i kipim, long olgeta we oli stap.
From samting ia yu mo mi, samtaem yumitu faenem yumituwan long tugeta saed blong desisen ia. Taem yumi faenem i had blong andastanem o akseptem tingting blong God, i gat kamfot blong tingbaot se Hem i lavem yumi olsem huia yumi, long wea ples yumi stap. Mo Hem i gat wan samting we i moa gud blong yumi. Sapos yumi askem help long Hem, bae Hem i helpem yumi.
Sapos i had blong askem help long Hem, semmak olsem we Sevya i talem long papa we i askem hiling from pikinini boe blong hem “man we i bilif, hem i save kasem evri samting.” Long taem blong yumi blong traehad, yumi save singaot strong tu, “Plis givhan long bilif blong [mifala].”
Stap Biaen long Tingting blong Hem
Wan taem Elda Neal A. Maxwell i tijim “Taem wan i givim tingting blong hem long God, hemia i mas wan samting ia nomo we hem i gat blong putum long olta blong God.” Hemia nao from wanem King Benjamin i bin wantem tumas se ol pipol blong hem oli kam, “olsem wan pikinini, i stap lisin, no stap flas, putum tingting i stap daon, i save wet longtaem, i gat plante lav, glad blong stap biaen long evri samting we Lod i tingting blong putum long hem, olsem wan pikinini i stap biaen long papa blong hem.”
Olsem oltaem, Sevya i soem stret eksampol long yumi. Wetem wan hat we i hevi, mo blong save wok we i soa we Hem i mas mekem, Hem i folem tingting blong Papa blong Hem, blong fulfilim misin blong Hem olsem Mesaea mo openem promes blong taem we i no save finis long yu mo mi.
Blong stap wan disaepol, i wan joes blong folem tingting blong God taem yumi putum fet blong yumi long aksen . Blong mekem joes ia, yumi faenemaot se wanem yumi jusum bae i no go lus; be, i kam gud moa wetem ol blesing we i kam long Tabu Spirit, we i givim stamba tingting, glad, pis mo hop we yumi no save faenem long narafala ples.
Sam manis i pas, mi mo wan stek presiden i visitim wan sista mo yang adalt pikinini boe blong hem long stek blong presiden ia. Afta sam yia we sista ia i nomo kam long Jos, from hem i bin go tru hadtaem mo folem rod we i no stret, naoia hem i kambak. Long taem blong visit blong mitufala, mitufala i askem hem, from wanem hem i bin kambak.
“Mi bin mekem tumas samting we i nogud” hem i talem, “mo mi save wea ples mi nid blong stap long hem.”
Mi askem hem, wanem nao hem i bin lanem long rod ia blong hem.
Wetem sam filing blong sore, hem i serem se hem i lanem se hem i nid blong go moa long jos blong lego ol fasin blong no stap go long jos, kasem taem hem i filim se hem i pat. Kambak blong hem i no bin isi, be taem hem i yusum fet long plan blong Papa, hem i filim Spirit i kambak.
Afta hem i ademap, “mi lanem miwan se God i gud mo se ol wei blong Hem oli moa gud bitim blong mi.”
Mi serem witnes abaot God, Papa blong yumi we I No Save Finis, we i lavem yumi; long Pikinini blong Hem Jisas Kraes we i sevem yumi. Tufala i save ol harem nogud mo jalenj blong yumi. Bae Tufala i neva fogetem yumi mo save stret olsem wanem blong helpem yumi. Yumi save stap glad taem yumi trastem Tufala moa bitim eniwan o eni narafala samting. Long tabu nem blong Jisas Kraes, amen.