Erikan eke Idorenyin
Idorenyin edi odu-uwem enɔ, enɔ emi ɔkɔride nte nnyin inamde mbuɔtidem nnyin okpon ke Jesus Christ.
Ndima nditɔ eka mi iren ye iban ke ofuri ererimbot, nte nnyin itɔŋɔde asaŋa asaŋa ini akwa mbono emi, enyin heaven eyenehede owuk ese nnyin. Nnyin iyekop “uyo Ɔbɔŋ“ otode ke mme isuŋ utom Esie; nnyin iyekop “ndausuŋ, ndiwut usuŋ, ye ndɔŋ esit” uteŋe eke Edisana Spirit, ndien mbuɔtidem nnyin eyesɔŋɔ.
Ke isua ita ekebede, President Russell M. Nelson ɔkɔtɔŋɔ akwa mbono ye mme ikɔ emi: “Ata eriyarare kabaŋa mme mbume ke esit mbufo eyenam mbono emi enyene iwuk ye emi mudufreke. Adieke muyomke kaŋa utom unwam eke Edisana Spirit ke ndinwam mbufo ekop se Ɔbɔŋ oyomde mbufo ekop ke mme usen iba emi, ami mekot mbufo nte anam idahaemi. Mbɔk enam akwa mbono emi ini eke ndiduŋɔre ke mme etop otode mme isuŋ-utom Esie.”
Mme ŋwed Abasi edian mme ikɔ ita emi ɔtɔ kiet: mbuɔtidem, idorenyin, ima. Enɔ eke idorenyin edi anana ekɔm urua enɔ otode Abasi.
Esin ikɔ emi idorenyin ke ediwak ŋkpɔ nnyin iyomde etibe. Nte uwut ŋkpɔ, “ami medot-enyin ke idi-dep-ke mfin,” mme “ami medot-enyin ke mbon nnyin eyekan.” Ekikere mi edi nditiŋ mbaŋa edisana ye nsi nsi idorenyin nnyin ɔkɔŋɔde ke Jesus Christ ye mfiak mendi ikɔ Abasi ye “uko idorenyin nnyin eke … enwɔŋɔ edidiɔŋ eke edinen ido.”
Idorenyin Nnyin kabaŋa Nsinsi Uwem
Idorenyin nnyin eke nsi nsi uwem edi akpan otode ke mfɔn eke Christ ye mme ndumek idem nnyin, ɔnɔde nnyin ɔwɔrɔ etop edidiɔŋ eke ndifiak nyɔŋ ufɔk eke heaven ye ke ndiduŋ ke nsi nsi ke emem ye inemesit ye Ete eke Heaven nnyin, Edima Eyen Esie, enyene mbuɔtidem ufɔk emana nnyin ye mme nti ufan, ye mme nti irenowo ye iban etode kpukpru idut ye mme emana.
Ke isɔŋ nnyin imikop idara ye mfuhɔ nte edomode nnyin enyuŋ enim ke akpan. Erikan nnyin edi oto mbuɔtidem ke Jesus Christ nte nnyin ikande mme idiɔk ŋkpɔ nnyin, ɔkpɔsɔŋ, idomo, utuk, ye mme idomo uwem isɔŋ emi.
Nte nnyin isɔŋɔde mbuɔtidem nnyin ke Jesus Christ, nnyin ikut ibe unyaŋa idem nnyin ika mme edidiɔŋ ye enwɔŋɔ eke nsi nsi. Nte ikaŋ emi unwana ayamade, idorenyin anam nkim nkim ererimbot ayama, ndien nnyin ikut ubɔŋ ini iso nnyin.
Idorenyin Oto Abasi
Tɔŋɔde ke eritɔŋɔ, Ete eke Heaven nnyin ye Edima Eyen Esie ɔkɔsuk ɔdiɔŋ ndinen owo ye eti enɔ eke idorenyin.
Ke amakekpɔŋ iŋwaŋ, angel ama ekpep Adam ye Eve abaŋa enwɔŋɔ eke Jesus Christ. Enɔ eke idorenyin ama anam uwem mmɔ ayama. Adam etiŋ, “Mme enyen mi etara, ndien ke uwem emi ami nyenyene idara.” Eve etiŋ abaŋa “idara erifak [mmɔ], ye nsinsi uwem emi Abasi ɔnɔde kpukpru mme okop item.”
Ukem nte Edisana Spirit akadade idorenyin ɔsɔk Adam, odudu Spirit Jehovah atat mme enyene mbuɔtidem enyin mfin, anamde ŋkpɔ nsinsi uwem ayama.
Andinyaŋa ama ɔnɔ Ndɔŋesit ɔsɔk nnyin, Edisana Spirit, owo nsaŋa adade mbuɔtidem, idorenyin, ye emem “idige nte ererimbot enɔde.”
“Ke ererimbot,” Andinyaŋa eketiŋ, “mbufo eyekut ukut ke ererimbot: edi edaresit; [enim ediyama idorenyin]; Ami makan ererimbot.”
Ke ɔkpɔsɔŋ ini, nnyin imek ndinim Jehovah ke mbuɔtidem. Nnyin suŋ suŋ ibɔŋ akam “Idige ke uduak mi edi okuo Ke enam.” Nnyin ikop unyime Jehovah kabaŋa nsuhɔre idem unyime nnyin, ndien nnyin ibet enwɔŋɔ emem emi Jehovah edinɔde ke ini Esie.
Apostle Paul Ekekpep, “Abasi idorenyin [eye] ɔyɔhɔ mbufo ye … idara ye emem … , man mbufo edu ye idorenyin,” “ndidara ye idorenyin, ime ke ndutuhɔre;” “otode ke odudu Edisana Spirit.“
Ukpep ŋkpɔ eke Idorenyin
Prophet Moroni ama ɔfiɔk akpa ubɔk abaŋa ndinyene idorenyin ke Christ ke ini ndutuhɔre. Enye anam anwaŋa ndaha mfina esie:
“Ami ndu ikpɔŋ. … Ami nyeneke … ebiet ndikade.”
“Ami namke efiɔk mi … mbak mmɔ edibiat mi.”
Ke eti ndaha, ke ekim ye ndobo ini, Moroni ewet mme ikɔ idorenyin ete esie:
“Edieke owo enyenede mbuɔtidem enye enyene ndinyene idorenyin; koro mbuɔtidem miduhe idorenyin ikemeke ndidu.”
“Ndien nso ke mbufo edinyene idorenyin ibaŋa? … Mbufo edinyene idorenyin ito erisio-isop Christ ye odudu eriset-ke-mkpa esie, ndinam eset eduk nsinsi uwem.”
Nditɔ eka irenowo ye iban, idorenyin edi odu-uwem enɔ, enɔ emi ɔkɔride nte nnyin inamde mbuɔtidem nnyin okpon ke Jesus Christ. “Mbuɔtidem edi ŋkpɔ ndikut eke ŋkpɔ edotde enyin ebaŋa.” Nnyin ibɔp ŋkpɔ emi—uwut ŋkpɔ eke mbuɔtidem nnyin—ito ke akam, ediomi temple, ndinim mme mbet, ndikaiso nse ikɔ Abasi ye mme ikɔ mme prophet emana emi, ndidia sacrament, ndinwam mbon efen, ye ndituak ibuot otokiet ye ndinen owo efen.
Ufɔk eke Idorenyin
Ke nditum idorenyin nnyin idem mbaŋa ini okponde ye ibak, Jehovah ɔnɔ prophet Esie uyo ndinam temple edu ke erembot nte ntɔi.
Nte nnyin idukde ke ufɔk Jehovah, nnyin ikop Spirit Abasi, esede idorenyin nnyin.
Temple edi ntiense abaŋa ukpɔk udi ye ke uwem ebede ikpehe akaka iso ɔnɔ kpukpru owo.
Kabaŋa mbon oro minyeneke nsisnsi adansaŋa, mme edinam esɔŋɔ ete ke kpukpru ndinen owo eyebɔ kpukpru enwɔŋɔ edidiɔŋ.
Odu idorenyin emi ɔwɔrɔde nte obufa ebe ye ŋwan etɔŋɔre edɔŋ ke altar ke edidian kiet, idige ke uwem kpɔt edi ke nsinsi.
Odu akamba idorenyin ɔnɔ nnyin ke mme edidiɔŋ emi enamde enɔ ubon nnyin, ke ndaha mmɔ ekededi.
Iduhe ubiak, udɔŋɔ iduhe, unana utebe ikpe iduhe, iduhe ŋkpɔ ekemede ndinam idorenyin nnyin ekim ke nte nnyin inimde inyuŋ imumde ediomi nnyin ye Abasi ɔfɔn ke ufɔk Jehovah. Enye edi ufɔk unwana ufɔk idorenyin.
Ke ini Ekpɔŋde Idorenyin.
Nnyin isiduɔk mmɔŋ eyet ke nte nnyin ikutde mfuhɔ ye ndik ke mbon oro mminyeneke idorenyin ke Christ.
Ke mimi emi ami mokut ke anyan usuŋ ebe ye ŋwan emi ema ekenyene mbuɔtidem ke Christ edi enyime ndiduɔk mbuɔtidem mmɔ. Mmɔ ema eda ɔfɔn ke ererimbot ndien mmɔ ema ekut inem ke ifiɔk ye ndisin mbuɔtidem mmɔ.
Kpukpru ŋkpɔ ama ɔfɔn mbemiso ebe, okosuk edide iwaad onyuŋ okop odudu, ɔsɔp ɔduɔ udɔŋɔ onyuŋ akpa. Nte ekim eke utin, mmɔ ema efuk unwana eke Eyen, ndien ibɔrɔ ekedi ekim eke idorenyin. Ŋwan, ke unana edinim, idahaemi inyeneke item, ke ubiak unana mbeŋeidem, ikemeke ndidɔŋ nditɔ esit. Ifiɔk ibuot esie ama ɔdɔhɔ enye ete ke uwem esie odu ke eti ndaha tutu ke edikep enyin enye ikemeke ndikut mkpɔŋ aba. Ndik esie ada ekim ye ndutimere edi.
Idorenyin ke Ini Nduɔ-esit
Yak ami nda ubiak ndik esie ndomo ye idorenyin ke Christ eke ufɔkemana efen ke ini iduɔesit.
Ke isua Edip ye kiet emi ekebede obufa nsek eyen eyen-eyen eka mi eren Ben Andersen ye ŋwan esie, Robbie, ekemen ke ubom ofim eto ke obio inwaŋ Idaho mmɔ eka ke Obio Salt Lake. Ami makesim ke ufɔkibɔk, ndien Ben etiŋ abaŋa akamba, mfina nsɔŋ-idem ke esit eyen mmɔ. Nnyin idori mme ubɔk nnyin ke ekpri ibuot Trey. Jehovah ama ɔdiɔŋ enye ye nkaiso uwem.
Trey ama enyene usiak esit ke akpa urua uwem esie, ndien ediwak edisiak ama ada itie. Nte mme isua ebede, ekedi akpan ke Trey eyeyom ukpuhɔre esit. Okposuk-edi nte ekesuhɔde mme ednam esie, mbuɔtidem esie ama okpon. Enye ewet, “Ami nkopke mfina mbaŋa idem mi koro ke ami kpukpru ini mɔfiɔk ufɔn ke ndinyene mbuɔtidem ke Jesus Christ ye ikɔ ntiense eke uduak erinyaŋa ukpɔŋ.”
Trey ama ɔsuhɔ ikɔ ibuot ibuot emi enehede efiɔk otode President Nelson ke phone esie: “Inemesit emi nnyin inyenede enyene ekpri ndinam ye ndaha uwem nnyin ndien enyene kpukpru ŋkpo ndinam ye se iwukde enyin ise ke uwem nnyin.”
Trey ewet: “Ami ke ofuri idaha nkere mbaŋa ndinam utom ke mission, edi … mme mbia ibɔk mi idiyake mi nka mission tutu isua kiet ke mma nkekpuhɔre esit. … Ami mesin mbuɔtidem mi ke Jesus Christ.
Trey ama okop inemesit ke edinyime enye nsin ke ukpep ndinam ibat ke BYU ɔtɔŋɔre ke semester emi, kpa nte ekenehere okop inemesit ke July ke ini enye ɔkɔbɔde ikoot eke fone ke ndika ufɔk-ibɔk ndikpuhɔre esit esie.
“Isua kiet,” Trey ɔdɔhɔ ete, “ndien ami nyedu ke mission mi.”
Akamba idorenyin ama odu nte enye okodukde ke ubet usiak-idem. Nte ededi, ke ini usiak-idem ediwak mfina ama odu, ndien Trey ikifiake ifiɔk idem aba.
Eka esie, Robbie, ɔdɔhɔ ete: “Friday ekedi mkpon-nkan usen iduɔesit … ke ndidomo ndimen ekikere nnyin nsin ke enye. … Nkidehe idap ke ntak ndomode ndikere kpukpru ŋkpɔ. Edi ke saturday, mma ndemere ye ekikere ata idara. Ikidige emem kpɔt; ikinyuŋ idige ndikaŋ. Ami mma ŋkop idara mbaŋa eyen eren mi, ndien nkop idara nte eka esie. … Ben ama ɔsɔp ademede akan mi, ndien ke ini nnyin ikinyenede ini nditiŋ ikɔ, Ben amademede ye ukem ekikere.”
Ben etiŋ: Mbufiɔk edi ɔnɔ ukpɔŋ mi nte Abasi ekpepde mi otode ke Edisana Spirit. Nkedemere ke nkanika inaŋ usenubɔk ndien nkeyɔhɔ ye emem ye idara emi owo mikemeke nditiŋ mbaŋa. Didie ke emi ekedi memem? … Trey ndikpa ekedi ata ŋkpɔ ubiak, ndien ami nnana enye eti eti. Edi Abasi ikpɔŋke nnyin ye unana ndɔŋesit. … Ami mmeyom mbaŋa idara edifiak mbono kiet.”
Enwɔŋɔ eke Idorenyin
Trey ama ewet ke ŋwed esie mme ikɔ emi otode etop akwa mbono eke President Nelson: Idige mmem mmem ŋkpɔ ke ndinyene idara ke ini eyen fo odude ke ndutuhɔre ye anana-nsuk udɔŋɔ mme ke ini afo ananade utom mme ke ini ebe mme ŋwan abiaŋare fi. Edi oro edi idara emi Andinyaŋa ɔnɔde. Idaraesit Esie odu kpukpru ini, ɔsɔŋɔre ɔnɔ nnyin ete ke ‘ndutuhɔre nnyin eyedu ke esisit ini’ [Doctrine and Covenants 121:7] ndien enɔ kabaŋa udori nnyin.”
Nditɔ eka irenowo ye iban, emem emi mbufo eyomde ekeme nditre ndisɔp ndi nte eyomde, edi menwɔŋɔ nnɔ mbufo ke nte mbufo enimde Abasi ke akpanikɔ, emem Esie eyedi.
Yak nnyin ikpeme eti mbuɔtidem nnyin, ika iso ye eti uyama eke idorenyin. Ami metie ntiense ke idorenyin nnyin edi Andinyaŋa nnyin, Jesus Christ. Otode ke Enye, kpukpru mme nti nkukut nnyin eyewɔrɔ osu. Enye edi Abasi idorenyin—idorenyin eke edikan. Enye odu uwem ndien Enye ama mbufo. Ke enyiŋ Jesus Chrst, amen.