Uwem-isɔŋ Enyene Utom!
Kesioho mme mfina, emi kpukpru nnyin ikutde, edima, Ete Heaven nnyin akanam uduak inemesit man otodo nnyin inana edikpu.
Ekenɔ mi utom ke ediwak isua ndidi home teacher nnɔ akamba eyeneka ŋwan kiet ke ward mi. Enye ikinyeneke ndimem ŋkpɔ ke uwem. Enye ama enyene nsio-nsio mfina udɔŋɔ onyuŋ odu uwem ubiak otode unɔmɔ emi enye ekenyenede kini uyen ke anwa mbre. Ɔkɔwɔrɔ-ndɔ ke edide isua 32 ye ndibɔk nyu ŋkama ŋmkpri nditɔ ina, enye akafiak ɔdɔ-ndɔ ke isua 50. Ebe esie ɔyɔhɔ iba akakpa kini enye edide isua 66, ndien eyeneka ŋwan emi adiana odu uwem ke isua 26 nte ebekpa.
Kesioho anyan ini uwem afanikɔŋ esie, enye okosuk enenim ediomi esie ekesim utit. Eyeneka ŋwan emi ekedi eti genealogist, owo emi akade temple, ye andibɔ ye andiwet mbuk ufɔkemana. Okposuk nte enye ekenyenede ediwak idomo, inyuŋ ibupke mbume enye ke ubak ini amasikop mfuhɔ ye ndobo-ikpɔŋ, enye ama enyene uyai ɔkpɔiso ye inem ye eti edu-uwem.
Ke ɔfiɔŋ usukkiet tɔŋɔ nte enye ekebe efep, kiet kotu eyeneren esie ama enyene inem ifiɔk-ukpep ke temple. Enye ekpep oto odudu Edisana Spirit ke eka esie ama enyene etop kiet ɔnɔ enye. Eka esie ekeneme nneme ye enye, idihe ke ŋkukut mme ke okokop uyo. Nnen-nnen etop etienede mi ama ediduk ekikere eyeneren emi oto eka esie ete: “Ami nyom afo ɔdiɔŋɔ ke uwem isɔŋ enyene utom, ndien ami nyom afo ɔdiɔŋɔ idahaemi ke ami mmɔfiɔk ntak eke ofuri ŋkpɔ eketibede [ke uwem mi] ke usuŋ nte ekedide—ndien ke kpukpru ŋkpɔ ɔfɔn ama.”
Etop emi enehede ɔfɔm ama kini owo ekerede abaŋa ndaha esie ye mme afanikɔŋ eke eyeneka ŋwan emi ɔkɔyɔde onyuŋ akan.
Nditɔ-eka irenowo ye iban, uwem-isɔŋ enyene ufɔn! Ekenam uwem-isɔŋ ndinyene utom! Kesioho mme mfina, ubiak-esit ye afanikɔŋ emi kpukpru nnyin ikutde, edima, enyene-ifiɔk, ye mfɔn-mma Ete Heaven nnyin akanam uduak inemesit man otodo nnyin inana edikpu. Uduak esie ɔnɔ nnyin usuŋ ndikpon nkan mme iduɔ eke uwem-isɔŋ nnyin. Jehovah ɔdɔhɔ ete, “Emi edi utom ye ubɔŋ Mi—man owo akan mkpa ikpɔkidem onyuŋ enyene nsinsi uwem.”
Ke ntre, edieke nnyin ididide mme adia-ufɔn ke “utom ye ubɔŋ … Abasi,” kpa eke uwem unana-mkpa ye nsinsi uwem, ana nnyin ibɔ ntunɔ ye ukpep ndinyuŋ nsaŋa mbe ke idomo andidiɔk—ke ubakini ebede ndaha eke nnyin. Ndibe mme mfina, afanikɔŋ ye nsɔŋɔ-ŋkpɔ ererimbot emi edidi ndisin usuŋ emi enehede odot man uwem-isɔŋ anam utom ofuri-ofuri.
Ndien ke ntre nnyin iduhe ke mkpaidem kini mkpɔsɔŋ ini etibede ɔnɔ nnyin. Nnyin iyekut mme ndaha emi edidomode nnyin ye mbon emi eŋwamde nnyin ndinam ata-ima ye ime. Edi nnyin imoyom ndiyɔ mmɔ ke idak afanikɔŋ nnyin nyuŋ nti, ke nte Jehovah ɔdɔhɔde ete:
“Ndien owo eke ayakde uwem esie ɔnɔ ke utom mi, ke ntak enyiŋ mi, eyefiak enyene uwem oro, kpa uwem nsinsi
“Mmɔdo, ekudihe mme asua mbufo [mme mfina, afanikɔŋ, mme idomo eke uwem emi], koro ami mmowuk … , Jehovah ɔdɔhɔ, ke ami nyedomo mbufo ke kpukpru ŋkpɔ, mme mbufo eyenim ediomi mi … man ekut ke mbufo emedot.”
Ini eke nnyin ikopde mmemidem mme ekikere kabaŋa mfina nnyin mme ndikop ke nnyin imibɔ okpon akan ndaha afanikɔŋ eke uwem, nnyin imikeme editi se Jehovah eketiŋde ɔnɔ nditɔ Israel ete:
“Nyuŋ ti ofuri usuŋ emi Jehovah Abasi fo akadade fi asaŋa ke ofuri isua aba emi ke edisad isɔŋ, man enye anam fi osuk idem, onyuŋ odomo fi ete, ifiɔk [se] idude fi ke esit, mme afo [eye] nim ibet esie, mme udunimke.”
Nte Lehi ekekpepde eyeneren esie Jacob ete:
“Afo ɔmɔyɔ mme ukut ye ediwak mfuhɔ. … Edi, [Abasi] eyediɔŋ mme ukut fo enim ɔnɔ udori fo. … Ke ntre, ami mmefiɔk nte ke efak fi, ke ntak edinen ido Andifak fo.”
Sia uwem emi edide itie udomo ndien mfina ekim ntɔŋ-enyɔŋ edifuk nnyin onyuŋ oyom ndibiat emem nnyin, eyefɔn nditi item ye eŋwɔŋɔ emi ikutde ke Mosiah 23 emi abuanade ye afanikɔŋ eke uwem ete: ”Edi—owo ekededi emi esinde mbuɔtidem esie ke [Jehovah] kpa ukem oro ke edimenede ke akpatre usen.”
Nte iwaad kiet, ami ke idem mi mma nnyene akwa ubiak ke ekikere ye esuene emi ekedide oto ke ntak utip mme edinam idiɔk-ido eke owo efen, emi ke ediwak isua akafinade eti ndaha mi ye ekikere edidot mi kiso Abasi. Edi, ami mmenɔ ntiense eke idem mi nte ke Jehovah ekeme edisɔŋɔ nnyin nidem onyuŋ ekpeme nnyin ke sutɔ afanikɔŋ emi esimde nnyin kini isaŋ mmɔŋeyet nnyin emi.
Nnyin imimehe ye ifiɔk-ukpep eke Paul ete:
“Mbak ndiseri iseri ŋkaha oto ke se eyararede[ami ŋkɔbɔde] enɔ mi okponde eti-eti, ke esin mi ŋkukim ke obukidem, isuŋutom Satan edituai mi, mbak ndiseri iseri ŋkaha.
“Kabaŋa ŋkpɔ emi ke ŋkekpe Ɔbɔŋ ubɔk utim ikata, nte adaha ɔkpɔŋ mi.
“Edi Enye ete mi, Mfɔn mi ke ekekem fi; koro enamde odudu Mi ɔfɔn ama ke mmem-idem mi. Ntre ke adat mi esit eti-eti ndinam mbure ke mmem-idem mi, man odudu Christ odoro ofuk mi.”
Nnyin ifiɔkke se “ŋkukim ke obukidem eke Paul” ekedide. Enye ikinyimeke ndiwut mme oro ekedi udɔŋɔ obukidem, eke ibuot mme udɔŋɔ ekikere, mme eke idomo. Edi nnyin iyomke ndifiɔk mbuk oro man idiɔŋɔ ke enye ama aŋwaŋa onyuŋ ekpe Jehovah ubɔk oyom uŋwam ndien, ke akpatre, ukeme ye odudu Abasi edi se ikiŋwamde enye ndiyɔ oro.
Ukem nte ekedide ye Paul, okoto ke uŋwam Abasi ke ami ŋkenyene ɔsɔŋɔ ke ekikere ye spirit ndien akpatre ndifiɔk ke ebede ediwak isua ke ami ke kpukpru ini ndi ow emi enyenede udori nyuŋ ndot ndibɔ edidiɔŋ ikɔ Abasi. Andinyaŋa akaŋwam mi ndikan mme ekikere unana-edidot mi ndien man nnyene ata erifen nnɔ owo-ndudue oro. Ami ke akpatre ndifiɔk ke Erisio-isop eke Andinyaŋa ekedi enɔ ɔnɔ mi ndien ke Ete Heaven mi ye Eyen Esie enehede ema mi. Ke ntak Erisio-isop eke Andinyaŋa, uwem-isɔŋ enyene ufɔn.
Kini ami ke akpatre ŋkebɔde edidiɔŋ ndifiɔk nte Andinyaŋa akanyaŋade mi onyuŋ ebere ye ami ke mme ifiɔk-ukpep oro, ami nehede mfiɔk ke idiɔk ndaha eke mme isua uyen mi ekedi usuŋ-isaŋ ye ifiɔk-ukpep eke idem mi , ubiere abaŋade ye akaptre ibɔrɔ ikemeke ediwut utip nnɔ mbon emi ekebɔde ndutuhɔ enyuŋ ekade-iso ndibɔ ukut oto ndiɔi ido eke mbon efen.
Ami mmefiɔk ke mme ifiɔk-ukpep eke uwem emi—edide eti ye idiɔk—ekeme edinɔ nnyin akpan ukpepŋkpɔ. Idahaemi ami mmediɔŋɔ nyuŋ nnɔ ikɔ-ntiense ke uwem-isɔŋ enyene ufɔn! Ami mmenim ke otode ke ofuri ifiɔk-ukpep eke uwem mi—edide eti ye idiɔk— ke ami mmenyene mmenyene mbɔm nnɔ mbon emi ebɔde ufen eto mme edinam eke mbon efen ye mbɔm nnɔ mbon ukut.
Ami menehede nim ke otode ke ofuri ifiɔk-ukpep eke uwem mi—edide eti ye idiɔk—ke ami mmefɔn ido ye mbon efen, nda mbon efen nte Andinyaŋa akpadade, nyuŋ nnyene mbɔm nnɔ anam-idiɔk ndien ke ami mmenyene ɔyɔhɔ eti-ido. Nte nnyin idide idinyene mbuɔtidem ke mfɔn Andinyaŋa inyuŋ inim ediomi nnyin, nnyin imikeme ndinam ŋkpɔ nte uwutŋkpɔ eke ata ufɔn eke Erisio-isop eke Andinyaŋa.
Ami nyebuana akpatre uwutŋkpɔ ke uwem-isɔŋ enyene ufɔn.
Elder Hales’s aunt, Lois VandenBosch, ye eka esie, Klea VandenBosch.
Eka mi ikinyeneke inem uwem ke uwem-isɔŋ. Enye ikibɔhɔ itoro mme ukpono ererimbot ikinyuŋ inyeneke ifet edika ufɔkŋwed mbe eke secondri. Enye ama ɔduɔ udɔŋɔ ke edide eyenɔŋwɔŋ, esinde ofuri uwem ubiak ye ndutuhɔ ke ukot ufien esie. Nte akamba owo, enye okokut ediwak mfina ye afanikɔŋ ke ndaha ikpɔkidem ye ŋkpɔ-okuk edi okosuk enenim ediomi esie onyuŋ ama Abasi.
Ini emi eka mi edide isua 55, udiana mkpon-nkan eyeneka mi ŋwan ama akpa, ɔkpɔŋde nsekeyen aŋwan ɔfiɔŋ itiaita, eyen-eyen eka mi ŋwan mi, ananade eka enim. Ke ediwak ntak, Eka mi ekenehede akama eyen-eyen eka mi ŋwan ke isua Efureta efen, awakde ndidi ke idak ndaha idomo. Edi, ke misehe ifiɔk-ukpep emi, enye okop inemesit ndien otim anam ŋkpɔ ɔnɔ ufɔkemana, mbɔhiduŋ, ye mbon ward esie onyuŋ anam utom nte ordinance worker ke temple ke ediwak isua. Ke mme akpatre isua uwem esie, Eka mi ama enyene oruk udɔŋɔ ndiɔŋɔ-idem kiet, esiwak edidu ke ndutime, onyuŋ okoduŋ ke itie-usɔbɔ idem. Ke editua mkpɔfiɔk, enye okodu ikpɔŋ kini enye ekebede efep ke unana idorenyin.
Ke ediwak ɔfiɔŋ ebede tɔŋɔ nte enye akakpa, ami ndinyene ndap eke ami mifreke. Ke ndap mi oro, ami ŋketie ke ubet ufɔk-utom mi ke Church Administration Building. Eka mi edibe oduk ubet ufɔk-utom oro. Ami mma ndiɔŋɔ ke enye okoto ererimbot spirit edi. Kpukpru ini ami nyesuk nti ekikere eke ami ŋkenyenede. Enye ikitiŋke ikɔ ndomokiet, edi enye okowut uyai ŋkpɔ Abasi eke ami minyeneke akpa eke ami mikemeke nditiŋ ŋwut.
Ɔkpɔiso ye ndaha-idem esie ama enehede eye! Ami nti nte ndɔhɔde enye nte, “Eka mi, afo emeye eti-eti!,” ŋketiŋ kabaŋa odudu spirit ye uyai esie. Enye ama ɔfiɔk mi—edi ikitiŋikɔ ikɔ. Ami mma ŋkop ima emi enye ekenyenede ɔn mi, ndien ami mma ndiɔŋɔ ke enye okop inemesit onyuŋ ɔbɔ erikɔk ke mme ukut ye mfina ererimbot ndien ke ebet “enyene-ubɔŋ eriset.” Ami mmediɔŋɔ ke eke Eka mi, ke uwem-isɔŋ enyene ufɔn—ndien ke enyene-ufɔn ɔnɔ nnyin ŋko.
Utom ye ubɔŋ Abasi edi ndinan owo akan mkpa ikpɔkidem nyuŋ nnyene nsinsi uwem. Ifiɔk-ukpep eke uwem-isɔŋ edi ubak ŋkpɔ eke usuŋ-isaŋ emi ayakde nnyin ndikpon nyuŋ ŋkɔri ŋkesim uwem unana-mkpa ye nsinsi uwem. Owo ikinɔhɔ nnyin idi mi man idikpu edi man idikut unen ke uduak emi Abasi enyenede ɔnɔ nnyin.
Nte Edidem Benjamin ekpepde ete: “Ndien efen-efen, ami mkpama nte afo ekere ebaŋa ndaha edidiɔŋ ye inemesit eke mbon emi enimde ibet Abasi. Koro sese, ediɔŋ mmɔ ke kpukpru ŋkpɔ, ke obukidem ye ke spirit mbiba; ndien edieke mmɔ ebuɔtde idem tutu esim utit ebɔ mmɔ esin ke heaven, man otodo mmɔ eduŋ ye Abasi ke edu emi inemesit minyeneke utit.” Ke ikɔ efen, uwem-isɔŋ enyene ufɔn!
Ami nnɔ ikɔ-ntiense ke nte nnyin ibɔde mme edinam ikɔ Abasi, iduk ediomi ye Abasi ndien inyŋ inim ediomi oro, ikabare esit, inam ŋkpɔ inɔ mbon efen, inyuŋ iyɔ ikesim utit, nnyin ŋko imikeme edinyene ɔsɔŋɔ ye ofuri idorenyin ke Abasi ke uwem-isɔŋ enyene ufɔn! Ami nnɔ ikɔ-ntiense mbaŋa Jesus Christ ye ke enyene-ubɔŋ ini-iso nnyin ye Ete Heaven nnyin eyesu oto ke mfɔn ye Erisio-isop eke Andinyaŋa. Ke enyiŋ Jesus Christ, amen.