Ubɔk Esie Ebeŋe-idem Ndiŋwam Nnyin
Nte nnyin itienede Jesus Christ ke mbuɔtidem, Enye Eyesuk odu do.
Ke ini ami nkedide eyen ɔwɔŋ, nte ufɔk emana nnyin ima ika nduɔk odudu ke mben mmɔŋ eke idut mi, Chile. Ami mma nkop inem ke ndibiat mme usen ke ini ndaeyo ye ufɔk emana mi. Nko ami mma nkop inem koro mankere ke akpatre ke ami nyebuana ke ŋkpɔ emi mme mkpon nkan nditɔ eka mi iren iba ekenamde ke ŋkpɔ imam ke mmɔŋ.
Usen kiet nditɔ eka mi iren eka ndibre ke ebiet emi ukot mmɔŋ ekekpohore, ndien ami mma nkop akamba ye edikpon ke nditiene mmɔ. Nte ami nkesikde mkpere ebiet oro, mamfiɔk ke mkpoho ukot mmɔŋ ema ekpon ekan nte nkokutde ke mben mmɔŋ. Ke usɔp, mkpoho ukot mmɔŋ abine mi, adade mi ke unana mbeŋeidem. Nkekere nte ke odudu eke obot ama ofuk mi, ndien ema-oduri mi esin ke ata esit inyaŋ. Ami nkikutke mme ndikop ebiet unwam ndomokiet nte eketɔde mi ke kpukpru ebiet. Kpa nte nkekerede ke isaŋ mi ke ererimbot amadisim utit, ami nkop ubɔk oduride mi aka enyɔŋ. Ke akpatre, ami mma nkut utin nyuŋ ŋwek ibifik.
Eyeneka eren mi Claudio ama okut ukeme mi ke ndinam nte akwa owo onyuŋ edi edinwam mi. Ami nkeniɔŋke usuŋ mkpɔŋ mben mmɔŋ. Ɔkpɔsuk edi nte mmɔŋ ikituŋɔke, ami nkanana ifiɔk ndien nkifiɔke ke mekeme ndinyaŋa idem mi. Claudio ɔdɔhɔ mi ete ke ana mkpeme idem ndien, edieke nyomde, ke neye ekeme ndikpep mi. Ke misehe mme ɔkpɔ mmɔŋ se nke-ɔwɔŋde, uko ye udɔŋ mi ndidi akamba eyen eren ama ɔsɔŋ, ndien ami ndɔhɔ, “akpanikɔ.”
Claudio ɔdɔhɔ mi ete ke ana nte mbine ofim mmɔŋ. Mandɔhɔ idem mi mme ami nyekpu ke ekɔŋ oro ye ŋkpɔ emi etiede nte akwa nduɔ mmɔŋ.
Nte obufa akamba ofim mmɔŋ edide, Claudio ɔsɔsɔp ɔdɔhɔ ete; “Se mi; emi edi nte afo adinamde.” Claudio efehe abine ofim mmɔŋ emi edide onyuŋ atamade oduk mbemiso enye ɔduɔ. Ami mma nehede nkop inem ke ntam-ma esie tutu ntre ndikut ofim mmɔŋ efen edide. Ntre ini kiet efen mamfiak nduk ke esit mmɔŋ ndien odudu obot ɔtɔ mi akanare. Ke mme second ifaŋ ebede, ubɔk omum okim, ndien efiak eduri mi esio edi ke ofim. Edeme ikaŋ eke uko mi ama anime.
Idaha emi eyen eka mi okot mi ete nwɔk ye enye. Nte ke ikoot esie, ami ntiene enye, ndien nnyin iwɔk ɔtɔkiet. Nkekere nte ke mma akan ata akamba mfina. Ke akpanikɔ, enye ikimemke, edi mma nam enye, menɔ ekɔm ke unwam ye uwutŋkpɔ emi eyen eka mi okowutde. Ubɔk esie ama anyaŋa mi ikaba; uwutŋkpɔ esie owut mi adaŋa nte ami ndinamde ye mfina mi nyuŋ nkan ke usen oro.
President Russell M. Nelson ama okoot nnyin ete yak ikere ibaŋa celestial, ndien nyom nditiene item esie nyuŋ nsin enye ke mbuk eke ini ndaeyo mi.
Odudu Andinyaŋa kabaŋa Andidiɔk
Edieke nnyin ikerede celestial, nnyin iyefiɔk ite ke mme uwem nnyin eyesobo ye mfina emi etiede nte okpon akan ukeme nnyin ndikan mmɔ. Ke ini uwem isɔŋ nnyin, nnyin idi ŋkpɔ inɔ enwan eke andidiɔk. Nte ofim mmɔŋ emi ekenyenede odudu akan mi ke usen ini ndaeyo oro, nnyin imikeme nditie nte inyeneke odudu inyuŋ iyom ndisuk ibuot nnɔ akamba ndaha. Mme “idiɔk ofim mmɔŋ” oro ekeme nditɔ nnyin aka ke ebiet ekededi. Edi ekufre enye emi enyenede odudu akan mme ofim mmɔŋ oro ndien, ke akpanikɔ, akan kpukpru ŋkpɔ. Oro edi Andinyaŋa nnyin, Jesus Christ. Enye enyene odudu ndiyaŋa nnyin nsio ke kpukpru idiɔk ndaha ye kpukpru idiɔk ebiet. Ke misehe mme nnyin imikpere Enye, Enye osuk ekeme ndisim nnyin ke ebiet eke idude nte nnyin idide.
Nte nnyin iyomde Enye ke mbuɔtidem, Enye eyesuk odu do, ndien ini Esie, Enye eyedu ke mbeŋeidem ke ndimum ubɔk nnyin onyuŋ oduri nnyin esin ke eti ebiet.
Andinyaŋa ye Uwutŋkpɔ Utom Esie
Edieke nnyin ikerede celestial, nnyin iyefiɔk Jesus Christ nte anana ndo uwutŋkpɔ eke ukwɔrɔ ikɔ. Usuŋ odu ke ikɔ Abasi ɔnɔ nnyin ke ini Enye mme mme mbet Esie ebinede owo emi oyomde unwam, edinwam, mme edidiɔŋ nte mmɔ enyande ubɔk mmɔ. Nte ke mbuk mi, ami ma-mfiɔk ke eyen eka mi ama odu-do, edi enye ndidu do nnɔ mi ikikem-ke. Claudio ama ɔfiɔk nkodu ke mfina, ndien enye aka ndinwam ndibede mi nsio ke mmɔŋ.
Ndusuk ini, nnyin ikere ke nnyin iyom ndidu do kpɔt kabaŋade owo emi oyomde unwam, ndien ke ediwak ini, odu ediwak emi ikemede ndinam. Ndinyene nsinsi ndaha ekeme ndinwam nnyin ibɔ eriyarare ke ndinɔ mbon oro eyomde usɔp usɔp unwam. Nnyin imikeme ndidorenyin ke ndausuŋ ye ntuk eke Edisana Spirit ke ndinɔ oruk utɔ unwam eke eyomde, kɔm ekpedi unwam eke obuk-idem nte ekikere ndɔŋesit, udia, mme unwam ke mme utom usen, mme ndausuŋ eke spirit ke ndinwam mbon efen ke isaŋ mmɔ ke ndibeŋe idem, nnam nyuŋ mkpono mme edisana ediomi.
Andinyaŋa odu ke mbeŋeidem ke Ndinwam Nnyin
Kini Peter, mkpon nkan Apostle, “akasaŋde ke eyɔŋ mmɔŋ, ke nditiene Jesus … enye ama okop ndik; ndien ɔtɔŋɔ ndideŋ”, ke ini oro,” “enye ofiori, ete, Ͻbɔŋ, nyaŋa mi.” Jesus ama ɔfiɔk mbuɔtidem oro Peter ekenyenede ke nditiene Enye ke enyɔŋ mmɔŋ. Enye nko ama ɔfiɔk ndik Peter. Nte mbuk etiŋde, Jesus “ke ndo-ndo oro … ama anyan ubɔk esie, onyuŋ omum enye,” etiŋ mme ikɔ emi: “O afo owo ekpri mbuotidem, se nte afo enyenede eyighe?” Ikɔ esie ikidighe ndiduari Peter edi ke nditi enye ke Enye, Andinwam, okodu ye enye ye mme mbet.
Edieke nnyin ikerede celestial, nnyin iyebɔ ndisɔŋɔ ke esit nnyin ite ke Jesus Christ ke akpanikɔ edi Andinwam, Enye emi etiede ubiɔŋ ɔnɔ nnyin ye Ete, ye Andifak nnyin. Nte nnyin inamde mbuɔtidem ke Enye, Enye eyewam nnyin osio ke ndaha iduɔ nnyin, akande mfina nnyin, ye unana ke uwem obukidem emi, onyuŋ ɔnɔ nnyin mkpon-nkan eke kpukpru enɔ, emi edide nsinsi uwem.
Andinyaŋa Ikpɔŋke Nnyin
Eyen eka mi ikikpɔŋke mi ke usen oro edi akaiso man ami nkeme ndikpep adaŋa nte ndinamde ke idem mi. Enye akaiso, kpa nte oro okoyomde ndinwam mi ikaba. Enye akaiso, kpa nte ami mikikemeke ndifiɔk ke akpa. Enye akaiso mman ami nkeme ndikan mfina nnyuŋ nkan. Edieke nnyin ikerede celestial, nnyin iyefiɔk ite ke Andinyaŋa eyedu do nte awakde ke ndinɔ unwam edieke nnyin iyomde ndikpep ŋkpɔ, mkpuhɔre, nkan, nyɔ, mme ndikan ke ŋkpɔ eke edidade eti ye nsinsi inemesitinɔ uwem nnyin.
Mme Ubɔk Andinyanga
Ŋwed Abasi anam mbiet uwutŋkpɔ ye ufɔn eke mme ubɔk Andinyaŋa. Ke uwa usio-isop Esie, ema ewak mme ubɔk Esie ke nkukim ke ndidian Enye ke eto mkpa. Ke Enye ama akeset ke mkpa, Enye ama owut mme mbet Esie idem ke mfɔn-ma idem, edi ndudu ke mme ubɔk Esie ekedi ŋkpɔ nditi nsana mma uwa Esie. Ubɔk Esie eyesuk odu ɔnɔ nnyin, ɔkpɔsuk edi nte nnyin mikemeke ndikut mme ndikop ke akpa, koro Ete eke Heaven nnyin akemek Enye ke ndidi Andinyaŋa nnyin, Andifak kpukpru ubon owo.
Ekperede Nnyin Ndimum, otode Jay Bryant Ward
Ubɔk Abasi, otode Yongsung Kim
Edieke ami ŋkerede celestial, ami mmɔfiɔk ke nnyin idihe ikpɔŋ ke uwem emi. Kini anade nte nnyin ikut mme mfina ye idomo, Ete eke Heaven nnyin ɔfiɔk ukeme nnyin onyuŋ ɔfiɔk ke nnyin imikeme ndiyɔ nnyuŋ nkan nsɔŋɔ ŋkpɔ nnyin. Ana nte nnyin inam eke nnyin inyuŋ ifiak itiene Enye ye mbuɔtidem. Edima Eyen esie, Jesus Christ edi Andinyaŋa ndien eyesuk odu do. Ke enyiŋ Esie, nsasana enyiŋ Jesus Christ, amen.