Ndinam Uduak Nnyin Asaŋa ye Esie
Editiene uduak Abasi ke uwem nnyin eyeyak nnyin ikut nsɔŋurua ŋkpɔ emi ɔfɔnde akan ke ererimbot—obio ubɔŋ heaven.
Ke ŋke oro, Andinyaŋa eketiŋ abaŋa owo anyam-urua kiet emi okoyomde “ediye nsɔŋ-urua ŋkpɔ.” Ke ini owo anyam-urua emi okoyomde, enye ama okut kiet “emi ɔkɔsɔŋde urua.” Edi, man enye enyene ata ediyama nsɔŋ-urua ŋkpɔ emi owo emi akana nte ayam kpukpru inyene esie, emi enye ɔkɔsɔpde ayam ke inemesit.
Oto ke ibio ye eti nke emi, Andiyaŋa ekpep ediye ediye ete ke obio ubɔŋ heaven etie nte anana ekɔm urua nsɔŋ-urua ŋkpɔ, ke akpanikɔ inyene emi ɔfɔnde akan emi anade nte eyom ekan kpukpru ŋkpɔ efen. Ete ke owo ayam urua emi ama ɔsɔp ayam kpukpru inyene esie man enyene eti nsɔŋ-urua ŋkpɔ emi etim owut ete ke ana nte nnyin inam ekikere ye mme udɔŋ nnyin esaŋa ye uduak Abasi ndien inyime ndinam kpukpru se nnyin ikande ke isaŋ uwem emi man inyene mme nsi nsi edidiɔŋ eke obio ubɔŋ Abasi.
Man idot ndinyene akwa utip emi, ana nte nnyin idomo, ye mme ŋkpɔ efen, ofuri ukeme nnyin ndisana ofuri ŋkpɔ idem nnyin nyak inyuŋ ikpɔŋ edinam kiet kiet emi emende nnyin ɔkpɔŋ ofuri nwaidem nnɔ Abasi ye mme akamba ye edisana usuŋ esie. Apostle Paul okot mme ndisana udɔŋ emi “ndinyene esit Christ.” Nte Jesus Christ ekemende owut, emi ɔwɔrɔ “[ndinam] ofuri ŋkpɔ emi enemde [Abasi]” esit kpukpru ini ke uwem nnyin, mme nte ubak owo esitiŋde idahaemi ete, emi edi “ndinam se ifɔnde nnɔ Abasi.”
Ke usuŋ gospel, “[ndinam] kpukpru ini mme ŋkpɔ eke enemde Abasi esit” ɔwɔrɔ ndiyak uduak nnyin nnɔ uduak Esie. Andinyaŋa ama ada ini ekpep ufɔn ukpep-ŋkpɔ emi ke ini Enye ekekpepde mme mbet Esie:
“Koro Ami nkoto ke heaven nsuhɔre ndi, idige man nnam uduak idem mi, edi man nnam uduak enye emi ɔkɔdɔŋde mi.
“Ndien emi edi uduak Ete mi emi ɔkɔdɔŋde mi, ete kpukpru se enye ɔkɔnɔde mi inaha nyak ndomo kiet atak, edi ete ke ana nte mfiak menere enye ke enyɔŋ ke akpatre usen.
“Ndien emi edi uduak Ete mi emi ɔkɔdɔŋde mi, ete kpukpru owo emi okutde Eyen, onyuŋ ɔbuɔtdeidem ke enye, ekeme ndinyene nsi nsi uwem: ndien nyefiak menere enye ke enyɔŋ ke akpatre usen.”
Andinyaŋa ama enyene mfɔnmma ye edisana nsuhɔde idem ɔnɔ Ete ke ndiyak uduak Ete akara uduak Esie. Enye ama ɔdɔhɔ ini kiet ete, “Ndien enye emi ɔkɔdɔŋde mi odu ye ami: Ete ikpɔŋke mi; koro nnam kpukpru ini se inemde enye esit.” Ke ekpepde Prophet Joseph Smith abaŋa ukut ye ubiak eke Mkpa usio-isop, Andinyaŋa ama ɔdɔhɔ ete:
“Koro, Ami, Abasi, mma nyɔ mme ŋkpɔ emi nnɔ kpukpru owo, man mmɔ ekubɔ ufen edieke mmɔ edikabade esit;
“Ndutuhɔ emi akanamde mi, kpa Abasi, andikpon nkan ofuri ŋkpɔ, nyek idem oto ke ubiak, ndien iyip ɔwɔrɔ ke ndudu kiet-kiet, nyung mbɔ ufen ke ikpɔkidem ye ke spirit—man otodo ami nkuwɔŋ ndot-ndot cup oro, nyung mkpri—
“Nte ededi, ubong enyene Ete, ndien ami mmenam nyung nkure mbeŋe-idem mi nnɔ nditɔ owo.”
Ke eyo uwem nnyin, nnyin imisinwana ye se nnyin ikerede ke nnyin imifiɔk, se nnyin ikerede ke ɔfɔn akan, ye se nnyin ikerede ke ɔfɔn ɔnɔ nnyin, emi misaŋake ye se Ete ke Heaven ɔfiɔkde, se ifɔnde ikan ke nsi nsi, ye se ifɔnde inɔ nditɔ ke uduak Esie. Akamba enwan emi ekeme ndisɔŋ, akpan akpan ke esede mme prophecy emi esinede ke mme ŋwed Abasi emi enɔde eyo nnyin: “Emi efiɔk ŋko, ete ke mme akpatre usen mme owo eyema idem mmɔ, … ema mme inem uwem ekan nte emade Abasi.”
Idiɔŋɔ kiet emi owutde ke prophecy emi osu edi se ikade iso ke ererimbot, emi ata ediwak owo enamde, emi mme owo emade idem mmɔ ndien kpukpru ini edɔhɔ ete, “Se ikpidedi, ndu ke akpanikɔ mi mme nnam se ifɔnde inɔ mi.” Nte Paul Apostle eketiŋde, mmɔ “eyom eke mmɔ, idihe mme ŋkpɔ emi edide eke Jesus Christ.” Mbon emi enamde se ifɔnde ye mmɔ ikpɔŋ, ese se mmɔ emade, mme ekutde ntak ndinam usuk ido emi misaŋake ye edima uduak Abasi ye uduak emi Enye enyenede ɔnɔ mmɔ esiwak ndikut usuŋ ukere ŋkpɔ emi nte ke edi “nnen nnen.” Edieke nnyin iyakde esit ye ekikere nnyin inɔ usuŋ ukere ŋkpɔ emi, nnyin imikeme ndinim mme ŋkpɔ ntuak-ukot nnɔ idem nnyin ke usuŋ ndinyene anana ekɔm-urua nsɔŋ-urua ŋkpɔ emi Abasi enimde ke ima ɔnɔ nditɔ Esie—nsinsi uwem.
Ke edide akpanikɔ ete ke nnyin kiet kiet isaŋa ke idem nnyin nte mme mbet ke usuŋ ediomi, idomo ndinim esit ye ekikere nnyin ke Christ Jesus, ana nte nnyin ikpeme inyuŋ itiŋ-enyin mbak ididuk ke idomo ndinyene utɔ ukpep-ŋkpɔ ererimbot emi ke uwem nnyin. Elder Quentin L. Cook ama ɔdɔhɔ ete ke “nditie nte Christ ke akpanikɔ edi udɔŋ ɔfɔnde akan ndidi nnen nnen.”
Ndima ufan mi, ke ini nnyin imekde ndiyak Abasi enyene odudu akan udɔŋ idem nnyin ke uwem nnyin, nnyin imikeme ndikɔri ke nte idide mme mbet inyuŋ ikɔri ke ukeme nnyin ndidian ekikere ye esit nnyin ye Andinyaŋa. Ke nkaŋ efen, ke ini nnyin imiyakke usuŋ Abasi akara uwem nnyin, eyak nnyin enɔ idem nnyin, ndien ke ini nnyin minyeneke edisana ndausuŋ Abasi, nnyin imikeme ndikut kpukpru se inamde mme se minamke nte ke efɔn. Nnyin ŋko imikeme ndinɔ idem nnyin ntak ke ndinam mme ŋkpɔ ke usuŋ nnyin, idɔhɔ ite, “Nnyuŋ nnam mme ŋkpɔ ke usuŋ mi.”
Ke ini kiet, ke ini Andinyaŋa ekekpepde ukpep-ŋkpɔ Esie, usuk mme owo, akpan akpan mme Pharisee emi ekekutde idem mmɔ nte nti owo, ema esin etop Esie enyuŋ edɔhɔ ete ke mmɔ edi nditɔ Abraham, emi ɔwɔrɔde ke ubon mmɔ eyenɔ mmɔ saŋa saŋa unen ke iso Abasi. Utɔ ekikere oro ama anam mmɔ edori enyin ke ifiɔk mmɔ ndien ibuɔtke idem ke se Andinyaŋa ekekpepde. Edinam mme Pharisee kabaŋa Jesus ama etim owut ete ke ido mmɔ ekenyenede ikinyeneke ufaŋ ke esit mmɔ inɔ mme ikɔ Andinyaŋa ye usuŋ Abasi. Ke ibɔrɔ, Jesus ke ifiɔk ye uko ama ɔdɔhɔ ete edieke mmɔ edide nditɔ ediomi Abraham ke akpanikɔ, mmɔ eyenam mme utom Abraham, akpan akpan ke edide ete ke Abasi Abraham akada mmɔ ke iso onyuŋ ekpep mmɔ akpanikɔ ke ini oro.
Nditɔ eka iren ye iban, nte mbufo ekande ekut, ifiɔk ukere ŋkpɔ emi edide “se ifɔnde inɔ mi” mme ndinam “se inemde Abasi esit” idighe obufa edinam emi edide saŋa saŋa ke eyo nnyin. Edi ekikere emi ɔsɔŋde emi okodude ke ediwak isua ndien esiwak ndinam mme ɔfiɔk-ŋkpɔ edi nnan ke enyin mmɔ ndien etimere onyuŋ anam idem emem ediwak nditɔ Abasi. Ekikere emi edi, ke akpanikɔ, akani nkari eke andidiɔk; edi usuŋ abiaŋa emi adade ini ada nditɔ Abasi ɔwɔrɔ ɔkpɔŋ akpanikɔ ye eti usuŋ ediomi Ke ini saŋa saŋa idaha nte uduot, ebiet iduŋ, ye obot ye nsɔŋ-idem ke ibuot esitukde isaŋ uwem nnyin, ke mme ŋkpɔ emi edide akpan, ufaŋ odu ke esit idem emi nnyin ikande imek mme nnyin iyima nditiene usuŋ emi Abasi enimde ɔnɔ uwem nnyin. Ke akpanikɔ, “Enye asiak usuŋ onyuŋ ada usuŋ, onyuŋ [eteme] kpukpru ŋkpɔ.”
Nte mme mbet Christ, nnyin iyom ndisaŋa ke usuŋ emi Enye akasiakde ɔnɔ nnyin ke ini Enye okodude ke isɔŋ. Nnyin iyomke ndinam uduak Esie ye kpukpru se idinemde Enye esit ikpɔŋ edi iyom nditie ŋko nte Enye. Nte nnyin idomode ukeme ndinim kpukpru ediomi emi nnyin inamde inyuŋ inam kpukpru ikɔ emi ɔwɔrɔde Abasi ke inua,” eyekpeme nnyin ebaŋa ndiduɔ nduk ke idomo ye mme ndudue ererimbot—mme ndudue ukpep-ŋkpɔ emi edidade nnyin iwɔrɔ ikpɔŋ mme nsɔŋ urua ŋkpɔ oro.
Ami mmebɔ nsɔŋɔ nto nte utɔ nsuhɔde idem nnɔ Abasi otukde nti mbet Christ nte mmɔ emekde ndinam mme ŋkpɔ oro ekefɔnde enɔ enyuŋ enemde kiso Abasi. Mmɔfiɔk akparawa kiet emi ekenyenede mfina abaŋa ndika mission emi ekenyenede udɔŋ ndika nyuŋ nkanam utom ke ini enye ekekpaŋde utɔŋ okop oto akamba ada usuŋ kiet ke Ufɔk Abasi nte enye ɔkɔnɔde ikɔ ntiense esie ye edisana ifiɔk abaŋade ndidi missionary.
Ke mme ikɔ esie, akparawa emi, emi ama ekeka mission onyɔŋ, ɔdɔhɔ ete: “Nte nkekpaŋde utɔŋ nnɔ ikɔ ntiense Apostle Jesus Christ, mma nkop ima emi Abasi enyenede ɔnɔ mi, ndien nyene udɔŋ ndiwana ima oro ye mbon efen. Ke ini oro mmafiɔk ke ana nte nka mission nsehe mme ndik, eyighe, ye mme mfina mi. Mma nkop odudu ke mme edidiɔŋ ye mme eŋwɔŋɔ Abasi emi enyenede ɔnɔ nditɔ Esie. Mfin emi, ndi obufa owo; menyene ikɔ ntiense nte ke gospel emi edi akpanikɔ ŋko ke efiak emen Ufɔk Abasi Jesus Christ edi ke isɔŋ.” Akparawa emi ama emek usuŋ Abasi onyuŋ akabara edi uwut-ŋkpɔ nte eti mbet ke kpukpru usuŋ.
Eti nkaiferi kiet ama emek ete ke enye idisuhɔkere idaha esie ke ini ekedɔhɔde enye ete esine ɔfɔŋ ke usuŋ emi mikifɔnke man oduk ye mbet usine ɔfɔŋ ke ebiet emi enye akanamde utom. Ke ɔkɔfiɔkde ete ke idem esie edi nsasana enɔ emi otode Ete nnyin ke Heaven ye ebiet emi Spirit ekemede ndiduŋ, enye ama emek ndidu ke idaha emi okponde akan eke ererimbot. Idighe ukpono otode mbon emi ekekutde nte enye okodude ke akpanikɔ Jesus Christ ikpɔŋ ke enye ekenyene, edi ŋko ama akaiso enyene utom esie, emi okodude ke mfina ke ini kiet. Enye ndinyime ndinam se ikenemde kiso Abasi, utu ke se ifɔnde inɔ ererimbot, ama ɔnɔ enye nsɔŋɔ ediomi ke ufɔt ɔkpɔsɔŋ ndimek.
Nditɔ iren ye iban, nnyin ke kpukpru ini imikut ukem edimek emi ke isaŋ nnyin ke usen ke usen. Oyom uko ye esit emi enyimede ndida nyuŋ ntiene akpanikɔ ye ndiduŋɔde idem ke nsuhɔde-idem ndikut mmem idem obukidem ke uwem nnyin emi ekemede ndikpan nnyin ndisuk ibuot nnɔ Abasi, ndien ke akpatre imek ndtiene usuŋ Esie idighe usuŋ nnyin. Akpatre ndomo nse nnyin nte mbet odu ke unyime nnyin ndisana nyak nyuŋ nnana akani idem nnyin ndien iyak esit nnyin ye ofuri ukpɔŋ nnyin inɔ Abasi man otodo uduak Esie akabade edi eke nnyin.
Ediye ini kiet emi okponde akan ke uwem emi edi ke ini ikutde idara emi edide ke ini anamde kpukpru ini mme ŋkpɔ “se ifɔnde inɔ onyuŋ enemde Abasi esit” ye “se ifɔnde inɔ nnyin” ekabare edi kiet ye ukem ukem! Ndibiere nam uduak Abasi edi eke nnyin ndien owo ifaŋake inyuŋ ibupke mbume oyom idi mbet ukpono ukpono ye uko uko! Ke ediye ini oro, esio nnyin enim enɔ Abasi, ndien nnyin iyak mme uduak nnyin ofuri ofuri inɔ Enye. Utɔ nsuhɔde idem spirit emi, ke nditiŋ ikɔ, eye, enyene odudu, onyuŋ akan ɔkpuhɔde.
Metie ntiense nte ke nditiene uduak Abasi ke uwem nnyin ayayak nnyin ikut nsɔŋ urua ŋkpɔ emi ɔfɔnde akan ke ererimbot—obio ubɔŋ heaven. Mebɔŋ akam nte yak nnyin kiet kiet, ke ini ye ufaŋ nnyin, ikan itiŋ ikɔ, ye ukpono ediomi, inɔ Ete nnyin ke Heaven ye Andinyaŋa Jesus Christ ite “se ifɔnde inɔ Fi, ɔfɔn ɔnɔ mi.” Ami ntiŋ mme ŋkpɔ emi ke nsasana enyiŋ Andinyaŋa Jesus Christ, amen.