Ndibuk mme Ŋkpɔ-ekɔŋ Nsɔŋ-ibuot Nnyin
Yak nnyin ibuk—enehede, ɔtuŋɔ—ŋkpɔ nsɔŋibuot ekededi ye Abasi ke uwem nnyin ndien ikpuhɔ oro ye edinyime esit ye edinyime uduak.
Ŋwed Mormon ewet ete ke ekperede isua Anaŋ-ye-duop mbemiso emana Christ, ke nditɔ iren eke Edidem Mosiah eketɔŋɔ se idide utom ukwɔrɔ-ikɔ ke isua Duopenaŋ enɔ mbon Lamanite. Ema-esinam unana edikut unen ukeme ke mme ediwak emana ndida mbon Lamanite man edinim ukpepŋkpɔ Christ ke akpanikɔ. Ini enye emi, nte ededi, otode ke utibe ubiɔŋɔ eke Edisana Spirit, ediwak tɔsin mbon Lamanite ema ekabare-esit enyuŋ edi mme mbet Jesus Christ.
Nnyin ikoot ete, “Ke akpanikɔ nte Jehovah odude uwem, ata akpanikɔ nte ediwak ekenimde, mme nte ekedade ediwak mmɔ edisim ifiɔk akpanikɔ, oto ke ukwɔrɔ-ikɔ Ammon ye nditɔ-ete esie, nte asaŋade ke spirit eriyarare ye eke prophecy, ye odudu Abasi anamde utibe-ŋkpɔ ke idem mmɔ—edi ntre, ami ndɔhɔ mbufo nte, nte Jehovah odude uwem, ke nte ediwak mbon Lamanite ekenimde ke ukwɔrɔ-ikɔ mmɔ, enyuŋ ekabare esit etiene Abasi, ikiduɔhɔ ikpɔŋ usuŋ.”
Etiŋ utom edida edibighe ŋkabare-esit eke mbonowo emi ke ufaŋ anditiene ete: “Koro mmɔ ekabare edi ndinen owo; mmɔ ema eyak ŋkpɔ-ekɔŋ nsɔŋ-ibuot enim, koro mmɔ ikiŋwanake ye Abasi aba, ikinyuŋ iŋwanake ye nditɔ-ete mmɔ ndomokiet.”
Editiŋ mbaŋa “ŋkpɔ-ekɔŋ nsɔŋ-ibuot” mbiba ekedi eke ŋwed ye eke mbiet. Oro ɔwɔrɔ eduat mmɔ ye mme ŋkpɔ uŋwana ekɔŋ ŋko edi nsɔŋ-ibuot mmɔ nnɔ Abasi ye ibet Esie.
Edidem eke mme akabare-esit mbon Lamanite emi owut oro ke usuŋ ntem ete: “Idahaemi sese, nditɔ-ete mi, … oro ekedi ofuri se nnyin ikemede edi-nam man ikabare esit ke ofuri idiɔkŋkpɔ nnyin ye ediwak uwot-owo emi nnyin ikinamde, nyuŋ nam man Abasi emen mmɔ osio ke esit nnyin, sia oro ekedi ofuri se nnyin ikemede ndinam man inehede ikabare esit kiso Abasi mbemiso Abasi man enye emen ntɔi nnyin osio.”
Ti ikɔ edidem oro—ikidaha ata edikabare-esit mmɔ ikisim erifen idiɔkŋkpɔ mmɔ kpɔt, edi Abasi ŋko ama emen ntɔi idiɔkŋkpɔ oro kpa ye udɔŋ edi-nam idiɔkŋkpɔ osio ke esit mmɔ. Nte afo ɔfiɔkde, utu ke edifiak ŋka akpa ndaha nsɔŋ-ibuot ye Abasi, mmɔ eme ebuk eduat mmɔ. Ndien nte mmɔ ebukde ŋkpɔ-ekɔŋ mmɔ, ye edikpuhɔre esit, mmɔ ŋkɔ ebuk udɔŋ mmɔ ke edi-nam idiɔkŋkpɔ.
Nnyin imikeme edibup idem nnyin se nnyin ikemede ndinam man itiene usuŋ emi, “ndiyak ŋkpɔ-ekɔŋ nsɔŋ-ibuot [nnyin] nim,” nte mmɔ ekpekede-di, ndien “ikabare esit [ndi] itiene Abasi” man emen ntɔi idiɔkŋkpɔ ye udɔŋ edi-nam idiɔkŋkpɔ esio ke esit nnyin ndien nnyin ididuɔhɔ aba.
Nsɔŋ-ibuot ekeme edidi eti mme idiɔk. Ata uwutŋkpɔ edinehede nsɔŋ-ibuot edi Lucifer, emi, ke ererimbot premortal, akaŋwanade ye uduak erifak eke Ete onyuŋ oyom mbon efen ete eŋwana ŋko, “ndien, ke usen oro, ediwak ema etiene enye.” Isɔŋke ndidiɔŋɔ ŋka-iso odudu nsɔŋ-ibuot esie ke eyo nnyin.
Ndedehe owo ita emi esuade-Christ ita ke Ŋwed Mormon—Sherem, Nehor, ye Korihor—owut akpan ukpep eke ata edisɔŋ-ibuot ye Abasi. Ŋwɔrɔ-nda ŋkari-ukpep eke Nehor ye Korihor ekedi ke idiɔkŋkpɔ ndomokiet iduhe; ke ntre, ufɔn iduhe ke ndikabare esit, koro Andinyaŋa iduhe. “Owo kiet-kiet edi[foro] etiene ifiɔk esie, ndien … owo kiet-kiet eye [kan] etiene ukeme esie; ndien ŋkpɔ ekededi emi owo [anamde idige] idiɔk ndomokiet.” Andisua-Christ esesin unen edu-ukpono, abat edinam-ikɔ Abasi ye ediomi nte ŋkpɔ-mbre emi “mme oku eyo eset ekenimde, ndinyene odudu ye unen.”
Uwutŋkpɔ kiet ke ukperedem usen emi eke ata nsɔŋ-ibuot ye inem ke akpatre edi mbuk eke William W. Phelps. Phelps okoduk Ufɔk Abasi ke 1831 ndien ema emek enye nte emiŋ-ŋwed nnɔ Ufɔk Abasi. Enye amasikpuhɔ ediwak akpa ŋwed emi Ufɔk Abasi emiŋde esio, ewet ediwak ikwɔ, onyuŋ anam utom nte ewet-ŋwed ɔnɔ Joseph Smith. Ke ndiɔk-iso, enye ediŋwɔŋɔde aŋwana ye Ufɔk Abasi ye Prophet, kpa ekesim ndaha ndinɔ ikɔ-ntiene nsu mbaŋa Joseph Smith ke esop Missouri, emi akanamde esin Prophet ke ŋkpɔkɔbi do.
Ekem, Phelps ediwet ŋwed ɔnɔ esɔk Joseph oyom erifen-nnɔ. “Ami mmɔfiɔk nadaha mi, afo ɔmɔfiɔk oro, ndien Abasi ɔfiɔk oro, ndien ami nyom enyaŋa mi edieke mme ufan mi ediŋwamde mi.”
Ke ibɔrɔ esie Prophet ete: “Edi akpanikɔ ke nnyin imibɔ akwa ndutuhɔ oto ke utip edu-uwem fo. … Nte ededi, nnyin ima ibɔ ukut oro ikure, ema enam uduak eke Ete Heaven nnyin, ndien nnyin ke isuk idodu uwem. … Duk di, edima eyeneka, sia ekɔŋ ama ekebe, koro ufan ke akpa ini efiak edi ufan ke akpatre.”
Ye ata erikabare-esit, William Phelps ama obuk “ŋkpɔ-ekɔŋ nsɔŋ-ibuot esie,” anamde efiak enyime esin ke ɔyɔhɔ itie, ndien ikifiakke iduɔ aba.
Ndusuk ata ndiɔk-ŋkan ndaha nsɔŋ-ibuot ye Abasi, nte ededi, edi eke edidodop—ndisin usuak Esie ke uwem nnyin. Ediwak eke mididuakke ata nsɔŋ-ibuot ekeme edisuk mfafaŋa uduak ye ikɔ Abasi ke editiene usuŋ idem mmɔ ke misehe edisana ndausuŋ. Oro anam mi nditi ikwɔ emi ekenamde ɔwɔrɔ-etop ke ediwak emi ekebede oto ɔkwɔ-ikwɔ Frank Sinatra ye ata udim ikwɔ ete “Ami nam oro ke usuŋ mi.” Ke akpanikɔ odu ediwak ubet-ufɔk ke uwem ɔnɔ edimek nnyin ye mbumek eke idem owo, edi kini ebehede erinyaŋa ye nsinsi uwem, ibuot-ikɔ ikwɔ nnyin ekpedi “Ami ŋkenam oro ke usuŋ Abasi,” koro ke akpanikɔ usuŋ efen iduhe.
Se, emi nte, uwutŋkpɔ Andinyaŋa kabaŋa uduɔkmmɔŋ. Enye ayak idem ɔnɔ uduɔkmmɔŋ ndiwut idiɔŋɔ nsuk-ibuot nnɔ Ete ye uwutŋkpɔ nnɔ nnyin ete:
“Enye owut nditɔ owo ete, ke obukidem enye ɔsuhɔre idem esie ke iso Ete, onyuŋ edi ntiense ɔnɔ Ete ete ke imɔ iyisuk ibuot inɔ Enye ke ndinim ibet esie. …
“Ndien enye ɔdɔhɔ nditɔ owo ete: Mbufo etiene mi. Ke ntre, ndima nditɔ ete mi, ndi nte nnyin imikeme nditiene Jesus ke mibɔhɔke nnyin iminyime ndinim ibet Ete?”
Ididuhe “usuŋ mi” edieke nnyin inade nte itiene uwutŋkpɔ Andinyaŋa. Ndidomo edikut isio-isio usuŋ ŋkesim heaven ebiet ikpikpu utom ekenamde ke Tower eke Babel utu ke edise Christ ye erinyaŋa Esie.
Mme akaŋkaŋ ye ŋkpɔ-ekɔŋ efen emi mbufa mbon Lamanite ekebukde ekedi ŋkpɔ-ekɔŋ nsɔŋ-ibuot otode ke nte mmɔ ekedade mmɔ enam utom. Ukem oruk ŋkpɔ-ekɔŋ oro odu ke ubɔk nditɔ irenowo mmɔ, emi edade ekpeme ufɔkemana ye uwɔrɔ-ufin, ikidige ŋkpɔ-ekɔŋ edida nsɔŋ-ibuot ye Abasi Ukem oro ekedi ntre ke oruk ŋkpɔ-ekɔŋ emi odude ke ubɔk mbon Nephite: “Mmɔ ikiŋwanake inɔ ukara mme odudu edi … ekeŋwana enɔ ufɔkemana ye ubɔhɔ mmɔ, iban ye nditɔ, ye ofuri ŋkpɔ mmɔ, edi ntre, enɔ ido ukpono ye ufɔk Abasi mmɔ.”
Ke ukem usuŋ oro, odu mme ŋkpɔ ke uwem nnyin emi ikpisinde mme kpa edide eti edi edade enam ke idiɔk usuŋ akabare edi “ŋkpɔ-ekɔŋ nsɔŋ-ibuot.” Ikɔ emi nnyin itiŋde, nte uwutŋkpɔ, ekeme edimenede mme ndisuhɔre owo. Nte James ɔdɔhɔde:
“Edi ama edi edeme [enye ebiet] baba owo kiet ikemeke ndisuk enye nnim; edeme edi idiɔk ŋkpɔ, onyuŋ ɔyɔhɔde ye idiɔk ibɔk.
“Nnyin ida edeme itoro Abasi, kpa Ete nnyin; inyuŋ ida enye isuŋi owo, emi ebotde ke mbiet Abasi.
“Kpa ke inua kiet oro ke eridiɔŋ ye isuŋi ewɔŋɔ. Nditɔ-ete mi, ŋkpɔ inaha nte ekpedi ntre.”
Ekpep ediwak ŋkpɔ ke aŋwa-aŋwa ye eke idem owo mfin emi edide udu onyuŋ asabade spirit. Odu ediwak nneme emi etimede onyuŋ asabade, kpa kotu mme iwaad. Oruk ikɔ ntem, edi “ŋkpɔ-ekɔŋ nsɔŋ-ibuot” ye Abasi, “ɔyɔhɔde ye idiɔk ibɔk.”
Kere-baŋa uwutŋkpɔ efen eke ŋkpɔ emi enehede ɔfɔn edi ekeme ediwɔŋɔde oro man aŋwana ye ndisana ndausuŋ—utom emi owo anamde. Owo ekeme edikut ata uyuhɔ ke utom, ubɔk-utom, mme utom-uŋwam, ndien kpukpru nnyin idia ufɔn ito ke se mme esinifik ye enyene-enɔ owo ke ediwak iso utom ekenamde ekure enyuŋ esiakde.
Edi, emem koro edisin-ifik nnɔ utom ekeme edikabare ndi akpan ntiŋ-enyin ke uwem owo. Ekem kpukpru ŋkpɔ efen akabare osuhɔde, esinede unyime ekededi emi Andinyaŋa ekemede ndinam nnɔ ini ye nda-mmana ifiɔk owo. Eke irenowo ye eke iban ŋko, ndikpɔŋ nti ifet nnɔ ndɔ, nditre ndidiana ye nyuŋ ŋwam ŋwan mme ebe, nditre edibɔk nditɔ fo, mme kpa ndikokoi ntre ndidiɔŋ ye ubiɔŋ ndibɔk-nditɔ ke ntak edikɔri ke utom ekeme ndikabare nti nam-ŋkure nsin ke oruk nsɔŋ-ibuot kiet.
Uwutŋkpɔ efen abaŋa ata idem nnyin. Paul eti nnyin ete ke ana nnyin inɔ Abasi ubɔŋ ke ikpɔkidem ye ke spirit ndien ke idem emi edi temple Edisana Spirit, “emi mbufo enyenede eto Abasi, mbufo inyuŋ idige eke mbufo.” Ntem, nnyin iminyene ata udɔŋ ke ndibiat ini mkpeme idem nnyin ke nte nnyin ikemede. Esisit nnyin iyesim edikɔŋ ndaha edinam emi nnyin ikutde ke mme nam-ŋkure eke mbon-itɔk eke Olympic ye Paralympic idahaemi, ndien ubak nnyin imikut iduɔ kini owo ɔsɔŋde, mme se President M. Russell Ballard okotde “ndiakpɔ ɔtɔŋɔde ndidiaŋa.”
Nte ededi, ami mmenim ke enem Andibot nnyin kini nnyin inamde ata ukeme nnyin ke edikpeme eti enɔ Esie eke ikpɔkidem. Oro edidi idiɔŋɔ nsɔŋ-ibuot ke edidebi ye edidehe idem fo, mme edibiat enye, mme editre edi-nam se owo ekemede ndinam man enyene eti nsɔŋidem. Ke ukem ini oro, ikpikpu ye ndikabare nyire ke ndaha idem, uyai, mme ɔfɔŋ ekeme ndidi oruk nsɔŋ-ibuot ke ebede ndaha, anamde owo ndikpono enɔ Abasi utu ke ekponode Abasi.
Ke akpatre, ndibuk ŋkpɔ-ekɔŋ nsɔŋ-ibuot nnyin ye Abasi ɔwɔrɔ ndinyime nnɔ udɔŋ Edisana Spirit, osio idiɔk owo-obot efep onyuŋ akabare edi “edisana owo oto ke erisio-isop Christ.” Oro ɔwɔrɔ ndinim akpa mbet nte akpa-ŋkpɔ ke uwem nnyin. Oro ɔwɔrɔ ndiyak Abasi akara. Edieke ima nnyin nnɔ Abasi ye ubiere nnyin ndinam ŋkpɔ nnɔ Enye ke ofuri ukeme, esit, ye odudu nnyin akabare edi idiɔŋɔ emi nnyin ikpede-ikpe ofuri ŋkpɔ inyuŋ inam ofuri ubiere nnyin, nnyin iyebuk ŋkpɔ-ekɔŋ nsɔŋ-ibuot nnyin. Otode ke mfɔn Christ, Abasi eyefen mme idiɔkŋkpɔ ye nsɔŋ-ibout nnyin eke ini edem ndien eyemen ntɔi idiɔkŋkpɔ ye nsɔŋ-ibuot oro esio ke esit nnyin. Ke ini akade, Enye eyemen udɔŋ idiɔk ekededi nte Enye akanamde ye mme akabare-esit mbon Lamanite eke ini edem. Ke oro ebede, nnyin ŋko “[idi] duɔhɔ ikpɔŋ usuŋ aba.”
Ndibuk ŋkpɔ-ekɔŋ nsɔŋ-ibuot nnyin ada ekesim asaŋa-asaŋa idara. Ye kpukpru mbon ekekabarede esit etiene Abasi, eda nnyin “ete idikwɔ [ikwɔ] ima erifak.” Ete nnyin ke Enyɔŋ ye Eyen Esie, Andifak nnyin, ema esɔŋɔ anan-utit ubiere Mmɔ enɔ akpatre inemesit nnyin ke ata iŋwaŋ-iŋwaŋ ima ye nwaidem. Nnyin imikut ima Mmɔ ke ofuri usen. Ke akpanikɔ nnyin imikeme edisio-ubiɔŋ oro ke ima ye nsuk-ibuot nnyin. Yak nnyin—ibuk, ɔtuŋɔ, enehede ɔtuŋɔ—ŋkpɔ nsɔŋibuot ekededi ye Abasi ke uwem nnyin ndien ikpuhɔ oro ye edinyime esit ye edinyime uduak. Ke enyiŋ Jesus Christ, amen.