Lisi o Manatu

Mafuta Faatasi [i le Fiafia]

O le gaoioiga o le afiafi faaleaiga o loo sologa lelei lava i le aiga o Padro i Santiago Chile. O loo faaputu maualuga laau afitusi i atigi faguinu i luga o le laulau. Ua oo i le taimi o Andrea e 16 tausaga, ma o mata uma ua taulai atu i ona lima ao taumafai ma le faaeteete e faatulaga se isi laau afitusi i luga o le faaputuga e le o mautu. Ua leai ma se isi e toe pisa.

“Faaeteete!” o le valaau mai lea a Javier e 13 tausaga, ua tete’i ai tagata uma ma mafua ai ona toeitiiti pau le faaputuga ia Andrea.

Mo sina taimi, e foliga mai o Javier o le a tupu ai se faaletonu, ae i le toe maua ai o lana manava, sa faatasi ai Andrea i le talieega.

I le nonofo ai o tagata e toa iva i se fale e tasi, “e mautinoa lava” o le a i ai ni faafitauli mai lea taimi i lea taimi. Tusa lava pe faapei lou aiga, o le galulue faatasi e le o se mea e masani ona faigofie.

O Francisco ma Vivian ma le la fanau—Andrea, Francisco, Vivian, Javier, Sebastian, Elizabeth, ma Augustin—sa faaaluina se taimi talu ai nei e faasoa mai mea ua latou faia e faamalosia ai la latou mafutaga.

O Mafutaga e Manaomia ai le Taimi

Ia i ai se taimi mo isi. Lagolago ou uso ma tuafafine ia latou taaloga, mea e tutupu, po o faafiafiaga.
Aai faatasi i le tele o taimi e mafai ai.
Ia avea afiafi faaleaiga o se tulaga taua.
Faatulaga se aso o le vaiaso e fai faatasi ai se gaoioiga faaleaiga.
Kuka, faamama, tatalo, taaalo, ma talie faatasi.
Ia saunia i soo se taimi. A maua loa se taimi e faatasi ai ae e le’i fuafuaina, faia loa se mea malie.

O Mafutaga e Manaomia le Fesootai

Ia i ai se taimi e talanoa ai. Ia faia fono faaleaiga ma faatalanoaga a matua ma fanau.
Suesue tusitusiga paia. O iina e amata ai talanoaga sili [ona lelei].
O le matamata faatasi i le televise po o se ata tifaga e mafai ona fiafia ai, ae o se sui le lelei mo faatasiga ma fegalegaleaiga.
Pe a tulai mai se feeseeseaiga, e mafai ona fesoasoani se tagata e le o aafia i feeseeseaiga e faia le faaleleiga.

O Mafutaga e Manaomia le Auauna Atu

Afai o se tasi ua i ai se faafitauli, ia fefaasoaai uma lava i ai.
Saili ni auala e auauna ai le tasi i le isi, ae maise lava o se tasi o loo i ai sou faafitauli ia te ia.
Saili ni auala e mafai ona auauna atu ai faatasi o se aiga.
“Aua pe faapefea ona iloa e le tagata le alii e lei auauna i ai o ia, o le tagata ese foi ia te ia, ma ua mamao i manatu ma manao o lona loto?” (Mosaea 5:13).