Ua Faamanatuina e le Fale Mataaga i se Faaaliga Aafiaga i Taavaletosolima

E Manatua Uili ma Matini: O se Faamalo i Paionia o Taavaletoso Mamona, o se faaaliga e faamamaluina ai aumalaga o taavaletosolima ua taua o le Uili ma Matini ma faamanatuina ai le faailogaina o le 150 o tausaga o le uluai taavaletosolima sa malaga i luga o le toafa, lea faatoa tapunia i le Fale Mataaga o Talafaasolopito ma Faatufugaga a le Ekalesia ina ua maea se faaaliga manuia mai ia Setema 2006 ia Ianuari 2007.

O le faaaliga, lea sa i ai ni ata vali ma ni faatagata e faaalia ai le aumalaga o taavaletosolima a Uili ma Matini lea sa taia e le afa aisa i luga o le toafa o Wyoming ao faimalaga atu i Iuta i le 1856, e mafai ona maimoaina i luga o le Uepi saite a le fale mataaga (www.lds.org/ churchhistory/museum).

“E toetoe o vaega uma o le faaaliga o loo i ai ni faamatalaga mai se tasi o paionia po o latou sa faasaoina,” sa faapea mai ai le pule o le fale mataaga o Robert Davis. “E le mafai ona ou mafaufau i se isi auala sili ona malosi e ta’u atu ai lenei tala nai lo faamatalaga a i latou sa aafia ai. O faamatalaga ma galuega a ata ua faatupuina ai se lagona alofa ma le faaaloalo mo nei tagata faatuatua, o e sa gafataulimaina faigata matautia ma na mafaia i le faatuatua maoae i le Atua.”

O le faaaliga na mulimuli lava i le malaga faigata a paionia agai i Iuta, mai le malaga atu i vaa i Egelani i le asaina o toafa aisa o Iowa ma Nebraska. O le faaiuga o le faaaliga o loo faaalia ai le lagona faafouina o le faamoemoe ao aumaia ma le saogalemu e le au laveai malolosi ia paionia ua lailoa o taavaletosolima i le Aai o Sate Leki.

O le tausaga 2006 ua faailoga ai le 150 tausaga talu ona taunuu le uluai taavaletosolima a le aumalaga i le vanu o Sate Leki, ma o le faaaliga fou ua faamanatuina ai lena aso taua. Sa saunoa Peresitene Gordon B. Hinckley i le konafesi aoao ia Oketopa 2006 e uiga i na faigata sa feagai ma paionia e faapea: “O lo latou faatuatua o la tatou lea e mauaina. O lo latou faatuatua o se faamanatu ia i tatou o le tau sa latou totogiina mo le manuia ua tatou sapi ai” (“O Le Faatuatua e Fuli ai Mauga,” Liahona, Nov. 2006, 84).

O nisi o tusiata o loo faaalia a latou galuega i le faaaliga, e tupuga sao mai lava i paionia ma le au laveai o le aumalaga a Uili ma Matini.

O le ata vali a Stephen Mark Bartholomew o loo faaalia ai le tina o le tina o lona tina matua ma lona uso ao talavou, o loo fai alala i le kiona. I ana suesuega, sa ia iloaina ai o nei tamaitai sa tosoina se tasi o taavaletosolima e lua a le aiga i le auala atoa i luga o le toafa seia oo ina taunuu le au laveai e latalata i le Devil’s Gate.

O le tusiata o Glen Hawkins sa valiina le ata o lona tuaa o Ann Jewell Rowley, o se tamaitai ua maliu lana tane, o loo tosoina se taavaletosolima i luga o le kiona ma sa fesoasoani i ai lana fanau e toafitu, sa latou faimalaga i le aumalaga a Uili.