Manatu Faaopopo mo Taimi o Fetufaaiga, Fepuari 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Fepuari 2007. Mo lesona, faatonuga, ma gaoioiga e o faatasi ma nei manatu, tagai “O Le A Ou Mulimuli ia te Ia i le Faatuatua” itulau U4 ma le U5 o le itulau a tamaiti i lenei lomiga.

Ia faia se faaaliga e faailoa ai nisi o mea matagofie o le fogaeleele. E mafai ona e faaalia ni ata o ni meaola, fugalaau, laau toto, ma ni meaai. Fai i tamaiti e mafaufau e uiga i le lalolagi matagofie o loo tatou ola ai. Ao taina e le ta piano se pese faaaloalo, pasi faasolo se fugalaau, ma fai atu i tamaiti e vaavaai ma le faaeteete i ai. Matau mea pei ni uaua, galemulemu, ma le manogi manaia. Fai i tamaiti, “O ai na faia le fugalaau?” (O Iesu Keriso—o se vaega o le Foafoaga.) Fesili, “Aisea na Ia faia ai le fugalaau?” (Ona e alofa o Ia ia i tatou ma manao ina ia tatou nonofo i se lalolagi matagofie.) Lu’i i latou e manatua le alofa o le Tama Faalelagi i taimi uma latou te vaai ai i se fugalaau.

Tuuina atu i tamaiti taitasi se fasi pepa ma ni vali. Fai i ai e tusi se ata o se mea se tasi o le foafoaga a le Atua ao tataina lemu le piano. Pe a maea ona tusia ata a tamaiti, ia faapipii a latou ata i le potu o le Peraimeri.
Fesili i tamaiti po o le a le uiga o le vavega. (O le vavega o se mea maoae po o se mea e seasea ona tupu ma e faigata lava ona faamatala manino. E faaalia ai le mana o le Atua.) Tuu atu ia i latou e faasoa mai ni faataitaiga o ni mea e mafai ona avea ma ni vavega, e pei o le la e le goto i le po, po o le manai sa vaaia i luga o le eleele i taeao taitasi. Vaai i le 2 Nifae 27:23. Faailoa atu mea e lua: o le Atua o le Atua o vavega ma e galue o Ia e tusa ai ma lo tatou faatuatua.

Vaevae tamaiti i ni vaega se fa. I ni nai aso ao lei oo i le Peraimeri, fai i ni taitai se toafa o le Peraimeri e talanoa e uiga i se vavega sa faia e le Alii ao i ai i luga o le fogaeleele. Mo se faataitaiga, talanoa pe faapefea ona ia faamamaina lepela e toa 10 (tagai Luka 17:12–19), faamalolo se tagata tauaso (tagai Mareko 8:22–26), ma faapena ai lava. Faaaoga nofoaga e fa (tagai “Nofoaga,” O Le Aoao Atu, E Leai se Isi Valaauga e Sili Ai [1999], 179), ma faapea ona fesuisuiai tamaiti i nofoaga taitasi. Fai atu i taitai taitasi e faamatala o Iesu Keriso sa faia vavega e faaalia ai Lona mana ma faamanuia ai tagata. Fai atu ia i latou taitoatasi ina tuuina atu se molimau e uiga i le Faaola.
Faatinoina o le Pese: “O Lo’u Atalii Pele Lenei” (Liahona, Tes. 1997, U4). E mafai ona e aoaoina lenei pese i ni vaiaso sosoo, ma gauai atu i le tala o loo iai i fuaiupu taitasi. Vaevae tamaiti i ni vaega se tolu. Tuuina atu i vaega taitasi se tasi o mau e tolu o loo lisi i le pito i lalo o le itu taumatau o le musika: Mataio 3:16–17; 3 Nifae 11:6–8; Talafaasolopito—Iosefa Samita 2:17. Fai i tamaiti ia faalogo ina ia maua po o a ni mea e tutusa ai fuaiupu. I nei mau, o loo faailoa mai ai e le Tama Faalelagi Lona Alo ma tuuina mai le molimau mo Ia. Usu le laina mulimuli o le pese, “O Lo’u Atalii Pele Lenei. Faalogo i ai!” Ia outou usu faatasi ma tamaiti ia laina mo ni nai taimi. Fesili po o le a le mea sa tupu i le mau muamua sa latou faitauina (Ua papatisoina Iesu). Faaali atu le ata mai le Tusi Ata 208 (O Ioane le Papatiso ua Papatisoina Iesu) ao e usuina le fuaiupu muamua. Ia usu faatasi ma tamaiti pe a e usuina le laina mulimuli. Toe fai, i le tuuina atu lea i tamaiti latou te usuina uma upu. Fesili po o le a le mea sa tupu i le mau lona lua (Sa faaali atu Iesu ia sa Nifae). Faaali le Ata 315 (Ua Faaali le Faaola ia sa Nifae) ao e usuina le fuaiupu lona lua. Ia faapea foi ona toe usu faatasi ma tamaiti pe a e usuina le laina mulimuli. Fesili po o le a le mea sa tupu i le mau lona tolu (Sa faaali atu le Tama Faalelagi ma Iesu ia Iosefa Samita). Faaali atu le Ata 403 (O Le Uluai Faaaliga) ao e usuina le fuaiupu lona tolu. Ia faapena foi, ona usu faatasi ma tamaiti pe a e usuina le laina mulimuli. Faamatala atu o le taimi lea o le Tama Faalelagi ua sili atu i lo le na o se leo mai le lagi—Ua i ai o Ia iina! Ia sue uma e tamaiti le MFF 18:34–36. Fai atu ia i latou e faalogo ma tali le fesili, “O ai isi e mafai ona faalogo i le leo o lo tatou Tama Faalelagi?” Usu le fuaiupu mulimuli e maua ai le tali.