E Le Tuuatoatasi Lava

Saunia e Anne Grenzebach

Sei faapea ua e filifili e auai i se lotu e ese mai i le lotu sa e ola mai ai. Sei faapea la o lea o le a e ta’uina atu i lou aiga. O le a sa latou tali mai? Pe latou te lagolagoina ea pe le fiafia ia te oe? Afai o le a aveesea la latou faauo, pe aoga ea le liliu atu i se isi faatuatuaga?

O nisi nei o popolega sa feagai ma au i ni nai tausaga ua tea ao ou suesueina le Ekalesia. Sa fautua mai ia te au se uo ou te mulimuli i lo’u loto ma talitonu o le Alii o le a fesoasoani mai ia te au e manumalo mai lo’u fefe i le teena ai e aiga ma uo. Faatasi ai ma lena faatuatua faatauvaa, sa ou agai ai i luma ma ou papatiso loa ia Aperila 2002.

I le avea ai na o oe o se tagata o le Ekalesia i lou aiga e le o se auala faigofie. E leai se lagolago mai lou aiga e fesoasoani ia te oe e tausia au feagaiga, faitau au tusitusiga paia i aso taitasi, ma faia gaoioiga laiti e faaauau ona atiina ae ai lau molimau. O le tumau ai i le fiafia i le talalelei o lau lava lea matafaioi toatasi. I le avea ai na o a’u o se tagata lotu i totonu o lo’u aiga, sa ou maua ni mea sa avea ma malosiaga i lo’u auai atoatoa i mea fai i totonu o le Ekalesia, fetufaai atu le talalelei i isi, tulimatai atu i galuega faalemalumalu, ma le le aveesea o lou faamoemoe e i ai se aso e auai ai lo’u aiga i le Ekalesia.

Lagolago i taimi o Feteenaiga

Ou te lei faia lava se tulaga matuia e le fiafia ai lo’u aiga seia oo ina ou auai i le Ekalesia. Ina ua ou auai [i le Ekalesia], sa ou iloa ua latou manatu ua ou faalataina i latou, ma sa ou lagona le leaga o le faatiga tele ia i latou. Sa faaauau pea ona ou auai i le Ekalesia aua sa ou iloa i lo’u loto o le mea lea o loo finagalo i ai le Atua mo au—ma i latou.

Ou te lei nofo latalata i lo’u aiga i lea taimi. O taimi uma ou te asiasi ai i lo’u aiga, e feiloai lava ma faitioga ma taufaaleaga. Sa faateleina lea tulaga ina ua ou filifili e faia se misiona. Sa faapea mai lo’u tinamatua ma loimata, “Lau tama e, Annie, afai o le a e faia lenei misiona, o le a e tata’e lo’u fatu.” Sa ou tau atu ia te ia o le misiona o se mea ua musuia ai au e fai, ma afai ou te le auauna atu, ua ou le usitai i le Tama oi le Lagi.

A’o ou sauni mo la’u misiona, sa ou maua le mafanafana ma le malosi i totonu o lo’u aiga i le uarota. Sa latou faia se galuega maoae i le fesoasoani ai ia te au e faamasani i suiga o le olaga e oo mai i le avea ai ma tagata o le Ekalesia, ma sa latou tuuina mai ia te au le lagolago i le feagai ai ma feteenaiga i lo’u aiga. Sa ou iloaina e faigofie ona faaauau e ui i faigata e ala lea i le auai atoatoa i totonu o le Ekalesia e ala i valaauga, gaoioiga, ma le alu i talaiga ma faifeautalai. E le gata i lea, sa ou nofo latalata i Palmyra, Niu Ioka, o le mea lea e masani ai ona ou maua le avanoa ou te nofonofo ai i le Togalaau Paia, ma mafaufau loloto i lo’u tulaga ma saili le filemu.

Auauna Atu i Aiga

E ui sa ou maua le lagolago mai lau uarota, sa ou lagona pea le le fiafia ma le le malamalama o lo’u aiga. O mea uma ua latou iloa e uiga i le Ekalesia sa latou aoao mai i nisi e le auai i le Ekalesia, ma latou te le taliaina se mea ou te tauina atu ia i latou. Sa ou taumafai e talanoa atu ia i latou e uiga i le talalelei ma faasa’o o latou manatu sese, ae foliga mai e le mafai ona ou manumalo i le taunuu ai i se tulaga femalamalamaai. O le va ua matou va ai ma e pele ia te au ua faalauteleina, ma sa ou le iloa pe faapefea ona faaitiitia. Ina ua ou alu ese mo la’u misiona i Virginia, na toe itiiti lava a leai so’u faamoemoe o le a faaalia e lo’u aiga se fiafia i le Eklaesia.

Sa faaauau au taumafaiga e fetufaai atu le talalelei e ala i a’u tusi i lo’u aiga. Sa ou manatua lo’u valaauliaina o lo’u tama e feiloai ma faifeautalai. Sa ia fai mai ma le manino e le fiafia i ai. I le faitau i ai i lana tali i a’u tusi, o se tasi lea o aafiaga sa sili ona faigata o lau misiona, ae sa aumai ai ia te au le naunautaiga e galue malosi ma faasoa atu le talalelei i soo se tasi e naunau e faalogo. Sa ou iloa o tagata uma i se tasi o aiga o se tagata o le Ekalesia ma o lo’u fesoasoani i se tagata e toatasi atonu ua ou tali atu ai i se tatalo a se isi tagata. Sa ou taumafai e faaauau i au taumafaiga e faasoa atu le talalelei, e ui ua le o toe avea au ma se faifeautalai faamisiona.

Faamanuiaga e auala mai le Malumalu

Ina ua tulai Elder Henry B. Eyring o le Korama a Aposetolo e Toasefululua e saunoa i le konafesi aoao ia Aperila 2005, sa ou lagonaina se faalogona malosi e tatau ona ou faalogo ma le totoa i le mea o le a ia saunoa mai ai. Sa amataina lana lauga i upu nei: “O lau savali e mo i latou e liliu mai i le Ekalesia… . E le o outou o se vaega toaitiiti o le faitau aofai o le Ekalesia. Ou te fia fai atu ia te outou e alofa tele ma faatuatuaina outou e le Alii. E le gata i lena, ae ou te fia tau atu foi, o loo matua faalagolago mai o Ia ia te outou.”¹

Sa ia saunoa i e liliu mai i le le tatau ona taofia le taumafai e faasoa atu le talalelei i o latou aiga. Ona ia faamalamalama mai lea, o se tasi auala taua o galuega talai i totonu o le aiga o galuega faalemalumalusa.

O upu a Elder Eyring na musuia ai au e faia ni sini e uiga i le auai atu i le malumalu ma galuega o talafaasolopito o aiga. Ua ou fiafia tele i le aveina atu o igoa o lo’u aiga i le malumalu ma ua maua ai ni faamanuiaga maoae e le’i mafaufauina i lea tulaga. Ua matua faateleina ai lo’u sootaga ma i latou o loo i le isi itu o le veli. Ua ou vaaia ni vavega ao ou taumafai e saili o latou igoa, ma lagonaina lo latou faatasi mai ao faia o latou sauniga.

O se tasi faamanuiaga na oo mai ina ua ou vaai i lo’u tinamatua mo le taimi muamua ina ua maea lau misiona. Sa ia tuuina mai ia te au se lisi o igoa e aveina atu i le malumalu. Sa ia talanoa mai foi i lona manao e faitau le “Tusi a Mamona” aua sa ia manatuaina lona tama o ia faitauina. O lea la ua ia valaau mai ai ia te au i vaiaso uma e talanoa e uiga i mea sa ia aoaoina i le Tusi a Mamona.

Ae ou te lei tuua lo’u aiga mo lau misiona, sa ou maua se faalogona o le toalua o lo’u tinamatua—lea na maliu i le 1996, ae ou te lei auai i le Ekalesia—o loo taumafai e fesoasoani ia faamaluluina lona agaga. Ao ou i ai i le Nofoaga e Aoao ai Faifeautalai, sa faia ai galuega faalemalumalusa a faifeau a lau itu. A’o ou nofonofo i le potu selesitila, sa ou matua maofa lava i le manatu ua faatasi uma mai iinei lo’u aiga. Ou te manao e mafaufau o loo faia e lo’u tamamatua mea uma na te mafaia e fesoasoani ai i lo matou aiga ia talia le talalelei.

Faaauauina i le Faamoemoe

Na sau lo’u tina ma te o atu ina ua maea la’u misiona, ma na tupu lenei mea ia Oketopa i le faaiuga o le vaiaso o le konafesi aoao. Sa ma matamata i sauniga e tolu o le konafesi ma sa matua fiafia lava o ia i ai, o lea na ia fai mai ai mo se DVD o sauniga ia mo le Kerisimasi. Ia te au, o lenei mea o se vavega e faailoa mai ai ia te au e le tatau ona aveesea le faamoemoe.

I le taimi nei, e leai se isi o lo’u aiga ua faaalia se tele o lona fiafia i le auai ai i le Ekalesia, ae ou te lagona o le a tupu i se aso—a le o lenei olaga o le isi. O la matou sootaga ua faateleina ma ua ou iloa e le mai i au lava taumafaiga ae mai i galuega a le Agaga. E faamanuia e le Tama Faalelagi i tatou i vavega ma manaoga amiotonu o o tatou loto pe a tatou taumafai e faia Lona finagalo. Ua ou lagonaina Lona malosi ma le lagolago e agai i luma, ma ua ou iloa o le a le tuua lava na o au i Lana Ekalesia moni.

Pe afai ua tuua na o oe

Saili le mafanafana ma le malosi i totonu o lou aiga i le uarota po o le paranesi.
Saili le filemu ma le faasinoala e ala i le tatalo.
Faasoa atu le talalelei i isi. Ia manatua o tagata uma e i ai se aiga, ma e mafai ona avea oe o se tali i se tatalo a se isi tagata.
Auai i galuega o talafaasolopito o aiga ma le malumalu.
Aua nei aveesea le faamoemoe e i ai se aso e talia ai e lou aiga le talalelei.