Ua Faamanatuina e Tagata o le Ekalesia le 200 Tausaga o le Soifua o Oliva Kaotui
O le 200 tausaga talu ai i le aso 3 o Oketopa, 1806, sa fanau ai Oliva Kaotui, o se tasi o Molimau e Toatolu i le Tusi a Mamona, i le taulaga o New England o Wells, Vermont. O tagata o le Ekalesia i Vermont ma tagata o le taulaga, sa faailogaina lea tulaga i le aso 23 o Setema e ala i le faatasi ai i le falesa Metotisi ma latou faalogologo ai i ni saunoaga mai se polofesa o mataupu tau le talafaasolopito mai le Iunivesite o Polika Iaga ma le peresitene o le Siteki a Montpelier Vermont.
O le faafiafiaga sa fuafuaina e faia i le malae o le taulaga, ae peitai ane na timu ma sa manaomia ai le faia i le falesa, lea sa faatasi ai le Faafeagaiga o David Adams, o le faifeau o le ekalesia, ma Ron Bremmer, o le taitaifono o le komiti filifilia a le taulaga (e tai tutusa ma le pulenuu).
“I Vermont, sa aoao ai e Oliva ia R e tolu o le (reading) faitautusi, (‘riting) tusitusi, ma le (‘rithmatic) numera; ina ua ia alu ese atu, na ia aoao e uiga i isi R e tolu: (restoration) toefuataiina, (revelation) faaaliga, ma le (reconciliation) toe faaleleia,” sa saunoa ai Fred E. Woods, o le polofesa o le talafaasolopito ma mataupu faale-Ekalesia.
O le faamatalaga tuu faatasi a Oliva Kaotui, Tavita Uitimera ma Matini Harisi o loo i le faatomuaga o le Tusi a Mamona, ua faamautuina ai le faaaliga mamalu lea sa faaali atu ai e le agelu ia i latou papatusi o le Tusi a Mamona. O Oliva o le “toeaina lona lua” o le Ekalesia toefuataiina (tagai MFF 20:3) ma o se tasi o tagata e toaono na faavaeina le Ekalesia, sa faailoa mai ai e Brother Woods.
“Sa avea Oliva ma failautusi a Iosefa Samita i le [faaliliuina] o le Tusi a Mamona, lea ua avea nei ma se tasi o tusi ua sili ona i ai sona aafiaga o tusi i totonu o Amerika,” sa ia faaauau ai. “O lea, i lenei aso ua tatou faamanatuina se tagata e toatasi e le gata ua ia faa-aafiaina le talafaasolopito ma aoaoga faaMamona ae ua faapea foi ona ia fausia talaaga ma mataupu tau lotu o Amerika.”
Sa tulimataia e Brother Woods mea na tutupu i le olaga o Oliva, e aofia ai lona nofo ai faatasi ma le aiga o Samita o se faiaoga mai le 1828 i le 1829 i le taulaga o Manchester, Niu Ioka, ma le la feiloaiga ma le Perofeta; o lona i ai faatasi ina ua toefuataiina mai e avefeau paia le Perisitua Arona ma le Mekisateko; ma lana galuega taua i le faaliliuina ma le lolomiina o le Tusi a Mamona.
I le tuuina mai o le MFF vaega 6, sa faailoa mai ai e Brother Woods o Oliva sa fautuaina ina ia “aua le saili i oa a o le poto” (f. 7), ma o le a avea o ia “ma ala o le faiga o mea lelei e tele” (f. 8), ma o lona mafaufau tuufesili ua taunuu ai i faaaliga (tagai ff. 14–17, 21–24).
“Sa tauivi Oliva ma le agasala masani o le mimita, e pei ona tatou faia uma lava mai i lea taimi i le isi,” sa faapea mai ai Brother Woods. “Sa aveesea lona igoa ma le Ekalesia ia Aperila 1838 mo ni mafuaaga eseese, lea sa aofia ai ma le le lagolagoina o le faatulagaga o le Ekalesia.”
Sa faaaogaina e Brother Woods se faamatalaga sa tusia e Elder G. Homer Durham (1911–85) o le Fitugafulu lea sa tusia “o le mea sa foliga o se tuuaiga sese, fenumiai ma le le malamalama sa tupu mai i le faatauina o se fanua, lea na oo ai lava i lona musu e oo atu i luma o le aufono a le Ekalesia.” Fai mai Brother Woods, “O i latou uma sa aumaia lenei moliaga ua faapea ona aveesea o latou pepa faamaumau ma sa mulimuli ane avea ma fili o le Ekalesia.”
I le tele o tausaga na sosoo ai, sa galue ai Oliva o se loia, e faamautu lava i Tiffin, Ohio, ma i lea taimi atoa na te lei faafitia lava lana molimau tusitusia o le Tusi a Mamona, e ui lava i se tasi taimi sa fesiligia ai o ia i lenei mataupu i totonu o se potu faamasino e se loia sa tetee, na toe faamatala mai ai e Brother Woods.
“I se vaitaimi e ono tausaga (1842 i le 1848), o Phineas Young, le uso o Brigham Young ma o le uso faaletulafono o Kaotui (Phineas na faaipoipo ia Lucy le tuafafine e tama faatasi ma Oliva), sa faaauau pea ona tusi atu ma asiasi atu ia Oliva,” sa fai mai ai Brother Woods. “I le taimi lava lea e tasi, na i ai i taitai o le Ekalesia se lagona alofa mo Oliva. Mo se faataitaiga, o Williard Richards, lea sa tausia tusi o talaaga o Iosefa Samita, sa faatonuina e Iosefa i le tautotogo o le 1843 ina ia ‘tusi atu ia Oliva Kaotui ma fesili atu ia te ia pe e lei lotomaualalo lava, pe e lei matuai saunia ea e toe foi mai.’ Sa auina atu e le [Korama a le] Toasefululua se tusi ia Oliva faatasi ma se valaaulia ina ia toe foi mai i le Ekalesia, faatasi ai ma isi mea, sa tau atu ai, ‘Ua saunia ou uso e taliaina oe… . Ua e iloa lava lou nofoaga mautu e tatau ona avea ma Siona.’”
Sa tali mai ma le faaaloalo Oliva ae e lei saunia lelei o ia mo le toe avea ai ma se tagata o le Ekalesia, ona sa ia manatu o le tulaga i le aafiaga o le aveesea ai o ia ma se tagata o le Ekalesia e lei matuai suesueina i le auala tonu, sa toe saunoa ai Brother Woods.
Ia Oketopa 1848, sa asiasi atu ai Phineas Young i le aiga o Kaotui i lo latou fale i Elkhorn, Wisconsin, sa ta’ua ai e Brother Woods. Sa ia aveina atu Oliva, o lona toalua, ma lona afafine e toatasi o loo soifua o le toaono o le fanau i Kanesville, Iowa, ina ia auai i le konafesi faalenuu a le Ekalesia. O iina, sa lauga ai Oliva i le faatasiga toeitiiti 2,000 tagata ma sa talosagaina ai pepa faamaumau i totonu o le Ekalesia. I vaiaso na sosoo ai, sa talia ai o ia ma le atoatoa ma na toe papatisoina ai i le aso 12 o Novema, 1848.
O lona naunau e faatasi ma le tino o le Ekalesia i le Vanu i Sate Leki ma amataina se pisinisi o laau-aina, sa muamua ai ona ia aveina atu lona toalua e asiasi i lona aiga, le au Uitimera, i Richmond, Missouri. Sa afaina lona soifua maloloina ma ua le mafai ai ona faataunuuina le malaga agai i sisifo, ma sa maliu ai o ia i le aso 3 o Mati, 1850. Sa tau mai e Brother Woods se faamatalaga a Tavita Uitimera, o le uso- faaletulafono o Oliva e faapea: “Sa maliu Oliva o se tagata sili ona fiafia ua ou vaai i ai. Ina ua maea ona faatalofa ma le aiga ma sogi atu i lona toalua ma lona afafine, sa ia faapea mai, ‘O le taimi nei o le a ou taoto ai i lalo mo le taimi mulimuli; o le a ou alu i lo’u Faaola,’ ma sa ia maliu loa lava ma ona foliga ataata.”
Sii mai le Church News, Set. 30, 2006; o faamaumauga o le talaaga i le soifua o Oliva Kaotui sa aumai i le lauga a Fred E. Woods, “O le a se Isi Molimau Sili e Mafai Ona E Maua I Lo Lea Mai le Atua?” o se lauga sa faia i le aso 23 o Set. 2006 i Wells, Vermont, na faamanatuina ai le luaselau tausaga o le soifua o Oliva Kaotui.