O Le Samaria Agalelei: O Faatusa Faagaloina
O se tasi o tala e tele sona aafiaga sa faamatalaina e Iesu Keriso o le faataoto lea i le Samaria agalelei. Sa toe faamatalaina e Iesu lenei faataoto i se tasi sa fesili, “Le aoao e, se a se mea ou te faia e maua ai le ola e faavavau?” Sa tali atu Iesu e ala i le fesili, “O le a ea ua tusia i le tulafono?”
Sa tali atu lenei alii, i le faailoa atu lea o le Teuteronome 6:5 ma le Levitiko 19:18, “Ia e alofa atu i le Alii lou Atua ma lou loto atoa … ma le lua te tuaoi e pei o oe lava ia te oe.”
Ina ua folafola atu e Iesu, “Ia e faapea ona fai, e te ola ai,” sa tali atu lenei alii ma le faafiatonu, “O ai foi le tagata ma te tuaoi?” I le tali atu i le fesili a lenei alii, sa faamatala ai e Iesu le faataoto i le Samaria agalelei. (Tagai Luka 10:25–35.)
O Vaega Loloto o Uiga
Sa masani ona fetalai le Faaola i faataoto ona o nei tulaga taitasi e i ai uiga loloto e malamalama i ai na o i latou e i ai “taliga e faalogo ai” (Mataio 13:9). Sa faamautu mai e le Perofeta o Iosefa Samita, o e e le talitonu sa le malamalama i faataoto a le Faaola. “Ae i ona soo sa Ia tau atu ma le auiliili [faataoto] ma le manino,” ma tatou te malamalama i faataoto, i le aoao mai a le perofeta, “pe afai e matala o tatou mata, ma faitau ma le faamaoni.”1 O le iloa o le i ai o se uiga loloto i le faataoto e na o e e talitonu e malamalama i ai e valaaulia ai ni manatu i le savali faafaatusa o le Samaria agalelei. I le malamalama o le talalelei a Iesu Keriso, o lenei tala faamalosiau ua matagofie ai le faamatalaina i se tala itiiti, le ata o le faaolataga i ni auala e toaitiiti le au faitautusi o nei aso e mafai ona o latou iloa.
O mea o loo taua i lenei faataoto o loo manino o ni mea moni o loo faatinoina i ona uiga, ae o se tu ma aga faamamaluina Faakerisiano ua faapea ona vaai ai i le faataoto o se faatusa e aoao mai ai ni uiga taua i le Pau ma le Faaolataga o le tagata. O lenei malamalama Faakerisiano o le Samaria agalelei o loo faaalia i se falesa tautaua o le seneturi sefulutasi i Chartres, Farani. I se tasi o ona faamalama valivali o loo faaalia ai le tulieseina o Atamu ma Eva mai le Faatoaga o Etena i le pito i luga o le faamalama, ma, i le faaalia o le sootaga o nei tala e lua, o le faataoto i le Samaria agalelei o loo i le pito i lalo. O lenei mea ua faailoa ai “ni faailoga faaliliuina o le faataoto a le Alii lea sa lauiloa i le Vaitausaga o le Taulotoa’iga.”2 O le vaai ai i lenei faamalama ua oo mai ai ia te au le manatu: o le a le mea a le Pau o Atamu ma Eva e fai i le faataoto e uiga i le Samaria agalelei?
E lei umi ae ou mauaina le tali.3 O le mafuaaga o le faaliliuina o lenei faatusa e oo le loloto i le amataga o le Faakerisiano. I le seneturi lona lua A.D., sa vaaia e Irenaeus o Farani ma Clement o Alexandria le Samaria agalelei o se faatusa o le Keriso lava Ia o loo faaolaina i latou o e ua pauu, ua mafatia i agasala. I nai tausaga mulimuli ane, o se tasi o tamaiti aoga a Clement o Origen sa ia taua o lenei faaliliuga sa oo mai ia te ia mai Kerisiano sa i ai muamua, o e sa latou faamatalaina lenei faatusa e faapenei:
“O le tagata na alu ifo i lalo o Atamu. O Ierusalema o le parataiso, a’o Ieriko o le lalolagi. O le au gaoi o le malosiaga leaga. O le ositaulaga o le Tulafono, o le Sa Levi o le perofeta, ma le Samaria o Keriso. O manuaga o le le usiusitai, o le manu o le tino lea o le Alii, o le [faletalimalo], lea e talia uma e mananao e ulu atu i ai, o le Ekalesia… . O le pule o le [faletalimalo] o le ulu lea o le Ekalesia, lea ua tuuina i ai le faatuatuaga mo le vaaia. Ma o le mea moni e pei ona folafolaina e le Samaria o lona toe foi mai o le faatusa lena o le toe afio mai faalua o le Faaola.”4
O lenei faitauga faafaatusa sa aoaoina e le gata i e na mulimuli ia Iesu anamua, ae sa faapea foi i le aotelega atoa o le popofou o le Faakerisiano, lea sa lagolagoina e Irenaeus, Clement, ma Origen, mai le seneturi fa ma le lima e Chrysostom o Constantinople, Ambrose o Milan, ma Augustine i Aferika i Matu. O lenei faaliliuga o loo maua le tele i le lua o isi faamalama togitogia o le vaitausaga o le taulotoa’iga, i falesa i Bourges ma Sens i totonu o Farani.
O Le Faatusa ma le Ata o le Ata o le Faaolataga
O e faitau tusi e maua le tele o mea i le mafaufau loloto i tusitusiga paia, ae maise o nei tusitusiga o loo molimau ia Iesu Keriso (tagai Ioane 5:39). O le faataoto i le Samaria agalelei o loo molimau ia Keriso. O loo aoao mai ai le ata o le faaolataga, le alofa togiola o le Faaola, ma la tatou malaga agai i le mauaina o le ola e faavavau. E mafai ona faitauina o se tala e le na o se tagata na malaga mai Ierusalema agai atu i Ieriko, ae faapea foi i latou uma sa o mai mai le afioaga o le Atua e nonofo i luga o le fogaeleele. O lenei uiga ua faaalia ai le tele o le manino i le malamalama o le talalelei a Iesu Keriso ua toefuataiina e ala mai i ana perofeta o aso e gata ai.
Se’i o tatou iloilo i vaega o le tala.
O se tasi tagata na alu ifo mai Ierusalema i Ieriko, ua maua o ia e tagata faomea
O se tasi tagata. Sa faatusa e uluai Kerisiano lenei tagata ia Atamu. O lenei sootaga atonu sa manino lelei i gagana anamua nai lo faaliliuga o aso nei. I le faaEperu, o le upu atamu o lona uiga “alii, tagata ola,” “o le pelulale o alii,” e faapea foi “Atamu” o se igoa talafeagai.5 O le mea lea, o Clement o Alexandria sa sao lava lana vaai o e mafatia i lenei tala faatusa e faatusa ia “i tatou uma.” O le mea moni sa tatou o mai uma lava i lalo nei o ni Atamu ma ni Eva, e faalagolago i tofotofoga ma fesuisuiaiga o le olaga faaletino: “Aua faapei ona oti uma ia Atamu …” (1 Korinito 15:22).
Alu ifo. O le tusitala Kerisiano muamua o Chrysostom sa vaai i lenei fuaitau le alu ifo o Atamu mai le faatoaga i lenei lalolagi—mai le mamalu i le tulaga o aso faisoo, mai le tulaga faalelagi i le tulaga faalelalolagi. O le tala i le Luka e 10 o loo faapea mai, o le tagata na alu ifo ma le loto i ai, ma le iloa o faafitauli o le a i ai i le malaga. E lei faamalosia e se tasi o ia e alu ifo i Ieriko. Sa ia manatu lava o le malaga e talafeagai ma faafitauli iloga o se malaga faapea i le auala lauleaga i ona po o Iesu.6
Mai Ierusalema. Na faamatala e Iesu le tagata na alu ifo e le mai se nofoaga masani ae mai Ierusalema. Talu ai ona o le mamalu o le aai o malumalu paia, na vaaia ai e uluai Kerisiano i lenei mea le manatu o lenei tagata sa alu ifo mai le afioaga o le Atua.
I Ieriko. O Ieriko ua faapea ona iloa ai i lenei lalolagi. I le sili atu ma le 825 futu (250 m) le maualalo mai le tulaga o le sami, o Ieriko o le nofoaga sili ona maualalo i le fogaeleele. O le malosi o lona tau malulu ua avea lea ma nofoaga e o mai i ai tagata e saili o latou lava fiafiaga, lea sa fausia ai e Herota se maota o se tupu, e feilafi ma taugata mo tafaoga. Ae ia iloa o le tagata malaga i le faataoto e lei oo i Ieriko ae osofaia e le au faomea. O lena tagata sa i ai i le auala faaifoifo i Ieriko, ae e le’i oo o ia i lalo.
Ua Maua. E faigofie ona iloa iinei se faatusatusaga i le tulaga o le pau faaletino ma le tulaga o le agasala a le tagata lava ia: “Ioe, ua solitulafono ma ua se tagata uma” (Alema 34:9).
Ua maua e tagata faomea. Sa eseese le vaai a uluai tusitala Kerisiano i le au faomea (po o le au gaoi) o le tiapolo ma lana autau faasatani, agaga leaga, po o ni faiaoga pepelo. O le upu Eperu mo le “gaoi” o loo faaaogaina e Luka, o loo tau mai ai o nei faomea o ni polofesa faatulagaina. Na osofaia le tagata malaga e se vaega o ni tagata gaoi faapolofesa faatulagaina lelei i se taupulepulega, o se sosaiete faatulagaina e faatino ma le manatu autasi lo latou faamoemoega.
ua latou toeseina ona ofu, ma fasi ia te ia, ua latou o, ua tuua ia, ua tali oti.
Ua toeseina ona ofu. Sa manatu le au uluai Kerisiano sa fetalai Iesu i se mea taua iinei. Sa vaai Origen ma Augustine i le aveeseina o laei o le tagata malaga o se faailoga o le aveesea o le tino ola pea ma le le faaleagaina o le tagata. Sa talanoa mai Chrysostom i le aveesea o “lona ofu o le tino ola pea” po o le “ofu o le usiusitai.” Sa tau mai e Ambrose le “toeseina o le ufiufi faaleagaga o le alofa tunoa mai le tagata malaga lea sa tatou mauaina [uma] [mai le Atua].”
Sa faapea lava ona mananao le au faomea i lavalava o le tagata malaga, aua e le o taua mai se tamaoaiga po o ni oloa o loo ia aveina. Mo nisi mafuaaga, e foliga mai sa fiafia le au gaoi i ona laei, o se mea sa ave ifo mai le nofoaga paia ma o se mea sa latou moomoo ma mananao e aveeseina.
Fasi. O lenei fuaitau sa vaaia o se faatusa o tiga o le olaga, o faigata ma tiga o le agaga, ma aafiaga talu ai agasala ma amioga leaga eseese. O le mea moni, o fili o le agaga e tuua manuaga (tagai Iakopo 2:8–9). O le solitulafono e i ai ona aafiaga moni (tagai Alema 41:10).
Tali Oti. Ua o ese le au gaoi, ae tuua le tagata ma le mautinoa ua “tali oti.” E mafai ona tatou vaaia i lenei tulaga auiliili se faatusatusaga i le oti muamua ma le oti faalua. Ua pau le tagata, ua afaina i le agasala ma ua tigaina i le oti muamua, ma ua i ai i se tulaga faalelalolagi. Ae o le oti faalua, le aveeseina tumau mai le Atua, e mafai lava ona alofia (tagai Alema 12:32–36).
Ua soona alu ifo le tasi faitaulaga i lea ala: ua iloa atu ia te ia, ona ui ane lea o ia i le tasi itu ala. Ua faapea foi le sa Levi, ua oo i lea mea, ua alu ane ma matamata ai; ona ui ane foi lea o ia i le tasi itu ala.
Ua soona alu ifo. O le taunuu o le faitaulaga Iutaia sa “soona alu ifo,” e le o se faaiuga o se suesuega fuafuaina. O lona i ai iina e le o se fuafuaga sa faia e se tasi.
Le tasi faitaulaga … ua faapea foi le sa Levi. Sa vaaia e uluai tagata faamatala Kerisiano le faitaulaga o se faailoga o le tulafono a Mose. O le faafitauli i o latou mafaufau, e le faapea o i latou o i ai le perisitua o le Feagaiga Tuai e mumusu e fesoasoani i le tagata ua mafatia, ae ona o le tulafono a Mose e le o i ai le malosi e faasaoina ai o ia. O le mea moni, o le tulafono a Mose ua na o se faatusa ma se ata o le Togiola o le a oo mai, ae le o lona aoga atoatoa (tagai Mosaea 3:15–17).
Sa vaaia le sa Levi o se sui o perofeta o le Feagaiga Tuai, o a latou upu lea na afio mai le Alii e faataunuu (tagai Mataio 5:17; 3 Nifae 15:2–5). O se vaega maualalo o faitaulaga, o sa Levi latou te faia feau i totonu o le malumalu. Ae talu ai o lenei sa Levi sa toeitiiti lava oo mai e fesoasoani; sa ia “alu ane” ma matamata. Atonu sa manao o ia e fesoasoani, ae masalo sa ia vaaia o ia o se tagata maualalo e ono tuuina atu se fesoasoani; sa le i ai foi ia te ia le malosi e faasaoina ai le tagata a oti.
A’o le tasi Samaria ua alu lana malaga, ua oo atu i le mea o i ai o ia, ua iloa o ia, ona mutimutivale lea o lona alofa; ua alu atu ua nonoa i ona manua, ua liligi foi i ai le suauu ma le uaina
Tagata Samaria. Sa auau faatasi uluai tusitala Kerisiano i le vaai ai lea i le Samaria o se e fai ma sui o Keriso. Sa faapea mai Chrysostom, o le Samaria o se tulaga e faapei o Keriso aua “o se Samaria e le sau mai Iutaia, e pei o Keriso e le mai i lenei lalolagi.”
O i latou sa maimoa ia Iesu i Ierusalema atonu sa latou matauina iina le faatusa a le Faaola ia te Ia lava. O nisi o le au Iutaia i Ierusalema sa teena Iesu ma le tau faaleaga, “E le ua tonu ea la matou upu, o le Samaria oe?”(Ioane 8:48). Talu ai o Nasareta o loo i le isi itu o le vanu i matu o Samaria, o nei vaega e lua e ono faigofie ona tuufaatasia. E pei lava ona vaai ia Samaria o se tulaga sili ona maualalo i tulaga uma faaletagata, ua faapea foi ona valoia le Mesia o le a “inosia ma tuulafoaiina o ia e tagata” ma ua le “manatuaina o ia” (tagai Isaia 53:3).
Ua alu atu lana malaga. E foliga mai o le Samaria (fai ma sui o le Keriso) o loo vaai ma le faamoemoe i tagata o loo manaomia le fesoasoani. E le o tauina mai i le tusi sa ia taunuu atu i se tulaga faafuasei. Sa taua e Origen sa “ia malaga atu ma le faamoemoe e faasaoina ma tausia le tagata o le a oti.” Sa afio mai le Faaola ma le suauu ma fusi ma le faamoemoega “e aumai le togiola i le lalolagi” (3 Nifae 9:21).
Mutimutivale. O loo talanoa lenei upu taua i le alofa mama o Keriso. O loo faapea mai le upu Eperu sa lagona e le Samaria le alofa mutimutivale loloto. O lenei upu o loo faaaogaina i le Feagaiga Fou pe a manaomia e tusitala ona faamatala uiga ootia o le alofa o le Atua. O loo faaalia faalauaitele i faataoto o le auauna le loto alofa, lea na “mutimutivale ai le alofa” (Mataio 18:27) o le Alii [fai ma sui o le Atua], ma le atalii faamaumau oa, lea ina ua vaai atu le tama (lea foi ua toe avea ma sui o le Atua) i le toe foi mai o lona atalii, ona “mutimutivale lea o lona alofa, ua momoe atu ia, ua fusi ia te ia, ma sogi atu ia te ia” (Luka 15:20). E faapea foi, o le Samaria ua fai ma sui o le Keriso agalelei, sa tigaina ina ia “faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu” (Alema 7:12).
Nonoa i ona manua. O nisi o uluai Kerisiano sa fai mai o fusi ua faatusa lea i le alofa, faatuatua, ma le faamoemoe, “ua fusia ai malosiaga o le faaolataga e faavavau.” O nisi ua latou vaai i fusi o ni aoaoga a Keriso, lea ua fusia ai i tatou i le amiotonu. E mafai ona faapea mai le Au Paia o Aso e Gata Ai, o le tagata faasaoina ua fusia i le Alii e ala i feagaiga (tagai MFF 35:24; 43:9).
Suauu. E matua malu lava le suauu olive. E ui o le toatele o uluai tusitala Kerisiano sa vaai iinei o se faailoga o upu faamafanafana a Keriso, ae sa vaai Chrysostom i lenei mea o se “faauuga paia”—lea e mafai ona faatusa i le tele o sauniga o le perisitua, le faamanuiaina o e mamai (tagai Iakopo 5:14), le meaalofa o le Agaga Paia (e masani ona faatusaina i le suauu olive), po o le faauuina o se tupu po o se tupu tamaitai.
Uaina. Sa sasaaina foi e le Samaria le uaina i luga o manua mo le faamamaina. Sa vaaia e tusitala Kerisiano lata mai i lenei uaina o le upu a le Atua—o se mea e faamama ma e tiga—ae o le faaliliuina e le au uluai Kerisiano ua fesootai le uaina i le toto o Keriso, ua faatusa lea i le faamanatuga (tagai Mataio 26:27–29; 3 Nifae 18:8–11). O lenei uaina, le toto togiola, e fufulueseina agasala ma faamamaina le agaga, faatagaina ai le Agaga o le Atua e faatasi ma i tatou. I le faaopoopo i ai ma le tuuina atu o le fesoasoani faaletino, o se Samaria lelei moni na te faatinoina foi mataupu faavae ma sauniga o le faaolataga o le talalelei. O le uaina togiola e mafai ona tiga muamua, ae o lona aoga o le a aumaia ai le faamaloloina filemu.
ua faatietie ia te ia i lana lava manu, ma taitai ia te ia i le fale e tali ai malo, ma tausi ia te ia.
Ua faatietie ia te ia i lana lava manu. O Keriso, i le faataunuuina o valoaga, ua tauaveina o tatou faaletonu (tagai Isaia 53:4; Alema 7:11). O le manu a le Samaria sa manatu e faatusa i le tino o Keriso. I le tuuina i luga o lana lava manu ua faapea ona talitonu ai i le i ai o le Atua i le tino, sa tauaveina a tatou agasala, ma tigaina mo i tatou.
Fale talimalo. I uluai Kerisiano o lenei mea ua saunia ma faatusa o le Ekalesia. O se “fale talimalo” o se “fale mo le lautele e tatala i tagata uma.” O se nofoaga malu faalauaitele e faatusa i le Ekalesia a Keriso i le tele o ala. O se fale talimalo i tafa ala e le o se taunuuga faalelagi ae o se fesoasoani manaomia e fesoasoani ai i e faimalaga ina ia taunuu atu ai i o latou aiga faavavau.
Tausi ia te ia. Sa faatasi le Samaria ma le tagata ua manua ma tausi ia te ia i le po muamua. Sa ia le tuuina atu faavave le tagata manua i le pule o le fale talimalo ae sa ia faatasi ma ia i itula faigata. E pei ona taua e Origen, sa tausia e Iesu le tagata manua “e le gata i taimi o le aso, ae faapea foi i le po. Sa ia tuuina atu lana tausiga atoa ma gaoioiga mo ia.”
O le taeao o le a alu ia, ona to ae lea o tenari e lua, ma avatu i le matai e ona le fale, ua fai atu ia te ia, Ina e tausi ia te ia; ai se mea e te toe faatau ai, ou te taui atu ia te oe pe a ou toe sau.
O le taeao. Sa vaaia e uluai faamatala upu i i le manatu o Iesu o le a toe tu i le taeao o le Toetu. Sa auauna atu Keriso i le tino i ona soo mo se taimi puupuu. Ina ua maea Lona toe Afio ae, sa Ia tuua le tagata malaga ina ia tausia e le Ekalesia.
O le matai. I lea tulaga, sa vaaia ai e uluai faamatala upu le matai, po o le pule o le fale talimalo, o Paulo po o isi Aposetolo ma e sui tulaga ia i latou. Afai o le fale talimalo e faatusa lea i le Ekalesia i lona lautele, ae peitai ane, o le pule ma lana au faigaluega e mafai ona avea ma sui o taitai ma tagata galulue uma o le Ekalesia o e ua faamaonia mai e le Alii ina ia faafailele ma tausia soo se agaga ua laveaiina, ma ua sailia se faamalologa.
Pe a ou toe sau. O le tagata ua fai ma sui o Keriso ua ia folafola mai faalauaitele e toe sau, o se faatusatusaga i le saunia mo le Afio Mai Faalua o Keriso. O le upu Eperu ua faaliliuina “o le toe sau” ua na o le tasi se isi taimi ua faaalia mai ai i le Feagaiga Fou, i le Luka 19:15, o loo faatusa i le faataoto i le Alii o le a toe afio mai e faamasino i mea na faia e tagata i tupe sa tuuina atu ia i latou. O lenei sootaga ua faapea ona faamalosia ai lenei faatusatusaga i le Afio Mai Faalua o le Alii.
Toe totogi po o le taui. I le faaiuga, na folafola atu ai i le pule o le fale talimalo o ana tupe faaalu uma o le a toe maua: “Ou te taui atu ia te oe i soo se mea e te faatau ai mo ia.” E masalo e sili atu i lo se isi mea i lenei tala, o lenei folafolaga—i le tulaga moni ua tuuina atu i le pule o le fale talimalo le avanoa e faaaluina ai soo se aofaiga o se tupe e aunoa ma ni puipuiga—ua faapopoleina ai le au faamatala o ona po nei o e ua malamalama i lenei tala o se faafoliga i se mea moni e tupu i lenei olaga. A’o ai i sona mafaufau sao na te faia ai se tuutuuga tatala faapea i se pule o se fale talimalo e le masani ai? Ae pe a malamalama i le tala i lona faatusatusaga, o lenei folafolaga e talafeagai, ona o le Samaria (Keriso) ma lona pule o le fale talimalo ua uma ona iloa ma faatuatuaina e le tasi le isi a’o le’i tuuina mai lenei folafolaga.
O se Tulafono e Faavavau
Talu ai ona o le faigata ona tatou malamalama i Lona natura e le gata ma le mamalu atoatoa, ua fetalai mai ai le Atua ia i tatou i faatusa ma faataoto (tagai Mose 5:7). O faatusa e ta’a’ina atu ai o tatou mafaufau papa’u i mea moni paia o loo natia i totonu o le talalelei e le mafaamatalaina pe faatusatusaina a Keriso, ma o le faatusatusaga malamalama o le faataoto i le Samaria agalelei ua faaopoopo ai se vaaiga e faavavau i lona autu moni o le avea ma tuaoi lelei.
I ana faataoto, sa aoao ai e Iesu mea taua o le ata o le faaolataga a le Tama. Ma o se faatusa o loo aoao mai ai lenei fuafuaga, o le Samaria agalelei ua aumaia ai a tatou galuega o le alofa faatuaoi iinei i le lalolagi i se tulaga e faavavau, i le iloa ai po o fea sa tatou o mai ai, pe faapefea ona tatou pauu atu i lenei tulaga faaletino, ma pe faapefea ona avea le puipuia o sauniga o le talalelei ma le alofa faamaloloina o le Faaola folafolaina ma aoaoga o Lana Ekalesia e faasaoina ai i tatou mai le tulaga o loo ua tatou i ai nei, a’o tatou auauna ma ola agavaa ai mo le taui i Lona Afio Mai Faalua.
O le vaai ai i le faataoto i lenei malamalama e valaaulia ai e faitau e faailoa atu ma le agaga maualuga tagata uma o loo i le tala. I se tasi tulaga, e mafai e tagata ona vaai ifo ia i latou lava o Samaria agalelei, i le avea ai ma ni tagata fesoasoani faaletino pei o ni faaola i luga o le Mauga o Siona, i le fesoasoani atu i tulaga taua uma i le faasaoina mai o agaga leiloloa. Sa tau atu e Iesu i le Faresaio, “Ina alu ia, ma ia e faapea ona fai” (Luka 10:37). I le faia e pei o le Samaria, ua tatou faatasi ai ma Ia i le fesoasoani e faataunuuina le aumaia o le faaolataga ma le ola e faavavau o tagata.
O loo mananao foi le au soo e mafaufau o i latou o ni pule i fale talimalo ua faatonuina e Iesu Keriso e faafaigofie le toe manuia faaleagaga mo se taimi umi o tagata malaga manunua.
Ia po o le vaai foi o le au faitau ia i latou lava o ni tagata malaga. A’o amata le faataoto, ia feofoofoai tagata uma i le alofa ma fefaailoaai i latou ma le tagata malaga vaivai. Tatou te manaomia uma le laveaiina. A’o faaiu le tala, o tagata malaga uma e mafai ona lagona le saogalemu, i le aoao ai, e tusa ai ma faaliliuga, o Le na “fai ma tagata la te tuaoi o le tagata na maua e tagata faomea” (Luka 10:36) e leai lava se isi nai lo le Keriso agalelei. O Ia o le faataitaiga sili o se Tuaoi.
O lenei mea ua taliina ai le fesili lona lua a le loia, “O ai foi le tagata ma te tuaoi?” I le taimi lava lea e tasi, ua taliina ai le fesili muamua, “Se a se mea ou te faia ina ia ou maua ai le ola e faavavau?” O le ola e faavavau e maua i le alofa i le Atua “ma lou loto atoa, ma lou agaga atoa, ma lou malosi atoa, ma lou manatu atoa” (Luka 10:27) faatasi ai ma le alofa i Lona Alo (lou tuaoi) e pei o oe lava. Ma e faia lea mea i lou alu atu ma faia e pei ona faia e le Faaola, i le alofa ai i o tatou uso a tagata, aua a tatou auauna ia i latou ua na ona tatou auauna ai i lo tatou Atua (tagai Mosaea 2:17).
Faatusa mai le faataoto o le samaria agalelei
|
Faailoga |
O se Faaliliuga Muamua Kerisiano |
|
Samaria Agalelei |
Iesu Keriso |
|
Tagata Mafatia |
O le Tagata ua manua i agasala |
|
Ierusalema |
Parataiso |
|
Ieriko |
Lalolagi |
|
Faitaulaga |
Tulafono a Mose |
|
Sa Levi |
Perofeta |
|
Manu |
Tino o Keriso |
|
O le fale talimalo |
Ekalesia |
|
Pule o le fale talimalo |
Ao o le Ekalesia |