Taimi o Fetufaaiga

O Le a Ou Mulimuli ia te Ia i le Faatuatua

Saunia e Elizabeth Ricks

“Ua matou talitonu, ma ua matou iloa o oe o le Keriso, o le Alo o le Atua soifua” (Ioane 6:69).

Pe ua e taalo i le taaloga o le mulimuli i le taitai? E faigofie tulafono: filifili se taitai ona mulimuli lea ia te ia.

O le faamoemoega o lo tatou olaga i luga o le fogaeleele o le mulimuli i lo tatou taitai o Iesu Keriso. Ina ua vaai Iesu ia Peteru ma Aneterea o fagogota, sa Ia fetalai atu ia i laua, “Mulimuli mai ia te au.” Sa tuua e Peteru ma Aneterea a laua upega ma mulimuli atu ia te Ia. (Tagai Mataio 4:18–20.)

E pei ona Ia faia ia Peteru ma Aneterea, ua valaauina foi i tatou taitoatasi e Iesu e mulimuli ia te Ia (tagai MFF 100:2). Atonu tatou te le o savavali tonu i le mea sa Ia femaliuai ai, ae e mafai ona tatou faia mea sa Ia faia. E mafai ona tatou faitauina tusitusiga paia. E mafai ona tatou tatalo i lo tatou Tama Faalelagi. E mafai ona papatisoina i tatou.

Ina ua maea ona mulimuli Peteru ia Iesu, sa folafola mai e Peteru, “Ua matou talitonu ma ua matou iloa o oe o le Keriso, o le Alo o le Atua soifua” (Ioane 6:69). Pe a tatou mulimuli ia Iesu Keriso i le faatuatua, e mafai ona tatou maua le molimau lava lea e tasi.

O le a faateleina lo tatou faatuatua ia Iesu Keriso pe a tele atu lo tatou malamalama e uiga ia te Ia. Ma o le tele o lo tatou iloa e uiga ia te Ia, o le faigofie foi lea ona tatou mulimuli ia te Ia i le faatuatua.

Gaoioiga

I le faia o se galuega suisui felavasai faataitai ona vali faailoga taitasi i le itulau U4. I le suiina o le faataitaiga, mulimuli i le faatulagaga agai i luga o le ie lanutasi, e pei o se musolini. Faaaoga ni filo uumi i lanu ua e filifilia mo faailoga taitasi. Fesili i se tagata matua e faasino atu ia te oe pe faapefea ona fai se galuega suisui felavasai i luga o faailoga taitasi (tagai i le ata.) Faaali atu lau faataitaiga i se mea e te vaai pea i ai.

Manatua: O lenei gaoioiga e mafai ona kopiina, tusi lolomi, pe fai mai se kopi o lenei gaoioiga mai le Initoneti i le www.lds.org. Mo le Igilisi, kiliki i le “Gospel Library.” Mo isi gagana, kiliki i luga o le faafanua o le lalolagi.

Manatu mo Taimi o Fetufaaiga

1. 1. Faaali igoa o tamaiti faapea foi ma igoa o nisi o perofeta anamua i luga o ni fasipepa. Fesili po o le a se mea e tutusa ai nei igoa. Faitau faatasi le Aperaamo 3:22–24, ma faamalamalama atu sa tatou nonofo faatasi uma ma le Tama Faalelagi i le muai olaga. Tau atu i tamaiti o tusitusiga paia ua tatou iloa ai ni mea laiti o mea sa tutupu iina. Fesili i tamaiti e sue po o ai fanau uma faaleagaga a le Atua sa muamua fanau mai i le sue lea i le MFF 93:21. Ia taina e le ta piano le vaega muamua o le pese, sosoo lea ma le vaega lua e uiga i le muai olaga. Ia faaopoopo faatasi vaega seia iu ina mateia e tamaiti le pese. A mateia e tamaiti, ia usu le pese atoa, ma faasino laina taitasi o loo faamatala ai e uiga i lo tatou olaga faatasi ma le Tama oi le Lagi ae tatou te lei o mai i lenei lalolagi. Faamalamalama atu sa avea i tatou uma o ni uso ma tuafafine i le muai olaga. Tatou te taua le tasi o se “uso” po o se “tuafafine” ona o na faalagiga e faaalia ai lo tatou va feagai ai faaleagaga o le tasi i le isi. Usu le pese “O Au o se Atalii o le Atua.”

2. 2. Faaali atu i tamaiti nisi o faataitaiga o ata fuafuaina. Mo se faataitaiga, o ni fua o kuka, o se ata mo le faia o se fale, po o ni faatonuga mo le faapipiina o se mea taalo. Faamalamalama atu pe a tatou tuufaatasia se mea—e pei o se fale, o se faaputuga kuki, po o se mea taalo—e sili ona lelei le iloa po o le a le mea o le a tupu mai i le iuga. Tatou te manaomia se ata faataatia. Ae tatou te le’i o mai i le lalolagi, sa faailoa mai e le Tama oi le Lagi lana ata faataatia. Ua taua o le ata o le faaolataga. Valaaulia faifeautalai faamisiona po o ni faifeau faatoa maea mai misiona ua faatagaina e le epikopo po o le peresitene o le paranesi e aoao atu le ata o le faaolataga, mai le tusi Talai La’u Talalelei (i. 47–59).