O Se Suiga i le Taimi Mulimuli
Ia Novema 2001 na faailoa mai ai e suesuega a fomai ua maua lo’u uso laititi i se ituaiga gasegase o le kanesa. Ua 45 tausaga o lona soifua ma o se tina o se fanau tama e toafa, o le toatasi o loo auauna i se misiona i Potukale. Sa faavave ona tatalo ma anapogi lana uarota ma le siteki i Arisona, faapea foi ma lona aiga mo ia. A’o le’i oo i le faaiuga o Me, na manumalo le kanesa i le taua, ma sa oo ina koma o ia. Ina ua maea ona matou maua faamanuiaga faaleperisitua ma le tatalo faatauanau, sa matou filifili loa e aveese masini faaola mai ia te ia. Sa faamautinoa mai e fomai ia i matou o le a vave ona maliu o ia. Ae i le valu aso mulimuli ane, sa tumau pea lona tulaga i le mea na i ai, ma na avea ai aso taitasi ma aso uumi ma le tiga.
O nai masina na tuanai ai sa avea o se taimi sa toe tomanatu ai lo matou aiga. Matou te alolofa i lo’u uso, ma e ui ua matou malamalama i le ata o le faaolataga, ae sa faigata i nisi taimi ona maua le faatuatua i le Alii o le a lelei mea uma. Ae ui i lea, sa matou lagona ana faapea e lava lo matou faatuatua, e faamaloloina lo’u uso. O lea sa matou fesiligia ai le malosi o lenei faatuatua. Sa matou iloa e faafofoga ma tali mai le Tama oi le Lagi i tatalo, ae sa matou le fiafia i Lana tali mai ma ua le mafai ai ona matou lagona le filemu.
O le matou konafesi faalesiteki i Iuta sa fuafuaina mo le aso 2 o Iuni, lea e asiasi mai ai le Fitugafulu Eria. Talu ai ona o le toatele o tagata i le siteki, sa vaeluaina ai le konafesi a le siteki i ni sauniga se lua. O le ma fanau tama e toatolu o e sa auai i le uarota a le au nofofua a le siteki, sa faatulagaina e auai i le sauniga o le taeao. O isi tagata uma o le aiga e auai atu i le sauniga o le aoauli. Sa ma filifili ma lo’u toalua o le auai faatasi o se aiga i le sauniga o le taeao o se itu lelei lea. E lei leva ona ma faia lea faaiuga, ae valaaulia i maua ma lo’u toalua e faia tatalo mo le sauniga o le aoauli. O lea sa toe suia ai a matou fuafuaga.
I le sauniga o le konafesi i le afiafi o le Aso Toonai, sa matou matauina ai se suiga. Na tofia mulimuli ane Elder L. Whitney Clayton o le Au Fitugafulu i la matou konafesi, e sui tulaga i le Fitugafulu Eria.
I le aoauli o le Aso Sa, sa amata le saunoaga a Elder Clayton i lona faapea mai, ua musuia o ia ina ia suia atoa lana lauga. Na tau atu ia te ia e le Agaga e manaomia lona lauga atu i se aiga o loo auai i lea aso. Sa vave ona ou iloa o le a ia lauga mai i lo matou aiga. Sa ia faamatala e uiga i se peresitene o se siteki sa maua lona toalua i le kanesa. Ina ua maea le tele o tatalo ma anapogi a tagata o lona aiga, uo, ma tagata o lana siteki, sa toe faaatoatoaina lona malosi.
Sa faapea ona talanoa mai Elder Clayton i se isi peresitene o se siteki, o le sa maliu lona toalua i le kanesa i le taimi o lana auaunaga o se peresitene o le siteki. Sa tuua e ia se fanau laiti i lana vaaiga. E toatele foi tagata sa anapopogi ma tatalo ina ia toe faafoisia lona malosi. O lenei tala sa patino le ootia ai o Elder Clayton ona o lenei tina na maliu, na pau lea o le uso o lona toalua.
Sa faaauau ona faamatala e Elder Clayton po o le a lava le tele o le faagaoioia o le faatuatua i taimi faapenei, o nisi taimi o le tali o le leai. Ona ia faitauina lea o se mau ua avea nei ma se tasi o mau fiafia a lo matou aiga, Tanielu 3:17–18:
“Afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule le tupu.
“Ae a leai, ia e silafia e oe le tupu e, matou te le auauna i ou atua; o le tupu auro foi ua e faatuina, matou te le ifo i ai” (faaopoopo le faamamafa).
E lei saunoa mai Elder Clayton ia i matou i se isi mataupu faavae fou i lena aoauli. Ae o se vavega na tupu na matou maofa tele ai. Sa faamautinoa mai e le Alii lo matou auai i le sauniga o le aoauli i le musuia lea o se tasi e fai mai ia i maua e tatalo. Sa Ia faatulagaina foi se tasi o ana auauna o le sa i ai se aafiaga e pei o lea sa matou i ai, e lauga mai ia i matou. Ma le mea mulimuli, sa Ia tuuina mai ia i matou se isi e atamai ma usiusitai o le sa soifua i lona olaga i se auala e mafai ona ia faalogo i le Agaga ma tali atu e tusa ai. Sa oo o matou agaga i se tulaga e le mafai ona faamatalaina ona o lena aafiaga.
I le aso na sosoo ai sa o matou maua ai le valaau e tau mai ai ia i matou ua maliu lo’u uso. E ui i lo matou faanoanoa ae, o se agaga matagofie o le mafanafana sa i ai i lo matou aiga a’o matou tatalo ai mo lona aiga—i lenei taimi ua i ai ia i matou le mautinoa atoa ua faia le finagalo o le Alii—ma faafetaia o Ia mo Lana tali matagofie ia matou tatalo.