Sa Ou Manatuaina Se Akerise
Sa ou fanau i Egelani i le 1942 i se aiga lelei o tina, tama, ma le tuafafine. Ina ua fitu ou tausaga, sa faamanuiaina i matou i se isi faaopoopoga i lo matou aiga—o se pepe tama. Sa alofa lo’u tina i le Faaola ae e le o ia o se tagata o se ekalesia faapitoa. E auai atu o ia i se ekalesia e sili ona latalata ane ma faamalosiau mai ia i maua ma lo’u tuafafine matou te o i le lotu. I lea tulaga, sa ou aoaoina ai le tele o mea e uiga ia Iesu Keriso ma faamoemoe e maua se ekalesia e faamalosia ai lo’u faatuatua ia te Ia.
I se tasi aso sa oo mai ai i totonu o le matou fale se tusi ata tele e taua o le Buffalo Bill’s Wild West Annual. Ou te le iloa le mea na aumai ai. I lea taimi sa ou manatu masalo sa aumai e se tasi o a’u uo ae ua galo ona toe ave i le fale. O loo i ai ata o tala faamatala a Pafalo Pili ma Pili le Tamaitiiti, o mea tonu lava ia e manaomia e se tamaititi e fia avea ma se kaupoe. O loo faamatala mai ai se tala o ata o tagata sa sauaina o e sa tuliesea mai se aai matagofie e ni tagata leaga solitulafono ma o ese faamalosia ai mo le selau ma selau o maila” ma onosaia tiga e le uma ae latou te lei faatuina se nofoaga fou i le togavao i sisifo. O tamai ata taitasi o loo faamatala mai ai se tala maoae o puapuaga ma le faatuatua, o loo i ai foi ni ata o se vavega e aafia ai ni se akerise na ’aia meatoto ma ni gogosina na ’aia se akerise.
O lo’u faitauina faafia o le tala na faatoa ou iloa ai o ia tagata mafatia na sauaina, o tagata o se ekalesia. Sa faapea ona oo malie mai ia te au o lenei ekalesia o le ekalesia lea o loo ou sueina. Sa ou manao ou te auai i lena ekalesia. Ae paga lea, ua tuuina mai ai ia te au se faafitauli. O le ata mulimuli i le tala o loo faamatala ai le Aai o Sate Leki, Iuta. Mai se isi faamatalaga sa mafai ai ona ou iloa o Iuta e i le Iunaite Setete o Amerika. Talu ai e le’i i ai sou faamoemoe ou te malaga atu i Iuta mai Egelani, o lea na tuua ai fuafuaga mo le auai ai i le Ekalesia. Ou te lei iloa e ono faatuina le Ekalesia i se isi mea e ese mai i le Iunaite Setete.
Sa taatia pea lena fuafuaga seia oo i le 11 tausaga mulimuli ane. I lena taimi na malaga atu ai lo’u aiga i Ausetalia ma nonofo ai i Sini. O iina sa amata ai ona suesue e lo’u uso se lotu fou. Sa ia aumaia i lo matou aiga ni tamaitusi, sa ou fiafia i ai ma sa ia faapea mai o le a ia fai atu i faifeautalai e asiasi mai. Sa ou malie i ai, ma le mafaufau o le a asia au e se soa o ni toeaiina matutua maualuluga. Sa ou matua ofo ina ua asiasi mai ni alii talavou e talitutusa lo matou matutua ma aoao a’u i aoaoga mausali o le ata o le faaolataga. Sa ou fia iloa, ma ou malie ai e faia se vaega o lesona.
Sa ou faalogo i faifeautalai ae le’i i ai se manatu ou te auai i le Ekalesia, ae maise ina ua ou aoao e uiga i le sefuluai. Ae peitai i se tasi aso, sa faamatala mai ai e se tasi o faifeautalai ia nisi o paionia o e sa faamalosia e faia se savaliga umi i se nofoaga e taua o le Aai o Sate Leki. Sa amata ona ou faalogo ma le totoa ma amata ona fai [au] fesili. Po o le Ekalesia lea e i ai se akerise ma gogosina? Ina ua ia taua Polika Iaga, sa vave ona ou iloaina le igoa ma iloa ai ua ou taunuu i le magaala o lo’u olaga. Afai ou te auai i se ekalesia, o lenei lava.
O le faafitauli i le sefuluai na foia ina ua ou aoao e uiga i le Upu o le Poto. Sa ou faaopoopoina ma ou iloa ai sa ou faaaluina le 10 pasene o au tupe maua i sikaleti ma le ava malosi. O le mea lea i le totogiina o le sefuluai o le a le toe oo ai se tulaga leaga i mea tau tupe, ma o le a faaaoga foi ia tupe i ni mafuaaga lelei nai lo le faatumuina ai o ou māmā i le ta uliuli ma oona ai o’u totoga.
I le taimi lea, sa tuuina atu ai foi e lo’u uso ia tamaitusi i lo’u tina. Sa malie o ia e faitau i ai i luga o le nofoa afi a’o alu atu i le galuega i lena aso. Ina ua foi mai o ia i le afiafi, sa matua liliu atoa o ia i le Ekalesia. Sa le fiafia o ia ina ua faalogo e tatau ona fai ni ana lesona a faifeautalai a’o lei papatiso!
O lea sa matou auai uma ai i le Ekalesia—sa muamua lo’u uso, sosoo ai ma a’u i le vaiaso na sosoo ai, ona papatiso ai lea ma faamauina lo’u tina i le isi vaiaso na sosoo ai. Sa teena pea e lo’u tama le Talalelei mo le 21 tausaga ma na auai mulimuli ane ai i le 1985. Sa faamauina i matou uma i le malumalu i Sini i le tausaga mulimuli ane.
Sa ou oo atu i le Aai o Sate Leki i le tele o taimi ma asiasi atu i nofoaga iloga o le talafaasolopito o le Ekalesia i Palmyra, Katelani, ma Navu. I nofoaga uma ou te alu i ai, e faamanatu mai pea le tala i le tusi ata a Pafalo Pili ma e le muta lava le faafetai i le Alii mo le tuuina mai i lo’u olaga o lea tusi a’o avea ai ma se tamaitiiti e 10 tausaga.